Nkaambo nzi Ncotweede Kusolole lwa Amuya wa Leza?

“Nduwe Leza wangu. Muuya wako mubotu undeenzye munzila iiluleme.”—INT. 143:10.

1. Ncinzi ciyandika kuti kamuli mulweendo kuya kubusena nkomutazyi?

AMWEEZYEEZYE kuti muli mulweendo kuya kubusena nkomutazyi. Mweenda amuntu ngomusyoma alimwi iwakaliko kale kubusena oobo. Kuti kaizyi kabotu nzila iiya kubusena oobu, ulakonzya kumutondezya. Tamukasweeki pe kuti mwatobela malailile ngamupa.

2, 3. (a) Muuya nzi uulaanguzu kapati ngwaakabelesya Jehova kaindi loko? (b) Nkaambo nzi ncotweelede kulangila kuti muuya uulaanguzu uutalibonyi wa Leza utweendelezye mazuba aano?

² Tuyandika busolozi notuli munzila iitola kubuumi. Tupango twakusaanguna mu Bbaibbele tulacipandulula cintu cimwi cikonzya kutusololela. Kalyaamba zyintu Jehova nzyaakacita kaindi loko, Bbaibbele mubbuku lya Matalikilo lyaamba kuti: “Kumatalikilo Leza wakalenga ijulu anyika.” Naakali kulenga, wakatuma muuya ulaanguzu kapati, nkaambo cibalo caamba kuti: “Muuya wa-Leza wakali kukumba-kumba.” (Matl. 1:1, 2) Jehova wakabelesya muuya wakwe uusalala kulenga zyintu zyoonse alimwi tulapona akaambo kanguwo.—Job. 33:4; Int. 104:30.

³ Jehova wakabelesya muuya uusalala kutulenga, pele alimwi ulaubelesya kutusololela. Mwana aa Leza, Jesu, wakaambila basikwiiya bakwe kuti: “Muuya wakasimpe, uyoomugwasya kukamvwisya kasimpe koonse.” (Joh. 16:13) Aboobo, ino muuya ooyu ninzi alimwi nkaambo nzi ncotweelede kuyanda kusololelwa anguwo?

Ino Muuya Uusalala Ninzi?

4, 5. (a) Ino bantu basyoma Butatu bayeeya kuti muuya uusalala ninzi? (b) Mbuti mbomukonzya kuupandulula muuya uusalala?

⁴ Cakutadooneka, bamwi bantu mbomukambaukila basyoma kuti Leza uli mubutatu. Bantu basyoma Butatu bayeeya kuti muuya uusalala muntu weelene a Leza Taata. (1 Ko. 8:6) Cikkomanisya ncakuti, kweelana abbuku lipandulula mabala, bbala lyakasandululwa kuti muuya uusalala talyaambi cintu cuumi citalibonyi pe.

⁵ Aboobo, ino muuya uusalala mubwini ninzi? Mu Bbaibbele ibbala lya Chihebrayo lyakuti ruʹach lisanduludwe kuti “muuya” mulugwalo lwa Matalikilo 1:2, mutupango tumwi lisanduludwe kuti “muuwo” naa lilasandululwa amabala aatondezya kuti ninguzu zitalibonyi. (Amweezyanisye a Matalikilo 3:8; 8:1.) Mbubwenya mbuli muuwo mboutalibonyi pele nzyoucita zilalibonya, aboobo muuya uusalala tali muntu alimwi tuulibonyi pele nzyoucita zilalibonya. Muuya ooyu ninguzu zizwa kuli Leza nzyabelesya mubantu naa muzyintu kutegwa acite ncayanda. Aboobo, sena cilakatazya kusyoma kuti muuya ooyu mubotu uzwa ku Muntu Uusalala, Leza Singuzuzyoonse? Peepe!—Amubale Isaya 40:12, 13.

6. Ncinzi Davida ncaakalomba kuli Jehova ciyandika kapati?

⁶ Sena Jehova ulakonzya kuzumanana kubelesya muuya wakwe kutusololela mubuumi bwesu? Wakasyomezya sintembauzyo Davida kuti: “Njookulaya akukutondezya inzila njoelede kutola.” (Int. 32:8) Sena Davida wakali kuyanda kusololelwa? Inzya, wakalomba Jehova kuti: “Undiiyisye kucita luyando lwako, nkaambo nduwe Leza wangu. Muuya wako mubotu undeenzye munzila iiluleme.” (Int. 143:10) Andiswe tweelede kuba aaluyandisisyo lwakusololelwa amuuya wa Leza. Nkaambo nzi? Atulange-lange twaambo tone.

