Sena Muli ‘Basungu Kubeleka Milimo Mibotu’?
Sena Muli ‘Basungu Kubeleka Milimo Mibotu’?
‘Kilisito Jesu wakalyaaba mwini akaambo kandiswe ikutegwa alisalazizye bantu bakwe balibedelede, ibasungweede kubeleka milimo mibotu.’—TIT. 2:13, 14.
INO INGA MWAPANDULULA BUTI?
Nkaambo nzi ncomucibona kuti ncoolwe kusungwaala kubeleka milimo mibotu?
Mbuti lugwalo lwa Daniele 2:41-45 mbolutondezya mbokuyandika kuba basungu mumulimo wesu wakukambauka?
Amupandulule kulilemeka kabotu mbokukwela bantu kubukombi bwakasimpe alimwi akuli Jehova Leza.
1, 2. Ino ncoolwe nzi Bakamboni ba Jehova ncobajisi, alimwi mulimvwa buti kujatikizya coolwe eeci?
BANTU banji bacibona kuti ncoolwe cipati kupegwa bulumbu akaambo kakuti bakacita cintu cimwi ciyandika. Mucikozyanyo, bamwi balapegwa bulumbu butegwa Nobel Prize akaambo kakuti bakali basungu mukugwasyilizya kuti kube luumuno akati katubunga tobilo itwatakali kumvwana. Eelo kaka ncoolwe cipati kutumwa a Leza katuli baiminizi bakwe kuyakugwasya bantu kutegwa babe muluumuno a Mulengi wabo!
2 Mbotuli Bakamboni ba Jehova, tulijisi coolwe eeci cilibedelede. Katuli ansi aabweendelezi bwa Leza a Kristo, tulabalomba bantu kuti ‘bayanzane a Leza.’ (2 Ko. 5:20) Jehova ulatubelesya kukwela bantu kulinguwe. Eeci ncocapa kuti mamiliyoni aabantu muzisi ziinda ku 235 bagwasyigwe kuba acilongwe cibotu a Leza alimwi akuba abulangizi bwakuba abuumi butamani. (Tit. 2:11) Cabusungu tulatamba ‘kufwumbwa ooyo uuyanda kuti anywe maanzi aabuumi cabuyo.’ (Ciy. 22:17) Akaambo kakuti tulakkomana kapati amulimo ooyu alimwi tulaubeleka cabusungu, inga tweelela kwaambwa kuti tuli bantu “basungweede kubeleka milimo mibotu.” (Tit. 2:14) Lino atulange-lange kusungwaala kwesu mukucita milimo mibotu mbokutugwasya kukwela bantu kuli Jehova. Nzila imwi nkwiinda mumulimo wesu wakukambauka.
AMWIIYE BUSUNGU BWA JEHOVA A JESU
3. Ino majwi aakuti “busungu bwa-Jehova” atusyomezya nzi?
3 Kujatikizya ncobuyakuzuzikizya bulelo bwa Mwana wa Leza, lugwalo lwa Isaya 9:7, lwaamba kuti: “Busungu bwa-Jehova wamakamu mbobuti cite aya makani oonse.” Majwi aaya akankaizya kuti Taateesu wakujulu ulabikkila maano kulufwutuko lwabantu. Cikozyanyo ca Jehova cabusungu citondezya kuti mulimo ngwatupede Leza wakuba bakambausi ba Bwami weelede kucitwa amoyo woonse alimwi cabusungu. Kuyandisisya kwesu kwakugwasya bantu kuti bamuzyibe Leza ncitondezyo cabusungu bwa Jehova. Mbotuli basimilimonyina a Leza, sena tulikanzide kutola lubazu cakumaninina mukukambauka makani mabotu kweelana abukkale bwesu?—1 Ko. 3:9.
4. Mbuti Jesu mbwaakapa cikozyanyo cibotu cakuba abusungu alimwi akuliyumya mumulimo?
4 Lino atulange-lange busungu mbwaakajisi Jesu. Wakapa cikozyanyo cibotu cakuliyumya mumulimo. Nokuba kuti wakali kukazyigwa kapati, wakazumanana kuba musungu mumulimo wakukambauka kusikila kumamanino aabuumi bwakwe anyika. (Joh. 18:36, 37) Ciindi lufwu lwakwe nolwakali afwaafwi, Jesu wakabeleka canguzu kugwasya bamwi kuzyiba Jehova.
