‘Ino Nguni Uuzyi Mbwayeeya Jehova?’
‘Ino Nguni Uuzyi Mbwayeeya Jehova?’
“Nguni uubwene miyeeyo ya-Jehova, abe mutoloki wakwe? Pele swebo tulijisi miyeeyo ya-Kristo.”—1 KOR. 2:16.
1, 2. (a) Ino mbuyumuyumu nzi mbobajana bantu banji? (b) Ncinzi ncotweelede kuyeeya kujatikizya mbotuyeeya ambwayeeya Jehova?
SENA kuli nocimukatazya kuzyiba mbwayeeya muntu umwi? Ambweni mwakakwatana ino-ino alimwi mubona kuti tamukonzyi kumuzyiba kabotu mbwayeeya ngomukwetene limwi. Masimpe, basankwa abakaintu baliindene mukuyeeya amukwaambaula. Mubwini, muzisi zimwi, nokuba kuti basankwa abamakaintu baambaula mwaambo omwe, balaindana mbobaambaula. Kuyungizya waawo, ikwiindana kwamusyobo alimwi amwaambo kulakonzya kupa kuti bantu kabaindana mbobayeeya ambobalilemeka. Nokuba boobo, mukuya kwaciindi nomuyaabubazyiba kabotu bantu mulakonzya kumvwisya naa kubona mbobayeeya.
2 Aboobo taceelede kutugambya kubona mizeezo yesu mboiindene kapati aya Jehova. Kwiinda mumusinsimi wakwe Isaya, Jehova wakaambila bana Israyeli kuti: “Miyeeyo yangu tiili miyeeyo yanu, anzila zyanu tazyeensi inzila zyangu.” Mpoonya kutegwa ape cikozyanyo kujatikizya kaambo aaka, Jehova wakaamba kuti: “Nkaambo mbubonya mbuli ijulu mbulisumpwidwe kwiinda nyika, mbubonya obo inzila zyangu zilisumpwidwe kwiinda inzila zyanu amiyeeyo yangu kwiinda miyeeyo yanu.”—Is. 55:8, 9.
3. Ino ninzila nzi zyobilo zikonzya kutugwasya ‘kumvwana a Jehova’?
3 Nokuba boobo, sena eeci inga catulesya kuzyiba mbwayeeya Jehova? Peepe. Nokuba kuti tatukonzyi kuzyiba bwini mbwayeeya Jehova, Ibbaibbele litukulwaizya ‘kumvwana a Jehova’ akutobela ‘malailile aakwe.’ (Amubale Intembauzyo 25:14; Tusimpi 3:32.) Inzila imwi mbotukonzya kuba acilongwe a Jehova nkwiinda mukubikkila maano kumilimo yakwe iilembedwe mu Jwi lyakwe, Ibbaibbele. (Int. 28:5) Inzila iimbi nkwiinda mukuzyiba “miyeeyo ya Kristo,” walo uuli “[mu]cikozyano ca-Leza.” (1 Kor. 2:16; Kol. 1:15) Kwiinda mukubala zili Bbaibbele akuzinzibala kuyeeya nzitwabala, tulakonzya kuzyiba bube bwa Jehova alimwi ambwayeeya.
Amuzicenjelele Zilengwa Zitali Kabotu
4, 5. (a) Ncilengwa nzi citaluzi ncotuteelede kucita? Amupandulule. (b) Nkuyeeya kutaluzi ikuli buti nkobakaba ankuko bana Israyeli?
4 Notuzinzibala kuyeeya milimo njacita Jehova, tatweelede kuba acilengwa cakutongooka Leza akaambo kazyintu nzyobacita bantu. Cilengwa eeci cilaambwa mumajwi ngaakaamba Jehova aalembedwe ku Intembauzyo 50:21 aakuti: “Lino wakali kuyeeya kuti ndili mbuli nduwe.” Myaka iinda ku 175 yainda, umwi sikwiiya zyamu Bbaibbele wakaamba kuti: “Bantu bali acilengwa cakutongooka Leza akaambo kazyintu nzyobacita alimwi bayanda kuti Leza kabeendelezya kweelana ambobayanda.”
