Amulekele Jehova Kuti Amusololele Kulwaanguluko Lwini-lwini
Amulekele Jehova Kuti Amusololele Kulwaanguluko Lwini-lwini
“[Amulangisisye] mumulawo uulondokede uuleta lwaanguluko.”—JAK. 1:25.
SENA INGA MWAPANDULULA?
Mulawo nzi uusololela kulwaanguluko lwini-lwini, alimwi mbaani bagwasyigwa anguwo?
Mbuti mbotukonzya kujana lwaanguluko lwini-lwini?
Ndwaanguluko nzi ndobayoojana aabo boonse bazumanana kweenda munzila iitola kubuumi?
1, 2. (a) Ncinzi cacitika kulwaanguluko lwamunyika, alimwi nkaambo nzi? (b) Ino ndwaanguluko nzi ndobayoojana babelesi ba Jehova kumbele?
TUPONA kuciindi bulyato, nkondo, alimwi akucita zibi nikwavwula kapati. (2 Ti. 3:1-5) Kutegwa mfwulumende zimanizye mapenzi aaya, zyapanga milawo iimbi, zyayungizya mweelwe wabamapulisa alimwi akubikka mincini iifwotola zyintu zicitika. Muzisi zimwi, bantu balasola kulikwabilila kwiinda mukubikka mincini iibazyibya kuti kuli ntenda, bayungizya maloko kuzijazyo alimwi babikka lubaya lujisi ntambo zyamagesi. Banji balakaka kuunka anze ciindi camasiku naa kukasya bana babo kusobanina anze kakunyina uubalanganya—masikati naa masiku. Cakutadooneka, lwaanguluko luyaabumana alimwi penzi eeli lilibonya kuti liyoozumanana.
2 Mumuunda wa Edeni, Saatani wakaamba kuti kutegwa kube lwaanguluko lwini-lwini bantu beelede kuzanduka kubweendelezi bwa Jehova. Eelo kaka ooko kwakali kubeja kubyaabi kapati! Masimpe, bantu nibacita nzyobayanda akusulaika nzyaamba Leza, ciinga cabantu coonse cilapenga. Bukkale oobu ibuyaabubija bulatujatikizya andiswe tobabelesi ba Jehova. Nikuba boobo, tujisi bulangizi bwakuti bantu bayakwaangununwa kucibi akububozi alimwi akukkomana aceeco Bbaibbele ncolyaamba kuti “lwaanguluko lwabulemu bwabana ba Leza.” (Lom. 8:21) Masimpe ngakuti, Jehova wakatalika kale kugwasya babelesi bakwe kulibambila kutambula lwaanguluko oolo. Munzila nzi?
3. Mulawo nzi Jehova ngwaapa basikutobela ba Kristo, alimwi ino mibuzyo nzi njotutiilange-lange?
3 Bwiinguzi bulajanika kuli ceeco sikulemba Bbaibbele Jakobo ncaakaamba kuti “mulawo uulondokede uuleta lwaanguluko.” (Amubale Jakobo 1:25.) Ma Bbaibbele aamwi asandulula majwi aaya kuti “mulawo uutupa kwaanguluka” naa “mulawo uulondokede walwaanguluko.” Kanji-kanji, bantu baswaanganya mulawo kukukasyigwa kucita zyintu zimwi, ikutali kulwaanguluko pe. Aboobo, ino “mulawo uulondokede uuleta lwaanguluko” ninzi? Alimwi ino mulawo ooyu utwaangulula buti?
MULAWO UUTWAANGULULA
4. Ino “mulawo uulondokede uuleta lwaanguluko” ninzi, alimwi mbaani bagwasyigwa anguwo?
4 “Mulawo uulondokede uuleta lwaanguluko” tuuli Mulawo wa Musa pe, nkaambo mulawo wa Musa wakali kupa kuti kusotoka mulawo kulibonye alimwi wakazuzikizyigwa muli Kristo. (Mt. 5:17; Gal. 3:19) Aboobo, ino mulawo nzi Jakobo ngwaakali kwaamba? Wakali kwaamba “mulawo wa Kilisito,” zimwi ziindi iwiitwa kuti “mulawo walusyomo” naa “mulawo wabantu baangulukide.” (Gal. 6:2; Lom. 3:27; Jak. 2:12) Aboobo, “mulawo uulondokede” ulabikkilizya zyoonse Jehova nzyayanda kulindiswe. Banakristo bananike alimwi “[aba]mbelele zimbi” boonse balagwasyigwa amulawo ooyu.—Joh. 10:16.
