Kulwana Mapenzi Aamazuba Aano Cabusicamba

“Leza macijilo [e]esu anguzu zyesu, mugwasyi loko mumapenzi.”—INT. 46:1.

SENA INGA MWAINGULA?

Mbuti mbotukonzya kuleka kutyompwa akaambo kazyintu zibyaabi?

Ntwaambo nzi tweelede kutupa kutondezya busicamba?

Ino mbubambe nzi Jehova mbwaabikka kutugwasya kulwana mapenzi?

1, 2. Mapenzi nzi bantu banji ngobajana, pele ncinzi babelesi ba Leza ncobayanda?

TUPONA muciindi camapenzi. Nyika izwide ntenda. Mizuzumo, kupaya kwameenda, mulilo, malundu aazwa mulilo, alimwi amvwula yaguwo kapati zyaleta mapenzi kubantu. Kuyungizya waawo, mapenzi aamumukwasyi alimwi amapenzi ngajisi umwi aumwi zyaleta kuyoowa alimwi akuusa. Masimpe kuti bantu boonse buyo balasikilwa “ziindi zyalufu azyamapenzi.”—Muk. 9:11.

² Babelesi ba Leza boonse antoomwe bacikonzya kuliyumya mubukkale bukatazya buli boobo. Nokuba boobo, tuyanda kulibambila kulwana mapenzi aali woonse aakonzya kutusikila kumbele ciindi bweende bwazyintu oobu nobusika kumamanino. Mbuti mbotukonzya kuliyumya mumapenzi aaya kuti atatuzundi? Ncinzi cikonzya kutugwasya kulwana mapenzi aamazuba aano cabusicamba?

AMWIIYE KULI BAABO BAKAPONA CABUSICAMBA

3. Kweelana ambokutondezyedwe mulugwalo lwa Baloma 15:4, ino inga twaumbulizyigwa buti ciindi notujana bukkale bukatazya?

³ Nokuba kuti bukkale bukatazya bwabajatikizya bantu banji kwiinda kaindi, tacili ceenzu kubantu kubona mapenzi. Atulange-lange ncotukonzya kwiiya kubabelesi ba Leza bamwi ibakaindi balo bakapona cabusicamba akuzwidilila.—Lom. 15:4.

4. Mapenzi nzi Davida ngaakaliyumya, alimwi ncinzi cakamugwasya?

⁴ Amuyeeye Davida. Akati kamapenzi ngaakajisi, wakeelede kuliyumya kumwami mukali, kulwanwa abasinkondonyina, kubwezyegwa kwabamakaintu bakwe, kubukilwa abantu bakwe alimwi akupenga mumizeezo. (1 Sam. 18:8, 9; 30:1-5; 2 Sam. 17:1-3; 24:15, 17; Int. 38:4-8) Zibalo zyamu Bbaibbele izyaamba buumi bwa Davida zitondezya kuti mapenzi aaya akapa kuti apenge  kapati. Nokuba boobo, mapenzi aaya tanaakamunyonganya kumuuya. Kazwide lusyomo wakaamba kuti: “Jehova ninguzu zyabuumi bwangu. Ngwani ngwencija?”—Int. 27:1; amubale Intembauzyo 27:5, 10.

5. Ncinzi cakabagwasya ba Abrahamu a Sara kuliyumya mubukkale bukatazya?

⁵ Kwamyaka minji mubuumi bwabo, ba Abrahamu a Sara bakali kukkala mumatente kabali bamuzwakule mucisi ceenzu. Buumi tiibwakali buubauba kulimbabo lyoonse. Nokuba boobo, bakaliyumya muzyintu mbuli nzala alimwi antenda kuzwa kuzisi zyakeengelede. (Matl. 12:10; 14:14-16) Ino bakacikonzya buti kucita oobo? Ijwi lya Leza litwaambila kuti Abrahamu “wakali kulindila munzi uujisi ntalisyo zini-zini, imunzi ooyo wakaanzwa akuyakwa a Leza.” (Heb. 11:8-10) Ba Abrahamu a Sara bakabikkilide maano kuzyintu zyakumbele, kutali kunyonganizyigwa anyika yakabazingulukide.

