Bakalyaaba Amoyo Woonse Kuyakubelekela mu Norway

MYAKA misyoonto yainda, ba Roald alimwi aba Elsebeth, banabukwetene ibakajisi myaka iinda ku 45, bakali kukkala kabotu mu Bergen, dolopo lyabili kukomena mucisi ca Norway. Banabukwetene aaba antoomwe amwanaabo musimbi alimwi amusankwa, Isabel a Fabian, cakusyomeka bakali kubeleka milimo yamumbungano. Ba Roald bakali kubeleka kabali baalu, ba Elsebeth bakali bapainiya, mpoonya Isabel a Fabian bakali basikumwaya bacita kabotu.

Nokuba boobo, mu September 2009, mukwasyi ooyu wakasala kucita cimwi cintu—bakasala kuti baunke kuyakukambauka kwansondo yomwe kubusena bumwi kulamfwu ikwakabulide basikumwaya ba Bwami. Aboobo, ba Roald aba Elsebeth antoomwe a Fabian iwakajisi myaka yakuzyalwa iili 18, bakaunka ku Nordkyn, busena buzingulukidwe amaanzi mudolopo lya Finnmark, mubusena bwa Arctic Circle. Kabali kokuya, mumunzi wa Kjøllefjord, bakali kukambauka antoomwe abakwesu abacizyi ibakaboolede kuzikukambauka mubusena oobu. Ba Roald bakaamba kuti: “Kumatalikilo aansondo eeyo, ndakalimvwa kukkutila akaambo kakuti ndakacikonzya kupanga bubambe akuboola kuzikukambauka mubusena oobo kwansondo yomwe.” Pele munsondo njimunya eeyo, ba Roald bakatalika kulibilika. Ncinzi cakacitika?

 KULOMBWA IKWATAKALI KUYEEYELWA

Ba Roald bakaamba kuti: “Cakutayeeyelwa, ba Mario, bapainiya ibabelekela ku Finnmark, bakatulomba kuti tukaakubelekele mudolopo litegwa Lakselv, kutegwa tukagwasye mbungano iyakajisi basikumwaya bali 23.” Ba Roald bakagambwa kapati akulomba ooko. Bakapandulula kuti: “Mebo aba Elsebeth twakalijisi kale makanze aakubelekela kubusena kwakabulide basikumwaya ba Bwami—pele makanze eesu akali kuyakuzuzikizyigwa ciindi bana besu baakuzwa aŋanda.” Nokuba boobo, mazuba masyoonto buyo ngobakali kukambauka mubusena oobu buli kulamfwu, ba Roald bakabona kuti bantu bakalijisi luyandisisyo lwakwiiya kujatikizya Jehova. Bantu bakali kuyandika kugwasya ncicona ciindi eeco—kutali kuti batalike kulindila pe. Ba Roald bakaamba kuti: “Kulomba ooko, kwakandipenzya mumizeezo alimwi kwakandimanina ŋonzi kwamazuba aali mbwaabede.” Mpoonya, ba Mario bakabatola amootokala ba Roald amukwasyi wabo ku Lakselv, musinzo uulampa makkilomita aali 240 kumusanza kwa Kjøllefjord. Ba Mario bakali kuyanda kuti beenzu aaba bakaakwiibone mbungano eeyi nsyoonto.

Nibakasika ku Lakselv, ba Andreas, umwi wabaalu bobilo mumbungano eeyi, bakabatondezya busena alimwi a Ŋanda ya Bwami. Basimbungano bakabatambula amaanza obilo alimwi bakaambila ba Roald aba Elsebeth kuti inga twakkomana kaka ikuti nywebo amukwasyi wanu mwaboola kuzikugwasyilizya mulimo wa Bwami okuno. Kumwi kabamwetamweta, ba Andreas bakaamba kuti bakabajanina kale mulimo ba Roald a Fabian. Ino beenzu aaba bakali kuyakucita nzi?

NCINZI NCOBAKASALA?