Tatukonzyi Kulisololela Tobeni

7, 8. (a) Nkaambo nzi ncotutakonzyi kulisololela tobeni kakunyina kusololelwa a Leza? (b) Amupe cikozyanyo citondezya kaambo ncotuteelede kulisololela mubweende bwazyintu oobu bubyaabi.

⁷ Cakusaanguna, tweelede kuyanda kusololelwa amuuya wa Leza nkaambo tatukonzyi kulisololela tobeni. “Kusololela” caamba “kutondezya nzila yeelede kutobelwa.” Nokuba boobo, Jehova tanaakatulenga anguzu zyakukonzya kucita boobo, ikapati mbotuli muciimo cakutalondoka. Musinsimi wakwe Jeremiya wakalemba kuti: “O Jehova, ndizi kuti muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.” (Jer. 10:23) Nkaambo nzi? Jeremiya wakacimvwisya ncaakaamba Leza icipa kuti katutacikonzyi kulisololela tobeni. Kaamba mbotubede mumoyo Jehova wakaamba kuti: “Moyo wamuntu uleena kwiinda zintu zyoonse, ulijisi bulwazi bukaka kupona, taakwe uukonzya kuzibisya mbuubede.”—Jer. 17:9; Mt. 15:19.

⁸ Sena inga tiikwaba kulibikka muntenda kuti muntu uutabuzyi busena watalika kweenda munkanda kakunyina muntu uumusololela? Ulakonzya kubikka buumi bwakwe muntenda nkaambo tazyi mbwakonzya kufwutuka bukkale bukatazya naa kujana nzila mbwakonzya kusika nkwaya. Mbubwenya buyo imuntu uuyeeya kuti ulakonzya kulisololela munyika eeyi mbyaabi kakunyina kuzumizya Leza kuti amutondezye nzila iiluzi ubikka buumi bwakwe muntenda. Nzila ilikke iikonzya kupa kuti tuzwidilile mubweende oobu bwazyintu nkupaila mbubwenya Davida mbwaakapaila naakati: “Intaamo zyangu zyatobela loko mikondo yako, Maulu aangu taana kuleya.” (Int. 17:5; 23:3) Ino inga cakonzyeka buti kuti tutambule busolozi buli boobu?

9. Kweelana ambokutondezyedwe apeeji 17, mbuti muuya wa Leza mboukonzya kuba busolozi busyomeka?

⁹ Kuti katulibombya alimwi katuyanda kusyoma Jehova, uuyootupa muuya wakwe uusalala busolozi busyomeka bukonzya kutusololela. Ino muuya ooyo uujisi nguzu inga watugwasya buti? Jesu wakapanduluda basikwiiya bakwe kuti: “Mugwasyi, nkokuti muuya uusalala, ooyo ngwayootuma Taata muzyina lyangu, uyoomuyiisya zyintu zyoonse alimwi akumwiibalusya zyintu zyoonse nzindakamwaambila.” (Joh. 14:26) Mbotuyaabwiiya jwi lya Leza akupaila lyoonse kubikkilizya azyintu zyoonse nzyaakaamba Kristo, muuya uusalala uyooyungizya kumvwisya kwesu kwabusongo bwa Jehova busumpukide, calo ciyoopa kuti tucite kuyanda kwakwe. (1 Ko. 2:10) Kuyungizya waawo, notuli munzila iisololela kubuumi, muuya uyootutondezya nzila njotweelede kutola kufwumbwa ciindi nokucitika zyintu nzyotutalangili. Uyootugwasya kuyeeya njiisyo zyamu Bbaibbele nzyotwakaiya kale alimwi akumvwisya mbotukonzya kuzibelesya muzyintu nzyotuyanda kucita.

Jesu Wakasololelwa Amuuya wa Leza

10, 11. Ncinzi Mwana aa Leza ncaakali kulangila kujatikizya muuya uusalala, alimwi ncinzi cakacitika?

¹⁰ Kaambo kabili ncotweelede kuyanda kusololelwa amuuya uusalala nkakuti Leza wakasololela Mwanaakwe anguwo. Katanaboola anyika Mwana aa Leza simuzyalwaalikke wakalibuzyi businsimi bwakuti: “Uyookalwa Muuya wa-Jehova, Muuya wabusongo awakuswiililisya, Muuya walulayo awanguzu, Muuya waluzibo awakulemeka Jehova.” (Is. 11:2) Amuyeeye buyo Jesu mbwaakali kuyandisisya kutambula busolozi bwa muuya wa Leza naakali kupona anyika.