6. Mbuti mbotukonzya kumwiiya Jobu?

⁶ Jobu, wakasikilwa mapenzi aataambiki. Amweezyeezye mbwaakalimvwa ciindi zyintu zyoonse mubuumi bwakwe nozyakali kuboneka kuti zyanyongana. (Job. 3:3, 11) Ciinda kubija ncakuti, tanaakali kumvwisya kaambo zyintu eezyo zyoonse ncozyakali kucitika kulinguwe. Nokuba boobo, tanaakatyompwa. Wakazumanana kusyomeka alimwi akusyoma Leza. (Amubale Jobu 27:5.) Eelo kaka ncikozyanyo cibotu ncotweelede kwiiya!

7. Nzyintu nzi zyakamucitikila Paulo naakali kubelekela Leza, pele ncinzi ncaakazyi icakamupa kuzumanana cabusicamba?

⁷ Amulange-lange alimwi cikozyanyo camwaapostolo Paulo. Wakasikilwa ‘ntenda mumunzi, munkanda alimwi amulwizi.’ Waamba ‘nzala anyota, kufwa mpeyo akubula zisani.’ Alimwi Paulo waamba kuba ‘mulwizi masiku amasyikati,’ ambweni akaambo kakuti bwato bwakanyonyooka. (2 Ko. 11:23-27) Nokuba kuti zyoonse eezyi zyakacitika, amubone muuya ngwaakatondezya ciindi naakatifwe akaambo kakubelekela Leza. Wakaamba kuti: “Cakali boobo kutegwa tutalisyomi tobeni pe, pele kuti tusyome Leza ooyo uubusya bafwide. Kuzwa mubukkale oobo bwalufwu wakatuvwuna alimwi ucituvwuna.” (2 Ko. 1:8-10) Tabali banji bantu bakacitikilwa zyintu zibyaabi mbuli Paulo. Nokuba boobo, tobanji tulakonzya kwaamba mbwaakalimvwa alimwi tulakonzya kuumbulizyigwa kuzwa kucikozyanyo cakwe cabusicamba.

MUTATYOMPWI AKAAMBO KAZYINTU ZIBYAABI ZYAKAMUCITIKILA

8. Ino mapenzi aamazuba aano inga atujatikizya buti? Amupandulule.

⁸ Munyika yamazuba aano iizwide ntenda alimwi amapenzi, banji balatyompwa kapati. Nobaba Banakristo bamwi mbobalimvwa oobo. Ba Lani, * ibakali kukkomana mumulimo waciindi coonse abalumi babo ku Australia, baamba kuti ciindi nobakajanwa abulwazi bwakkansa yakunkolo, bakatyompwa kapati. Bakaamba kuti: “Busilisi bwakali kundipa kuciswa kapati, alimwi ndakali kulimvwa kubula mulimo.” Kuyungizya waawo, bakali kulanganya balumi babo balo bakaandulwa kumoongolola ciindi cimwi. Kuti twanjila mubukkale buli boobo, ncinzi ncotweelede kucita?

9, 10. (a) Ncinzi ncotuteelede kulekela Saatani kucita? (b) Mbuti mbotukonzya kuliyumya kweelana akaambo kalembedwe mulugwalo lwa Milimo 14:22?

⁹ Tweelede kuyeeya kuti Saatani uyanda kubelesya mapenzi ngotujisi kunyonganya lusyomo lwesu. Nokuba boobo, tatweelede kumulekela kuti atunyange lukkomano lwesu munzila eeyi. Lugwalo lwa Tusimpi 24:10 lwaamba kuti: “Na wawizuka mubuzuba bwamapenzi, inguzu zyako zyaceya.” Kuzinzibala kuyeeya kujatikizya zikozyanyo zyamu Bbaibbele, mbuli zyeezyo nzyotwabandika kale, kuyakutugwasya kuba basicamba ciindi notulwana mapenzi.

