Amuukwabilile Muuya Mubotu Wambungano
Amuukwabilile Muuya Mubotu Wambungano
“Iluzyalo lwa Mwami wesu Jesu Kilisito alube andinywe akaambo kamuuya ngomutondezya.”—FLP. 4:23.
MBUTI MBOTUKONZYA KUKULWAIZYA MUUYA MUBOTU WAMBUNGANO . . .
․․․․․
ciindi nituli abakwesu?
․․․․․
kwiinda mukuba basungu mumulimo wakukambauka?
․․․․․
kwiinda mukuyubununa zibi zipati?
1. Nkaambo nzi mbungano zyaku Filipi aku Tuataira ncozyakalumbaizyigwa?
BANAKRISTO bamumwaanda wakusaanguna mu Filipi bakali bacete kumubili. Nokuba boobo, bakali baabi alimwi bakatondezya citondezyo cibotu caluyando kubasyominyina. (Flp. 1:3-5, 9; 4:15, 16) Kumamanino aalugwalo lwakasololelwa amuuya ndwaakabalembela, mwaapostolo Paulo wakalemba kuti: “Iluzyalo lwa Mwami wesu Jesu Kilisito alube andinywe akaambo kamuuya ngomutondezya.” (Flp. 4:23) Akaambo kakuti muuya uuli boobo wakatondezyegwa a Banakristo baku Tuataira, Jesu Kristo wakabaambila kuti: “Ndiliizyi milimo yako, luyando lwako, lusyomo lwako, mulimo wako alimwi akuliyumya kwako, akuti milimo njocita lino ilayiinda eeyo yakusaanguna.”—Ciy. 2:19.
2. Ncinzi ncotucita kutegwa kube muuya ngoitondezya mbungano yesu?
2 Mbungano imwi aimwi ya Bakamboni ba Jehova mazuba aano ilijisi muuya umwi ngoitondezya kapati. Mbungano zimwi zilizyibidwe kapati akaambo kakutondezya luyando. Zimwi zilapa cikozyanyo cibotu kapati mukusumpula mulimo wakwaambilizya Bwami cabusungu alimwi akubikkila maano kapati kumulimo waciindi coonse. Ciindi umwi aumwi wesu natondezya muuya mubotu, tupa kuti kube lukamantano mumbungano akugwasya kuti iiyaambele kumuuya. (1 Ko. 1:10) Kulubazu lumwi, muuya uutali kabotu ulakonzya kutupa koona kumuuya, kujoka munsi kumuuya nikuba kusisa zibi mumbungano. (1 Ko. 5:1; Ciy. 3:15, 16) Ino mbungano yanu ijisi muuya uuli buti? Mbuti nywebo kumugama mbomukonzya kugwasya kusumpula muuya mubotu mumbungano?
AMUKULWAIZYE MUUYA MUBOTU
3, 4. Mbuti mbotukonzya ‘kumulumba Jehova mumbungano mpati’?
3 Sintembauzyo wakaimba kuti: “Lino njookulumba [Jehova] mumbungano impati, njookutembaula akati kabantu banji.” (Int. 35:18) Sintembauzyo tanaakawayawaya kutembaula Jehova ciindi naakali ababelesi ba Leza bambi. Miswaangano yansondo ansondo, kubikkilizya Ciiyo ca Ngazi Yamulindizi zilatupa coolwe cakutondezya busungu ciindi nitupa bwiinguzi akwaamba calusyomo. Toonse tweelede kulibuzya kuti: ‘Sena ndilacibelesya cakumaninina coolwe cakutola lubazu mumiswaangano? Sena ndilalibambila kabotu akupa bwiinguzi bugwasya? Mbondili silutwe wamukwasyi, sena ndilabagwasya bana bangu kulibambila bwiinguzi ciindi kaciciliko akubayiisya kwiingula mumajwi aabo?’
4 Sintembauzyo Davida wakatondezya kweendelana kuliko akati kakukkalikana kwa moyo wesu akwiimba. Wakaamba kuti: “Ulindikkede moyo wangu O Leza, ulindikkede ncobeni moyo wangu, njooimba akukutembaula.” (Int. 57:7, BT) Nyimbo zibelesyegwa kumiswaangano ya Bunakristo zitupa coolwe cibotu ‘cakwiimba akutembaula’ Jehova amoyo uukkalikene. Ikuti katutazizyi nyimbo zimwi, tweelede kwiiya mboziimbwa ciindi Cakukomba Mumukwasyi. Atube amakanze ‘akwiimbila Jehova nitucipona akumutembaula nituciliko.’—Int. 104:33.
5, 6. Mbuti mbotukonzya kusamausya alimwi akwaaba kuli bamwi, alimwi kucita boobo kusumpula nzi mumbungano?