Fabian mbwaakamvwida buyo makani aaya wakaamba kuti: “Tandiyandi kulonga mebo kuboola kokuno.” Muzeezo wakusiya balongwe bamumbungano mbaakakomena limwi akulongela mudolopo lisyoonto tiiwakali kumukkomanisya naaceya. Alimwi, Fabian wakacili acikolo ncaakali kwiiya mulimo wakubamba magesi. Nokuba boobo, ciindi Isabel (iwakajisi myaka iili 21 ciindi eeco) naakaambilwa makani aakulonga, wakaamba kuti: “Eeco ncecintu ncindali kulombozya kucita!” Nokuba boobo, Isabel wakaamba kuti: “Nindakakkala ansi akuyeeya, ndakalibuzya kuti, ‘Sena ooyu muzeezo mubotu ncobeni? Sena ndiyakubayeeya balongwe bangu? Sena ndikkale buyo mumbungano yangu mwalo mondakazyibila kale?’” Ino ba Elsebeth bakalimvwa buti akulombwa ooku? Bakaamba kuti: “Ndakalimvwa kuti Jehova waupa mulimo mukwasyi wesu, nokuba boobo ndakali kuyeeya ŋanda yesu njitwakazwa akuyakulula alimwi azyintu nzyotwakaulide mumyaka iili 25 yakaindide.”

Nsondo yaalubazu noyakamana, ba Roald amukwasyi wabo bakapiluka ku Bergen, pele bakazumanana kubayeeya Banakristonyina baku Lakselv, ibakali kukkala kubusena kulampa makkilomita aali 2,100 kuzwa kubusena nkobakali kukkala balo. Ba Elsebeth bakaamba kuti: “Ndakali kupaila kuli Jehova ziindi zinji, alimwi twakali kutuminana zifwoto azyakuluula abalongwe mbotwakajana.” Ba Roald bakaamba kuti: “Ndakali kuyandika ciindi kutegwa ndizumine kulonga. Alimwi ndakeelede kulanga-langa mbocinga cakonzyeka kumukwasyi wangu kulijanina ziyandika zyamubuumi. Ino twakali kuyakupona buumi buli buti? Ziindi zinji ndakali kupaila kuli Jehova akubandika amukwasyi alimwi abakwesu basimide.” Fabian wakaamba kuti: “Nindakakkala ansi akwayeeyesya makani aaya, ndakabona kuti kwakanyina kaambo kaya koomoonga kakeelede kundipa kukaka. Ndakali kupaila kuli Jehova ziindi zinji, eeci cakandigwasya kuti ndicince muzeezo akuba aamakanze aakuyanda kulongela kubusena oobu.” Ino Isabel wakacita buti? Kutegwa alibambile kabotu, wakatalika kucita bupainiya mudolopo mobakali kukkala. Nokwakainda myezi iili cisambomwe kali mupainiya kumwi kabelesya ciindi cinji kucita ciiyo cakwe mwini ca Bbaibbele, wakalimvwa kuti lino wakalilibambilide kulonga kakunyina abubi buli boonse.

NTAAMU NZYOBAKABWEZA KUTEGWA BAZUZIKIZYE MBAAKANI YABO

Luyandisisyo lwabo lwakubelekela kubusena kubulide basikumwaya ba Bwami nolwakakomena, mukwasyi wakabweza ntaamu zyeelede kutegwa bazuzikizye mbaakani yabo. Ba Roald bakali kubeleka mulimo ngobakali kuvwola mali manji alimwi bakali kuuyanda mulimo wabo, nokuba boobo bakalomba kutegwa balyookezye kwamwaka omwe. Basikubalemba mulimo bakabaambila kuti inga cabota kuti kababeleka nsondo zyobilo mpoonya balyookezya kwansondo zili cisambomwe. Ba Roald bakaamba kuti: “Mali ngondakali kuvwola akaceya citaambiki, nokuba boobo muzeezo ooyo wakagwasya kapati.”

