Ino Nguni Sikuswiilila Mipailo?
Ino Nguni Sikuswiilila Mipailo?
KUTI NAA nkwali sikuswiilila mipailo, nkokuti weelede kuti kali Mulengi. Ino nguni uumbi kunze lyayooyo wakalenga boongo bwamuntu uukonzya kuzyiba ncayeeya muntu? Ino nguni uumbi uukonzya kwiingula mipailo alimwi akubapa lugwasyo ndobayandika bantu? Ambweni mulakonzya kulibuzya kuti, ‘Sena ncamaano kusyoma kuti kuli Mulengi?’
Bantu banji bayeeya kuti kusyoma kuti kuli Mulengi caamba kukazya sayaansi ncoyaamba. Pele kuyeeya kuti kusyoma muli Leza tazyeendelani ancoyaamba sayaansi taali masimpe pe. Amubone twaambo ootu tutobela.
▪ Buvwuntauzi bwakacitwa abasyaazibwene basayaansi bali 1,646 bakumayunivesiti aali 21 aaku United States bakajana kuti akati kabantu botatwe bali boonse omwe buyo nguwakaamba kuti “Tandisyomi muli Leza.”
Bwini mbwakuti bunji bwabasisayaansi balasyoma kuti Leza nkwali.
Bumboni Bwakuti Mulengi Nkwali
Sena tweelede kuzumina kuti Mulengi nkwali kakunyina bumboni? Peepe. Muzeezo wakuti lusyomo lyoonse lwaamba kusyoma kakunyina bumboni tauli wamasimpe pe. Bbaibbele lipandulula kuti lusyomo “mbumboni busalede bwazyintu zini-zini zitanabonwa.” (Bahebulayo 11:1) Mucikozyanyo, tamukonzyi kwaabona mayuwe aawailesi, pele fooni yanu ilatondezya kabotu-kabotu bumboni bwamayuwe aayo aatalibonyi aapa kuti majwi kaalimvwisya; aboobo mulakonzya kuzumina kuti mayuwe nkwaali. Mbubwenya buyo, nokuba kuti tatukonzyi kumubona sikuswiilila mipailo, tulakonzya kulanga bumboni buliko bukonzya kutupa kusyoma kuti nkwali.
Ino nkuli nkotukonzya kujana bumboni butondezya kuti Leza nkwali? Tweelede buyo kulanga zyintu zituzingulukide. Bbaibbele lyaamba kuti: “Iŋanda iili yoonse kuli wakaiyaka, pele ooyo wakayaka zyintu zyoonse ngu Leza.” (Bahebulayo 3:4) Sena mulakazumina kaambo aaka? Ambweni ciindi nomuzinzibala kuyeeya bubambe bwabubumbo, matalikilo aabuumi, naa bupange bwazyintu zyoonse zyaanyika, boongo bwamuntu, mulazyiba kuti kweelede kuti kuli cintu cipona cipati kwiinda muntu. *
Pele zyintu zyamunyika kuli mpozigolela kutuyiisya kujatikizya Leza. Kulanga bumboni bwakuti Leza nkwali kwiinda muzyintu nzyaakalenga cili mbuli kumvwa kuti kuli muntu weenda anze. Mulizyi kuti kuli muntu aanze, pele tamuzyi kuti naa nguni. Kutegwa mumuzyibe, mweelede kujalula mulyango. Tweelede kucita mbubwenya kutegwa tuzyibe Muntu wakalenga zyintu zyoonse.
Bbaibbele ngomulyango waluzyibo kujatikizya Leza. Mwajalula mulyango ooyu akubona businsimi bumwi alimwi ambobuzuzikizyigwa, muyakujana bumboni bwakuti Leza nkwali. * Pele kunze lyaboobo, zibalo izitondezya Leza mbwabeendelezya bantu zitondezya bube bwakuti ngu Sikuswiilila mipailo.
Ino Sikuswiilila Mipailo Uli Buti?
Bbaibbele litwaambila kuti Sikuswiilila mipailo nkwali ncobeni—walo ngomukonzya kuzyiba. Masimpe, ulakonzya kumuswiilila akumumvwisya. Cilakulwaizya kubala kuti: “Webo ooswiilila zikombyo, bantu boonse bayoosika kulinduwe.” (Intembauzyo 65:2) Ulabaswiilila aabo bapaila kulinguwe calusyomo. Alimwi ulijisi zyina. Bbaibbele lyaamba kuti: “Jehova uli kule kuzwa kulibasizibi, pele ulaswiilila cikombyo cabaluleme.”—Tusimpi 15:29.
