1, 2. Ino bantu bamwi bayeeya nzi kujatikizya Leza?

BANTU banji bayeeya kuti nzyobacita taakwe mbozimujatikizya Leza. Bayeeya kuti Leza tazibikkili maano zintu zibacitikila. Mucikozyanyo, ciindi cibeela cipati cacisi ca Philippines nocakanyonyoonwa amvwula mpati yaguwo mu November 2013, mupati wadolopo limwi wakaamba kuti: “Kweelede kuti aciindi eeci, Leza tanaakaliko pe.”

² Bantu bamwi bayeeya kuti Leza takonzyi kubona zintu nzyobacita. (Isaya 26:10, 11; 3 Johane 11) Bantu ibakali kupona ciindi ncaakali kupona mwaapostolo Paulo abalo mbobakali kuyeeya oobu. Kujatikizya mbabo, wakati: ‘Tiibakayanda kuba aluzyibo lwini-lwini kujatikizya Leza.’ Tiibakaluleme, bakali babi alimwi bakali basyaacivwulemwangu.—Baroma 1:28, 29.

3. (a) Mibuzyo nzi njotweelede kulibuzya? (b) Mu Bbaibbele, ino kanji-kanji “janza” lya Leza lyaamba nzi?

³ Ino mbuti swebo? Tulizyi kuti Jehova ulazibona zintu zyoonse nzyotucita. Pele sena tulasyoma kuti Jehova ulatubikkila maano? Sena tulalibona janza lyakwe iligwasya mubuumi bwesu?  Mu Bbaibbele, ibbala lyakuti “janza” lya Leza kanji-kanji lyaamba nguzu zyakwe nzyabelesya. Ubelesya nguzu zyakwe kugwasya babelesi bakwe alimwi akuzunda basinkondonyina. (Amubale Deuteronomo 26:8.) Jesu wakaamba kuti bantu bamwi “bayoomubona Leza.” (Matayo 5:8) Sena tuli akati kabantu aabo? Mbuti mbotukonzya ‘kumubona Leza’? Atubone zikozyanyo zyamu Bbaibbele zyabantu ibakalibona janza lya Leza mubuumi bwabo alimwi azyabaabo ibatakalibona. Alimwi tulaiya lusyomo mbolukonzya kutugwasya kulibona janza lya Leza.

4. Nkaambo nzi basinkondo babana Israyeli mbobakakaka kubona janza lya Leza?

⁴ Kaindi, bantu banji bakalijisi coolwe cakumvwa alimwi akubona Leza mbwaakali kugwasya bana Israyeli. Jehova wakacita maleele kufwutula bantu bakwe kuzwa mu Egepita alimwi akuzunda bami banji ibakali kukkala mu Nyika Yakasyomezyedwe. (Joshua 9:3, 9, 10) Nokuba kuti bami bamwi bakamvwa akubona Jehova mbwaakafwutula bantu bakwe, “bakatalika kulibunga-bunga antoomwe kuti balwane Joshua abana Israyeli.” (Joshua 9:1, 2) Ciindi nobakalwana bana Israyeli, bami aabo bakalijisi coolwe cakubona janza lya Leza. Akaambo kanguzu zinji nzyajisi Jehova, “zuba lyakaima, awalo mwezi wakaleka kweenda, kusikila bana Israyeli bazunda basinkondonyina.” (Joshua 10:13) Pele Jehova “wakayumya myoyo” yabasinkondo babana Israyeli kutegwa balwane bana Israyeli. (Joshua 11:20) Basinkondo babana Israyeli bakazundwa akaambo kakuti bakakaka kuzumina kuti Jehova nguwakali kulwanina bantu bakwe.

5. Ino ncinzi Mwami mubi Ahabu ncaakakaka kusyoma?

⁵ Kuzwa waawo, Mwami mubi Ahabu wakalijisi coolwe cakubona janza lya Leza ziindi zinji. Elija wakamwaambila kuti: “Takukooyooba mume noiba mvwula, ccita mane ndikaambe!” (1 Bami 17:1) Eeci cakali kukonzyeka kucitika akaambo kajanza lya Leza, pele Ahabu wakakaka kwaasyoma majwi aaya. Kumane, Elija wakapaila kuli Jehova, alimwi Leza wakamwiingula kwiinda mukutuma mulilo kuzwa kujulu. Ahabu wakacibona eeci. Mpoonya, Elija wakaambila Ahabu kuti Jehova wakali kuyoomanizya cilanga kwiinda mukuleta mvwula mpati. (1 Bami 18:22-45) Ahabu wakaabona maleele aaya woonse pele wakakaka kusyoma kuti wakali kubona nguzu zya Jehova. Ino ncinzi ncotwiiya kuzikozyanyo eezyi? Tweelede kulangaula janza lya Leza mubuumi bwesu.

