Basikubala Balabuzya . . .

Sena Jesu ngo Mungelo Mupati Mikayeli?

▪ Bwiinguzi mbwakuti inzya. Bantu banji bajisi cilengwa cakuulika muntu mazyina manji. Oobu mbocibede caboola kumazyina aamu Bbaibbele. Mucikozyanyo, syaaneene Jakobo wakaulikwa zyina lyakuti Israyeli. (Matalikilo 35:10) Mwaapostolo Petro ujisi mazyina aainda kuli osanwe—Simeoni, Simoni, Petro, Kefa alimwi alya Simoni Petro. (Matayo 10:2; 16:16; Johane 1:42; Incito 15:7, 14) Ino mbuti mbotukonzya kuba masimpe kuti Mikayeli ndezyina limbi lya Jesu? Atulange-lange bumboni bwamu Magwalo butobela.

Izyina lyakuti Mikayeli lilajanika ziindi zyosanwe mu Bbaibbele. Mulugwalo lwa Daniele lilajanika ziindi zyotatwe. Kulugwalo lwa Daniele 10:13, 21, tubala kuti mungelo wakatumidwe wakagwasyigwa a Mikayeli walo wiitwa kuti “umwi wabasilutwe bapati” alimwi “mwami wanu.” Mpoonya, lugwalo lwa Daniele 12:1 lutwaambila kuti kumazuba aakumamanino “uyoobuka Mikayeli, silutwe mupati uulanga bantu bako.”

Lugwalo lumbi lwaamba Mikayeli ndwa Ciyubunuzyo 12:7, ilwaamba kuti “Mikayeli abaangelo bakwe” bakalwana calo cakapa kuti Saatani Diabolosi abaangelo bakwe batandwe kujulu.

Amubone kuti magwalo aali atala aawa naamba Mikayeli, atondezya kuti mungelo ooyo ngusikalumamba walo uulwanina akugwasyilizya bantu ba Leza nokuba kumubbonta sinkondonyina wa Jehova, Saatani.

Juda kapango 9 kaamba kuti Mikayeli ngo “angelo simutwe.” Kapango kamwi kamamanino ikaamba mungelo simutwe kali kulugwalo lwa 1 Ba-Tesalonika 4:16, kwalo Paulo nkwaakaamba Jesu iwakabusyigwa kuti: “Mwami mwini [Jesu] uyooseluka kuzwa kujulu amukunga ajwi lyaangelo simutwe amweembo wa-Leza.” Aboobo Jesu Kristo aawa waambwa kuti ngo mungelo simutwe, naa mungelo mupati.

Kujatikizya makani aaya, ino ncinzi ncotukonzya kwaamba? Tulakonzya kwaamba kuti Jesu Kristo ngo Mikayeli imungelo mupati. Mazyina oonse obilo—Mikayeli (ilyaamba kuti “Ino nguni uuli mbuli Leza?”) azyina lyakuti Jesu (ilyaamba kuti “Jehova Ndufwutuko”)—akankaizya mulimo wakwe wakuba mwiiminizi mupati wabweendelezi bwa Leza. Lugwalo lwa Ba-Filipi 2:9 lwaamba kuti: “Leza ncaakamusumpula [Jesu uusumpulidwe] akumupa izina ibotu kwiinda mazina oonse.”

Ncotweelede kuzyiba ncakuti, Jesu naakazyalwa aayo tanaakali ngamatalikilo aabuumi bwakwe pe. Jesu katanazyalwa, Mariya wakaswaigwa amungelo iwakamwaambila kuti uyoomita kwiinda mumuuya uusalala akuti mwana akamuulike kuti ngu Jesu. (Luka 1:31) Naakali kukambauka, bunji bwaziindi Jesu wakali kwaamba kuti wakaliko katanaboola aano anyika.—Johane 3:13; 8:23, 58.

Aboobo, Mikayeli mungelo mupati ngu Jesu katanaba muntu. Naakabusyigwa akujokela kujulu, Jesu wakaakuzumanana amulimo wakuba Mikayeli, mupati wabangelo, “cakulemeka Leza Tateesu.”—Ba-Filipi 2:11.