Sena Mulatondezya Bulemu Bwa Jehova?
Sena Mulatondezya Bulemu Bwa Jehova?
‘Tulatondezya bulemu bwa Jehova mbuli zimbonimboni.’—2 KO. 3:18.
INO INGA MWAINGULA BUTI?
Nikuba kuti tatulondokede, mbuti mbotukonzya kumulemeka Jehova?
Ino mipailo yesu alimwi akujanika kumiswaangano ya Bunakristo kutugwasya buti kutondezya bulemu bwa Leza?
Ncinzi cikonzya kutugwasya kuzumanana kulemeka Jehova?
1, 2. Nkaambo nzi ncotukonzya kwaamba kuti inga twacikonzya kwiiya bube bwa Jehova?
MUNZILA imwi toonse tulibakonzyede bazyali besu. Nkakaambo kaako tacigambyi pe kumvwa bamwi kabaambila mwana musankwa kuti, ‘Ulibakonzyede bauso.’ Mwana musimbi balakonzya kumwaambila kuti, ‘Undiyeezya banyoko.’ Alimwi kanji-kanji bana bacita nzyobabona kubazyali babo. Mbuti kujatikizya ndiswe? Sena inga twamwiiya Taateesu wakujulu, Jehova? Nikuba kuti tatunamubwene, tulakonzya kuzyiba bube bwakwe kwiinda mukubala Jwi lyakwe, kulangilila zyintu nzyaakalenga, alimwi akuzinzibala kuyeeya Magwalo ikapati zibalo zyaamba majwi alimwi amicito ya Mwana aa Leza, Jesu Kristo. (Joh. 1:18; Lom. 1:20) Inzya, inga twacikonzya kutondezya bulemu bwa Jehova.
2 Kabatanalengwa ba Adamu a Eva, Leza wakalisinizyide kuti bantu bayoocikonzya kucita kuyanda kwakwe, kutondezya bube bwakwe alimwi akumupa bulemu. (Amubale Matalikilo 1:26, 27.) Aboobo, nitubelekela Leza cakulyaaba, tweelede kutondezya bube bwayooyo wakatulenga. Ikuti naa twacita oobo, tunoojisi coolwe cakutondezya bulemu bwa Leza, kunyina makani ambotwakakomezyegwa, zilengwa naa lwiiyo ndotujisi. Nkaambo nzi? Akaambo kakuti “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—Mil. 10:34, 35.
3. Mbuti mbobakonzya kulimvwa Banakristo nibabelekela Jehova?
3 Banakristo bananike balatondezya bulemu bwa Jehova. Aboobo, mwaapostolo Paulo iwakananikwa amuuya wakaamba kuti: “Alimwi toonse, eelyo busyu bwesu butavwumbidwe cisani nobutondezya bulemu bwa Jehova mbuli zimbonimboni, tulasandulwa kuba mucinkozya cakwe, alimwi tulazumanana kuzwa mubulemu bumwi kuya mubulemu bumbi.” (2 Ko. 3:18) Ciindi Musa naakaseluka kuzwa ku Cilundu ca Sinai kajisi mabwe aakalembedwe Milawo iili Kkumi, busyu bwakwe bwakali kumweka nkaambo wakaambaula a Jehova. (Kul. 34:29, 30) Nikuba kuti cintu cili boobu tacinabacitikila Banakristo alimwi busyu bwabo tabumweki, balakkomana nibaambila bamwi kujatikizya Jehova, bube bwakwe, alimwi amakanze aakwe kujatikizya bantu. Mbuli zimbonimboni zyalubulo zimweka izyakaindi, bananike alimwi abanyina ibajisi bulangizi bwakupona anyika balatondezya bulemu bwa Jehova mubuumi bwabo alimwi amumulimo. (2 Ko. 4:1) Sena mulatondezya bulemu bwa Jehova kwiinda mukulilemeka kabotu alimwi akutola lubazu lyoonse mumulimo katuli basikukambauka ba Bwami?