5. Nkaambo nzi mulawo walwaanguluko ncoutaminyi?
5 Mukwiimpana amilawo yazisi zinji, “mulawo uulondokede” taukatazyi kutobela alimwi tauminyi, pele ulijisi milawo alimwi anjiisyo zyuuba-uba. (1 Jo. 5:3) Jesu wakaamba kuti: “Joko lyangu talikatazyi kunyamuna, alimwi mukuli wangu muuba.” (Mt. 11:29, 30) Kuyungizya waawo, “mumulawo uulondokede” takuyandiki mulongo mulamfwu wazyintu ziteelede kucitwa naa zisubulo zikonzya kupegwa, nkaambo uyeeme aluyando alimwi ulembedwe mumizeezo amumyoyo kutali amabwe.—Amubale Bahebulayo 8:6, 10.
MBOUTWAANGULULA “MULAWO UULONDOKEDE”
6, 7. Ncinzi ncotukonzya kwaamba kujatikizya zyeelelo zya Jehova, alimwi nkaambo nzi mulawo walwaanguluko ncoupa kwaanguluka?
6 Zyintu Jehova nzyaambila zilenge zyakwe zyamaano kucita naa kutacita zigwasya nzizyo zilenge alimwi akuzikwabilila. Mucikozyanyo, atulange-lange milawo yeendelezya zilengwaleza. Bantu tabatongooki akaambo kakudyaamininwa amilawo eeyi. Muciindi caboobo, balalumba, nkaambo balizyi kuti milawo eeyi ilayandika. Aboobo, zyeelelo zya Jehova nzyotwiiya kwiinda “mumulawo uulondokede” wa Kristo, nzyakugwasya bantu.
7 Kuyungizya waawo, mulawo walwaanguluko ulatukwabilila akutuzumizya kucita zyintu zyoonse nzyotuyanda kakunyina kulicisa naa kunyonganya lwaanguluko lwabamwi. Aboobo, kutegwa tujane lwaanguluko lwini-lwini lwakucikonzya kucita zyintu zyoonse nzyotuyanda, tweelede kuyanda zyintu zili kabotu, zyalo zyeendelana abube alimwi anjiisyo zya Jehova. Munzila imwi, tweelede kwiiya kuyanda zyintu Jehova nzyayanda alimwi akusulaika zyintu nzyasulaika, mulawo walwaanguluko ulatugwasya kucita oobo.—Am. 5:15.
8, 9. Nimpindu nzi njobajana aabo bautobela mulawo walwaanguluko? Amupe cikozyanyo.
8 Akaambo kakuti tatulondokede, tacili cuubauba kukazya mizeezo mibi. Nikuba boobo, cakusyomeka nitutobela mulawo walwaanguluko, tulakonzya kugwasyigwa amulawo ooyu neliba lino. Mucikozyanyo: Ba Jay, nibakatalika kwiiya Bbaibbele, bakajisi cilengwa cakufweba tombwe. Ciindi nibakaiya kuti cilengwa cabo tacimukkomanisyi Leza, bakasala cakucita. Sena bakeelede kulibombya kuzisusi zyabo zyanyama naa kuli Jehova? Cabusongo, bakasala kubelekela Leza nikuba kuti moyo wakali kuuyanda tombwe kapati. Ino bakalimvwa buti nibakacizunda cilengwa eeci? Bakaamba kuti: “Ndakalimvwa kwaanguluka alimwi ndakakkomana kapati.”
