Sena Mulabona Kuti Mweendelezyegwa a Leza?

BANA Israyeli abana Egepita tiibakaninga cibwene cintu cili boobu. Ciindi bana Israyeli nobakali Kulonga kuzwa ku Egepita, ikkumbi lyakaboola afwaafwi ambabo alimwi lyakali ambabo lyoonse. Masiku lyakali kuba mulilo. Eelo kaka cakali kukankamanisya eeco! Pele ino lyakazwa kuli? Ino lyakali amulimo nzi? Kakwiindide myaka iili 3,500, ino ncinzi ncotukonzya kwiiya twalanga bana Israyeli mbobakali kuubona “musumpululu [wakkumbi] awamulilo”?—Kul. 14:24.

Ijwi lya Leza lilaamba nkolyakazwa kkumbi amulimo ngolyakajisi noliti: “Jehova wakali kubazulwida isikati amusumpululu [wakkumbi] kuti abatondezye inzila, amasiku amusumpululu wamulilo kuti abamunikile, kuti kabeenda amasiku asikati. Taakwe naakabanyanzya musumpululu [wakkumbi] wasikati nuuba musumpululu wamulilo wamasiku.” (Kul. 13:21, 22) Jehova Leza wakabelesya kkumbi amulilo ikusololela bantu bakwe kuzwa mu Egepita kuya munkanda. Bakeelede kuzyitobela. Basikalumamba bana Egepita nobakali kutobela bantu ba Leza kuti babalwane ikkumbi lyakaba aakati kankamu zyobilo, kutegwa bana Israyeli bakwabililwe. (Kul. 14:19, 20) Nokuba kuti ikkumbi tiilyakainda nzila iikosola, kulitobela njiyakali nzila ilikke njobakali kukonzya kusika ku Nyika Yakasyomezyedwe bana Israyeli.

Ikkumbi lyakali kutondezya bantu ba Leza kuti Jehova wakali ambabo. Lyakali kwiiminina Jehova alimwi zimwi ziindi wakali kwaambaula ambabo kwiinda mukkumbi eeli. (My. 14:14; Int. 99:7) Alimwi ikkumbi lyakatondezya kuti Musa nguwakasalwa a Jehova kuti abasololele bantu. (Kul. 33:9) Mbubwenya buyo, ciindi camamanino nolyakalibonya kkumbi, Jehova wakatondezya kuti wasala Joshua kuti abweze busena bwa Musa. (Dt. 31:14, 15) Kutegwa beende kabotu kuzwa ku Egepita, bana Israyeli bakeelede kuzyiba mbwaakali kubeendelezya Leza akumutobela.

Bakaleka Kumusyoma Leza

Kweelede kuti bana Israyeli bakakkomana kapati nibakalibona kkumbi ciindi cakusaanguna. Pele mukubula coolwe, maleele aaya ngobakali kubona tanaakabagwasya bana Israyeli kuti bazumanane kumusyoma Jehova. Ziindi zinji bakali kumudooneka kuti Leza takonzyi kubasololela. Bana Egepita nobakali kubatandila, tiibakasyoma kuti Jehova ulakonzya kubafwutula. Muciindi caboobo, bakamupa mulandu Musa mubelesi wa Leza akwaamba kuti wakali kubasololela kulufwu. (Kul. 14:10-12) Nobakazabuka Lwizi Lusalala, bakatongookela Musa, Aroni alimwi a Jehova akaambo kakubula cakulya ameenda. (Kul. 15:22-24; 16:1-3; 17:1-3, 7) Nokwakainda buyo nsondo zisyoonto kuzwa ciindi eeco bakamoongelezya Aroni kuti apange moombe wangolida. Amuciyeeyele buyo! Kulubazu lumwi lwa cilabba bana Israyeli bakalibona ikkumbi amulilo—citondezyo ca Yooyo wakabasololela kuzwa mu Egepita—alimwi afwaafwi awaawo bakatalika kukomba mutuni kabaamba kuti: “Mbaaba baleza bako, O Israyeli, ibakamupozya mucisi ca-Egepita.” Eelo kaka ‘bakacita milimo iikalazya loko’!—Kul. 32:4; Neh. 9:18.