TUYANDA KUTONDEZYA BULEMU BWA JEHOVA
4, 5. (a) Mbubwenya mbuli Paulo, ino ninkondo nzi njotujisi? (b) Ino cibi catujatikizya buti?
4 Cakutadooneka, mbuli babelesi ba Jehova, muzyintu zyoonse nzyotucita tuyanda kutondezya bulemu ku Mulengi wesu. Nikuba boobo, kanji-kanji nzyotuyanda kucita, tatuziciti. Paulo awalo cakamucitikila mbubwenya oobo. (Amubale Baloma 7:21-25.) Naakali kupandulula penzi eeli, Paulo wakalemba kuti: “Boonse bakabisya alimwi balalezya kubulemu bwa Leza.” (Lom. 3:23) Akaambo kakuti Adamu wakabisya, bantu boonse balazyalwa kabali bazike bacibi calo icili mbuli mwami silunya uubeendelezya boonse.—Lom. 5:12; 6:12.
5 Ino cibi ninzi? Ncintu cilicoonse citeendelani abube bwa Jehova, nzila zyakwe, zyeelelo alimwi akuyanda kwakwe. Cibi cilacinyonganya cilongwe muntu ncajisi a Leza. Cibi citupa kwiinzya ambaakani, mbubwenya mbuli muntu uubelesya buta mbwakonzya kufwusa muvwi pele wainzya ambaakani. Tulakonzya kucita cibi acaali naa cakutazyiba. (My. 15:27-31) Cibi cili banjide kapati bantu alimwi cipa kuti basinkilwe ku Mulengi wabo. (Int. 51:5; Is. 59:2; Kol. 1:21) Aboobo, bantu balaalilwa kucita nzyaamba Jehova alimwi balasweekelwa coolwe cipati cakutondezya bulemu bwa Leza. Cakutadooneka, cibi mbulwazi bubyaabi kapati mbobajisi bantu.
6. Mbuti mbotukonzya kutondezya bulemu bwa Leza nikuba kuti tatulondokede?
6 Nikuba kuti tuli bantu batalondokede, Jehova watondezya kuti ngu “Leza uupa bulangizi.” (Lom. 15:13) Jehova wapa nzila yakumanya cibi—cipaizyo cacinunuzyo ca Jesu Kristo. Kwiinda mukuba alusyomo mucipaizyo eeco, tatubi limbi “bazike bacibi,” pele tuli muciimo ncotukonzya kutondezya bulemu bwa Jehova. (Lom. 5:19; 6:6; Joh. 3:16) Kuti twazumanana kuba acilongwe cili boobu a Leza, ulatulongezya lino alimwi kumbele tuyooba bantu balondokede akuba abuumi butamani. Nikuba kuti tucili bantu batalondokede, tulilelekedwe nkaambo Leza utubona kuti tulakonzya kutondezya bulemu bwakwe.
KUTONDEZYA BULEMU BWA LEZA
7. Ncinzi ncotweelede kuzyiba lwesu tobeni kutegwa tutondezye bulemu bwa Leza?
7 Kutegwa tucikonzye kutondezya bulemu bwa Leza, tweelede kuzumina kuti tatulondokede. (2 Mak. 6:36) Tweelede kuzyiba kuti tatulondokede alimwi tweelede kusola kulyeendelezya kutegwa tucikonzye kutondezya bulemu bwa Leza. Mucikozyanyo, twacegwa mukakole kacibi cakweebelela zyintu ziletela muzeezo wakoonana, tweelede kuzumina kaambo kamasimpe kakuti tuyandika lugwasyo lwakumuuya akubweza ntaamu iiyandika kutegwa tugwasyigwe. (Jak. 5:14, 15) Eeyi inga yaba ntaamu yakusaanguna kutegwa tupone buumi bulemeka Leza cakumaninina. Mbotuli bakombi ba Jehova, tweelede kulilingula lyoonse kutegwa tubone naa tulasika azyeelelo zyakwe ziluleme. (Tus. 28:18; 1 Ko. 10:12) Kufwumbwa naa tumpenda twesu tuli buti, tweelede kuzumanana kutulwana kutegwa tucikonzye kutondezya bulemu bwa Leza.