9 Ba Jay bakaiya kwiinda kuli ceeco cakabacitikila kuti lwaanguluko lwanyika, lwalo iluzumizya bantu “kubikkila maano zyamubili,” lupa kuba muzike, kakuli lwaanguluko lwa Jehova lwalo lwaamba “kubikkila maano zyamuuya” lupa kwaanguluka alimwi lusololela “[ku]buumi aluumuno.” (Lom. 8:5, 6) Ino ba Jay bakazijana kuli nguzu zyakuzunda cilengwa cabo icakali kubapa buzike? Bakazijana kuli Leza kutali munguzu zyabo. Bakaamba kuti: “Ndakali kwiiya Bbaibbele cakusitikila, kupailila muuya uusalala, alimwi akuyandaula lugwasyo lwalo ndondakajana mumbungano ya Bunakristo.” Mbubwenya buyo, zyintu eezyi zilakonzya kutugwasya toonse nituyandaula lwaanguluko lwini-lwini. Atubone mbotukonzya kucita oobo.
IKUBIKKILA MAANO KU JWI LYA LEZA
10. Ino “[ku]langisisya” mumulawo wa Leza caamba nzi?
10 Mulugwalo lwa Jakobo 1:25 mubufwaafwi tubala kuti: “Ooyo uulangisisya mumulawo uulondokede uuleta lwaanguluko alimwi uuzumanana mulinguwo . . . unookkomene mukuucita.” Ibbala lya Cigiliki ilyakasandululwa kuti “uulangisisya” lyaamba kukotama kutegwa mulangisisye cintu cimwi, calo caamba kubikkila maano kapati. Masimpe, ikuti katuyanda kuti mulawo walwaanguluko utweendelezye mumizeezo amumoyo, tweelede kucita lubazu lwesu kwiinda mukwiiya Bbaibbele cakusitikila alimwi akuzinzibala kuyeeya zyintu nzyotubala.—1 Ti. 4:15.
11, 12. (a) Ino Jesu wakakankaizya buti mbociyandika kuti katupona kweelana akasimpe? (b) Kweelana acikozyanyo cili atala aawa, nintenda nzi bana-bana njobeelede kutantamuka?
11 Kulubazu lumwi, tweelede ‘kuzumanana’ naa kuliyumya mukubelesya nzyolyaamba Jwi lya Leza, kucita boobo kuyoopa kuti kasimpe kabe cibeela cabuumi bwesu. Jesu wakatondezya muzeezo nguwenya ooyu ciindi naakaambila bamwi ibakamusyoma kuti: “Kuti mwazumanana mujwi lyangu, muli basikwiiya bangu ncobeni, alimwi mulazyiba kasimpe, eelyo kasimpe kalamwaangununa.” (Joh. 8:31, 32) Bbuku limwi lyaamba kuti bbala lya ‘kuzyiba’ libelesyedwe aawa alimwi lyaamba kutondezya kulumba akaambo “kazyintu ‘zizyibidwe’ kuti zilaampindu kapati kuliyooyo uuzizyi.” Aboobo, ciindi nitupona kweelana akasimpe, ‘tulakazyiba’ cakumaninina. Mpoonya tulakonzya kwaamba kuti “majwi aa Leza alabeleka” mulindiswe, kutugwasya kuba abube bubotu kutegwa katutondezya bube bwa Taateesu wakujulu.—1 Te. 2:13.
12 Amulibuzye kuti, ‘Sena kasimpe ndikazyi ncobeni? Sena ndipona kweelana akasimpe? Sena kucili “lwaanguluko” lwamunyika ndondilombozya?’ Nalanga buumi bwakwe bwakubwana, mucizyi umwi iwakakomezyegwa abazyali Banakristo wakalemba kuti: “Kuti wakomenena mukasimpe, Jehova inga ulaanduwe lyoonse. Pele mebo kunyina nindakamuzyiba. Kunyina nindakaiya kusulaika zyintu nzyasulaika. Kunyina nindakali kuyeeya kuti nzyondakali kucita zilamujatikizya. Alimwi kunyina nindakaiya kupaila kulinguwe ikuti kandijisi mapenzi. Ndakali kulisyoma, calo ncindizyi lino kuti bwakali bufwubafwuba nkaambo kunyina ncindakazyi.” Calukkomano, mukuyakwaciindi mucizyi wakaliyeeya akubona kuti kuyeeya kwakwe tiikwakaluzi aboobo wakacinca kapati. Mane buya wakatalika kubeleka kali mupainiya waciindi coonse.
