‘Jehova Alikke’ Nguuyobolola Mukwasyi Wakwe
‘Jehova Alikke’ Nguuyobolola Mukwasyi Wakwe
‘Ndimulomba kuti muzumanane alukamantano lwamuuya.’—EF. 4:1, 3.
INO INGA MWAPANDULULA BUTI?
Ino bweendelezi bwa Leza bujisi makanze nzi?
Mbuti ‘mbotuzumanana alukamantano lwamuuya’?
Ncinzi ciyootugwasya kutegwa ‘katufwidilana luzyalo’?
1, 2. Ino Jehova ujisi makanze nzi kujatikizya nyika alimwi abantu?
INO bbala lyakuti mukwasyi limuyeezya nzi? Sena limuyeezya luyando alimwi alukkomano? Sena limuyeezya kubelekela antoomwe amukwasyi wanu kutegwa muzuzikizye mbaakani imwi? Sena limuyeezya busena nkomukonzya kukomena kabotu, kwiiya alimwi akwaamba zili kumoyo? Ambweni mulakonzya kuyeeya boobo kuti kamuli mumukwasyi uumubikkila maano. Jehova ngo Sikutalisya mukwasyi. (Ef. 3:14, 15) Makanze aa Leza akali aakuti zilenge zyakwe zyoonse zyakujulu aanyika zibe mukwasyi omwe alimwi kazilimvwa kukwabililwa, kabasyomana umwi amweenzyinyina alimwi kabakamantene.
2 Nibakacita cibi, bantu bakaleka kuba mumukwasyi wa Leza wazilenge zyoonse, pele makanze aa Jehova kunyina naakalesyegwa pe. Uyoobona kuti nyika ya Paradaiso yakkalwa abana ba Adamu a Eva. (Matl. 1:28; Is. 45:18) Jehova wabikka bubambe kutegwa makanze aaya azuzikizyigwe. Bunji bwazyintu nzyaabamba tulazibala mubbuku lyamu Bbaibbele lya Baefeso, lyalo lyaamba zyalukamantano. Atulange-lange tupango tumwi twamubbuku eeli alimwi atubone mbotukonzya kubeleka kweelana amakanze aa Jehova aakukamantanya zilenge zyakwe.
BWEENDELEZI AMULIMO MBOBUJISI
3. Ino bweendelezi bwa Leza bwaambidwe mulugwalo lwa Baefeso 1:10 ninzi, alimwi ndilili cibeela cakusaanguna nicakatalika kubeleka?
3 Musa wakaambila bana Israyeli kuti: “Jehova ngu-Leza wesu, Jehova ngumwi.” (Dt. 6:4) Milimo ya Jehova alimwi amakanze aakwe zileendelana. Aboobo, ‘nicakakkwana ciindi cibikkidwe,’ Leza wakabikka ‘bweendelezi’—nkokuti bubambe bwakukamantanya zilenge zyakwe zyamaano zyoonse. (Amubale Baefeso 1:8-10.) Bweendelezi oobu buyoozuzikizya makanze aambubo muzibeela zyobilo. Cibeela cakusaanguna Leza ugwasya bananike kulibambila buumi bwakujulu nkobayoozumanana kubeleka ansi abweendelezi bwa Jesu Kristo. Cibeela eeci cakatalika kubeleka mu Pentekoste 33 C.E. ciindi Jehova naakatalika kubunganya baabo bayoolela a Kristo kujulu. (Mil. 2:1-4) Mbwaanga bananike bakaambwa kale kuti mbalulami kwiinda mucipaizyo cacinunuzyo ca Kristo alimwi baleelela kuba abuumi, balizyi kuti bakasalwa kuba “bana ba Leza.”—Lom. 3:23, 24; 5:1; 8:15-17.
4, 5. Mucibeela cabili, ino bweendelezi buyoocita nzi?