¹¹ Majwi aa Jehova akazuzikizyigwa. Makani Mabotu alaamba cakacitika Jesu naakamana buyo kubbapatizyigwa kuti: “Mpoonya Jesu kazwide muuya uusalala wakazwa ku Jodano, eelyo wakasololelwa amuuya munkanda.” (Lk. 4:1) Ciindi Jesu naakali kuliimya kulya, kupaila alimwi akuzinzibala kuyeeya, kulangilwa kuti Jehova wakamulailila Mwanaakwe akumutondezya kujatikizya zyakali kuboola kumbele. Muuya wa Leza uulaanguzu wakali kubeleka mumizeezo ya Jesu alimwi amumoyo, kumusololela muzyintu nzyaakali kuyeeya akusala kucita. Aboobo, Jesu wakalizyi cakucita mubukkale buli boonse alimwi wakacita kweelana ancobakali kuyanda Bausyi kuti acite.

12. Nkaambo nzi ncotuyandika kulomba muuya wa Leza kuti utusololele?

¹² Kuzyiba muuya wa Leza mbowakamugwasya mubuumi bwakwe, Jesu wakakankaizya kuli basikwiiya bakwe mbociyandika kuti kabalomba alimwi akusololelwa amuuya uusalala. (Amubale Luka 11:9-13.) Nkaambo nzi eeci ncociyandika kulindiswe? Nkaambo cilakonzya kucinca kuyeeya kwesu kutegwa kweelane amizeezo ya Kristo. (Lom. 12:2; 1 Ko. 2:16) Kwiinda mukulekela muuya wa Leza kuti utusololele mubuumi bwesu, tulakonzya kuyeeya mbuli mbwayeeya Kristo alimwi akwiiya cikozyanyo cakwe.—1 Pe. 2:21.

Muuya Wanyika Ulakonzya Kutupa Kusweeka

13. Ino muuya wanyika ninzi, alimwi ino uzyala micelo iili buti?

¹³ Kaambo katatu ncotuyandila muuya wa Leza kuti kautusololela nkakuti tulakonzya kusweeka akaambo kamuuya wanyika uubeleka mubantu banji aano mazuba. Nyika ijisi muuya wanjiyo uulaanguzu kapati uukulwaizya bukkale bwiindene aboobo muuya uusalala mboukulwaizya. Muciindi cakupa bantu kuba amizeezo ya Kristo, muuya wanyika upa bantu kuyeeya alimwi akucita zyintu zikozyenye azyamweendelezi wanyika eeyi Saatani. (Amubale Baefeso 2:1-3; Tito 3:3.) Kuti muntu wayungwa amuuya wanyika akutalika kucita zyintu zyanyama, zyintu zibi zilakonzya kumucitikila zyalo zikonzya kupa kuti atakakoni Bwami bwa Leza.—Gal. 5:19-21.

14, 15. Mbuti mbotukonzya kuzwidilila mukukazya muuya wanyika?

¹⁴ Jehova ulatugwasya kutegwa tuukazye muuya wanyika. Mwaapostolo Paulo wakaamba kuti “amuzumanane kuyuma mu Mwami alimwi amubupati bwanguzu zyakwe . . . kutegwa mukacikonzye kuliyumya mubuzuba bubyaabi.” (Ef. 6:10, 13) Kwiinda mumuuya wakwe Jehova ulatuyumya kutegwa tucikonzye kulwana kweena kwa Saatani. (Ciy. 12:9) Muuya wanyika ulaanguzu alimwi tatukonzyi kuweeleba cakumaninina. Nokuba boobo, tatweelede kusofwaazyigwa anguwo. Muuya uusalala ulaanguzu alimwi ulakonzya kutugwasya.

¹⁵ Kuli baabo bakasweeka akuleka kuba Banakristo mumwaanda wamyaka wakusaanguna, mwaapostolo Petro wakaamba kuti: “Akaambo kakusiya nzila iiluleme, aaba beenwa.” (2 Pe. 2:15) Eelo kaka tulalumba kuti “tiitwakatambula muuya wanyika, pele twakatambula muuya uuzwa kuli Leza”! (1 Ko. 2:12) Kwiinda mukugwasyigwa amuuya ooyu alimwi akubelesya zyintu zyoonse Jehova nzyatupede kutegwa tuzumanane kweenda munzila iiluleme kumuuya tuyoozwidilila mukukazya muuya wa Saatani wanyika eeyi mbyaabi.—Gal. 5:16.