Ba Elsebeth bakaamba kuti: “Balumi bangu bakandilomba kuti ndijane ŋanda mu Lakselv mpoonya ŋanda yesu iili mu Bergen tunjizye bantu baleenti. Kucita boobo cakatutolela ciindi cilamfwu, pele kumamanino twakazwidilila. Nokwakainda ciindi, bana besu bakajana milimo njobakali kubeleka mawoola masyoonto, alimwi balatugwasya kuula zyakulya alimwi akubbadelela ziyandika zyamu lweendo.”

Isabel wakaamba kuti: “Mbwaanga dolopo nkotwakalongela ndisyoonto, penzi ndendakajisi ndyakujana mulimo kutegwa kandiligwasya mumulimo wangu wabupainiya. Zimwi ziindi ndakali kutyompwa.” Mumwaka omwe wakusaanguna,  Isabel wakanjila mulimo uubelekwa mawoola masyoonto ziindi zili fwuka, nokuba boobo Isabel wakacikonzya kubbadelela ziyandika. Ino Fabian zyakamweendela buti zyintu? Wakaamba kuti: “Kutegwa ndimanizye lwiiyo lwangu lwakubamba magesi, ndakali kugwasyilizya muntu umwi amulimo wakwe. Ndakali kucita oobo kandili ku Lakselv. Ciindi nindakalemba musunko, ndakacita kabotu mpoonya ndakajana mulimo wakubeleka mawoola masyoonto kandili sikubamba magesi.”

ABAMWI MBOBAKAYUNGIZYA MULIMO WABO

Ba Marelius abakaintu babo ba Kesia, abalo bakali kuyanda kuunka kuyakubelekela kubusena kwakabulide basikumwaya ba Bwami. Ba Marelius, ibajisi myaka yakuzyalwa iili 29 lino, bakaamba kuti: “Makani aakaambwa lyamuswaangano wacooko alimwi akubuzya-buzya kujatikizya mulimo wabupainiya kwakapa kuti nditalike kuyeeya kujatikizya kuyungizya mulimo wangu.” Nokuba boobo, ba Kesia ibajisi myaka yakuzyalwa iili 26 lino, muzeezo wakusiya mukwasyi tiibakali kuukkomanina pe. Bakaamba kuti: “Ndakali kuyoowa kusiya bantu mbondakali kuyanda.” Kuyungizya waawo, ba Marelius bakali kubeleka kutegwa bapilusye cikwelete camali ngobakabelesya kuula ŋanda. Bakaamba kuti: “Kwiinda mulugwasyo lwa Jehova alimwi amipailo minji mwalo motwakali kulomba lugwasyo kutegwa tucince bukkale, twakacikonzya kulonga.” Cintu cakusaanguna ncobakacita, bakali kubelesya ciindi cinji muciiyo cabo ca Bbaibbele. Mpoonya banabukwetene aaba bakasambala ŋanda yabo, bakacileka kubeleka boonse bobilo, kumane mu August 2011 bakalonga kuunka kudolopo lya Alta, cisi ca Norway nkocili kunyika. Kabali kokuya, kutegwa baligwasye kujana ziyandika mubuumi kabali bapainiya, ba Marelius balabeleka kabali basikweendelezya mali, ba Kesia babeleka mucintoolo.