4 Mucibeela cabili Leza ugwasya baabo bayoopona mu Paradaiso aanyika ansi aabweendelezi bwa Kristo mu Bwami bwabu Mesiya. Iba “nkamu mpati” mbebali mucibeela cakusaanguna cambunga eeyi. (Ciy. 7:9, 13-17; 21:1-5) Kumane, mubulelo bwa Kristo bwa Myaka Iili Cuulu, mabbiliyoni aabantu bayoobusyigwa kutegwa bapone aanyika antoomwe abankamu mpati. (Ciy. 20:12, 13) Eelo kaka bubuke buyootupa coolwe cakutondezya kuti tulikamantene! Kumamanino aamyaka iili cuulu, “zyintu zili anyika” ziyoosunkwa camamanino. Aabo bayoojanika kuti balasyomeka bayooba “bana ba Leza” baanyika.—Lom. 8:21; Ciy. 20:7, 8.
5 Mazuba aano, Jehova ulimukugwasya bananike kulibambila kuyoopona kujulu alimwi ambelele zimbi kuyoopona mu Paradaiso aanyika. Pele mbuti umwi aumwi wesu mbwakonzya kubeleka kweelana abweendelezi bwa Leza?
‘AMUZUMANANE ALUKAMANTANO LWAMUUYA’
6. Ino Magwalo atondezya buti kuti Banakristo beelede kuswaangana antoomwe?
6 Magwalo aamba kuti Banakristo beelede kubungana antoomwe. (1 Ko. 14:23; Heb. 10:24, 25) Pele kutegwa tukamantane tatweelede kuswaangana buyo kubusena bomwe mbuli mbobacita bantu baunka kumusika naa kubbuwa lyazisobano. Kukamantana kwini kulainda aawo. Tulakamantana ciindi nitubelesya zyintu nzyatuyiisya Jehova alimwi akuzumizya muuya uusalala wa Leza kutugwasya kuba bantu bacita kabotu.
7. Ino “kuzumanana alukamantano lwamuuya mucaanzyo caluumuno” caamba nzi?
7 Kwiinda mucipaizyo cacinunuzyo ca Kristo, Jehova waamba bananike kuti baliluleme kabali bana bakwe, abalo bambelele zimbi ubaamba kuti balilume kabali balongwe bakwe, pele nikuba kuti cili boobo, zimwi ziindi kwiimpana kulakonzya kubako kufwumbwa kuti katucipona mubweende obuno bwazyintu. (Lom. 5:9; Jak. 2:23) Nkakaambo kaako majwi aakasololelwa amuuya ncaatukulwaizya kuzumanana “kweengelelana.” Mbuti mbotukonzya kukamantana abakombima? Tweelede “kulicesya cakumaninina akubomba moyo.” Kuyungizya waawo, Paulo utwaambila kuti tweelede kusoleka “kuzumanana alukamantano lwamuuya mucaanzyo caluumuno.” (Amubale Baefeso 4:1-3.) Kubelesya lulayo oolu kubikkilizya kuzumizya muuya wa Leza kucinca mbotuyeeya alimwi akuuzumizya kuzyala mucelo mulindiswe. Mukwiimpana amilimo yamubili iipa kwaandaana, mucelo wamuuya ulatugwasya kumana mazwanga ngotujisi abamwi.
8. Muunzila nzi milimo yamubili moipa kuti kutabi lukamantano?
8 Amubone “milimo yamubili” mboikonzya kutwaandaanya. (Amubale Bagalatiya 5:19-21.) Bwaamu bulamwaandaanya muntu a Jehova alimwi ambungano. Bumambe bupa mikwasyi kuusa kapati alimwi bulakonzya kwaandaanya bana kubazyali babo alimwi bulakonzya kubaandaanya banabukwetene. Busofwaazi bupa kuti cibayumine bantu kukamantana a Leza alimwi abaabo bamuyanda. Muntu uuyanda kunamatika zyintu zyobilo ulizyi kuti mbazu zyoonse zyobilo zyeelede kusalala katanazinamatika. Kunjila mubukkale busesemya citondezya kutalemeka milawo ya Leza iiluleme. Milimo yoonse yamubili yaandaanya bantu kuli umwi amweenzinyina alimwi akuli Leza. Bukkale buli boobo tabweendelani abube bwa Jehova.