5 Tweelede kucenjela kutegwa Jehova tutamuboni kuti ulakonzya kucinca kweelana ambotuyanda. Ino nkaambo nzi ncotweelede kucenjelela? Nkaambo notubala Magwalo, milimo imwi ya Jehova inga twaibona mbuli kuti tailuzi pe akaambo kakuti tulalezya alimwi tatulondokede. Bana Israyeli bakaindi mbobakatalika kuyeeya oobo eelyo zyintu nzyaakabacitila Jehova bakazibona kuti tiizyakali kabotu pe. Amubone ncaakabaambila Jehova naakati: “Mulaamba kuti, Inzila ya-Mwami tiiluleme. Amuswiilile noluzubo lwa-Israyeli. Sa inzila yangu tiiluleme? Sa teensi inzila zyanu zitaluleme?”—Ezk. 18:25.
6. Ino ncinzi ncaakaiya Jobu, alimwi mbuti mbotukonzya kugwasyigwa kuzyintu zyakamucitikila?
6 Icikonzya kutugwasya kuti tutamupi mulandu Jehova kweelana ambotuzibona zyintu, nkuzyiba kuti swebo tulalezya alimwi zimwi ziindi tulaimpya kapati mbotuzibona zyintu. Jobu wakeelede kukaziba kaambo aaka. Jobu naakali kupenga wakakopana kapati cakuti tanaakacizyiba ncaakali kupengela. Pele Jehova wakamugwasya. Wakatondezya kuti Jobu tanaakali kuzimvwisya zyintu naakamubuzya mibuzyo yiinda ku 70 eeyo Jobu njaakaalilwa kwiingula. Jobu wakalicesya mbokunga wakacinca mbwaakali kuyeeya.—Amubale Jobu 42:1-6.
Amube ‘Amizeezo ya Kristo’
7. Ino kulanga-langa milimo ya Jesu kutugwasya buti kubona mbwayeeya Jehova?
7 Jesu wakabaiya Bausyi muzyintu zyoonse nzyaakali kwaamba akucita. (Joh. 14:9) Aboobo, ikulanga-langa milimo ya Jesu kulatugwasya kumvwisya mbwayeeya Jehova. (Rom. 15:5; Flp. 2:5) Lino atulange-lange zibalo zyobilo zili mu Makani Mabotu.
8, 9. Mbuli mbokulembedwe kuli Johane 6:1-5, ino ncinzi cakapa kuti Jesu amubuzye Filipo, alimwi ino nkaambo nzi Jesu ncaakacitila boobo?
8 Amubone bukkale oobu. Pobwe lya Kwiindilila lyamu 32 C.E. lyakali afwaafwi kucitika. Eeci nceciindi baapostolo ba Jesu nibakajoka buyo kuzwa ku Galilaya kukukambauka. Akaambo kakuti bakalikatede, Jesu wakabatola kubusena bunyina bantu kunkomwe kwa Lwizi lwa Galilaya. Pele, bantu bakabatobela. Jesu naakamana kuponya bantu aaba akubayiisya zyintu zinji, kwakabuka penzi limbi. Ino mbuti bantu aaba boonse mbobakali kukonzya kujana cakulya mubusena oobu? Jesu naakalibona penzi eeli, wakabuzya Filipo walo iwakali kuzwa kubusena oobu ikuti: “Nkukuli nkotuti kaule mikamu kuti balye aba?”—Joh. 6:1-5.