¹⁰ Ncibotu alimwi kuyeeya kuti tatukonzyi kwaagwisya mapenzi oonse. Mubwini,  tweelede kwaalangila kutucitikila. (2 Ti. 3:12) Lugwalo lwa Milimo 14:22 lutwaambila kuti: “Tweelede kwiinda mumapenzi manji kutegwa tukanjile mu Bwami bwa Leza.” Muciindi cakulimvwa kutyompwa kapati, mweelede kwaabona kuti ncoolwe momukonzya kutondezya busicamba ibuyeeme alusyomo lwanu munguzu zya Leza zyakumugwasya.

11. Mbuti mbotukonzya kutantamuka kutyompwa akaambo kamapenzi aamubuumi?

¹¹ Tweelede kubikkila maano kuzyintu zibotu. Ijwi lya Leza litwaambila kuti: “Moyo uukondwa ulaangununa busyu, pele mubuusu bwamoyo muntu ulafwidwa muuya.” (Tus. 15:13) Bamadokota balizyi kuti cintu cimwi cikonzya kugwasya mulwazi kupona ncakuti kayeeya kuti ulaba kabotu. Ziindi zinji kuti mulwazi kanywa mapiilusi aakucengeezya, pele kajisi lusyomo lwakuti inga amugwasya, ulaba kabotu. Pele kuti mulwazi kayeeya kuti mapiilusi nganywa amupa kutalimvwa kabotu, ulacisilwalimwi. Lyoonse ikuyeeya bukkale mbotutakonzyi kucinca kulakonzya kututyompya kapati. Icikkomanisya ncakuti, Jehova tatupi mapiilusi aakucengeezya pe. Muciindi caboobo, nociba ciindi cantenda, ulatupa lugwasyo lwini-lwini kwiinda mukukulwaizya kujanwa mu Jwi lyakwe, bunyina bwesu alimwi anguzu zijanwa mumuuya uusalala. Kubikkila maano kuzyintu eezyi kuyakutukulwaizya kapati. Muciindi cakuyeeya zyintu zibyaabi, amucite zyintu zigwasya kuliyumya mupenzi limwi alimwi akubikkila maano kumbazu zibotu zyabuumi bwanu.—Tus. 17:22.

12, 13. (a) Ncinzi cagwasya babelesi ba Leza kuliyumya ciindi cantenda? Amupe cikozyanyo. (b) Ziindi zyantenda, ncinzi citondezya cintu ciyandika kapati mubuumi bwamuntu?

¹² Ciindi cisyoonto cainda, zisi zimwi zyapenga akaambo kantenda zipati. Cikkomanisya ncakuti, bakwesu banji mumasi aaya batondezya kuliyumya kapati. Eeci tacaambi kuti cakali cuubauba. Kumatalikilo aamwaka wa 2010, muzuzumo mupati alimwi akupaya kwamaanzi mucisi ca Chile kwakanyonyoona maanda manji aabakwesu alimwi alubono, mpoonya bamwi milimo yabo naa nzila zyakujanina mali zyakanyonganizyigwa. Nokuba boobo, bakwesu bakazumanana kuyuma kumuuya. Ba Samuel balo ibakanyonyookelwa ŋanda yoonse bakaamba kuti: “Neliba leelyo notwakali mubukkale bukatazya kapati, mebo abakaintu bangu taakwe notwakaleka kubungana alimwi akukambauka. Ndisyoma kuti zilengwa eezyi zyakatugwasya kukkazyika moyo.” Balo antoomwe abakwesu abacizyi bamwi banji, babikka mulimo wa Jehova mubusena bwakusaanguna muciindi cantenda.

¹³ Mu September 2009, busena busika ku 80 pesenti bwa Manila, ku Philipines, bwakazula maanzi akaambo kamvwula mpati. Muntu umwi iwakavwubide kapati iwakasweekelwa zyintu zinji wakaamba kuti: “Kuvwula kwamaanzi kwakabajatikizya bantu boonse, kwakaleta mapenzi kubantu bavwubide abacete.” Eeci cituyeezya lulayo lwa Jesu lwabusongo lwakuti: “Amuliyobwede lubono kujulu, kwalo nkolutaligwi azyuuka naa nkalaya alimwi ababbi nkobatanjili akubba.” (Mt. 6:20) Kuba abuumi bwakuyandisya lubono, lwalo ilukonzya kumana cakufwambaana, kanji-kanji kulaleta kutyompwa. Eelo kaka ncamaano kugamika buumi bwesu kucilongwe cesu a Jehova, calo citakonzyi kunyongana nokuba kuti kuli catucitikila!—Amubale Bahebulayo 13:5, 6.

