Mupailo

1 Nkaambo nzi Ncouyandika?

MUPAILO. Mu Bbaibbele kuli makani amwi aapa kuti bantu babe aluyandisisyo lwakuzyiba zinji. Amubone mibuzyo iili ciloba bantu njobabuzya kujatikizya mupailo; mpoonya tulange-lange antoomwe bwiinguzi bujanika mu Bbaibbele. Zibalo eezyi zyabambilwa kuti zimugwasye mbomweelede kupaila—mbomukonzya kutalika kupaila naa mbomukonzya kupaila mipailo iilimvwisya.

NYIKA yoonse mbwiizulwa, muzikombelo zyoonse, bantu balapaila. Balapaila nobali balikke; anobali mutubunga. Bapailila muzikombelo, mumatempele amumalende. Balabelesya bulungu, zinkozya, mabbuku aamipailo naa mipailo iilembedwe abboodi.

Mupailo upa lwiindano akati kabantu azyintu zimwi zipona anyika. Nokuba boobo, kuli nzyotukozyenye abanyama. Mbubwenya mbuli banyama, tuyandika zyakulya, muuwo alimwi amaanzi. Mbuli banyama, andiswe tulazyalwa, tulapona alimwi akufwa. (Mukambausi 3:19) Pele bantu balikke mbebapaila. Ino nkaambo nzi?

Ambweni bwiinguzi butakatazyi mbwakuti tuyandika kupaila. Kunze lyaboobo, mupailo nenzila bantu njobakonzya kubandika acintu ncobabona kuti cilisetekene alimwi citamani. Ibbaibbele litondezya kuti twakalengwa aluyandisisyo lwazyintu zili boobu. (Mukambausi 3:11) Ciindi cimwi Jesu Kristo wakaamba kuti: “Balikkomene aabo bazyi kuti bayandika zyintu zyakumuuya.”—Matayo 5:3.

‘Ikuyanda zyintu zyakumuuya’—ncecipa kuti bantu kabapaila kwamawoola manji. Masimpe kuti, bantu bamwi balalisyoma naa basyoma bamwi kuti balakonzya kubapa nzyobayandika zyakumuuya. Sena muyeeya kuti bantu balakonzya kumupa zyintu zyoonse nzyomuyandika zyakumuuya? Tatujisi nguzu, tulafwambaana kufwa alimwi tatukonzyi kuzyiba zili kumbele. Alikke, uujisi busongo kapati, singuzuzyoonse, uupona kukabe kutamani nguukonzya kutupa nzyotuyandika. Aboobo, ino nzyintu nzi zyakumuuya zitupa kuti katupaila?

Amulange-lange mibuzyo eeyi: Sena kuli nomwakali kuyanda busolozi, busongo naa bwiinguzi kumibuzyo njomwakabona kuti tiikonzyi kwiingulwa abantu? Sena kuli nomwakali kuyanda luumbulizyo ciindi nomwakafwidwa, busolozi nomwakeelede kusala cakucita, naa kulekelelwa nimwakabisya kapati?

Kweelana ancolyaamba Bbaibbele, toonse ootu twaambo tupa kuti katupaila. Bbaibbele ndebbuku lisyomeka kapati mumakani aaya, alimwi lilijisi zibalo zinji zyamipailo yabantu bakali kusyomeka. Bakali kupailila luumbulizyo, busolozi, kulekelelwa abwiinguzi kumibuzyo yakali kukatazya kapati.—Intembauzyo 23:3; 71:21; Daniele 9:4, 5, 19; Habakuku 1:3.

Mipailo yamu Bbaibbele yakali indene-indene, pele yakali kukozyanya munzila imwi. Boonse bakali kupaila bakalizyi cakali kuyandika kutegwa mipailo yabo imvwugwe, icintu ncobatabikkili maano bantu mazuba aano. Bakalizyi mipailo yabo nkoyakeelede kugamikwa.