Kuzanga kwabana Israyeli kwakatondezya kuti tababusyomi busolozi bwa Jehova. Alimwi bana Israyeli bakaleka kuzyilanga munzila yakumuuya zyintu nzyaakali kubacitila  Jehova. Bakalibona kkumbi pele bakaluba kuti liiminina bweendelezi bwa Leza. Nokuba kuti nzyobakali kucita zyakali “kukalazya Uusalala wa-Israyeli,” Jehova wakazumanana kubasololela bana Israyeli kabelesya kkumbi kusikila ciindi nobakasika mu Nyika Yakasyomezyedwe.—Int. 78:40-42, 52-54; Neh. 9:19.

Amubone Mbwasololela Leza Mazuba Aano

Mbubwenya buyo amazuba aano, Jehova tabalekelezyi bantu bakwe kabatajisi bweendelezi. Bana Israyeli tanaakabalekelela kuti balisalile nzila njobakeelede kubelesya, amazuba aano tatulangilwi kulisalila nzila iiyootusisya munyika mpya. Jesu Kristo Ngomusololi wambungano uusalidwe. (Mt. 23:10; Ef. 5:23) Wapa mikuli iimwi kumuzike musyomesi, ikabunga ka Banakristo bananike basyomeka. Kumane baciinga camuzike balasala balangizi mumbungano zya Banakristo.—Mt. 24:45-47; Tit. 1:5-9.

Ino inga twabazyiba buti baciinga camuzike naa mubanzi? Amubone Jesu mbwabapandulula: “Ino mubwini nguni mubanzi musyomesi, uucenjede, ooyo Simalelo wakwe ngwayoobikka kulanganya babelesi bakwe ikuti lyoonse kabapa cakulya cikkwene aaciindi ceelede? Ulikkomene muzike ooyo ikuti Simalelo wakwe aakusika akamujane kacita boobo!”—Lk. 12:42, 43.

Aboobo, baciinga camubanzi ooyu “musyomesi,” balazumanana kusyomeka kuli Jehova, Jesu, kukasimpe kamu Bbaibbele akubantu ba Leza. Kwaamba kuti “uucenjede,” citondezya kuti baciinga camubanzi baubeleka kabotu mulimo uuyandika kapati wakukambauka “makani mabotu aa-Bwami” alimwi akugwasya “bantu bamisyobo yoonse kuba basikwiiya.” (Mt. 24:14; 28:19, 20) “Aaciindi ceelede,” baciinga camubanzi balaaba cakulya cakumuuya ciyaka alimwi cijisi busani. Icitondezya kuti Jehova ulaukkomanina mulimo ooyu, nkuvwula kwabakombi bakasimpe, ulabasololela muzyintu nzyobasala, balakamvwisya kasimpe kamu Bbaibbele, ulabakwabilila kuli basinkondonyina alimwi balaliiba.—Is. 54:17; Flp. 4:7.

Amubutobele Bweendelezyi bwa Leza

Ino inga twatondezya buti kuti tulabukkomanina bweendelezi bwa Leza? Mwaapostolo Paulo wakaamba kuti: “Kamubamvwida aabo basololela akati kanu alimwi kamulibombya.” (Heb. 13:17) Pele kucita boobo tacili cuuba-uba lyoonse pe. Mucikozyanyo: Amweezyezye kuti muli bana Israyeli mumazuba a Musa. Amuyeeye kuti mwali kweenda kwaciindi cilimbocibede, kumane ikkumbi lyaima. Ino lilaima kwaciindi cilamfwu buti? Sena mbuzuba bomwe? Ninsondo? Naa myezi buya? Mpoonya mulakonzya kulibuzya kuti, ‘Sena ndilongolole zyintu zyoonse nzyondijisi?’ Kusaanguna ndiza inga mwalongolola buyo zyintu ziyandika kapati. Mukuya kwamazuba mulakonzya kuzilongolola zyoonse. Mpoonya kamuyanda kumanizya kulongolola, mwabona ikkumbi lyanyamuka caamba kuti mweelede kutalika alimwi kulongela. Kucita boobo tacili cuuba-uba. Mbubwenya buyo bana Israyeli bakeelede ‘kulonga.’—My. 9:17-22.