MUUYA UUSALALA ULAKONZYA KUTUGWASYA KWAANGULUKA
13. Ino muuya uusalala wa Leza utugwasya buti kutegwa twaanguluke?
13 Mulugwalo lwa 2 Bakolinto 3:17, tubala kuti: “Ooko kuli muuya wa Jehova, kuli lwaanguluko.” Mbuti muuya uusalala mbougwasya kutegwa tube alwaanguluko? Ulatugwasya kuba abube ibuyandika kulwaanguluko mbuli: “Luyando, lukkomano, luumuno, kukkazyika moyo, luzyalo, bubotu, lusyomo, kubomba moyo, kulilesya.” (Gal. 5:22, 23) Kuti kakunyina bube oobu, kwaambisya luyando, kunyina cisi cikonzya kuba alwaanguluko lwini-lwini—aaka nkaambo kamasimpe munyika mazuba aano. Icikkomanisya ncakuti, naakamana kwaamba mulongo wamucelo wamuuya, mwaapostolo Paulo wakayungizya kuti: “Kunyina mulawo uukasya zyintu eezyi pe.” Ino wakali kupandulula nzi? Kukomena kwamucelo wamuuya wa Leza takukonzyi kusinkililwa amulawo uuliwoonse. (Gal. 5:18) Nkaambo mulawo uuli boobo inga kautajisi makanze. Nkuyanda kwa Jehova kuti tube abube mbuli bwa Kristo kukabe kutamani akubutondezya kakunyina cisinkilila.
14. Muunzila nzi muuya wanyika moupa kuti aabo balibombya kulinguwo babe bazike?
14 Aabo bakkomana akaambo kamuuya wanyika alimwi ibatobela zisusi zyabo zyanyama balakonzya kuyeeya kuti balaangulukide. (Amubale 2 Petulo 2:18, 19.) Nikuba boobo, bwini mbwakuti tabaangulukide pe. Milawo minji ilayandika kutegwa igwasye kweendelezya kulombozya kubyaabi alimwi akulilemeka. Paulo wakaamba kuti: “Mulawo taubikkilwi muntu mululami pe, pele ubikkilwa bantu bataswiilili alimwi ibazangi.” (1 Ti. 1:9, 10) Alimwi mbazike kucibi, ibeendelezyegwa “[a]zisusi zyanyama,” simalelo uujisi lunya. (Ef. 2:1-3) Munzila imwi, bantu bali boobo bali mbuli tuuka itunjila mumutiba uujisi buci. Akaambo kakuti tuyanda buyo kulya, tulacegwa kakutanainda ciindi.—Jak. 1:14, 15.
KWAANGULULWA MUMBUNGANO YA BANAKRISTO
15, 16. Ino kuyanzana kwesu ambungano kuyandika buti, alimwi ndwaanguluko nzi ndotujana?
15 Kutegwa munjile mumbungano ya Banakristo, tiimwakalembela buya pe. Muciindi caboobo, mwakanjila mumbungano akaambo kakuti Jehova wakamukwela. (Joh. 6:44) Ncinzi icakapa kuti Leza acite boobo? Sena wakabona muntu mululami, imuntu uuyoowa Leza? Mulakonzya kwiingula kuti “peepe!” Pele ino wakabona nzi? Wakabona moyo uukonzya kutambula mulawo wakwe uupa lwaanguluko, moyo uukonzya kulibombya kumulawo. Mumbungano, Jehova waubamba moyo wanu kwiinda mukuusanina zyintu zyakumuuya, kumwaangulula kubukombi bwakubeja akusyoma mizimo alimwi akwiinda mukumuyiisya mbomukonzya kuba abube mbuli bwa Kristo. (Amubale Baefeso 4:22-24.) Aboobo, mulijisi coolwe cakuba akati kabantu balikke munyika ibakonzya kwaambwa kuti “bantu baangulukide” ncobeni.—Jak. 2:12.
