Kuliyumya Naakukaka Ngomukwetene Limwi

BA Margarita abalumi babo ba Raúl, bali kubelekela Jehova kabali mumulimo waciindi coonse kwamyaka minji. * Pele mbubakazyalila buyo mwana wakutaanguna, ba Raúl bakaleka kucita kabotu mumulimo wa Jehova. Bamane ba Raúl bakaleka kulilemeka kabotu mpoonya bakagusyigwa mumbungano ya Banakristo. Ba Margarita baamba kuti: “Zyoonse eezyi nizyakacitika ndakalimvwa kuti ndiyanda kufwa. Ndakatyompwa kapati alimwi tiindakalicizyi cakucita.”

Ba Jane mbobakakwatilwa buyo, balumi babo bakabatyompya. Bakatalika kubauma. Ba Jane baamba kuti: “Ibuzuba mbobakasaanguna kunduuma, ndakagambwa kapati, ndakafwa nsoni alimwi ndakatyompwa. Cakaba cilengwa kuti lyoonse banduuma, bakali kundilomba kuti ndibalekelele. Ndakali kuyeeya kuti akaambo kakuti ndili Munakristo, ndeelede kubalekelela. Alimwi ndakali kuyeeya kuti tacili kabotu kwaamba mapenzi aangu kubantu bambi—nobaba baalu bambungano. Cilengwa eeci cakuumwa akulekelela cakazumanana kwamyaka minji. Ciindi coonse eeci ndakali kuyeeya kuti kuli cintu cimwi ncondeelede kucita kutegwa balumi bangu kabandiyanda.  Nibakandisiya amwanaangu musimbi, ndakalimvwa kuti ndakaalilwa, akuti ndakeelede kwaamba naa kucita zyintu zinji kutegwa tutalekani.”

Mbubwenya mbuli ba Margarita aba Jane, mulakonzya kuti kamupenga mumizeezo, kubula mali alimwi akupenga kumuuya akaambo kakuti balumi banu bakamukaka. Naa ndinywe nobalumi nomupenga akaambo kakuti bakaintu banu tabasyomeki. Cakutadooneka, tupona ‘muziindi zikatazya’ kweelana abusinsimi bwamu Bbaibbele. Businsimi oobu butondezya kuti “kumazuba aakumamanino,” mikwasyi iyoopenga akaambo kakutayandana. Bamwi bayoolibonya kuti nzyobaamba kuti babelekela Leza nzyakubeja. (2 Tim. 3:1-5) Banakristo beni-beni abalo alabacitikila mapenzi aali boobu; aboobo, ino ncinzi cikonzya kumugwasya kuti muliyumye ikuti ngomukwetene limwi wamutyompya?

Amulibone Mbuli Jehova Mbwamubona

Kumatalikilo, cilakonzya kumukatazya kapati kusyoma kuti muntu ngomuyanda inga wamutyompya kapati. Mulakonzya kulipa mulandu akaambo kakulubizya kwakwe.

Kamuyeeya kuti awalo muntu uulondokede Jesu bakamukaka kumweenzinyina ngwaakali kusyoma akuyanda. Jesu wakabasala beenzinyina aaba, baapostolo naakamana kuyeeya kapati akupaila. Aciindi eeci boonse bali 12 bakali babelesi ba Jehova basyomeka. Aboobo, cakutadooneka Jesu wakatyompwa kapati Judase naakaba “sikumwaaba.” (Lk. 6:12-16) Nokuba boobo, Jehova tanaakamupa mulandu Jesu akaambo kancaakacita Judase.

Masimpe ngakuti kwiina banabukwetene balondokede aciindi cino. Boonse balalubizya. Sintembauzyo wakasololelwa amuuya wakalemba kuti: “O Jehova, nowakabika moyo wako kuzibi zyesu, ngwani wakali kunoopona, O Mwami?” (Int. 130:3) Nobaiya Jehova, banabukwetene beelede kulekelelana kulubizya kwabo.—1 Pet. 4:8.