6, 7. Ino ncinzi bana Gibeoni alimwi a Rahabu ncobakazyiba?

⁶ Bana Gibeoni bakaliindene kapati amasi aakabazingulukide. Bakalibona janza lya Leza. Muciindi cakulwana bana Israyeli, bana Gibeoni bakayanda kuba aluumuno abana Israyeli. Ino nkaambo nzi? Bakaamba kuti akaambo kakuti bakamvwa makani aajatikizya Jehova alimwi azintu zyoonse nzyaakacita. (Joshua 9:3, 9, 10) Bakatondezya busongo kwiinda mukuzyiba kuti Jehova nguwakali kulwanina bana Israyeli.

⁷ Rahabu awalo wakalibona janza lya Jehova. Tanaakali muna Israyeli, pele wakamvwa makani aajatikizya Jehova mbwaakabafwutula  kuzwa mu Egepita. Ciindi basikutwela nyika bana Israyeli bobilo nobakasika kulinguwe, wakabaambila kuti: “Ndili masimpe kuti Jehova uyoomupa nyika.” Rahabu wakalijisi lusyomo lwakuti Jehova wakali kukonzya kumufwutula antoomwe abamukwasyi wakwe. Wakatondezya lusyomo lwakwe muli Jehova nokuba kuti wakalizyi kuti kucita boobo kwakali kumubikka muntenda.—Joshua 2:9-13; 4:23, 24.

8. Mbuti bana Israyeli bamwi mbobakalibona janza lya Leza?

⁸ Mukwiindana a Mwami mubi Ahabu, bana Israyeli bamwi ibakabona mulilo kauzwa kujulu akaambo kamupailo wa Elija, bakazyiba kuti ngu Leza iwakacita boobo. Bakoompolola kuti: “Jehova ngo Leza mwini-mwini!” (1 Bami 18:39) Bakalisinizyide ncobeni kuti bakabona nguzu zya Leza.

9. Ino mbuti mbotukonzya kumubona Jehova alimwi ajanza lyakwe mazuba aano?

⁹ Twabona zikozyanyo zibotu alimwi azibi izikonzya kutugwasya kumvwisya ncocaamba ‘kubona Leza’ naa kubona janza lya Leza. Mbotuyaabumuzyiba Jehova alimwi abube bwakwe, tulalibona janza lyakwe ‘ameso aamumyoyo yesu.’ (Baefeso 1:18) Eeci citukulwaizya kwiiya bantu bakaindi ibakali kusyomeka alimwi abamazuba aano ibabona Jehova mbwaabagwasya bantu bakwe. Nokuba boobo, sena kuli bumboni butondezya kuti Leza ulabagwasya bantu mazuba aano?

10. Mbumboni nzi mbotujisi butondezya kuti Jehova ulabagwasya bantu mazuba aano? (Amubone cifwanikiso icili kumatalikilo aacibalo.)

¹⁰ Tulijisi bumboni bunji kapati butondezya kuti Jehova wazumanana kubagwasya bantu  mazuba aano. Kanji-kanji tulamvwa zyakuluula zyabantu ibakapaila kuli Leza kutegwa abagwasye mubuumi bwabo alimwi akuti wakayiingula mipailo yabo. (Intembauzyo 53:2) Mucikozyanyo, ciindi nobakali kukambauka munsumbu imwi nsyoonto yamucisi ca Philippines, ba Allan bakayaanya mukaintu umwi iwakatalika kulila. Bakaamba kuti, “Mafwumofwumo ngawonya aayo, mukaintu ooyu wakapaila kuli Jehova kutegwa Bakamboni babonane anguwe.” Naakacili mukubusi, wakali kwiiya Bbaibbele a Bakamboni, pele naakakwatwa alimwi akulongela kunsumbu eeyo, tanaakazumanana kwiiya. Leza wakawiingula mupailo wakwe cakufwambaana munzila yakamusika amoyo. Kautanamana amwaka omwe wakalyaaba kuli Jehova akubbapatizyigwa.

11, 12. (a) Mbuti Jehova mbwabagwasya babelesi bakwe? (b) Amupandulule Jehova mbwaakagwasya mucizyi umwi?