9. Mbuti mbotukonzya kulilingula kutegwa tubone naa ‘tulasolekesya camoyo woonse kuzumanana alukamantano lwamuuya’?
9 Aboobo, umwi aumwi wesu weelede kulibuzya kuti: ‘Sena ndilasolekesya “kuzumanana alukamantano lwamuuya mucaanzyo caluumuno”? Ino ndicita buti kwaba mapenzi? Sena bantu banji ndilabaambila mapenzi aangu kutegwa ndijane lugwasyo kubalongwe baindene-indene? Sena ndilangila baalu kunjilila mumakani aangu muciindi cakusolekesya ndemwini kutegwa kube luumuno mucilongwe? Sena ndilabatantamuka ibamwi kutegwa nditabayeezyi cintu cilicoonse ncobakandilubizyila, ambweni kwiinda mukusolekesya kapati kuti tutanoobonani?’ Sena kucita boobo inga kwatondezya kuti tucita zyintu kweelana amakanze aa Jehova aakuyobolola alimwi zyintu zyoonse antoomwe muli Kristo?
10, 11. (a) Nkaambo nzi luumuno ncoluyandika abakwesu? (b) Nzyintu nzi zikonzya kupa kuti kube luumuno alimwi akuti katucita kabotu kumuuya?
10 Jesu wakaamba kuti: “Lino ikuti uleta cipego cako kucipaililo kumane wayeeya kuti munyoko uli akaambo anduwe, siya cipego cako aawo kumbele lyacipaililo, uunke. Usaangune kumvwana amunyoko, mpoonya wapiluka utuule cipego cako. Kofwambaana kubamba twaambo.” (Mt. 5:23-25) Jakobo wakalemba kuti: “Inseke yamucelo wabululami ilasyangwa muluumuno akati kabaabo baleta luumuno.” (Jak. 3:17, 18) Aboobo, tatukonzyi kuzumanana abukkale buli kabotu kuti kakunyina luumuno.
11 Mucikozyanyo, muzisi zinji imuvwula kucitika nkondo, cibeela cipati canyika tacilimwi akaambo kakuti balimi bayoowa tudandamiti. Ikuti kadandamiti kabboloka, balimi balaisiya myuunda, basimunzi balabula aakukkala alimwi amwalo mumadolopo cakulya tacijaniki. Mbubwenya buyo akulindiswe kukomena kumuuya kulasinkililwa kuti katujisi tumpenda itukonzya kunyonganya luumuno abakwesu. Pele kwiinda mukufwambaana kulekelelana akubeleka canguzu kuti kube luumuno abamwi, tupa kuti kube bukkale buli kabotu kapati.
12. Mbuti baalu mbobakonzya kutugwasya kukamantana?
12 Kuyungizya waawo, “zipego zyabantu” zilakonzya kugwasya kapati kutegwa kube luumuno. Mulimo wabo ngwakutugwasya kuti ‘tukamantane mulusyomo.’ (Ef. 4:8, 13) Ciindi baalu nibabeleka andiswe mumulimo uusetekene akupa mizeezo iizwa mu Jwi lya Leza, balatugwasya kusama buntu bupya. (Ef. 4:22-24) Mululayo lwabo, sena mulabona kusolekesya kwa Jehova kumugwasya kulibambila kuyoopona munyika mpya mubweendelezi bwa Mwanaakwe? Nobaalu, sena mulasolekesya kugwasya bamwi kamujisi makanze aayo?—Gal. 6:1.