Ba Knut aba Lisbeth, banabukwetene ibajisi myaka yakuzyalwa iili kuma 35, bakakulwaizyigwa kapati ciindi nobakabala zyakuluula izili mu Yearbook izyaamba kujatikizya bakwesu abacizyi ibabelekela mumasena aabulide basikumwaya ba Bwami. Ba Lisbeth bakaamba kuti: “Zyakuluula eezyi zyakatupa kuti tube amuzeezo wakubelekela mucisi cimbi, nokuba boobo ndakali kulitenga kuti muntu buyo uuli mbuli ndime, sena inga wacikonzya.” Nokuba kuti cakali boobo, bakabweza ntaamu zyeelede kutegwa bazuzikizye mbaakani yabo. Ba Knut bakaamba kuti: “Twakasambala ŋanda yesu kutegwa tujane mali aayandika, twakatalika kukkala antoomwe abaama. Nokwakainda ciindi, kutegwa tumvwe mbocimvwika kubelekela mucisi cimbi, kwamwaka omwe twakalongela kumbungano iyakali kubelesya mwaambo wakucisi cimbi, twakaunka kumbungano iyakali kubelesya Cingisi ku Bergen, kwalo nkotwakali kukkala antoomwe abamamazyala.” Kakutanainda ciindi, ba Knut aba Lisbeth bakalimvwa kuti inga bacikonzya kulongela kucisi cimbi cili kulamfwu—ku Uganda. Inga balapiluka ku Norway kwamyezi yobilo mumwaka kutegwa bakaakubeleke. Kwiinda mukubelesya nzila eeyo, bacikonzya kujana mali aayandika kutegwa bazumanane kukkala akukambauka kwaciindi coonse mu Uganda mumyezi iiceede.

“AMULABILE, MUBONE KUTI JEHOVA MUBOTU”

Ino zyintu zyakabeendela buti babelesi aaba balisungwide? Ba Roald bakaamba kuti: “Tulajana ciindi cinji cakuba antoomwe mbuli mukwasyi mubusena oobu buli kulamfwu kwiinda ambocakabede ciindi notwakali ku Bergen. Mumukwasyi wesu kwaba lukamantano. Kubona bana  besu kabayaambele kumuuya, ncilongezyo cipati. Alimwi, kulongela kokuno kwatugwasya kutegwa katuzilanga kabotu zyintu zyakumubili. Twabona kuti nzisyoonto buyo zyintu ziyandika ncobeni kwiinda mbotwakali kuyeeya.”

Ba Elsebeth bakabona kuti cakali kuyandika kwiiya mwaambo uumbi. Nkaambo nzi? Cilawo cambungano ya Lakselv cibikkilizya munzi wa Karasjok, mwalo mujanika bantu babelesya mwaambo waci Sami—bantu ibakazwa mumasena aali kunyika kwa Norway, Sweden, Finland, alimwi a Russia. Kutegwa cuube-ube kukambaukila bantu aaba, ba Elsebeth bakatalika kwiiya mwaambo waci Sami. Lino, ba Elsebeth balacikonzya kwaambaula asyoonto mwaambo waci Sami. Sena balakkomana kubelekela mucilawo eeci? Kabamwetamweta bakaamba kuti: “Ndilasololela ziiyo zya Bbaibbele zili cisambomwe. Oobu mbobusena mbondiyanda, kunyina kumbi nkondiyanda pe!”

Fabian walo uubeleka kali mupainiya lino alimwi mukutausi, wakaamba kuti, walo a Isabel bakagwasya bakubusi botatwe bamumbungano yabo mpya ibatakali kucita kabotu kumuuya ibakali kuyandika kukulwaizya kutegwa kabatola lubazu mumilimo yamumbungano. Bakubusi boonse botatwe lino mbasungu mumulimo wakukambauka. Bobilo akati kabakubusi botatwe aaba bakabbapatizyigwa alimwi mumwezi wa March 2012 bakacita bupainiya bwakugwasyilizya. Umwi wabakubusi aaba iwakatalikide kuleya munzila yakasimpe, wakamulumba Fabian a Isabel akaambo kakumugwasya “kuyuma mukasimpe alimwi.” Fabian wakaamba kuti: “Ndakakkomana kapati ciindi naakaamba majwi aaya. Eelo kaka cilakkomanisya kugwasya muntu umwi!” Isabel wakati: “Mumulimo ooyu, ‘ndalabila alimwi ndabona kuti Jehova mubotu’ ncobeni.” (Int. 34:8) Wakayungizya akwaamba kuti: “Kuyungizya waawo, kubelekela kokuno kulakkomanisya kapati!”