9 Ino nkaambo nzi Jesu ncaakamubuzyila Filipo? Sena Jesu wakalilibilikide kujatikizya cakucita? Peepe. Ino ncinzi cini ncaakali kuyeeya? Imwaapostolo Johane, awalo iwakaliko wakaamba kuti: “[Jesu] wali kumusola buyo, nkaambo walo mwini wali kuzi mbwati cite.” (Joh. 6:6) Aawa Jesu wakali kusunka basikwiiya bakwe kutegwa abone mbobakali kuyabukomena kumuuya. Kwiinda mukubuzya mubuzyo ooyu wakabapa ciindi cakuti bayeeye akuti batondezye lusyomo muzyintu nzyaakali kucita. Pele tiibakacita oobo alimwi bakatondezya kuti bakali kulezya ncobeni mbobakali kuzibona zyintu. (Amubale Johane 6:7-9.) Mpoonya Jesu wakatondezya kuti wakali kukonzya kucita cintu ncobatakali kuyeeyela. Wakabasanina munzila yamaleele bantu boonse bakafwide nzala.—Joh. 6:10-13.
10-12. (a) Ino nkaambo nzi Jesu ncaatakamugwasya mukaintu Mugiliki aciindi ncimunya eeco? Amupandulule. (b) Ino ncinzi ncotutiilange-lange lino?
10 Cibalo eeci cilakonzya kutugwasya kumvwisya ncaakali kuyeeya Jesu naakali kubusena bumwi. Nikwakainda buyo ciindi cisyoonto kuzwa ciindi naakasanina bantu aaba, Jesu abaapostolo bakwe bakagama kunyika kucooko ca Tulo a Sidoni ikulamfwu a Israyeli. Nibakali kooko, bakajana mukaintu Mugiliki iwakalomba Jesu kuti aponye mwanaakwe musimbi. Kusaanguna, Jesu tanaakamubikkila maano mukaintu ooyu. Pele naakazumanana kulomba, Jesu wakamwaambila kuti: “Bataangune kukuta bana, nkaambo tacili cibotu kunyanga bana insima akwiiwaala kutubwa.”—Mk. 7:24-27.
11 Ino nkaambo nzi Jesu kumatalikilo ncaakakakila kugwasya mukaintu ooyu? Sena Jesu wakali kumusunka buya mbuli mbwaakacita kuli Filipo kuti abone ncaakali kunga wacita, kutegwa atondezye lusyomo lwakwe? Nokuba kuti cibalo tacitondezyi mbolyakali kulimvwisya jwi lya Jesu, mukaintu ooyu tanaakatyompwa. Naakaamba kuti “tubwa,” tanaakali kufwubaazya buya pe. Aboobo Jesu ambweni wakali kucita mbuli muzyali uutayandi kulitondezya kuti wazumina kumupa ncalomba mwana ikutegwa amusunke mwana akubona naa ulisinizyide. Kufwumbwa naa cakali buti, mukaintu ooyu naakatondezya lusyomo lwakwe, Jesu wakamucitila ncaakalomba.—Amubale Marko 7:28-30.
12 Zibalo eezyi zyobilo zili mu Makani Mabotu zitugwasya kwiimvwisya kabotu “miyeeyo ya Kristo.” Lino atubone zibalo eezyi mbozikonzya kutugwasya kumvwisya mbwayeeya Jehova.
Jehova Mbwaakabandika a Musa
13. Ino kubona mbwayeeya Jesu kutugwasya buti?
13 Ikubona mbwayeeya Jesu kutugwasya kumvwisya zibalo zyamu Magwalo izikatazya kumvwa. Mucikozyanyo, amubone majwi ngaakaamba Jehova kuli Musa ciindi bana Israyeli nibakamana kubumba moombe wangolida kuti kabakomba. Leza wakati: “Ndibwene bantu aba. Mbantu bayumu myoyo. Undileke kuti bukali bwangu bubabukile canguzu, nkabanyonyoone, lino ndakucita yebo ube musyobo mupati.”—Kul. 32:9, 10.