Ino tucita buti notweendelezyegwa a Leza? Sena tulabutobela bweendelezi oobo? Naa tulazumanana kucita zyintu kweelana ambotwakazyibila kucita? Sena tulaatobela malailile ngotwakapegwa ino-ino mbuli kusololela ziiyo zya Bbaibbele, kukambaukila bantu bazwa kuzisi zimbi, kujanika lyoonse kukomba mumukwasyi, kubelekela aantoomwe aba Kkomiti ya Hospital Liaison alimwi akulilemeka kabotu kumiswaangano yacooko? Alimwi tulatondezya kuti tulabulemeka bweendelezi bwa Leza kwiinda mukutobela lulayo. Notusala ziyandika kapati tatweelede kulisyoma pe, pele tweelede kulanga kuli Jehova ambunga yakwe kuti itusololele. Mbubwenya mbuli mwana mbwayanda kukwabililwa abazyali bakwe nokuli mvwula mpati, andiswe tulakwabililwa  ambunga ya Jehova ciindi mapenzi aali mbuli mvwula mpati naatusikila.

Aabo basololela mumbunga ya Leza iili anyika tabalondokede mbubwenya mbuli Musa mbwaakabede. Nokuba boobo, kkumbi lyakali kutondezya kuti Leza wakali anguwe lyoonse akuti nguwakamusala. Alimwi amubone kuti tabali bana Israyeli boonse bakali kwaamba ciindi nobakeelede kutalika kweenda. Muciindi caboobo, bantu bakali kucita “mbubonya mbuli Jehova mbwaakalailila kumulomo wa-Musa.” (My. 9:23) Aboobo Musa wakali kwiiminina Leza, akuti ndiza nguwakali kupa citondezyo cakuti batalike kweenda.

Mazuba aano, ciinga camubanzi ca Jehova cilatupa citondezyo kufwumbwa casika ciindi cakweenda. Ino mbuti mubanzi mbwacita oobo? Ulacita oobo kwiinda muzibalo zya Ngazi Yamulindizi amu Mulimo Wesu wa Bwami, mumabbuku mapya amakani aapegwa amiswaangano yaalubazu, yabbazu alimwi ayacooko. Malailile alapegwa kumbunga kwiinda mubalangizi beendeenda, mumagwalo alimwi amuzikolo oomo bakwesu bajisi mikuli mumbungano mobayiisyigwa.

Sena mulabona kuti mweendelezyegwa a Leza? Jehova ubelesya mbunga yakwe kutusololela mazuba aano aamamanino munyika eeyi mbyaabi ya Saatani. Nkakaambo kaako tulakkomana akaambo kakukamantana, kumvwana akukwabililwa.

Bana Israyeli nobakasika ku Nyika Yakasyomezyedwe, Joshua wakaamba kuti: “Mulizi camyoyo yanu yoonse acamiyeeyo yanu yoonse kuti taakwe cintu niciba comwe icakawida ansi akati kazyintu zibotu zyoonse Jehova Leza wanu nzyakaamba aandinywe. Zyoonse buyo zyakacitika, taakwe niciba comwe icakawida ansi.” (Jos. 23:14) Mbubwenya buyo, bantu ba Leza mazuba aano cakutadooneka baya kunjila munyika mpya yakasyomezyegwa. Nokuba boobo, tacikwe makani naa andiswe tunakuliko, iciyandika kapati nkulibombya akutobela ncatwaambila Leza. Aboobo, atuzumanane kweendelezyegwa a Jehova.

[Zifwanikiso izili apeeji 5]

Imbunga ya Jehova njiitusololela mazuba aano

Mabbuku aamwayigwa amuswaangano wacooko

Zikolo zyeendelezyegwa a Leza

Kuyiisigwa kumiswaangano yakuya mumulimo wamumuunda