5 Kusamausya bakwesu abacizyi ninzila aimbi njotukonzya kusumpula muuya mubotu mumbungano. Mucaandaano camamanino calugwalo ndwaakalembela bana Hebrayo, Paulo wakabikkilizya akukulwaizya kwakuti: “Luyando lwanu lwabunyina aluzumanane. Mutalubi kusamausya beenzu.” (Heb. 13:1, 2) Kubatamba kucakulya balangizi beendeenda alimwi abamakaintu babo naa babelesi baciindi coonse mumbungano ninzila mbotu yakusamausya. Alimwi amubayeeye bamukabafwu, bazyali bali balikke naa ibamwi bakonzya kugwasyigwa kwiinda mukutusangana aciindi cakulya naa aciindi cakukomba mumukwasyi.
6 Paulo wakalailila Timoteyo kuti akulwaizye bamwi “kuti kabacita zibotu, kababeleka milimo mibotu minji, kabalisungwide kupa cabuuya, kabalibambilide kwaabana zyintu abamwi, eelyo banooliyobweda ntalisyo mbotu yaciindi cakumbele, ikutegwa bajatisye buumi bwini-bwini.” (1 Ti. 6:17-19) Paulo wakali kwaamba kuti bakombinyina beelede kuba amuuya wabwaabi. Nimuba muziindi naakatazya mali, tulakonzya kusumpula muuya wabwaabi. Nzila imwi mbotu yakucita boobo, nkubanyamuna mumootokala aabo bayandika lugwasyo, ciindi nituunka mumulimo wamumuunda alimwi akumiswaangano. Ncinzi ncobakonzya kucita aabo bagwasyigwa amilimo yaluzyalo iili boobo? Balakonzya kukulwaizya muuya mubotu mumbungano kuti batondezya kulumba, ambweni kwiinda mukupa ncobakonzya kugwasyilizya kubbadelela mungwimba azimwi ziyandika kutegwa mootokala kaweenda. Kuyungizya waawo, kujana ciindi cinji cakuba abakwesu alimwi abacizyi bakumuuya kulakonzya kubapa kuti balimvwe kuti balayandwa alimwi akuyandika. Ciindi nitucita milimo mibotu minji “[ku]baciinga cesu calusyomo” alimwi akulibambila kwaaba ciindi cesu alimwi azyintu nzyotujisi kulimbabo, tuyooyungizya luyando lwesu kulimbabo alimwi akugwasya kusumpula muuya mubotu mumbungano.—Gal. 6:10.
7. Mbuti kubamba twaambo twamaseseke tujatikizya bamwi mbocigwasya kukwabilila muuya mubotu mumbungano?
7 Pele amuyeeye twaambo atumbi tukonzya kuyumya luyando abasyomima: bulongwe alimwi akubamba maseseke. (Amubale Tusimpi 18:24.) Balongwe beni-beni balabamba maseseke. Ciindi bakwesu nibayubununa twaambo twabo twamaseseke alimwi ambobalimvwa kulindiswe alimwi kabasyomede kuti makani aaya taakayubununwi, luyando luliko kale luyooyuma. Mumbungano, atusumpule luyando iluli mbuli lwamumukwasyi kwiinda mukuba balongwe basyomeka ibakonzya kubamba twaambo twamaseseke.—Tus. 20:19.
AMUSUNGWAALE MUMULIMO WAKUKAMBAUKA
8. Ino ndulayo nzi bana Laodikeya ndobakapegwa, alimwi nkaambo nzi?
8 Naakali kwaambila mbungano yaku Laodikeya, Jesu wakaamba kuti: “Ndiliizyi milimo yako, kuti totontoli alimwi topyi pe. Nocali cibotu ikuti nowali kutontola naa kupya. Aboobo, akaambo kakuti ukasaala buyo alimwi topyi naa kutontola, ndilakuswida kuzwa mukanwa lyangu.” (Ciy. 3:15, 16) Bana Laodikeya tiibakali basungu mumulimo wa Bunakristo. Eeci cakajatikizya mbobakali kubabona bamwi mumbungano. Aboobo, Jesu caluyando wakabaambila kuti: “Aabo boonse mbondiyanda ndilabasinsa akubalaya. Aboobo sungwaala akweempwa.”—Ciy. 3:19.