Jehova kuli mbwalimvwa. Ngu “Leza siluyando” alimwi waambwa kuti ngu “Leza uukkomene.” (2 Bakolinto 13:11; 1 Timoteyo 1:11) Kujatikizya mbwaakalimvwa ciindi bubi nibwakavula kapati munyika, Bbaibbele lyaamba kuti: “Wakapenga mumoyo wakwe.” (Matalikilo 6:5, 6) Kaambo kakuti Leza nguuleta mapenzi kutegwa asunke bantu takali kamasimpe. Bbaibbele lyaamba kuti: “Kacili kule a-Leza kuti acite bubi.” (Jobu 34:10) Pele mulakonzya kulibuzya kuti, ‘Ikuti naa Leza ngo Mulengi singuzuzyoonse, nkaambo nzi ncalekelede kupenga?’
Jehova wakapa bantu coolwe cakulisalila zyakucita, alimwi eeci citugwasya kuzyiba mbwabede Leza. Sena tatulumbi kuti tulakonzya kusala mbotukonzya kupona? Pele cuusisya ncakuti, bantu banji tabacibelesyi kabotu coolwe eeci muciindi caboobo balaliletela mapenzi lwabo beni alimwi akuletela bamwi. Lino ngooyu mubuzyo uuyandika kuyeeyesya kapati wakuti: Ino Leza uyookumana buti kupenga kakunyina kunyonganya coolwe cabantu cakulisalila? Tulaulanga-langa mubuzyo ooyu mucibalo citobela.
[Bupanduluzi buyungizidwe]
^ munc. 8 Kutegwa mujane bumboni bunji bwakuti Leza nkwali, amubone broshuwa yakuti The Origin of Life—Five Questions Worth Asking alimwi abbuku lyakuti Is There a Creator Who Cares About You? oonse akamwaigwa a Bakamboni ba Jehova.
^ munc. 10 Broshuwa yakuti A Book for All People alimwi abbuku lyakuti The Bible—God’s Word or Man’s? alamwaigwa a Bakamboni ba Jehova kutegwa amugwasye kubona bumboni bwakuti Bbaibbele lyakasololelwa a Leza.
[Kabbokesi kali apeeji 5]
Sena Bukombi Bumupa Kudooneka?
Cuusisya ncakuti, bukombi bupa bantu banji kudooneka kuti kuli siluse sikuswiilila mipailo. Zikombelo mbozilinjizya munkondo, bugwebenga, alimwi akuzumizya kupenzya bana capa kuti nobaba bantu bapaila baambe kuti, “Tandisyomi muli Leza.”
Ino nkaambo nzi bukombi kanji-kanji ncobuyunga bantu kucita zibi? Mubufwaafwi: Bantu babi bacita zyintu zinji zibi muzyina lya bukombi. Ibbaibbele lyakaambila limwi kuti Bunakristo buyakweendelezyegwa akubelesyegwa munzila mbyaabi. Mwaapostolo Paulo wakaambila balangizi Banakristo kuti: “naaba akati kanu nobeni kuyoobuka baalumi ibayooyiisya zyintu zipilingene kutegwa balikwelele basikwiiya.”—Milimo 20:29, 30.
Leza ulasesemwa abukombi bwakubeja. Mubwini, Ijwi lya Leza, Bbaibbele, lipa mulandu bukombi bwakubeja akaambo ‘kakujanwa abulowa . . . bwabantu boonse buyo bakajaigwa anyika.’ (Ciyubunuzyo 18:24) Akaambo kakuti bukombi bwakubeja bwaalilwa kuyiisya bantu kujatikizya Leza wakasimpe, walo siluyando, zikombelo eezyi zili aamulandu wabulowa mumeso aa Leza.—1 Johane 4:8.
Sikuswiilila mipailo ulabeetelela bantu aabo bapenzyegwa abukombi. Lino-lino, luyando lwakwe Leza kubantu luyakupa kuti abeteke basizikombelo basikuupa-upa ameso kwiinda mukubelesya Jesu. Jesu wakaamba kuti: “Ibanji bayooamba kulindime mubuzuba oobo kuti: ‘Mwami, Mwami, sena tiitwakasinsima muzyina lyako?’ . . . Pele mebo mpoonya aawo ndiyoobaambila kuti: Tiindaamuzyi pe! Amuzwe kulindime, nywebo nobasikucita zibi.”—Matayo 7:22, 23.
