SENA MUCIYEEYEDE?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Ino bibliomancy ninzi, alimwi mbuti Banakristo mbobeelede kwiibona?

Bibliomancy caamba kubala kapango kamu Bbaibbele nkomwasaanguna kubona mbomwajalula buyo Bbaibbele akusyoma kuti mulajana lugwasyo ndomuyanda mukapango aako. Banakristo bakasimpe tabasondi. Muciindi caboobo, balabala Bbaibbele kutegwa bajane luzyibo lwini-lwini alimwi abusolozi bwa Leza.—12/15, peeji 3.

Ino “nyika” iyaambwa kuti ilamana ninzi?

Eeyi taili “nyika” iikkalwa bantu pe, pele mbantu boonse bamunyika ibacita micito iiteendelani akuyanda kwa Leza. (1 Jo. 2:17) Nyika iini alimwi abantu basyomeka bayakufwutuka.—1/1, mapeeji 5-7.

Nokuba kuti wakafwa, mbuti Abelo mbwaambaula kulindiswe? (Heb. 11:4)

Ulacita oobo kwiinda mulusyomo. Tulakonzya kwiiya cikozyanyo calusyomo lwakwe akucitobela. Cikozyanyo cakwe nkocicili.—1/1, peeji 12.

Ino muumbazu nzi motuteelede kuzumizya cintu cili coonse kutwaandaanya a Leza?

Mbazu zimwi nzeezyi: mulimo wakumubili, zyakulikondelezya nzyotusala, kuyanzana abanamukwasyi bagwisyidwe mumbungano, kubelesya makkompyuta amincini iimbi, kulibilika kujatikizya buponi, kwaalanga munzila iiteelede mali alimwi akulisumpula.—1/15, mapeeji 12-21.

Ncinzi ncotukonzya kwiiya kukulicesya kwa Musa?

Muciindi cakulekela mikuli njaakajisi kumupa kulisumpula, Musa wakali kusyoma Leza, kutali kulisyoma mwini. Tatweelede kulekela nguzu zyakweendelezya naa zyintu nzyotukonzya kucita kutupa kulisumpula; muciindi caboobo tuyanda kusyoma muli Jehova. (Tus. 3:5, 6)—2/1, peeji 5.

Ino bantu ibayoobusyigwa bayookkala kuli?

Mweelwe musyoonto—144,000—bayookkala kujulu. Nokuba boobo, bunji bwabaabo bayakubusyigwa, bayoobusyigwa akupona anyika alimwi bayookkomana abuumi butamani aano anyika.—3/1, peeji 6.

Ino majwi aakuti bana Israyeli “tabapalwidwe mumyoyo yabo” akali kwaamba nzi? (Jer. 9:26)

Bakalizangide alimwi bakali kuyandika kugwisya zyintu eezyo izyakali kupa kuti myoyo yabo iyume—mbobakali kuyeeya, nzyobakali kuyandisya, naa makanze aayo aakali kukazyanya a Leza. (Jer. 5:23, 24)—3/15, mapeeji 9-10.

Mbuti Jesu mbwaakali cikozyanyo cibotu camuntu iwakajisi buumi bulaampindu?

Wakajisi makanze mubuumi, makanze aakucita kuyanda kwa Leza. Wakali kubayanda kapati Bausyi, alimwi wakali kubayanda bantu. Cakweelela, Jesu wakalizyi kuti Bausyi bakali kumuyanda alimwi akumukkomanina. Ootu ntotwaambo tuyandika tukonzya kutupa kuba abuumi bulaampindu.—4/1, mapeeji 4-5.

Ino mbunga ya Leza yaanyika ibikkilizya nzi?

Ibikkilizya Kabunga Keendelezya, makkomiti aa mitabi, balangizi beendeenda, tubunga twabaalu, mbungano alimwi asikumwaya umwi aumwi.—4/15, peeji 29.

Nkaambo nzi ncotutakonzyi kwaamba kuti Leza wakali silunya ciindi naakali kusubula bantu?

Jehova takkomani alufwu lwabasizibi. (Ezk. 33:11) Zyintu nzyaakacita musyule zitondezya kuti caluyando ulabacenjezya bantu katanaleta lunyonyooko. Eeci cilakonzya kutupa bulangizi bwakufwutuka lunyonyooko lwakumbele.—5/1, mapeeji 5-6.

Sena bana Israyeli bakali kujaya zigwebenga kwiinda mukuzyaanzika azisamu?

Peepe. Zisi zimbi izyakaindi zyakali kucita oobo pele ikutali bana Israyeli. Ciindi Magwalo aa Chihebrayo naakali kulembwa, basizibi bakali kusaanguna kujaigwa kwiinda mukubafwusa mabwe. (Lev. 20:2, 27) Kumane mubili wakali kwaanzikwa acisamu kutegwa bamwi bacenjezyegwe.—5/15, peeji 13.

Nkaambo nzi bantu ncobatakonzyi kuleta luumuno munyika yoonse?

Nokuba kuti bantu bacita zyintu zinji, tabajisi nguzu zyakweendelezya ntaamu zyabo beni. (Jer. 10:23) Saatani nguweendelezya nyika, aboobo bantu tabakacikonzyi kuleta luumuno. (1 Jo. 5:19)—6/1, peeji 16.