“AMUFWIDILANE LUZYALO”
13. Ncinzi cikonzya kucitika kuti tiitwalutobela lulayo lujanika mulugwalo lwa Baefeso 4:25-32?
13 Lugwalo lwa Baefeso 4:25-29 lulaamba cacigaminina bukkale mbotweelede kutantamuka. Bukkale oobu bubikkilizya kwaamba zyakubeja, kunyema naa butolo, alimwi akwaamba majwi aabolede muciindi cakwaamba majwi aali kabotu kukuyaka. Kuti muntu umwi waalilwa kutobela lulayo oolu, inga wapenzya muuya wa Leza, nkaambo nenguzu iigwasya kusumpula lukamantano. (Ef. 4:30) Kutegwa kube luumuno alukamantano, tweelede kutobela acimwi ncaakaamba Paulo naakati: “Amuzisowe zyintu zyoonse eezyi, kulutila, bukali, kunyema, kubwenta alimwi amajwi aakusampaula antoomwe abubi buli boonse. Pele amufwidilane luzyalo, mube amoyo mutete walubomba, akulekelelana camoyo woonse mbubonya awalo Leza muli Kilisito mbwaakamulekelela camoyo woonse.”—Ef. 4:31, 32.
14. (a) Ino majwi aakuti “amufwidilane luzyalo” apa muzeezo nzi? (b) Ncinzi ciyootugwasya kuba aluzyalo?
14 Mabala aakuti “amufwidilane luzyalo” apa muzeezo wakuti ambweni tiitwalikutondezya luzyalo, aboobo tuyandika kuyaambele. Eelo kaka cilayandika kuliyiisya kubikkila maano mbobalimvwa bamwi kwiinda mbotulimvwa! (Flp. 2:4) Ambweni ncotuyanda kwaamba cilakonzya kubasesya bamwi naa kupa kuti tuboneke mbuli kuti tuli basongo, pele sena kucita boobo nkutondezya luzyalo? Kusaanguna kubikkila maano kukaambo aaka kuyootugwasya ‘kufwidilana luzyalo.’
KWIIYA KUBA ALUYANDO ALIMWI ABULEMU MUMUKWASYI
15. Mbuti lugwalo lwa Baefeso 5:28 mbolubagwasya bamaalumi kumvwisya mbobeelede kumwiiya Kristo?
15 Bbaibbele likozyanisya bulongwe bwa Kristo ambungano abulongwe buliko akati kamulumi amukaintu wakwe. Cikozyanyo ca Kristo citugwasya kubona mwaalumi mbweelede kumugwasya, kumuyanda alimwi akumulanganya mukaintu wakwe, alimwi cilatugwasya kubona mukaintu mbweelede kulibombya kumulumaakwe. (Ef. 5:22-33) Paulo naakalemba kuti: “Munzila eeyi balumi abalo beelede kuyanda bakaintu babo mbuli mbobayanda mibili yabo beni,” ino wakali kwaamba “nzila” iili? (Ef. 5:28) Majwi aakwe ngaakaamba katanaamba majwi aaya alatugwasya kubona kuti wakali kwaamba nzila ‘Kilisito mbwaakayanda mbungano akulyaaba akaambo kanjiyo, akwiisalazya kwiinda mukwiisanzya amaanzi aajwi lya Leza.’ Kutegwa mulumi abeleke kweelana amakanze aa Jehova aakuyobolola alimwi zyintu zyoonse muli Kristo, weelede kubikkila maano kusanina mukwasyi wakwe kumuuya.