14. Ino Musa wakacita buti kumajwi ngaakaamba Jehova?
14 Cibalo alimwi caamba kuti: “Musa wakakombelezya Leza wakwe, wati, O Jehova, nkaambonzi bukali bwako bwabukila bantu bako mbowagwisya mucisi ca-Egepita anguzu ziyoosya ajanza ijumu? Sa ncibotu kuti ba-Egepita baambe kuti, Wakabapozezya bubi, kuti abajaye muzilundu akubanyonyoona, batabonwi limbi ansi. Leka bukali bwako buyoosya, utabisizyi bantu bako. Ibaluka Abrahamu a-Izaka a-Israyeli balanda bako, mbowakakonkezya muzina lyako omwini cakwaamba kuti, Njoovuzya inyungu zyanu mbuli inyenyeezi zyakujulu, anyika eyi yoonse njendakasyomezya njooipa inyungu zyanu baivube lyoonse. Mpawo Jehova wakalekelela bantu bakwe bubi mbwaakali kuyeeya kubacitila.”—Kul. 32:11-14. *
15, 16. (a) Ino mulimo nzi ngwaakapegwa Musa akaambo kamajwi ngaakaamba Jehova? (b) Ino ncinzi ncaakasala kucita Jehova?
15 Sena Musa wakeelede kumululamika Jehova? Peepe! Nokuba kuti Jehova wakaamba ncaakali kuyanda kucita, tanaakali kuyanda kubanyonyoona bantu boonse aciindi ncimunya eeco. Mubwini, aawa Jehova wakali kusunka Musa mbubonya Jesu mbwaakasunka Filipo amukaintu Mugiliki. Musa wakapegwa coolwe cakwaamba mbwaakali kuyeeya. * Jehova wakasala Musa kuti abe simwiimaakati wabana Israyeli anguwe, alimwi wakali kuyanda kuti Musa aubeleke mulimo ooyu. Lino Jehova wakali kuyanda kuzyiba kuti naa Musa ulazumina kuti Jehova abakake bana Israyeli akucita kuti bana ba Musa babe musyobo mupati.
16 Majwi ngaakaamba Musa atondezya kuti wakali kusyoma bululami bwa Jehova. Ncaakacita citondezya kuti tanaakali kuliyanda pe, pele wakali kubikkila maano kuzyina lya Jehova. Kunyina naakali kuyanda kuti lisampulwe. Aboobo Musa wakatondezya kuti wakaliizyi “miyeeyo ya Jehova” mukaambo aaka. (1 Kor. 2:16) Ino ncinzi cakatobela? Akaambo kakuti Jehova tanaakabajaya bana Israyeli, cibalo cakasololelwa amuuya caamba kuti “waka[ba]lekelela.”
Jehova Mbwaakabandika a Abrahamu
17. Ino mbuti Jehova mbwaakatondezya kuti ulakkazyika moyo naakali kubandika a Abrahamu?
17 Acimbi cikozyanyo citondezya Jehova mbwazumizya babelesi bakwe kuti batondezye lusyomo lwabo nceeco caamba Abrahamu naakali kulomba kuti Sodoma atanyonyoonwi. Mucibalo eeci, Jehova wakakkazyika moyo naakamulekela Abrahamu kuti amubuzye mibuzyo iili lusele. Aciindi cimwi, Abrahamu wakakombelezya kuti: “Ncobeni cilatondwa kulinduwe kucita obo, kujaya uululeme antoomwe asizibi, uululeme acitilwe mbubonya mbuli sizibi. Ncobeni cilatondwa kulinduwe. Sa oyo uubeteka nyika yoonse takooyoocita cakululama?”—Matl. 18:22-33.
18. Ino ncinzi ncotwiiya kuli Jehova naakabandika a Abrahamu?
18 Mucibalo eeci, ino ncinzi ncotwiiya kujatikizya mbwayeeya Jehova? Sena Jehova wakali kuyandika kwaambilwa a Abrahamu kutegwa acite ciluzi? Peepe. Masimpe, kuzwa kumatalikilo Jehova wakali kukonzya kwaamba twaambo tujatikizya ncaakali kuyanda kucita. Pele kwiinda mumibuzyo eeyi, Jehova wakamupa Abrahamu ciindi cakuti aabone makani aaya kweelana ambwakali kwaabona Jehova. Kunze lyaboobo, eeci cakapa kuti Abrahamu abone luzyalo lwa Jehova abululami bwakwe. Inzya, Jehova wakabandika a Abrahamu mbuli mulongwe wakwe.—Is. 41:8; Jak. 2:23.