8. Nikuba kuti tatulondokede, ncinzi ncotweelede kucita?
8 Jesu alikke ngookali muntu iwakaponede akufwa kakunyina kwaalilwa kumukkomanisya Leza alimwi wakatondezya bulemu bwa Leza. Nikuba kuti tatuli mbuli Jesu iwakalondokede, tulakonzya alimwi tweelede kwiiya cikozyanyo cakwe. (1 Pe. 2:21) Jehova ulakubona kusoleka kwesu nkotucita alimwi akuyaambele kwesu, alimwi ulatulongezya mumakanze eesu ngotujisi aakupa bulemu kulinguwe.
9. Ino Bbaibbele lijisi mulimo nzi mubuumi bwa Banakristo ibayanda kupona kweelana azyeelelo zya Leza?
9 Ijwi lya Jehova lilakonzya kutumunikila kutegwa tuyaambele. Kwiiya Magwalo cakusitikila akuzinzibala kuyeeya nitubala Bbaibbele kulayandika kapati. (Int. 1:1-3) Kubala Magwalo abuzuba kuyootugwasya kuyaambele. (Amubale Jakobo 1:22-25.) Luzyibo lwamu Bbaibbele ngomusemo walusyomo lwesu alimwi nenzila iikonzya kutugwasya kuba amakanze aakutantamuka cibi cipati alimwi akukkomanisya Jehova.—Int. 119:11, 47, 48.
10. Ino mupailo inga watugwasya buti kubelekela Jehova cakumaninina?
10 Acimbi ncotuyandika kutegwa tutondezye bulemu bwa Leza, ‘nkujatisya kupaila.’ (Lom. 12:12) Tweelede kupaila kutegwa Jehova atugwasye kuti tumubelekele munzila iimukkomanisya. Kutegwa tucite oobo tulakonzya kumulomba muuya uusalala, lusyomo luyumu, nguzu zyakuliyumya mumasunko azyakucikonzya ‘kuyiisya akupandulula ijwi lyakasimpe cakulomya.’ (2 Ti. 2:15; Mt. 6:13; Lk. 11:13; 17:5) Mbubwenya mbuli mwana mbwasyoma bausyi, andiswe tweelede kusyoma Taateesu wakujulu, Jehova. Kuti twamulomba kuti atugwasye kumubelekela cakumaninina, tulakonzya kusyoma kuti uyoocita oobo. Tatweelede kulimvwa kuti tulamukatazya pe. Muciindi caboobo, mumupailo atumutembaule, tumulumbe, tumulombe busolozi ikapati nituli mumapenzi alimwi akumulomba kuti atugwasye kumubelekela munzila iitondezya kuti tulemeka zyina lyakwe lisalala.—Int. 86:12; Jak. 1:5-7.
11. Mbuti mboitugwasya miswaangano yambungano kutondezya bulemu bwa Leza?
11 Leza wapa mbelele zyakwe kuti zilanganizyigwe “[a]muzike musyomesi uucenjede.” (Mt. 24:45-47; Int. 100:3) Ciinga camuzike cilayandisisya kubona bakombinyina mbobatondezya bulemu bwa Jehova. Miswaangano yesu ilatubambulula kutegwa tube babelesi Banakristo mbubwenya sikusuma zisani mbwabambulula zisani zyesu kutegwa tuboneke kabotu. (Heb. 10:24, 25) Aboobo, tweelede kubamba ciindi, nkaambo kuti twaba acilengwa cakumuka, tunooindwa twaambo tumwi twakumuuya tuyandika kutubambulula kutegwa tuyaambele mbotuli babelesi ba Jehova.