¹¹ Babelesi ba Jehova banji bakalibona janza lyakwe ligwasya ciindi nobakaleka zilengwa zibyaabi mbuli kufweba, kubelesya misamu iikola, naa kweebelela zintu iziletela muzeezo wakoonana. Bamwi bakaamba kuti bakasola kucileka munguzu zyabo beni pele bakaalilwa. Nokuba boobo, ciindi nobakalomba lugwasyo kuzwa kuli Jehova, wakabapa “nguzu zigambya iziinda zyabantu,” mpoonya bakacikonzya kuleka zilengwa zibyaabi.—2 Bakorinto 4:7; Intembauzyo 37:23, 24.

¹² Jehova alimwi ulabagwasya babelesi bakwe kuti baliyumye ciindi nobali mubuyumuyumu. Eeci ncicakacitika kuli ba Amy. Bakapegwa mulimo wakugwasyilizya kuyaka Ŋanda ya Bwami alimwi aŋanda yabamisyinali munsumbu imwi nsyoonto yamu Pacific Ocean. Zilengwa zyakaliindene azilengwa zyakucisi nkobakazwida, kanji-kanji kwakanyina malaiti naa maanzi, migwagwa yakazwide maanzi, bakali kubayeeya banamukwasyi, alimwi bakali kukkala mukaluumu kasyoonto kamuhotela. Bumwi buzuba, bakabbodweeda mucizyi ngobakali kubeleka limwi. Bakalimvwa bubi kujatikizya ncobakacita. Ciindi nobakaunka kuluumu yabo kwalo ikwakali mudima akaambo kakuti malaiti akaluunkide, bakapaila kuli Jehova kutegwa abagwasye. Mpoonya naakaboola malaiti, bakabala cibalo cimwi camu Ngazi Yamulindizi icakali kwaamba kujatikizya muswaangano wabasikumanizya cikolo ca Gileadi. Cibalo cakapandulula buyumuyumu mbubwenya ba Amy mbobakeelede kuliyumya. Bakaamba kuti: “Ndakalimvwa mbuli kuti Jehova wakali kwaambila ndime busiku obuya. Cakandikulwaizya kuzumanana amulimo wangu.”—Intembauzyo 44:25, 26; Isaya 41:10, 13.

13. Mbumboni nzi mbotujisi ibutondezya kuti Jehova wabagwasya bantu bakwe kukwabilila lwaanguluko lwabo lwakukambauka?

¹³ Jehova alimwi wabagwasya bantu bakwe kukwabilila akusitikizya makani mabotu mumulawo. (Bafilipi 1:7) Mucikozyanyo, ciindi mfwulumende zimwi nozyakasola kulesya mulimo wesu wakukambauka, twakalikwabilila munkuta. Twazunda mumilandu iibalilwa ku 268 yamunkuta zipati nyika yoonse, akati kayeeyi milandu iili 24 yakazundwa munkuta ya European Court of Human Rights kuzwa mumwaka wa 2000. Cilalibonya ncobeni kuti kunyina muntu uukonzya kulesya janza lya Leza!—Isaya 54:17; amubale Isaya 59:1.

14. Mbumboni nzi abumbi mbotujisi ibutondezya kuti Leza uli abantu bakwe?

 ¹⁴ Kukambaukwa kwamakani mabotu nyika yoonse mbwiizulwa mbumboni abumbi butondezya mboligwasya janza lya Leza. (Matayo 24:14; Milimo 1:8) Alimwi lukamantano luliko akati kababelesi ba Jehova mumasi oonse inga lwakonzyeka buyo kwiinda mukugwasyigwa a Jehova. Lukamantano oolu lulilibedelede! Nobaba bantu ibatakombi Jehova balaamba kuti: “Leza ncobeni uli akati kandinywe.” (1 Bakorinto 14:25) Tulijisi bumboni bunji kapati butondezya kuti Leza uli abantu bakwe. (Amubale Isaya 66:14.) Mbuti kujatikizya ndinywe lwanu kumugama? Sena mulalibona janza lya Jehova mubuumi bwanu?

15. Ino nkaambo nzi zimwi ziindi ncotutakonzyi kulibona janza lya Jehova mubuumi bwesu?

¹⁵ Zimwi ziindi tatukonzyi kulibona janza lya Leza mubuumi bwesu. Ino nkaambo nzi? Ciindi notujisi mapenzi manji, tulakonzya kuluba kuti Jehova watugwasya ziindi zinji mubuumi. Eeci cakamucitikila Elija. Wakali sicamba, pele ciindi Mwami Mukaintu Jezebeli naakali kuyanda kumujaya, wakayoowa. Kwaciindi cili mbocibede, wakaluba Jehova mbwaakamugwasyide musyule. Bbaibbele lyaamba kuti Elija wakalombozya buyo kufwa. (1 Bami 19:1-4) Ino nkuli nkwaakali kukonzya kujana lugwasyo alimwi abusicamba? Wakali kuyandika kulanga kuli Jehova!—1 Bami 19:14-18.