16. Ncinzi cicitika mumaanda ikuti bazyali bacita mulimo wabo wamu Magwalo?
16 Bazyali beelede kuzyiba kuti Jehova wakabapa mulimo wakulanganya bana babo. Cuusisya kapati ncakuti, mazuba aano bantu banji munyika ‘tabajisi luyando lwakuzyalwa andulo.’ (2 Ti. 3:1, 3) Bamausyi banji balakaka kucita mulimo ngobapedwe wakulanganya bana babo calo cipa kuti bana bause. Paulo wakapa lulayo oolu kuli bamausyi Banakristo naakaamba kuti: “Mutanoobanyemyi bana banu pe, pele amuzumanane kubalela mululayo lwa Jehova akubayiisya kutobela mizeezo yakwe.” (Ef. 6:4) Bana batalikila mumukwasyi kwiiya mbobeelede kutondezya luyando alimwi ambobakonzya kulemeka bweendelezi. Bazyali ibayiisya bana babo zyintu eezyi balabeleka kweelana abweendelezi bwa Jehova. Bazyali beelede kubikkila maano kubona kuti bana babo balimvwa kuyandwa mumukwasyi. Aboobo, tabeelede kuba bakali, basikunyema-nyema, alimwi tabeelede kubelesya majwi mabi. Ikuti baatobela malailile aaya, bayiisya bana babo ziiyo ziyandika kapati zijatikizya kutondezya luyando akulemeka bweendelezi. Eeci ciyoobagwasya kulibambila buumi bwamunyika ya Leza mpya.
17. Ncinzi ciyandika kutegwa tuzwidilile mukulwana Diabolosi?
17 Tweelede kuzyiba kuti Diabolosi muntu wakusaanguna iwakanyonganya luumuno lwaanyika uyootulwana ciindi nitusoleka kucita kuyanda kwa Leza. Bantu banji munyika balacita kuyanda kwa Saatani ciindi nibalekana, nibakkala antoomwe kakunyina kukwatana, alimwi anibazumizya basankwa naa bamakaintu kuti kabakwatana mulicabo. Swebo tatutobeli bukkale bwabo budumide kapati bwamunyika eeyi. Twiiya cikozyanyo ca Kristo. (Ef. 4:17-21) Aboobo, tukulwaizyigwa ‘kusama zilwanyo zyoonse zizwa kuli Leza’ kutegwa tuzwidilile mukulwana Diabolosi amadaimona aakwe.—Amubale Baefeso 6:10-13.
“KAMUZUMANANA KWEENDA MULUYANDO”
18. Ncinzi ciyandika kutegwa kube lukamantano lwa Banakristo?
18 Tweelede kuba aluyando ikuti katuyanda lukamantano. Myoyo yesu ilizwide aluyando lwa ‘Mwami wesu omwe,’ ‘Leza wesu omwe,’ alimwi aluyando lwaumwi amweenzyinyina, alimwi tulikanzide “kuzumanana alukamantano lwamuuya mucaanzyo caluumuno.” (Ef. 4:3-6) Jesu wakalupailila luyando luli boobo naakaamba kuti: “Tandilombeli baaba balikke pe, pele ndilabalombela abaabo bandisyoma kwiinda mumajwi aabo; ikutegwa boonse babe bamwi mbubonya yebo Taata andime mbotukamantene, ikuti abalo kabakamantene andiswe . . . Alimwi ndabazyibya zyina lyako alimwi ndiyoolizyibya ikutegwa luyando ndookali kundiyanda andulo lube muli mbabo alimwi mebo ambabo tukamantane.”—Joh. 17:20, 21, 26.
19. Ino mukanzide kucita nzi?
19 Ikuti cimwi cintu kacitukatazya mumoyo akaambo kakutalondoka, luyando lweelede kutukulwaizya kupaila mbuli mbwaakapaila sintembauzyo naakati: ‘Kondipa mbe simoyo omwe kukulemeka izyina lyako.’ (Int. 86:11) Atube amakanze aakukazya makanze aa Diabolosi aakutwaandaanya kuli Taateesu siluyando akubakwesu abacizyi. Atubeleke cakulomya kutegwa ‘tumwiiye Leza, mbotuli bana bayandwa, alimwi katuzumanana kweenda muluyando’—mumukwasyi, mumulimo wesu wakukambauka, alimwi amumbungano.—Ef. 5:1, 2.
[Mibuzyo Yaciiyo]
[Cifwanikiso icili apeeji 29]
Muntu ulaakaambo amunyina, ulasiya cipego cakwe acipaililo akuunka kuti akamvwane amunyina
[Cifwanikiso icili apeeji 31]
Nobazyali amubayiisye bana banu kutondezya bulemu