9. Ino mbotuubona mulimo wakukambauka cuujatikizya buti muuya wambungano?
9 Kutegwa mumbungano kube muuya mubotu, tweelede kusungwaala mumulimo wakambauka. Makanze aamwi mbungano ncoiliko, nkuyandaula bantu bali mbuli mbelele muzilawo akubayiisya kasimpe. Aboobo, tweelede kutola lubazu cabusungu mumulimo wakugwasya bamwi kuba basikwiiya mbubwenya mbwaakacita Jesu. (Mt. 28:19, 20; Lk. 4:43) Ikuti naa twaba basungu kapati mumulimo, tuyookamantana akuba “basimilimonyina a Leza.” (1 Ko. 3:9) Kubona mbotubeleka limwi mumuunda kabapandulwida bamwi nzyobasyoma alimwi akutondezya kulumba kuzyintu zyakumuuya, cilatukulwaizya kuti katubayanda alimwi akubalemeka kapati. Alimwi kubelekela antoomwe mumulimo wamumuunda cipa kukamantana mumbungano.—Amubale Bafilipi 1:27.
10. Ino kusoleka kwesu kutegwa katucita kabotu mumulimo wakukambauka kubajatikizya buti bamwi mumbungano?
10 Kusoleka kwesu kutegwa katucita kabotu mumulimo wakukambauka kulabagwasya bamwi. Kubabikkila maano kapati bantu mbotujana mumulimo, alimwi akubeleka canguzu kuti tubasike amoyo nitubayiisya, citupa kuba basungu mumulimo wakukambauka. (Mt. 9:36, 37) Kuti naa katuli basungu, aabo mbotubeleka limwi abalo balaba basungu. Jesu wakatuma basikwiiya bakwe kuti bakakambauke kabali bobilo-bobilo ikutali aumwi alikke pe. (Lk. 10:1) Eeci cakali kupa kuti bakulwaizyanye akwiiya kuli umwi amweenzyinyina alimwi cakabakulwaizya kuba basungu mumulimo. Eelo kaka tulalumba kubeleka abasikumwaya ba Bwami basungu! Busungu bwabo bulatukulwaizya kutegwa tuzumanane mumulimo wakukambauka.—Lom. 1:12.
AMUKUCENJELELE KUTONGOOKA AKUSISA ZIBI
11. Ino muuya nzi bana Israyeli bamwi mumazuba a Musa ngobakajisi, alimwi ino eeci cakabajatikizya buti?
11 Kwakainda buyo nsondo zisyoonto kuzwa bana Israyeli nibakaba cisi, bakatalika kutakkutila azyintu nzyobakajisi alimwi akutongooka. Eeci cakabapa kuzangila Leza abaabo mbaakali kubelesya. (Kul. 16:1, 2) Akati kabana Israyeli ibakazwa ku Egepita, mbasyoonto buyo bakazumizyigwa kunjila mu Nyika Yakasyomezyegwa. Mbwaakalimvwa Musa ciindi bana Israyeli nibakatondezya muuya wakuzanga cakapa kuti awalo atazumizyigwi kunjila mu Nyika Yakasyomezyegwa. (Dt. 32:48-52) Ncinzi ncotukonzya kucita mazuba aano kutegwa tutabi amuuya wakutongooka?
12. Mbuti mbotukonzya kutantamuka muuya wakutongooka?
12 Tweelede kucenjela kutegwa tutabi amuuya wakutongooka. Nokuba kuti kulicesya alimwi akulemeka baabo bali mubweendelezi kulakonzya kutugwasya, pele alimwi tweelede kubikkila maano kujatikizya bantu mbotuyanzana limwi. Kutasala kabotu zyakulikondelezya naa kutola ciindi cilamfwu kuyanzana ambomubeleka limwi naa basicikolonyoko batatobeli zyeelelo ziluleme kulakonzya kumuletela mapenzi. Ncamaano kutayanzana abantu bajisi muuya wakutongooka naa muuya wakulicitila kufwumbwa ncobayanda.—Tus. 13:20.
13. Ino muuya mubi wakutongooka ulakonzya kusololela kumicito nzi iimbi iikonzya kunyonganya mbungano?
13 Muuya mubi wakutongooka ulakonzya kupa kuti bamwi bacileke kucita kabotu kumuuya. Mucikozyanyo, kutongooka kulakonzya kunyonganya luumuno alukamantano mumbungano. Kuyungizya waawo, kutongooka bakwesu kulakonzya kubapa kulimvwa bubi alimwi kulakonzya kupa kuti zibi zyakuvwiya ziindile. (Lev. 19:16; 1 Ko. 5:11) Basikutongooka bamwi mumbungano yamumwaanda wakusaanguna bakali ‘kunyansya beendelezi alimwi bakali kusampaula baabo balemekwa.’ (Jud. 8, 16) Kutongooka kuli boobu kujatikizya baalumi ibakapedwe mikuli mumbungano kunyina naakakukkomanina Leza pe.
14, 15. (a) Mbuti mbungano yoonse mboikonzya kujatikizyigwa kuti twalekela cibi? (b) Ncinzi ncotukonzya kucita kuti twazyiba kuti kuli cibi mukwesu naa mucizyi umwi ncasisa?