16 Amubone kaambo aaka: Ciindi nimuli akati kabantu bamuyanda Jehova amoyo wabo woonse, sena mulayoowa? Sena mujanika kuti ciindi coonse mwiile kucebauka? Ciindi nimubandika abakwesu ku Ŋanda ya Bwami, sena mulazijatilila zyintu zyanu kamuyeeya kuti inga zyasweeka naa kubbigwa? Peepe! Mulimvwa kwaanguluka. Sena oobo mbomukonzya kulimvwa kubusena bumbi buyo? Peepe! Kuyungizya waawo, lwaanguluko ndomujana akati kabantu ba Leza matalikilo buyo aalwaanguluko luboola kumbele.
“LWAANGULUKO LWABULEMU BWABANA BA LEZA”
17. Ino kwaangululwa kwabantu kweendelana buti “[a]kuyubununwa kwabana ba Leza”?
17 Ciindi naakali kubandika lwaanguluko Jehova ndwabambilide babelesi bakwe baanyika, Paulo wakalemba kuti: “Zilenge zilalangila cakuyandisisya kuyubununwa kwabana ba Leza.” Mpoonya wakayungizya kuti: “Zilenge azyalo ziyooangununwa kubuzike bwakubola akuba alwaanguluko lwabulemu bwabana ba Leza.” (Lom. 8:19-21) Ibbala lyakuti “zilenge” lyaamba bantu bajisi bulangizi bwakupona anyika, balo bayoojana mpindu akaambo “[ka]kuyubununwa” kwabana ba Leza bananikidwe amuuya. Kuyubununwa ooku kuyootalika ciindi “bana” aaba ibanooli babusyigwa mumibili yamuuya, nibayootola lubazu antoomwe a Kristo kusalazya nyika eeyi kububi alimwi akufwutula “nkamu mpati” kubanjizya mubweende bupya bwazyintu.—Ciy. 7:9, 14.
18. Ino lwaanguluko luyooyungizyika buti kubantu bamvwida, alimwi ndwaanguluko luli buti ndobayookkomana andulo kumamanino?
18 Bantu ibayoonununwa, lino bayoojana lwaanguluko lupya—lwaanguluko kukuyunga kwa Saatani amadaimona aakwe. (Ciy. 20:1-3) Eelo kaka kuyooba kukatalukwa! Kumane waawo, bami abapaizinyina a Kristo bali 144,000 bayoozumanana kunununa bantu kwiinda mukubelesya mpindu yacipaizyo cacinunuzyo kusikila cibi ca Adamu alimwi akutalondoka zikagwisigwe cakumaninina. (Ciy. 5:9, 10) Akaambo kakuzumanana kusyomeka ciindi camasunko, bantu bayoojana lwaanguluko lulondokede Jehova ndwaakababambila—“lwaanguluko lwabulemu bwabana ba Leza.” Amuyeeye buyo! Cinooli cuubauba kucita cintu ciluzi kumeso aa Leza, nkaambo munoolondokede alimwi bube bwanu buyoocinca cakumaninina kweelana acinkozya ca Leza.
19. Ncinzi ncotweelede kuzumanana kucita mazuba aano kutegwa tuzumanane kuba munzila iitola kulwaanguluko lwini-lwini?
19 Sena mulalulombozya “lwaanguluko lwabulemu bwabana ba Leza”? Kuti kacili boobo, amuzumanane kweendelezyegwa “amulawo uulondokede uuleta lwaanguluko” mumizeezo alimwi amumoyo wanu. Inzya, amwiiye Magwalo lyoonse. Amupone kweelana akasimpe, alimwi amukapange kuba kanu. Amupailile muuya uusalala. Amugwasyigwe ambungano ya Banakristo alimwi acakulya cakumuuya Jehova ncapa. Mutamulekeli Saatani kuti amucenge mbubwenya mbwaakacenga Eva kukuyeeya kuti Leza ulaciindizya kukasya zyintu. Kwaamba masimpe, Diabolosi ulicenjede. Mbubwenya mbotuyoobona mucibalo citobela, tatweelede ‘kuzundwa a Saatani nkaambo tulizizyi nzila zyakwe zyabucenjezu.’—2 Ko. 2:11.
[Mibuzyo Yaciiyo]
[Zifwanikiso izili apeeji 9]
Sena kucili “lwaanguluko” lwamunyika ndondilombozya?
[Zifwanikiso izili apeeji 9]
Sena kupona kweelana akasimpe njenzila yabuumi bwangu?