5. Mbuti Jesu mbwaakacita kweelana acikozyanyo cakwe cacisamu cankuyu?
5 Mucikozyanyo, kumamanino amwaka wa 32 C.E., Jesu wakapa cikozyanyo camwaalumi wakajisi cisamu cankuyu mumuunda wakwe wamisaansa icatakali kuzyala kwamyaka yotatwe. Naakaambilwa kuti acigonke, mubelesi wamumuunda ooyu wakalomba kuti apegwe ciindi cakuti acibikkile mbolezi. (Amubale Luka 13:6-9.) Aciindi eeco, kwakali buyo bantu basyoonto ibakaba basikwiiya ba Jesu. Pele mbubwenya mbokutondezyedwe mucikozyanyo eeci camubelesi wamumuunda, Jesu wakabelesya ciindi cisyoonto cakaceede—myezi iili cisambomwe—kukambauka kapati mu Judaya alimwi amu Pereya. Kakuceede buyo mazuba masyoonto kuti afwe, Jesu wakeetezyegwa abantu bamucisi cokwabo aabo bakali ‘kumvwa amatwi aabo pele tiibakali kucita.’—Mt. 13:15; Lk. 19:41.
6. Nkaambo nzi ncotweelede kubeleka canguzu mumulimo?
6 Akaambo kakuti lino tuli mumazuba aamamanino, cilayandika kapati kubeleka canguzu mumulimo wesu wakukambauka. (Amubale Daniele 2:41-45.) Eelo kaka taciliboteli coolwe cakuba Bakamboni ba Jehova! Ndiswe tolikke munyika notujisi makani aapa bulangizi bubotu kujatikizya mapenzi aabantu. Caino-ino mukaintu umwi sikulemba muteende wakaamba kuti tacikonzyeki kuzyiba kaambo zyintu zibi ncozibacitikila bantu ibali kabotu. Mbotuli Banakristo, mukuli wesu alimwi ncoolwe kwaambila bamwi bwiinguzi bwamu Bbaibbele bwamibuzyo iili boobu kuli boonse balibambilide kuswiilila. Alimwi tulijisi twaambo tutupa ‘kupya moyo akaambo kamuuya’ ciindi notucita mulimo wesu ngwaakatupa Leza. (Lom. 12:11) Kwiinda mukulongezyegwa a Leza, kucita mulimo wabukambausi cabusungu kulakonzya kugwasya bamwi kumuzyiba alimwi akumuyanda Jehova.
MUUYA WAKULYAABA ULAMULEMEKA JEHOVA
7, 8. Ino muuya wakulyaaba umulemeka buti Jehova?
7 Kweelana azyintu izyakamucitikila mwaapostolo Paulo mbozitondezya, mulimo wesu wakukambauka ulakonzya kutupa “kutoona masiku” alimwi akuba “aziindi notunyina cakulya.” (2 Ko. 6:5) Majwi aaya atupa citondezyo cibotu cakulyaaba alimwi alakonzya kutuyeezya bapainiya ibabikka mulimo wakukambauka mubusena bwakusaanguna mubuumi bwabo kumwi kabaliyandawida ziyandika zyakumubili. Alimwi amuyeeye buyo bamisyinali ‘ibalitila mbuli cituuzyo cakunywa acipaizyo’ kutegwa bakagwasye bantu muzisi zimwi. (Flp. 2:17) Mbuti kujatikizya baalu ibabeleka canguzu balo zimwi ziindi batajani ciindi cakulya naa koona kutegwa balanganye mbelele zya Jehova? Alimwi tulijisi aabo bacembeede alimwi abaabo baciswa-ciswa babeleka canguzu kutegwa bajanike kumiswaangano alimwi akutola lubazu mumulimo wamumuunda. Tulakkomana kapati kubona mbobalyaaba babelesi ba Leza aaba. Kubeleka canguzu kuli boobu kulabajatikizya bamwi mbobaubona mulimo wesu wakukambauka.