NCOTWEELEDE KUTONDEZYA BUSICAMBA

14. Ntwaambo nzi ntotujisi tweelede kutupa kutondezya busicamba?

¹⁴ Jesu wakaamba kuti kuyakuba mapenzi ciindi cakubako kwakwe, pele wakaamba kuti: “Mutakayoowi pe.” (Lk. 21:9) Kali Mwami wesu alimwi akugwasyigwa a Mulengi wabubumbo boonse, tulijisi twaambo twakuba alusyomo. Paulo wakakulwaizya Timoteo kwiinda mukwaamba kuti: “Leza tanaakatupa muuya wabukandu pe, pele  wakatupa muuya wanguzu aluyando alimwi akuyeeya kabotu.”—2 Ti. 1:7.

15. Amupe zikozyanyo zyamajwi aatondezya lusyomo lwababelesi ba Leza, alimwi amupandulule mbotukonzya kuba abusicamba buli boobo.

¹⁵ Amubone majwi amwi aababelesi ba Leza aatondezya lusyomo luyumu. Davida wakaamba kuti: “Jehova ninguzu zyangu, nintobo yangu; moyo wangu ulamusyoma, aboobo ndagwasigwa. Moyo wangu wakondwa loko.” (Int. 28:7) Paulo wakaamba majwi aatondezya lusyomo lutazungaani kwiinda mukwaamba kuti: “Muzyintu zyoonse eezyi tulazunda cakumaninina kwiinda muli yooyo wakatuyanda.” (Lom. 8:37) Mbubwenya buyo, ciindi ntenda noyakali afwaafwi, Jesu cakutadooneka wakaambila baswiilizi bakwe kuti wakalijisi cilongwe ciyumu a Leza kwiinda mukwaamba kuti: “Tandili ndelikke nkaambo Taata uli andime.” (Joh. 16:32) Ncinzi cilibonya mumajwi aaya oonse? Majwi amwi aamwi atondezya lusyomo lutazungaani muli Jehova. Kuti twaba alusyomo luliboobo muli Leza, tulakonzya kuba abusicamba buyandika kulwana mapenzi aali woonse mazuba aano.—Amubale Intembauzyo 46:1-3.

AMUGWASYIGWE ALUGWASYO NDWAMUPA LEZA

16. Nkaambo nzi ncokuyandika kulindiswe kwiiya Jwi lya Leza?

¹⁶ Takuyandiki kulisyoma tobeni kutegwa tube abusicamba bwa Bunakristo. Muciindi caboobo, bulaboola akaambo kakumuzyiba Leza alimwi akumusyoma. Tulakonzya kucita oobo kwiinda mukwiiya Jwi lyakwe, Bbaibbele. Mucizyi umwi uuciswa bulwazi bwakutyompwa wakapandulula cakamugwasya kuti: “Cakwiinduluka-induluka ndilabala kapati zibalo zyuumbulizya.” Sena tulatobela busolozi bwakuti katukomba mumukwasyi lyoonse? Kucita boobo kuyakutugwasya kuba amuuya wasintembauzyo iwakaamba kuti: “Nduuyandisya loko mulao wako! Nduuyeeya buzuba boonse!”—Int. 119:97.

17. (a) Ncinzi cikonzya kutugwasya kuzumanana kutondezya busicamba? (b) Amupe cikozyanyo citondezya makani aamba buumi mbwaamugwasya.

¹⁷ Bubambe bwabili, watupa mabbuku aamba zyamu Bbaibbele imujanika makani aayumya lusyomo lwesu muli Jehova. Bakwesu banji bagwasyigwa amakani aamba buumi aajanika mumagazini eesu. Mucizyi umwi ku Asia uujisi penzi lyakabuko (bipolar mood disorder) wakakkomana naakabala makani aamba buumi aajatikizya mukwesu misyinali iwakazwidilila mukulwana bulwazi bukozyene ambwaakajisi. Wakalemba kuti: “Cakandigwasya kumvwisya penzi ndendijisi alimwi cakandipa bulangizi.”