Nzyotwiiya
19. Ino mbuti mbotukonzya kumwiiya Jobu?
19 Ino ncinzi ncotwaiya kujatikizya “miyeeyo ya Jehova”? Tweelede kugwasyigwa a Jwi lya Leza kuti tumvwisye mbwayeeya Jehova. Tatweelede kumujanina kaambo Jehova akaambo kambotuzicita zyintu ambotuyeeya. Jobu wakati: “[Leza] tali muntu uulya maila mbuli ndime kuti ndikonzye kumwiingula nikuba kukazyanya anguwe munkuta.” (Job. 9:32, BT) Mbuli Jobu, notutalika kumvwisya mizeezo ya Jehova, citupa kwaamba kuti: “Zyoonse ezi ngumoombe biyo wanguzu zyakwe, nkuvwiiyavwiiya kuniini buyo nkotumvwa anguwe. Aboobo ngwani uunga ulaziba kuzuma kuzulide kwanguzu zyakwe?”—Job. 26:14.
20. Ino ncinzi ncotweelede kucita ikuti twajana cibalo camu Magwalo cikatazya kumvwa?
20 Notubala Magwalo, ino ncinzi ncotweelede kucita ikuti twajana cibalo cikatazya kumvwa, ikapati kuti kacimujatikizya Jehova? Ikuti naa twaavwuntauzya makani aaya twamana twataamvwisya, tulakonzya kubona kuba sunko litugwasya kubona naa tulamusyoma Jehova. Amuyeeye kuti zimwi ziindi twaambo tumwi tulatugwasya kuti tutondezye lusyomo muli Jehova. Tulazumina kuti tatuzimvwisyi zyintu zyoonse nzyacita. (Muk. 11:5) Aboobo, eeci ciya kutupa kwaazumina majwi ngaakaamba mwaapostolo Paulo aakuti: “Ha! muli bulondo buteeli mubusongo bwa-Leza amuluzibo lwakwe! Ncobeni imbeta zyakwe tazilangiki, aziyanza zyakwe tazitobeleki! Nkaambo nguni uubwene miyeeyo ya-Mwami? Na nguni wakaba mukanzenyina? Na nguni iwakasaanguna kumupa cintu, akaboozezegwe ncico? Ikuti kulinguwe nkuzizwida zintu zyoonse, alimwi mulinguwe muziponena, alimwi kulinguwe nkuzyeelela. Walo abe abulemu kube akutamani, Ameni!”—Rom. 11:33-36.
Bupanduluzi buyungizidwe
^ munc. 14 Cibalo cikozyenye cijanika mubbuku lya Myeelwe 14:11-20.
^ munc. 15 Kweelana abasyaazibwene bamwi, kaambyo ka Chihebrayo kakuti “undileke” kali ku Kulonga 32:10 kalakonzya kubonwa kuti kajatikizya kutamba, ikutondezya kuti Musa wakazumizyigwa kwiiminina naa ‘kwiima’ akati ka Jehova acisi eeci. (Int. 106:23; Ezk. 22:30) Kufwumbwa mbocibede, cakutadooneka Musa weelede kuti wakalikwaya kwaamba mbwaakali kuyeeya kuli Jehova.
Sena Muciyeeyede?
• Ino ncinzi cikonzya kutugwasya kutaba acilengwa cakubona Jehova kweelana ambotuyeeya?
• Ino mbuti kumvwisya milimo ya Jesu mbokutugwasya ‘kumvwana a Jehova’?
• Ino ncinzi ncomwaiya kuli Jehova kubona mbwaakabandika a Musa a Abrahamu?
[Mibuzyo yaciiyo]
[Zifwanikiso izili apeeji 5]
Ino ncinzi ncotwiiya kujatikizya mbwayeeya Jehova mukulanga mbwaakabandika a Musa a Abrahamu?