8 Imwaalumi umwi uutali Kamboni wakalemba lugwalo kumuteende umwi wamu United Kingdom, kuti: “Lusyomo lwabantu mubukombi luyaabuceya . . . Ncinzi bapati bazikombelo eezyi ncobali mukucita? Masimpe ngakuti tabaunki kuyakuyandaula bantu mbuli mbwaakacita Kristo . . . Cikombelo cilikke icilibonya kuti cilabikkila maano nca Bakamboni ba Jehova, nkaambo balo balaunka kuyakuyandaula bantu alimwi balatola lubazu mumulimo wakukambauka kasimpe cakusyomeka.” Munyika iino iizwide bantu baliyanda, kulyaaba kwesu kulagwasya kapati kulemeka Jehova Leza.—Lom. 12:1.
9. Ncinzi cikonzya kutukulwaizya kuzumanana kucita milimo mibotu mumulimo wesu wakukambauka?
9 Ncinzi ncotukonzya kucita ikuti twabona kuti twaleka kuba basungu mumulimo wesu wakukambauka? Cilakonzya kutugwasya kuyeeya ncali mukuzuzikizya Jehova kwiinda mumulimo wakukambauka. (Amubale Baloma 10:13-15.) Kutegwa bantu bakafwutuke ciyeeme aakwiita zyina lya Jehova, pele bantu tabakonzyi kucita oobo ccita kuti twabakambaukila. Kuzyiba kaambo aaka kweelede kutukulwaizya kuzumanana kusungwaala kucita milimo mibotu alimwi akubeleka canguzu mumulimo wakukambauka makani mabotu aa Bwami.
KULILEMEKA KABOTU KUPA KUTI BANTU BAMUYANDE LEZA
10. Nkaambo nzi ncotukonzya kwaamba kuti kulilemeka kwesu kubotu kulakwela bantu kuli Jehova?
10 Nokuba kuti kuba basungu mumulimo kulayandika, busungu bulikke tabukonzyi kukwela bantu kuli Leza. Cintu cimbi icikonzya kukwela bantu kuli Leza, nkulilemeka kabotu kwa Bunakristo. Paulo wakakankaizya mbociyandika kulilemeka kabotu naakalemba kuti: “Tatuciti cintu cili coonse cityompya bamwi, kutegwa mulimo wesu utajaninwi kampenda.” (2 Ko. 6:3) Kwaambaula kwesu kubotu alimwi akulilemeka kupa kuti kuyiisya kwa Leza kubote, akupa kuti bamwi bakukkomanine kukomba Jehova. (Tit. 2:10) Masimpe ngakuti, tulamvwa bantu babombe myoyo kabaamba zyintu zibotu ciindi nobabona kulilemeka kwesu kubotu kwa Bunakristo.
11. Nkaambo nzi ncotweelede kwaapailila makani aajatikizya kulilemeka kwesu mbokubajatikizya bamwi?
11 Nokuba kuti zyintu zibotu nzyotucita zilakonzya kubakulwaizya bamwi kucita zyintu zibotu, pele zyintu zibi nzyotukonzya kucita azyalo zilakonzya kubapa kucita zyintu zibi. Aboobo, kufwumbwa naa tuli aŋanda, kuncito naa kucikolo tulasola kutapa bamwi kujana kampenda mumulimo naa mukulilemeka kwesu. Ikuti naa twacita cibi acaali, zyintu iziyakutucitikila akaambo kakucita boobo, zinooli zibi kapati. (Heb. 10:26, 27) Kaambo aaka keelede kutukulwaizya kwaapailila makani aaya akubona zyintu nzyotucita alimwi abuumi bwesu mbobukonzya kubajatikizya bantu bamwi. Kutalilemeka nokuyaabuvwula munyika, bantu babombe myoyo ‘bayakubona kwaandaana kuliko akati kamuntu uuyoowa Leza amuntu uutamuyoowi.’ (Malk. 3:18) Masimpe, kulilemeka kwesu kubotu kwa Bunakristo kujisi mulimo mupati mukuyanzanya bantu kuli Leza.
12-14. Mbuti kuliyumya kwesu kuzyintu zisunka lusyomo lwesu mbozijatikizya bamwi mbobaubona mulimo wesu wakukambauka? Amupe cikozyanyo.
