Mibuzyo Yabasikubala

Ino ncinzi ncindeelede kucita kuti kandijisi mubuzyo kujatikizya cintu cimwi ncindakabala mu Bbaibbele naa kuti kandiyanda kugwasyigwa kujatikizya penzi ndendijisi?

Lugwalo lwa Tusimpi 2:1-5 lukulwaizya umwi aumwi wesu ‘kulangaula’ kumvwisya alimwi abupampu mbubwenya mbotuyandaula “zintu ziyandika zisisidwe.” Eeci caamba kuti tweelede kubikkila maano kapati kuvwuntauzya bwiinguzi kumibuzyo njotujana mu Bbaibbele alimwi akujana nzila mbotukonzya kumana mapenzi ngotujisi. Mbuti mbotukonzya kucita oobo?

Bbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza, mapeeji 33 kusika ku 38, lilapandulula “Mbokuvwuntauzyigwa” kwiinda mukubelesya zibelesyo nzyotupedwe “[a]muzike musyomesi uucenjede.” (Mt. 24:45) Bbuku eeli apeeji 36 lilapandulula mbotukonzya kubelesya bbuku lya Watch Tower Publications Index, eeli bbuku lilijisi mulongo watwaambo awamagwalo. Mulongo ooyu ulatugwasya kuyandaula mabala ngotuyanda naa tupango twamu Bbaibbele ntotuyanda kumvwisya alimwi ulatondezya mabbuku motukonzya kuvwuntauzya. Amukkazyike moyo nomuyandaula bwiinguzi naa busolozi mbomuyanda. Amuyeeye kuti muyandaula “zintu ziyandika zisisidwe,” aboobo kuyandika ciindi alimwi akubikkila maano.

Masimpe ngakuti, kuli twaambo alimwi amagwalo aatapanduludwe cacigaminina mumabbuku eesu. Nokuba kuti twaambo tumwi twamu Bbaibbele tulipanduludwe, ambweni bupanduluzi buliko tabukonzyi kwiingula mubuzyo ngomujisi. Alimwi tupango tumwi twamu Bbaibbele tulapa kubuzya mibuzyo imwi akaambo kakuti twaambo tumwi mu Magwalo tatwaambidwe mubulamfwu. Aboobo, tacikonzyeki kuti inga twajana bwiinguzi kumubuzyo uuliwoonse ngotujisi. Kuti cintu cili boobo cacitika, tatweelede kutalika kuyeeyela bwiinguzi kumibuzyo iitakonzyi kwiingulwa akutalika kukazyanya “muciindi cakupa zyintu zizwa kuli Leza iziyumya lusyomo.” (1 Ti. 1:4; 2 Ti. 2:23; Tit. 3:9) Bakwesu babelekela kuofesi lyamutabi naa aabo babelekela kumaofesi mapati tabakonzyi kwiingula mibuzyo yoonse kujatikizya twaambo toonse tutapanduludwe mumabbuku eesu. Tuli masimpe kuti Bbaibbele lilatupa twaambo tuzulide tukonzya kutugwasya ecino ciindi, pele twaambo ntotutamvwisyi tutupa coolwe cakutondezya kuti tulamusyoma kapati Leza alimwi a Jwi lyakwe.—Amubone mapeeji 185 kusika ku 187 mubbuku lyakuti Amubaa Cilongwe a Jehova.

Ino ncinzi ncomukonzya kucita kuti mwavwuntauzya kaambo kamwi kamujatikizya pele kakunyina kujana busolozi naa bwiinguzi mbomuyanda? Amulimvwe kwaanguluka kusikila musyominyoko uusimide, ambweni kubuzya umwi wabaalu mumbungano yanu. Balijisi luzyibo lunji lwamu Bbaibbele alimwi ambobeelede kupona Banakristo. Kuti kamuyanda lulayo kujatikizya penzi ndomujisi naa cakusala balakonzya kumugwasya akaambo kakuti balimuzyi alimwi balibuzyi bukkale bwanu. Alimwi tamweelede kucileka kupaila kuli Jehova kujatikizya penzi ndomujisi akulomba lugwasyo kwiinda mumuuya uusalala, “nkaambo Jehova ulaabila busongo . . . [akumvwisya, BT.]”—Tus. 2:6; Lk. 11:13.