18. Nkaambo nzi ncotweelede kupaila lyoonse?

¹⁸ Bubambe bwatatu, mupailo. Mupailo ulakonzya kutugwasya mubukkale buli  boonse. Mwaapostolo Paulo wakatondezya mbouyandika mupailo naakati: “Mutalibiliki acintu niciba comwe, pele muzyintu zyoonse, kwiinda mumupailo akukombelezya antoomwe akulumba, amumuzyibye Leza nzyomukumbila; eelyo luumuno lwa Leza oolo lwiinda kumvwisya koonse luyookwabilila myoyo yanu amizeezo yanu kwiinda muli Kilisito Jesu.” (Flp. 4:6, 7) Sena tulapaila lyoonse kutegwa tugwasyigwe kuliyumya mubukkale bukataazya? Ba Alex, mukwesu ku Britain iwaciswa bulwazi bwakutyompwa kwaciindi cilamfwu wakaamba kuti: “Kwaambaula a Jehova mumupailo alimwi akuswiilila kulinguwe kwiinda mukubala Jwi lyakwe kwandigwasya kapati mubuumi.”

19. Mbuti mbotweelede kukubona kujanika kumiswaangano ya Bunakristo?

¹⁹ Kuyanzana ciindi camiswaangano mbubambe bwane buyandika kapati. Sintembauzyo wakalemba kuti: “Moyo wangu ulisukeme, ulayandisya kunjila mucikalilo ca-Jehova.” (Int. 84:2) Sena mbotulimvwa oobo? Ba Lani ibaambwa kale, bapandulula mbobalimvwa kujatikizya kuyanzana kwa Bunakristo kuti: “Kujanika kumiswaangano kunyina nocakali cintu cakulisalila pe. Ndakalizyi kuti ndeelede kujanika kutegwa Jehova andigwasye kuliyumya.”

20. Ino kutola lubazu mumulimo wakukambauka kuyakutugwasya buti?

²⁰ Bubambe bwasanu, nkuzumanana kuba basungu mumulimo wakukambauka Bwami. (1 Ti. 4:16) Mucizyi umwi ku Australia iwajanika mumapenzi manji waamba kuti: “Kukambauka mulimo ngondakali kuyanda kucita kumamanino, pele mwaalu wakanditamba kuti ndibeleke anguwe. Ndakaunka. Kweelede kuti Jehova wakali kundigwasya, lyoonse ndaunka mumulimo wamumuunda ndakali kukkomana kapati.” (Tus. 16:20) Banji bajana kuti akaambo kakuyanda kugwasya bamwi kusyoma muli Jehova, abalo bayumya lusyomo lwabo. Kwiinda mukucita boobo, balacileka kubikkila kapati maano kumapenzi ngobajisi, akutalika kubikkila maano kuzyintu ziyandika kapati.—Flp. 1:10, 11.

21. Ndusyomo nzi ndotujisi kujatikizya mapenzi ngotujana?

²¹ Jehova wapa lugwasyo lunji kutegwa tucikonzye kulwana mapenzi aamazuba aano cabusicamba. Kwiinda mukubelesya bubambe boonse bubikkidwe akuzinzibala kuyeeya alimwi akwiiya zikozyanyo zibotu zyababelesi ba Leza ibakatondezya busicamba, tulakonzya kuba masimpe kuti tuyakuzwidilila mukulwana mapenzi. Nokuba kuti zyintu zinji zibyaabi zilakonzya kucitika mamanino aabweende oobu naasika kumamanino, tulakonzya kulimvwa mbuli Paulo iwakaamba kuti: “Tuumputilwa ansi, pele tatunyonyooki pe. . . . Tatulengaani pe.” (2 Ko. 4:9, 16) Kwiinda mulugwasyo lwa Jehova, tulakonzya kwaalwana mapenzi aamazuba aano cabusicamba.—Amubale 2 Bakolinto 4:17, 18.

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 10]

Ciindi nomujana mapenzi amulubelesye lugwasyo Jehova ndwaapa