12 Ciindi naakalembela bana Korinto, Paulo wakabaambila kuti wakapenzyegwa, wakajana buyumuyumu, wakaumwa alimwi akwaangwa. (Amubale 2 Bakolinto 6:4, 5.) Ciindi lusyomo lwesu nolusunkwa, kuliyumya kwesu kulakonzya kubagwasya aabo batulangilila kuti batambule kasimpe. Mucikozyanyo: Myaka iili mbwiibede yainda, bantu bamwi bakasoleka kulesya mulimo wa Bakamboni ba Jehova kubusena bumwi mucisi ca Angola. Banabukwetene babbapatizyidwe alimwi abamwi ibakajisi luyandisisyo bali 30, bakabwezegwa abasikukazya ciindi nobakali kumiswaangano yambungano. Kumane, basikukazya bakabunganya bantu bamucilawo eeco kutegwa balangilile ciindi nobakali kukwibbaula bantu aaba ibatakajisi mulandu kusikila bazwa bulowa. Nobaba bamakaintu abana abalo bakakwibbaulwa. Makanze aabasikukazya akali akuyoosya bantu kuti kabatabaswiilili Bakamboni ba Jehova. Pele nobakamana kubakwibbaula abuleya, bantu banji bamucilawo eeci bakasikila Bakamboni ba Jehova akulomba kuti batalike kwiiya Bbaibbele. Kuzwa waawo, mulimo wakukambauka Bwami wakayaambele, calo cakapa kuti kube kuyungizyika alimwi azilongezyo zinji.
13 Cikozyanyo eeci citondezya kukakatila kwesu kunjiisyo zyamu Bbaibbele mbokukonzya kubajatikizya bamwi. Ambweni tulakonzya kuyeeyela buyo bantu ibakayanzanisyigwa kuli Leza akaambo kabusicamba bwa Petro abaapostolo bamwi. (Mil. 5:17-29) Caboola kulindiswe, mbotwiiya limwi, mbotubeleka limwi naa banamukwasyi balakonzya kutuswiilila babona mbotukakatila kucita zyintu ziluzi.
14 Lyoonse bakwesu bamwi balapenzyegwa. Mucikozyanyo, ku Armenia, bakwesu babalilwa ku 40 bali muntolongo akaambo kakutatola lubazu mutwaambo twacisi alimwi ibambi banji balalangilwa kwaangwa mumyezi iiboola. Mucisi ca Eritrea babelesi ba Jehova bali 55 bali muntolongo, bamwi bajisi myaka yakuzyalwa iinda ku 60. Mucisi ca South Korea, Bakamboni babalilwa ku 700 bali muntolongo akaambo kalusyomo lwabo. Bukkale oobu bwazumanana kwamyaka iili 60. Tweelede kupailila kuti kusyomeka kwabakwesu ibapenzyegwa muzisi zisiyene-siyene kupe kuti Leza alemekwe alimwi akugwasya baabo bayanda bululami kukakatila kubukombi bwakasimpe.—Int. 76:8-10.
15. Amupe cikozyanyo citondezya kusyomeka mubuumi mbokukonzya kukwela bamwi kukasimpe.
15 Akaambo kakuti tulasyomeka mubuumi acalo cilakonzya kukwela bantu kukasimpe. (Amubale 2 Bakolinto 6:4, 7.) Mucikozyanyo, atulange-lange cakuluula eeci: Mucizyi umwi wakali kubikka mali mukancini kamatiketi mubbaasi ciindi mweenzinyina naakamwaambila kuti tanaakali kuyandika kubbadela nkaambo nkwaakali kuunka akali afwaafwi kapati. Mucizyi wakapandulula kuti cakaliluzi kuula tiketi nokuba kuti wakali kuunka afwaafwi. Nobakamana kubandika, mweenzinyina wakaseluka mubbaasi. Kumane namutekenya wakabuzya mucizyi kuti, “Sena uli Kamboni wa Jehova?” Mucizyi wakaingula kuti, “Inzya, ncinzi camupa kubuzya?” Namutekenya wakaingula kuti, “Ndalikuswiilila nomwali kubandika kujatikizya kuula tiketi lyabbaasi, alimwi ndilizyi kuti Bakamboni ba Jehova bali akati kabantu basyoonto bacita boobo alimwi balasyomeka muzyintu zyoonse.” Nokwakainda myezi misyoonto, mwaalumi umwi wakamusikila mucizyi ooyu naakali kumiswaangano akumubuzya kuti, “Sena ulindizyi? Ndime namutekenya uulya iwakabandika anduwe kujatikizya tiketi lyabbaasi. Ndakayeeya kuti nditalike kwiiya Bbaibbele a Bakamboni ba Jehova nondakabona mbowakalilemeka.” Mpuwo yesu yakusyomeka itupa kuzyibwa kuti tuli babelesi basyomeka.