Muuya Uusalala Upa Kuzyala Micelo Mibotu

16. Ino muuya uusalala utupa kuzyala micelo iili buti?

¹⁶ Kaambo kane ncotuyandila muuya wa Leza kuti kaubeleka mulindiswe nkakuti muuya ooyu uzyala micelo mibotu kuli baabo basololelwa anguwo. (Amubale Bagalatiya 5:22, 23.) Sena kuli uutayandi kuba muntu uukkomene, siluyando alimwi siluumuno? Ino nguni akati kesu uutayandi kuba muntu uukkazyika moyo, siluzyalo alimwi mubotu? Sena kuli uutakonzyi kugwasyigwa akaambo kakuba alusyomo lunji, kubomba moyo alimwi akulilesya? Muuya wa Leza upa kuti katutondezya bube bubotu bukonzya kutugwasya alimwi akugwasya baabo mbotukkala akubeleka limwi. Mbwaanga tatukasyidwe kuzyala micelo yamuuya, tweelede kuzumanana kubeleka canguzu kutegwa tube abube oobu.

17. Mbuti mbotukonzya kuzumanana kuzyala micelo minji yamuuya?

¹⁷ Tulacita kabotu kulilingula kutegwa nzyotwaamba akucita kazitondezya kuti tusololelwa amuuya uusalala alimwi akuti tulazyala micelo. (2 Ko. 13:5a; Gal. 5:25) Kuti naa tuyandika kuba acibeela cimwi camucelo wamuuya, tweelede kucita zyintu kweelana amuuya kutegwa tuzyale mucelo ooyo. Tulakonzya kucita oobo kwiinda mukwiiya cibeela cilicoonse camucelo wamuuya mbuli mbocitondezyedwe mu Bbaibbele alimwi amumabbuku aa Bunakristo. Aboobo, tulakonzya kuzyiba mucelo wamuuya mboweelede kutondezyegwa mubuumi bwesu alimwi akubeleka kutegwa katuzyala micelo minji. * Ciindi notubona muuya wa Leza mboubeleka mubuumi bwesu alimwi amubuumi bwa Banakristoma, cilatugwasya kubona kaambo ncotweelede kusololelwa amuuya.

Sena Mulabuzumina Busolozi bwa Muuya wa Leza?

18. Mbuti Jesu mbwali citondezyo cibotu kulindiswe caboola kukuzumizya muuya wa Leza kutusololela?

¹⁸ Bbaibbele lyaamba kuti kali muntu, Jesu wakabona nguzu zyamuuya uusalala wa Leza mbozyakali kubeleka mubuumi bwakwe. Wakazizumizya kuti zibeleke mubuumi bwakwe alimwi nozyakali kumusololela wakali kucita kweelana anguzu zyamuuya uusalala. (Mk. 1:12, 13; Lk. 4:14) Sena andinywe mbomucita oobo?

19. Ncinzi ncotweelede kucita kutegwa nguzu zyamuuya uusalala zitweendelezye mubuumi?

¹⁹ Muuya wa Leza ucizumanana kubeleka mumizeezo alimwi amumyoyo yabantu bauzumizya kuti ubasololele. Mbuti mbumukonzya kuuzumizya kuti ubeleke mulindinywe akumusololela kutegwa mweende munzila iiluzi? Mweelede kupaila lyoonse kuli Jehova kuti amupe muuya wakwe alimwi akumugwasya kuti mweendelezyegwe anguwo. (Amubale Baefeso 3:14-16.) Amucite kweelana amipailo yanu kwiinda mukuyandaula busolozi mu Jwi lya Leza, Ibbaibbele—lyakasololelwa amuuya uusalala. (2 Ti. 3:16, 17) Amutobele malailile aajanika mu Bbaibbele alimwi akuzumina busolozi bwamuuya uusalala. Amusyome Jehova kuti ulakonzya kumusololela munyika eeyi mbyaabi.

[Bupanduluzi buyungizidwe]

Sena Mulituyeeyede Twaambo Tupati-pati?

• Mbuti muuya uusalala mboukonzya kubujatikizya buti buumi bwesu?

• Ntwaambo nzi tone tweelede kutupa kuyanda kusololelwa amuuya wa Leza?

• Ncinzi ncotweelede kucita kutegwa tugwasyigwe abusolozi bwamuuya wa Leza?

[Mibuzyo yaciiyo]

 [Cifwanikiso icili apeeji 15

Jesu wakali kusololelwa a muuya wa Leza mubuumi bwakwe

 [Cifwanikiso icili apeeji 17

Muuya wa Leza ulabeleka mumizeezo alimwi amumyoyo yabantu kuti ubasololele