16. Mbuti mbotukonzya kumubona Leza ciindi notujisi mapenzi?

¹⁶ Jobu wakalibilika kapati cakuti bukkale bwakwe tanaakali kububona mbwaakali kububona Jehova. (Jobu 42:3-6) Zimwi ziindi, andiswe cilakonzya kutuyumina kubona Leza akaambo kamapenzi ngotujisi. Ino ncinzi cikonzya kutugwasya kubona zintu nzyatucitila Leza? Tweelede kuzinzibala kuyeeya  Bbaibbele ncolyaamba kujatikizya mapenzi eesu. Mpoonya, Jehova uyooba mwini-mwini kulindiswe, alimwi ciyootupa kuti andiswe twaambe kuti: “Ndakali kumvwa buyo mpuwo yako, pele lino ndakubona ameso aangu.”

17, 18. (a) Mbuti mbomukonzya kulibona janza lya Jehova mubuumi bwanu? (b) Amwaambe cakuluula citondezya Leza mbwatugwasya mazuba aano.

¹⁷ Mbuti mbomukonzya kulibona janza lya Jehova mubuumi bwanu? Atulange-lange zikozyanyo zyosanwe. Cakusaanguna, mulakonzya kulimvwa kuti Jehova wakamugwasya kutegwa mujane kasimpe. Cabili, ambweni mulakonzya kuyeeya ciindi nomwakali kuunka kumiswaangano ya Bunakristo, kuswiilila makani, alimwi akulyaambauzya mumoyo kuti: “Aaya ngamakani ngondali kuyandika!” Catatu, ambweni mwakabona Jehova mbwaakaingula mupailo wanu umwi. Cane, ambweni mwakali kuyanda kucita zinji mumulimo wa Jehova alimwi mwakabona mbwaakamugwasya kuzuzikizya mbaakani yanu. Casanu, ambweni mwakauleka mulimo wanu wakumubili akaambo kakuti wakali kumumanina ciindi cakubelekela Jehova mpoonya mwakabona Leza mbwaakazuzikizya cisyomezyo cakuti: “Tandikakulekelezyi pe.” (Bahebrayo 13:5) Ikuti twaba acilongwe ciyumu a Jehova, cilakonzya kuuba-uba kulibona janza lyakwe mubuumi bwesu.

¹⁸ Ba Sarah, mucizyi wakucisi ca Kenya, bakaamba kuti: “Ndakamupailila muntu ngotwakali kwiiya limwi Bbaibbele walo iwakali kulibonya mbuli kuti tanaakali kubikkila maano kwiiya Bbaibbele. Ndakabuzya Jehova naa ndakeelede kucileka buyo kwiiya anguwe. Mbondakamanina buyo kwaamba kuti ‘Ameni,’ fooni yangu yakalila. Muntu nguwenya ooyu ngondakali kwiiya limwi Bbaibbele wakandilomba kuti tuunke limwi kumiswaangano! Ndakakkomana kapati alimwi akugambwa!” Ikuti twayeeya zintu Leza nzyatucitila, tuyoolibona janza lyakwe ligwasya. Ba Rhonna, mucizyi uukkala ku Asia, bakaamba kuti citola ciindi kubona Jehova mbwatugwasya mubuumi bwesu. Bakayungizya kuti: “Ikuti naa mwacita oobo, ciyoomugambya kuzyiba mbwatubikkila maano kapati!”

19. Ncinzi acimbi ncotweelede kucita kutegwa tubone Leza?

¹⁹ Jesu wakaamba kuti aabo ‘ibayoomubona Leza’ beelede ‘kusalala mumoyo.’ (Matayo 5:8) Ino eeci caamba nzi? Tweelede kusalala mumizeezo alimwi akucileka kucita cintu cili coonse cibyaabi. (Amubale 2 Bakorinto 4:2.) Mucibalo eeci, twaiya kuti, ikutegwa tumubone Leza, tweelede kuzumanana kuyumya cilongwe cesu anguwe. Mucibalo citobela tuyoobandika lusyomo mbolukonzya kutugwasya kulibona kabotu-kabotu janza lya Jehova mubuumi bwesu.