ATUMWIIYE LEZA
12. Ino inga twamwiiya buti Leza?
12 Kuti katuyanda kutondezya bulemu bwa Jehova, tweelede ‘kumwiiya Leza.’ (Ef. 5:1) Nzila imwi motukonzya kumwiiya Jehova nkulanga zyintu mbwazibona walo. Kupona munzila iimpene citondezya kutamulemeka alimwi cilakonzya kutunyonganya kumuuya. Mbwaanga tupona munyika yeendelezyegwa amubi, Saatani Diabolosi, tweelede kubeleka canguzu kusulaika zyintu nzyasulaika Jehova akuyandisya zyintu nzyayanda. (Int. 97:10; 1 Jo. 5:19) Tweelede kusyoma cakumaninina kuti nzila mbotu ilikke yakubelekela Leza nkucita zyintu zyoonse kutegwa alemekwe.—Amubale 1 Bakolinto 10:31.
13. Nkaambo nzi ncotweelede kucisulaika cibi, alimwi kucita boobo kuyootugwasya kucita nzi?
13 Jehova ulacisulaika cibi, aboobo andiswe tweelede kucisulaika. Masimpe, tweelede kusolekesya kusikila mpotugolela kutantamuka cibi kutegwa tutazundwi ancico. Mucikozyanyo, tweelede kukazya luleyo, icibi cikonzya kutupa kuti tuteeleli kulemeka Leza. (Dt. 13:6-9) Aboobo, tatweelede kujatana abasiluleyo naa muntu uuliwoonse uulyaamba kuti mukwesu pele talemeki Leza. Oobu mboceelede kuba nikuba kuti muntu ooyo uzwa mumukwasyi wesu. (1 Ko. 5:11) Tatukonzyi kugwasyigwa kwiinda mukupa twaambo ikuzula kukazya kwabasiluleyo naa aabo ibataiyandi mbunga ya Jehova. Mubwini, ciletela ntenda kumuuya alimwi taciluzi kubala makani aabo, kunyina makani naa alembedwe buya naa ajanwa aa Intaneti.—Amubale Isaya 5:20; Matayo 7:6.
14. Mbube nzi bweelede kulibonya mulindiswe ciindi nitutondezya bulemu bwa Leza, alimwi nkaambo nzi?
14 Aimbi nzila mbotu kapati motukonzya kumwiiya Taateesu wakujulu nkutondezya luyando. Inzya, tweelede kutondezya luyando mbulinguwe. (1 Jo. 4:16-19) Mubwini, luyando ndotujisi akati kesu lutuzyibya kuti tuli basikwiiya ba Jesu alimwi akuti tuli babelesi ba Jehova. (Joh. 13:34, 35) Nikuba kuti kutalondoka kwesu zimwi ziindi kulatuzunda, tweelede kusolekesya kutegwa tutondezye luyando ciindi coonse. Kuba aluyando alimwi abube bumbi bwabunaleza cilakonzya kutugwasya kutantamuka kucita zyintu zibyaabi.—2 Pe. 1:5-7.
15. Mbuti luyando mbolucijatikizya cilongwe cesu abambi?
15 Luyando lutupa kuti tucitile bantu bambi zibotu. (Lom. 13:8-10) Mucikozyanyo, kuyanda muntu ngotukwetene limwi kuyoopa kuti bulo bwakukwatanina butasofwaazyigwi. Kuyanda baalu alimwi akulemeka mulimo wabo kuyootugwasya kubamvwida alimwi akulibombya kubusolozi bwabo. Ibana bayanda bazyali babo balabamvwida akubalemeka alimwi tabaambi zyintu zibi kujatikizya mbabo. Kuti katubayanda bantuma, tatukababoni kuti mbantu buyo naa kwaamba majwi aatapi bulemu kulimbabo. (Jak. 3:9) Alimwi ibaalu ibayanda mbelele zya Leza bayoozilanganya calubomba.—Mil. 20:28, 29.