Ba Marelius aba Kesia tabaponi buumi buyanda mali manji pe, nokuba boobo balikkomene. Kumbungano ya Alta, kwalo nkobakalongela lino ijisi basikumwaya bali 41. Ba Marelius bakaamba kuti: “Ikuti ndalanga musyule, cilakulwaizya kubona buumi bwesu mbobwacinca. Tulamulumba Jehova akaambo kakuti twacikonzya kucita mulimo wabupainiya okuno. Kunyina cintu cindikkomanisya mbuli ceeci.” Ba Kesia bakayungizya kuti: “Ndakaiya kusyoma Jehova cakumaninina, alimwi ulatubamba kabotu. Acimbi ncindajana ncakuti, kukkala kulamfwu abanamukwasyi kwapa kuti ziindi nzyotuswaangana ambabo kazikkomanisya kapati. Taakwe nindakausa kale akaambo kakusala kwesu pe.”

Ino ba Knut aba Lisbeth buumi bubeendela buti mucisi ca Uganda? Ba Knut bakaamba kuti: “Cakatutolela ciindi kutegwa tuzyibile mubusena bupya abukkale. Ciindi aciindi tulaba apenzi lyamaanzi, magesi, alimwi akuciswa mwida, nokuba boobo tulakonzya kusololela ziiyo zya Bbaibbele kufwumbwa nzyotuyanda.” Ba Lisbeth bakaamba kuti: “Musinzo weendwa maminiti aali 30 kuzwa abusena mpotukkala, kuli zilawo mwalo makani mabotu mwaatanasika pe. Twaunka kuyakukambauka kubusena oobu, tujana kuti bantu balabala Bbaibbele, alimwi balalomba kuti tubayiisye. Kuyiisya bantu balicesya boobu mulumbe wamu Bbaibbele, cilakkomanisya kapati!”

Eelo kaka Musololi wesu, Kristo Jesu, ulikkomene nalanga ansi akubona mulimo wakukambauka ngwaakatalisya mboucitwa mumasena aaindene-indene! Cakutadooneka, bantu ba Leza boonse balikkomene kapati kulisungula mukutobela mulawo wa Jesu ‘wakugwasya bantu bamisyobo yoonse kuba basikwiiya.’—Mt. 28:19, 20.

[Kabbokesi kali apeeji 6]

Kubelesya Njiisyo zyamu Bbaibbele kulakonzya kumugwasya kulibambila kuyakubelekela kubusena kubulide basikumwaya ba Bwami:

• Amupaile kuli Jehova kutegwa mube aluyandisisyo alimwi “[a]busongo.”—Tus. 3:21; Flp. 2:13; Jak. 1:5.

• Amulombe lulayo kubasyomima basongo. “Uuenda abasongo ulasongwaala.”—Tus. 12:15; 13:20.

• Amulibambile kabotu. “Makanze aabasungu alaleta zilyo zinji.”—Tus. 21:5.

• Amubeleke kweelana amakanze aanu. ‘Amucite zyintu zili kabotu.’—Int. 37:3.

Kuti mwabweza ntaamu eezyi, mulakonzya kuba masimpe kuti Jehova uyakumulongezya.—Tus. 16:3.

[Maapu iili apeeji 3]

(Kutegwa mubone bwini mbwaakkede mabala, amubone bbuku lini)

Kjøllefjord

Lakselv

Alta

Karasjok

Arctic Circle

OSLO

Bergen

[Cifwanikiso icili apeeji 3]

(Kulumwensi) Ba Roald a Fabian

[Cifwanikiso icili apeeji 3]

(Atala) Ba Elsebeth a Isabel

[Cifwanikiso icili apeeji 5]

(Kulumwensi) Ba Knut aba Lisbeth bayiisya mukwasyi ku Uganda

[Cifwanikiso icili apeeji 5]

(Atala) Ba Marelius aba Kesia bakambaukila mukaintu mu Sami ku Norway

[Cifwanikiso icili apeeji 6]

“Mumukwasyi wesu kwaba lukamantano.”—Roald