Mubandi Amukamwini Ŋanda Sena Jesu ngu Leza?

BAKAMBONI BA JEHOVA balakkomana kubandika makani aamu Bbaibbele abasimukobonyina. Sena kuli mubuzyo wamu Bbaibbele ngomwakalibuzyide? Sena mulayandisisya kuzyiba njiisyo zimwi nzyobasyoma naa mbobakomba Bakamboni ba Jehova? Ikuti kacili boobo, mutakawayi-wayi kubabuzya Bakamboni ciindi mwaakubaswaanya. Bayookkomana kubandika andinywe kujatikizya makani aaya.

Mubandi uutobela utondezya Bakamboni ba Jehova mbobakonzya kubandika abasimukobonyina. Atweezyeezye kuti Kamboni uutegwa Mutinta wasika kuŋanda yamukaintu uutegwa Michelo.

Sena Masimpe Kuti Tamusyomi Muli Jesu?

Michelo: Bapasita bangu bakaamba kuti Bakamboni ba Jehova tabasyomi muli Jesu. Sena aayo masimpe?

Mutinta: Andimwaambile cakusinizya kuti tulasyoma muli Jesu. Mubwini, tusyoma kuti kuba alusyomo muli Jesu cilayandika kapati kutegwa tukafwutuke.

Michelo: Andime mbwesyoma oobo.

Mutinta: Aboobo, eeci ncecintu cimwi nywebo andime ncotuzuminana. Ndalilubide kwaamba, zyina lyangu ndime Mutinta. Ino nywebo ndinywe bani?

Michelo: Ndime Michelo. Cabota kuzyibana.

Mutinta: Andime ndakkomana kumuzyiba ba Michelo. Mulakonzya kulibuzya kuti, ‘Ikuti Bakamboni ba Jehova kabasyoma ncobeni muli Jesu, nkaambo nzi bantu ncobaamba kuti tabamusyomi?’

Michelo: Inzya, ndiyanda kuzyiba kujatikizya kaambo aaka.

Mutinta: Kwaamba buyo mubufwaafwi ba Michelo, tujisi lusyomo luyumu muli Jesu, pele tatuzisyomi zyoonse nzyobaamba bantu kujatikizya nguwe.

Michelo: Sena inga mwandipa cikozyanyo?

Mutinta: Inzya. Bantu bamwi baamba kuti Jesu wakali muntu buyo uuli kabotu. Pele swebo tatukazumini kaambo aaka.

Michelo: Andime tandikazumini pe.

Mutinta: Aboobo aaka nkaambo akambi nkotuzuminana. Cikozyanyo cabili ncakuti Bakamboni ba Jehova tabazizumini njiisyo ziteendelani ancaakaamba Jesu lwakwe kujatikizya mbobacitene walo aba Usyi.

Michelo: Ino mupandulula nzi?

Mutinta: Zikombelo zinji ziyiisya kuti Jesu ngu Leza. Ambweni andinywe mbomwakayiisyigwa oobo.

Michelo: Inzya, bapasita bangu bakaamba kuti Leza a Jesu baleelene.

Mutinta: Pele, sena inga mwazumina kuti nzila mbotu yakwiiya kasimpe kajatikizya Jesu nkulanga-langa nzyaakaamba kujatikizya nguwe.

Michelo: Inzya, inga ndazumina oobo.

Ncinzi Jesu Ncaakaamba?

Mutinta: Atubone kapango kamu Bbaibbele katugwasya kumvwisya kaambo aaka. Amubone, ncotubala mulugwalo lwa Johane 6:38. Jesu wakaamba kuti: “Ndakaboola kuzwa kujulu kuti  nditaciti kuyanda kwangu, pele ndicite kuyanda kwayooyo wakandituma.” Lino, majwi aaya inga atunyonganya kuti Jesu naali Leza.

Michelo: Ino mupandulula nzi?

Mutinta: Amubone kuti Jesu wakaamba kuti taakaboola kuzwa kujulu kuti azoocite kuyanda kwakwe.

Michelo: Inzya, wakaamba kuti wakaboola kuti acite kuyanda kwayooyo wakamutuma.

Mutinta: Pele kuti naa Jesu ngu Leza, ino nguni wakamutuma kuzwa kujulu? Alimwi nkaambo nzi Jesu ncaakazumina kucita kuyanda kwayooyo wakamutuma?

Michelo: Ndabona ncomusoleka kwaamba. Pele tandisyomi kuti kapango komwe aaka kalasinizya kuti Jesu tali Leza.

Mutinta: Amubone alimwi Jesu ncaakaamba aciindi cimbi. Wakaamba majwi aakozyenye mucaandaano citobela ca Johane. Ndamulomba kuti mubale lugwalo lwa Johane 7:16.