14 Ncinzi ncotukonzya kucita kuti twazyiba kuti kuli cibi umwi ncasisa, ambweni ulaciindizya kunywa bukoko, uleebelela zyintu ziletela muzeezo wakoonana, naa upona buumi bwakutalilemeka? (Ef. 5:11, 12) Kusisa cibi cipati boobu, kulakonzya kupa kuti Jehova agusye muuya wakwe uusalala mumbungano. Eeci cilakonzya kunyonganya muuya wambungano yoonse. (Gal. 5:19-23) Mbubwenya mbuli Banakristo baku Korinto bakusaanguna mbobakeelede kugusya cibi cili coonse, mazuba aano muuya uuliwoonse mubi taweelede kuzumizyigwa mumbungano kutegwa tukwabilile muuya mubotu wambungano. Ncinzi ncomukonzya kucita kutegwa kube luumuno mumbungano?
15 Mbubwenya mbokwaambwa kale, cilayandika kapati kubamba maseseke mutwaambo tumwi, ikapati kuti ibamwi batwaambila mbobalimvwa alimwi amizeezo yabo. Taciluzi alimwi citondezya kubula luyando kumwaya makani aamaseseke aajatikizya muntu umwi. Nokuba boobo, ikuti cibi cipati cacitwa aabo bapedwe nguzu zyamu Magwalo kulanganya twaambo—ibaalu mumbungano beelede kuzibisyigwa. (Amubale Levitiko 5:1.) Aboobo, ikuti naa tulizyi kuti mukwesu naa mucizyi wakacita cibi cili boobo, tweelede kumukulwaizya kuti akabaambile baalu akulomba kugwasyigwa. (Jak. 5:13-15) Pele kuti tanaacita oobo muciindi ceelede, nkokuti tweelede kubaambila baalu kujatikizya cibi eeco.
16. Mbuti kuyubununa zibi zipati mbokugwasya mukukwabilila muuya mubotu wambungano?
16 Mbungano ya Banakristo mbusena bwakumuuya bwalukwabililo, alimwi tweelede kubukwabilila kwiinda mukuyubununa zibi zipati. Ikuti baalu bamugwasya muntu wacita cibi alimwi walutambula lulayo akweempwa, nkokuti muuya wambungano tuucili muntenda. Mbuti kuti muntu iwacita cibi cipati tanaaempwa alimwi kunyina naalutambula lulayo lwabaalu? Sikucita cibi ulagusyigwa mumbungano. Eeci cipa kuti muuya uusofwaazya ‘unyonyoonwe’ alimwi akukwabilila muuya mubotu wambungano. (Amubale 1 Bakolinto 5:5.) Kwaamba masimpe, kutegwa tukwabilile muuya mubotu wambungano tweelede kubweza ntaamu zili kabotu, tweelede kubelekela antoomwe akabunga kabaalu, akukwabilila buumi bwabakombima.
AMUKULWAIZYE “LUKAMANTANO LWAMUUYA”
17, 18. Ncinzi ciyootugwasya “kuzumanana alukamantano lwamuuya”?
17 Kwiinda “[muku]zumanana kubikkila maano kukuyiisya kwabatumwa,” basikutobela ba Jesu bakagwasyilizya mukusumpula muuya walukamantano mumbungano. (Mil. 2:42) Bakalumba lulayo lwamu Magwalo alimwi abusolozi bwakazwa kubaalu. Akaambo kakuti baalu bamazuba aano babelekela antoomwe aciinga camuzike musyomesi uucenjede, toonse mumbungano tulakulwaizyigwa akugwasyigwa kutegwa tuzumanane kukamantana. (1 Ko. 1:10) Ciindi nitutambula malailile aayeeme munjiisyo zyamu Bbaibbele kuzwa kumbunga ya Jehova akutobela busolozi bwabaalu, tulatondezya kuti “[tula]soleka camoyo woonse kuzumanana alukamantano lwamuuya mucaanzyo caluumuno.”—Ef. 4:3.
18 Atusoleke kusikila mpotugolela kutegwa tukwabilile muuya mubotu mumbungano. Ikuti twacita oobo, tuli masimpe kuti ‘iluzyalo lwa Mwami wesu Jesu Kilisito luyooba andiswe akaambo kamuuya ngotutondezya.’—Flp. 4:23.
[Mibuzyo yaciiyo]
[Cifwanikiso icili apeeji 19]
Sena mulakulwaizya muuya mubotu kwiinda mukulibambila bwiinguzi bugwasya?
[Cifwanikiso icili apeeji 20]
Amukulwaizye muuya mubotu kwiinda mukuzizyiba kabotu nyimbo zyesu