16. Ino kutondezya luyando kuyootugwasya buti mumulimo wesu?
16 Luyando alimwi lweelede kulibonya mumulimo wesu. Akaambo kakuti tulamuyanda kapati Jehova, tatukazungaani ciindi bamukamwini ŋanda nibatayandi kuswiilila naa nibaamba majwi mabi. Muciindi caboobo, tuyoozumanana kukambauka makani mabotu. Luyando luyootupa kulibambila kabotu alimwi akuba basungu mumulimo. Kuti katumuyanda ncobeni Leza alimwi abasimukoboma, mulimo wakukambauka Bwami tatukauciti buyo cakwiinzya mulawo. Muciindi caboobo, tuyakuubona kuti ncoolwe cipati alimwi tuyakuubeleka calukkomano.—Mt. 10:7.
AMUZUMANANE KUMULEMEKA JEHOVA
17. Nkaambo nzi ncotugwasyigwa akaambo kakuzumina kuti tulalezya kubulemu bwa Leza?
17 Bantu banji munyika tababikkili maano mbwaali mapati makani aacibi, pele swebo tulacita oobo. Eeci cipa kuti tubone kuti tweelede kulwana tumpenda twesu tubyaabi. Kuzumina kuti tatulondokede citugwasya kuti tuyiisye manjezeezya eesu kutegwa katucita kabotu zyintu ciindi cibi nicinjila mumoyo wesu. (Lom. 7:22, 23) Masimpe, tulakonzya kukompama, pele Leza ulakonzya kutuyumya kutegwa tucite ciluzi mubukkale buli boonse.—2 Ko. 12:10.
18, 19. (a) Ncinzi citugwasya kutegwa tuzwidilile mukulwana myuuya mibi? (b) Ino tweelede kuba amakanze nzi?
18 Kuti katuyanda kulemeka Jehova, acimbi ncotweelede kucita nkulwana myuuya mibi. Zilwanyo zizwa kuli Leza zipa kuti tuzwidilile kucita boobo. (Ef. 6:11-13) Saatani taleki kusola kubweza bulemu bwa Jehova, ibulemu ibweelede nguwe alikke. Kuyungizya waawo, Diabolosi ulazumanana kusoleka kapati kutegwa anyonyoone cilongwe cesu a Jehova. Eelo kaka Saatani ulausa ciindi swebo alimwi amamiliyoni amwi aabaalumi, bamakaintu alimwi abana batalondokede nituzumanana kusyomeka akulemeka Leza! Aboobo, atuzumanane kutembaula Jehova, mbuli zilenge zyakujulu iziimba kuti: “Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zyintu zyoonse, alimwi akaambo kakuyanda kwako zyakabako alimwi zyakalengwa.”—Ciy. 4:11.
19 Atube amakanze aakuzumanana kutembaula Jehova ziyume zitete. Ncobeni, Leza ulakkomana nabona bantu banji basyomeka ibasoleka kusikila mpobagolela kumwiiya akutondezya bulemu bwakwe. (Tus. 27:11) Tweelede kwiimba mbuli Davida iwakaimba kuti: “Ndakulumba amoyo wangu woonse, O Mwami Leza wangu. Njoolemeka izina lyako lyoonse.” (Int. 86:12) Eelo kaka tulabulangila buzuba oobo ciindi nituyootondezya bulemu bwa Jehova cakulondoka alimwi akumutembaula kukabe kutamani! Bantu basyomeka mbobayookkomana oobo! Sena mulatondezya bulemu bwa Jehova Leza lino kamusyoma kuti muyoocita oobo kukabe kutamani?
[Mibuzyo yaciiyo]
[Zifwanikiso izili apeeji 27]
Sena mulatondezya bulemu bwa Jehova mumbazu eezyi?