Michelo: Lwaamba kuti: “Mpoonya Jesu wakabaingula akwaamba kuti: ‘Nzyondiyiisya tazyili zyangu pe, pele nzizya yooyo wakandituma.’”

Mutinta: Ndalumba ba Michelo. Kweelana akapango aaka, sena Jesu wakali kuyiisya mizeezo yakwe mwini?

Michelo: Peepe, wakaamba kuti nzyaakali kuyiisya zyakali zyayooyo wakamutuma.

Mutinta: Mbombubo. Pele alimwi eeci cipa kubuzya kuti: ‘Ino nguni wakatuma Jesu? Alimwi nguni wakamwaambila kasimpe nkaakali kuyiisya?’ Sena ooyo takonzyi kuba mupati kwiinda Jesu? Kayi sikutuma inga mupati kwiinda yooyo watumwa.

Michelo: Eeci candikkomanisya. Tandina kabalide kapango aaka.

Mutinta: Amubone alimwi majwi aa Jesu mulugwalo lwa Johane 14:28 aakuti: “Mwalimvwide nindamwaambila kuti, ndilaunka pele ndiyoopiluka alimwi kulindinywe. Ikuti nimwali kundiyanda ncobeni, nimwakondwa kuti nduunka kuli Taata, nkaambo Taata mupati kwiinda ndime.” Kweelana akapango aaka, ino inga mwaamba kuti Jesu wakali kulibona buti naakali kulyeezyanisya a Bausyi?

Michelo: Wakaamba kuti Bausyi mbapati kwiinda nguwe. Aboobo ndisyoma kuti wakali kulibona kuti Leza mupati kulinguwe.

Mutinta: Masimpe. Acimwi cikozyanyo, amubone Jesu ncaakaambila basikwiiya bakwe icilembedwe mulugwalo lwa Matayo 28:18. Kapango aaka kaamba kuti: “Ndapegwa nguzu zyoonse kujulu alimwi aanyika.” Sena Jesu wakaamba kuti lyoonse wakalijisi nguzu zyoonse?

Michelo: Peepe, wakaamba kuti zyakapegwa kulinguwe.

Mutinta: Pele kuti naa Jesu ngu Leza, ino inga wapegwa buti nguzu zimbi? Alimwi nguni wakamupa nguzu?

Michelo: Ndeelede kukayeeyesya kaambo aaka.

Ino Nguni Ngwaakali Kwaambila?

Mutinta: Kuli kaambo akamwi kanyonganya ikuti naa ncobeni Jesu ngu Leza.

Michelo: Ino nkaambo nzi aako?

Mutinta: Nkaambo nkotubala kujatikizya kubbapatizyigwa kwa Jesu. Amubone majwi aalembedwe mulugwalo lwa Luka 3:21, 22. Ndamulomba kuti mubale tupango ootu.

Michelo: “Lino bantu boonse nobakabbapatizyigwa, awalo Jesu wakabbapatizyigwa. Eelyo naakali kupaila, ijulu lyakajaluka, mpoonya muuya uusalala uuli mbuli nziba wakaseluka alinguwe, eelyo ijwi kuzwa kujulu lyakati: ‘Yebo uli Mwanaangu ngweyandisya, ngwekkomanina.’”

Mutinta: Sena mwabona ncaakali kucita Jesu ciindi naakali kubbapatizyigwa?

Michelo: Wakali kupaila.

Mutinta: Inzya. Masimpe tulakonzya kulibuzya kuti, ‘Ikuti naa Jesu ngu Leza, ino wakali kupaila kuli ni?’

Michelo: Ooyo mubuzyo mubotu. Ndiyakubabuzya bapasita bangu.

Mutinta: Kuli kaambo akambi nkotweelede kuyeeya, amubone kuti ciindi Jesu naakamana kubbapatizyigwa mumaanzi, kuli muntu wakaambaula kuzwa kujulu. Sena mwabona ncaakaamba muntu ooyu?

Michelo: Wakaaamba kuti Jesu Mwanaakwe, ulamuyandisya, alimwi akuti ulamukkomanina.

Mutinta: Mbombubo. Pele kuti naa Jesu ngu  Leza, ino nguni wakaamba majwi aayo kuzwa kujulu?

Michelo: Tiindakali kukayeeyela boobo kaambo aaka.

Nkaambo nzi mbobacitene Leza a Jesu ncecikozyanisyigwa mbuli “Usyi” a “Mwana”?

