IBBAIBBELE LILAKONZYA KUBACINCA BANTU

“Ndakali silunya”

Akaluulwa aba esa Leinonen

MWAKA WAKUZYALWA: 1960

KUCISI NKWAZWA: FINLAND

MBWAAKABEDE KAINDI: MWIIMBI WANYIMBO ZYA HEAVY-METAL

MBONDAKABEDE KAINDI: Ndakakomenena mudolopo lya Turku, ilijisi cito camato kwalo bantu nkobatajisi mali manji. Bataata mbebakali kuzunda mucisobano cakulwana amfwaindi, alimwi mebo amusyoonto wangu twakali kuciyandisisya cisobano cakulwana amfwaindi. Nindakacili kucikolo ndakali kuyungwa kulwana alimwi tiindakali kuwayawaya kufwusa mfwaindi. Nindakali mukubusi, ndakatalika kuyanzana akabunga kabantu batamvwi calo cakandipa kuti ndiindile kuyandisya kulwana. Ndakatalika kuswiilila nyimbo zya heavy-metal alimwi ndakatalika kuyeeya kuba mwiimbi wanyimbo zya rock uudumide kapati.

Ndakaula ngoma akupanga nkamu yabaimbi alimwi tiilyakalampa, ndakaba mwiimbi uucibwene munkamu yesu. Cakali kundikkomanisya kusotauka-sotauka ndanooimba acibumbili. Akaambo kakuti nkamu yesu yakali kwiimba canguzu, mukuya kwaciindi twakaba ampuwo. Twakatalika kwiimbila baantu banji akulekkooda nyimbo zisyoonto, alimwi nyimbo nzyotwakalekkooda kumamanino bakazikkomanina kapati bantu. Kumamanino aamwaka wa 1980, twakaunka ku United States kuyaabusumpula nkamu yesu yabaimbi. Twakaimba asyoonto mu New York alimwi amu Los Angeles, mpoonya twakabonana abamwi basyaazibwene munyimbo katutanapiluka ku Finland.

Nokuba kuti ndakalikkomene kuba munkamu yabaimbi, ndakali kuyanda kuba abuumi bulaampindu ncobeni. Ndakatyompwa akaambo kamuuya wakuzundana alimwi amuuya walunya ngobakajisi baimbi alimwi tiindakali kubukkomanina bukkale bwangu bubyaabi. Ndakalimvwa kuti ndakali muntu mubyaabi, alimwi ndakali kuyoowa kupya mumulilo wahelo. Ndakasoleka kuyandaula bwiinguzi mumabbuku oonse aabukombi alimwi ndakapaila canguzu kuti Leza andigwasye, nokuba kuti ndakali kulimvwa mbuli kuti tandikonzyi kumukkomanisya.

IBBAIBBELE MBOLYAKANDICINCA: Kutegwa kandijana mali aakuligwasyilizya, ndakali kubeleka kupositi ofesi yakali kubusena nkondakali kukkala. Bumwi buzuba, ndakazoozyiba kuti umwi ngotwakali kubelekalimwi wakali Kamboni wa Jehova. Ndakamubuzya mibuzyo minji. Bwiinguzi bwakwe bwamu Magwalo, ibulimvwisya bwakandikkomanisya kapati, aboobo ndakazumina kwiiya Bbaibbele anguwe. Nondakazumanana kwiiya kwansondo zili mbozibede, nkamu yesu yabaimbi yakapegwa  mulimo mubotu wakulekkooda nyimbo akuba abulangizi bwakugwisya alubbamu yanyimbo mucisi ca United States. Ndakalimvwa kuti eeci cakali coolwe ncondatakali kukonzya kujana alimwi mubuumi bwangu.

Ndakaambila Kamboni iwakali kundiyiisya Bbaibbele kuti ndakali kuyanda kugwisya alubbamu yanyimbo yomwe buyo alimwi akuti ndaakumana, nendiyoobikkila maano kubelesya njiisyo zyamu Bbaibbele mubuumi bwangu. Taakwe naakaamba nzyaakali kuyeeya; wakaile kundaambila kubala majwi aa Jesu aalembedwe mulugwalo lwa Matayo 6:24. Kapango aaka kaamba kuti: “Taakwe uukonzya kubelekela basimalelo bobilo.” Ndakagambwa nondakazyiba bupanduluzi bwamajwi aa Jesu aaya. Pele nokwakainda mazuba masyoonto, sikundiyiisya Bbaibbele nguwakagambwa! Ndakamwaambila kuti, akaambo kakuti ndiyanda kutobela Jesu, ndacileka kwiimba!

Ibbaibbele lyakali mbuli cimbonimboni cakanditondezya zindakali kulubizya. (Jakobo 1:22-25) Ndakabona kuti ndakali silunya: Ndakali kulisumpula, alimwi ndakajisi makanze aatamani. Ndakali kubelesya majwi mabyaabi, ndakali sinkondo, ndakali kufweba alimwi ndakali kuciindizya kunywa bukoko. Nindakazyiba kuti bukkale bwangu tiibwakali kweendelana anjiisyo zyamu Bbaibbele, ndakatyompwa kapati. Nokuba boobo, ndakalilibambilide kucinca.—Baefeso 4:22-24.

Kwaambisya kumatalikilo, ndakali kulimvwa kuusa kapati akaambo kazyintu zibi nzyondakacita musyule. Pele Kamboni iwakali kundiyiisya Bbaibbele wakandigwasya kapati. Wakanditondezya ncolyaamba Bbaibbele mulugwalo lwa Isaya 1:18: “Nekuba kuti zibi zyanu zyasalala pyu, ziyootuba buu mbuli lukobo.” Kapango aaka alimwi atupango tumbi twamu Bbaibbele twakandipa kusinizya kuti Taateesu wakujulu ngusiluse alimwi ulayanda kubagwasya aabo beempwa kuzibi zyabo.

Nindakatalika kumuzyiba alimwi akumuyanda Jehova, ndakayanda kwaaba buumi bwangu kulinguwe. (Intembauzyo 40:8) Ndakabbapatizyigwa mu 1992 amuswaangano wamasi wa Bakamboni ba Jehova mudolopo lya St. Petersburg, mucisi ca Russia.

MBONDAGWASYIGWA: Ndaba abalongwe babotu banji akati kabakombi ba Jehova. Ciindi aciindi, tulakkala antoomwe kutegwa twiimbe nyimbo zili kabotu alimwi akulikkomanisya acipego eeci icizwa kuli Leza. (Jakobo 1:17) Cilongezyo cilibedelede ncondakajana, nkukwata mukaintu ngondiyandisya kapati, Kristina. Mebo amukaintu wangu, twakainda muzyintu zinji—twakali kukkomana antoomwe, twakali kupenga antoomwe, alimwi ndakali kumwaambila mbondilimvwa.

Nindatakaba Kamboni wa Jehova, nendifwide sunu. Kaindi, lyoonse ndakali kujanika mumapenzi. Lino ndijisi buumi bulaampindu ncobeni, alimwi ndilimvwa kuti zyoonse zili buyo kabotu.

[Cifwanikiso icili apeeji 8]

[Cifwanikiso icili apeeji 8]

[Kulumba]

© Kaj Ewart

[Majwi aakwelelezya sikubala aali apeeji 9]

“Taateesu wakujulu ngusiluse, alimwi ulayanda kubagwasya aabo beempwa kuzibi zyabo”