AMUTONDEZYE BUBE BULEMEKA LEZA LYOONSE
16. Nkaambo nzi bube mbuli kukkazyika moyo, luyando alimwi aluzyalo ncobubakkomanisya bantu? Amupe cikozyanyo.
16 Tulatola lubazu mukukwela bantu kuli Jehova ciindi notutondezya bube mbuli kukkazyika moyo, luyando alimwi aluzyalo. Bantu bamwi ibatulangilila balakonzya kuba aluyandisisyo lwakwiiya kujatikizya Jehova, makanze aakwe alimwi abantu bakwe. Bube alimwi akulilemeka kwa Banakristo bakasimpe kuliindene kapati abube bwabaabo balitondezya buyo kumeso aabantu kuti balilyaabide kuli Leza pele kanji-kanji bukombi bwabo mbwakuupaupa buyo aameso. Basololi bazikombelo bamwi bavwuba kwiinda mukubabbida mali bantu bamucikombelo cabo, akubelesya mali aaya kuula maanda amyootokala iidula—alimwi zimwi ziindi akubambila babwa kaanda ikajisi muncini uufwulida muuwo uutontola naa uupya. Masimpe, bantu banji ibalyaamba kuti mbaasikutobela Kristo, tabayandi ‘kupa cabuyo.’ (Mt. 10:8) Muciindi caboobo, mbubwenya mbuli bapaizi ibakazangide kaindi mu Israyeli, “balaiisya cakuvola buyo”—alimwi bunji bwazyintu nzyobayiisya tazili zyamu magwalo. (Mik. 3:11) Kuupaupa ameso kuli boobo takuyanzanyi bantu kuli Leza pe.
17, 18. (a) Mbuti mbotumulemeka Jehova ciindi notutondezya bube bwakwe mubuumi bwesu? (b) Ncinzi cimukulwaizya kuzumanana kucita milimo mibotu?
17 Kulubazu lumwi, bantu balakkomana anjiisyo zya Bunakristo zyakasimpe alimwi azyintu zibotu nzyotubacitila basimukoboma. Mucikozyanyo, ciindi cimwi mupainiya umwi naakali kukambauka kuŋanda aŋanda wakatandwa amukamufwu umwi uucembeede. Mucembele ooyu wakaamba kuti ciindi mupainiya naakakonkomona amulyango, wakatantide amanela muncikini, wakali kuyanda kucinca gulobbu. Mupainiya wakaamba kuti: “Cabija kuti mwali kucita mulimo ooyu nyolikke.” Mupainiya wakacinca gulobbu kumane bakalayana. Ciindi mwana musankwa wamucembele ooyu naakamvwa cakacitika, wakakkomana kapati cakuti wakayanda kuti abonane amukwesu ooyu kutegwa amulumbe. Mukuya kwaciindi, mwana ooyu musankwa wakazumina kwiiya Bbaibbele.
18 Nkaambo nzi ncomukanzide kuzumanana kubeleka milimo mibotu? Ambweni akaambo kakuti mulizyi kuti naa twatondezya busungu mumulimo wesu wakukambauka alimwi akucita zyintu kweelana akuyanda kwa Leza, tulamutembaula Jehova alimwi cilakonzya kugwasya bamwi kuti bakafwutuke. (Amubale 1 Bakolinto 10:31-33.) Kusungwaala kwesu kucita milimo mibotu mumulimo wakukambauka makani mabotu alimwi akulilemeka kabotu kutondezya kuti tulamuyanda Leza alimwi abantuma. (Mt. 22:37-39) Kuti katuli basungu mukucita milimo mibotu, tuyakulongezyegwa kapati alukkomano alimwi akukkutila noliba lino. Kuyungizya waawo, tulakonzya kulangila kumbele kuciindi bantu boonse nobayakuba basungu mubukombi bwakasimpe akulemeka Mulengi wesu, Jehova.
[Mibuzyo yaciiyo]
[Cifwanikiso icili apeeji 8]
[Zifwanikiso izili apeeji 10]
Kujanika kwanu mumulimo wamumuunda kupa bumboni kuli baabo balangilila
[Cifwanikiso icili apeeji 12]
Kusyomeka kwesu alimwi akubeleka canguzu tazili zyabuyo