Mutinta: Nkaaka kaambo kambi nkotweelede kulanga-langa: Twabala kuti Jesu wakaamba Leza kuti Mbaausyi bakujulu. Alimwi Jesu naakabbapatizyigwa, ijwi lyakazwa kujulu lyakaamba kuti Jesu Mwanaangu. Masimpe, Jesu wakalyaamba alikke kuti Mwana aa Leza. Lino, ikuti kamuyanda kundiyiisya kuti bantu bobilo baleelene, ino inga mwabelesya cikozyanyo nzi camumukwasyi kutegwa kamvwike kaambo?

Michelo: Inga ndabelesya cikozyanyo cabanabokwabo bobilo.

Mutinta: Masimpe—ambweni bana bamaanga. Pele Jesu wakaamba Leza kuti Taata mpoonya walo wakalyaamba kuti Mwana. Aboobo, ino muyeeya kuti Jesu wakali kupandulula nzi?

Michelo: Ndakabona kaambo. Jesu upandulula kuti muntu umwi mupati alimwi akuti ulaanguzu kwiinda umwi.

Mutinta: Masimpe. Amuciyeeyele eeci: Nywebo mwacikonzya kupa cikozyanyo ceelela cabantu beelene, eciya cabanabokwabo bobilo naa bana bamaanga. Ikuti ncobeni Jesu naali Leza, sena tamuyeeyi kuti Jesu mbwaali Mwiiyi Mupati naakayeeya cikozyanyo nceena eeci naa ambweni cikozyanyo cikasalazya kaambo kakweelana?

Michelo: Inzya, masimpe aayo.

Mutinta: Pele muciindi caboobo, wakabelesya mabala aakuti “Taata” a “Mwana” kupandulula mbobacitene a Leza.

Michelo: Mwaamba kaambo kakkomanisya.

Ncinzi Ncobakaamba Batobeli ba Jesu Bakusaanguna?

Mutinta: Kanditanaunka, ndiyanda kuti tubone akambi kaambo kujatikizya makani aaya ikuti kamujisi ciindi.

Michelo: Inzya, ndilijisi maminiti masyoonto.

Mutinta: Ikuti ncobeni Jesu ngu Leza, sena tamuyeeyi kuti basikwiiya ba Jesu nibakaamba oobo cakutainda mumbali?

Michelo: Cilibonya kuti ncamaano kuyeeya boobo.

Mutinta: Pele mu Magwalo kunyina mpotubala kuti bakayiisya boobo. Mukwiimpana, amubone ncaakalemba mwaapostolo Paulo, umwi wabatobeli ba Jesu bakusaanguna. Mulugwalo lwa Bafilipi 2:9, upandulula ncaakacita Leza ciindi Jesu naakafwa akubusyigwa kuti: “Leza wakamusumpula akumupa cuuno caatala azyina liinda mazyina oonse.” Kweelana akapango aaka, ncinzi Leza ncaakamucitila Jesu?

Michelo: Kapango kaamba kuti Leza wakamusumpula akumupa cuuno caatala.

Mutinta: Inzya. Pele kuti katanafwa Jesu wakaleelene a Leza alimwi akuti Leza wakamusumpula akumupa cuuno caatala, sena eeci nicatakamupa kusumpuka Jesu kwiinda Leza? Tacikonzyeki kuti Jesu naakasumpuka kwiinda Leza.

Michelo: Inzya tacikonzyeki.

Mutinta: Masimpe. Aboobo, kweelana abumboni boonse oobu, sena inga mwaamba kuti Bbaibbele liyiisya kuti Jesu ngu Leza?

Michelo: Peepe, kulibonya kuti taliyiisyi boobo. Ibbaibbele lyaamba kuti Mwana aa Leza.

Mutinta: Oobo mbombubo. Alimwi kumwaambila masimpe ba Michelo, Bakamboni ba Jehova balamulemeka kapati Jesu. Tusyoma kuti lufwu lwakwe kali Mesiya wakasyomezyedwe lwakajalula nzila yabantu boonse basyomeka kuti bakafwutuke.

Michelo: Andime mbwesyoma oobo.

Mutinta: Aboobo, mulakonzya kulibuzya kuti, ‘Mbuti mbotukonzya kumutondezya Jesu kuti tulamulumba akaambo kakutufwida?’ *

Michelo: Ndakalibuzya kale oobo.

Mutinta: Ambweni inga ndaakuboola alimwi kuzyoobandika andinywe bwiinguzi bwamu Bbaibbele. Sena muyoojanika aŋanda aciindi ncicona eeci nsondo iiboola?

Michelo: Inzya, ndinooliko.

Mutinta: Cabota kapati, tuyoobonana alimwi.

[Bupanduluzi buyungizidwe]