Nokuba boobo, “toonse buyo tuleelede kulyaambilila makani esu kubusyu bwa-Leza.” (Rom. 14:12) Ikuti umwi kapenzya mweenzinyina, nguujisi mulandu kuli Jehova. Jehova tabayandi basinkondo abaabo babelesya majwi mabi, aboobo taakwe kaambo muntu ncakonzya kupenzyela mweenzinyina akutamulemeka. (Int. 11:5; Ef. 5:33; Kol. 3:6-8) Ikuti Munakristo kanyema-nyema alimwi katacinci, weelede kugusyigwa mumbungano ya Banakristo. (Gal. 5:19-21; 2 Joh. 9, 10) Ngwakwetene limwi teelede kuyoowa kumwaamba kubaalu akaambo kamicito yakwe iitali ya Bunakristo. Masimpe, Jehova ulababikkila maano aabo bapenzyegwa.

Muntu nacita bumambi, tabisyili buyo ngobakwetene limwi pele ulamubisyila awalo Jehova. (Mt. 19:4-9; Heb. 13:4) Ikuti naa ooyo watabisya wali kusoleka kutobela njiisyo zyamu Bbaibbele, teelede kulimvwa bubi akaambo kakulubizya kwamweenzinyina.

Kamuyeeya kuti Jehova ulizyi mbomulimvwa. Ulalyaamba kuti ngumulumi wabana Israyeli, alimwi Ijwi lyakwe lilijisi twaambo tweetezya itutondezya mbwaakausa akaambo kabumambi bwakumuuya mbobakacita. (Is. 54:5, 6; Jer. 3:1, 6-10) Amuzyibe kuti Jehova ulamubona nomulila akaambo kakumukaka nkwaakacita ngomukwetene limwi. (Malk. 2:13, 14) Ulizyi kuti muyandika kuyumizyigwa akukulwaizyigwa.

Jehova Mbwaumbulizya

Nzila yomwe Jehova njabelesya kuumbulizya bantu nkwiinda mumbungano ya Banakristo. Ba Jane bakagwasyigwa munzila eeyi. Baamba kuti: “Mulangizi wabbazu naakatuswaya nceciindi nindakatyompedwe kapati. Wakalizyi kuti ndakalityompedwe akaambo kakuti balumi bangu bakali kuyanda kundileka. Bakajana ciindi cakundigwasya ikuyeeya  magwalo mbuli lwa 1 Ba-Korinto 7:15. Magwalo aaya alimwi amajwi aalubomba ngaakabelesya akandigwasya kuti kanditalimvwi kuba amulandu alimwi ndakakatalukwa.” *

Ba Margarita ibaambwa kale, abalo bakaiya kuti Jehova ulagwasya kwiinda mumbungano ya Banakristo. Baamba kuti: “Nindakabona kuti balumi bangu tabacinci, twakalongela kudolopo limbi abana bangu. Nitwakasika, ndakajana ŋanda yakubbadelela. Buzuba bwakatobela, nindakali kulongolola zyintu muŋanda ndakamvwa muntu kakonkomona kumulyango. Ndakayeeya kuti mbaamukamwini ŋanda bakaintu bakkala munsi-munsi. Cigambya ncakuti, wakali mucizyi wakayiisya bamaama Bbaibbele alimwi wakagwasya mukwasyi wesu kwiiya kasimpe. Tiibakali kuyeeya kuti balandijana, bakali kuboolela bamukamwini ŋanda mbibakali kwiiya limwi Bbaibbele. Eelyo kaka ndakamvwa kabotu—ndakalila! Ndakabaambila penzi lyangu abalo bakalila. Mpoonya bakandaambila kuti tuunke kumuswaangano buzuba oobo. Bakatutambula kabotu bakwesu, abalo baalu bakabikka bubambe bwakuti mukwasyi wangu ugwasyigwe kumuuya.”

Bamwi Mbobakonzya Kugwasya

Masimpe, bamumbungano ya Banakristo balakonzya kugwasya munzila zinji. Mucikozyanyo, Ba Margarita bakeelede kujana ncito. Mukwasyi umwi mumbungano bakabaambila kuti inga kababalangila bana bakotoka kucikolo ikuti naa kwayandika.

Ba Margarita baamba kuti: “Ndilaakulumba kapati bakwesu abacizyi nobalyaaba kuti babeleke andiswe mumulimo wamumuunda.” Kwiinda mukucita boobu, bakwesu mumbungano balagwasya ‘kunyamuna mikuli’ yabamwi alimwi nobacita boobo bazuzikizya “mulao wa-Kristo.”—Gal. 6:2.

Aabo ibapengede akaambo kazibi nzyobacita bamwi balalumba kapati nobagwasyigwa munzila iili boobu. Ba Monique, ibakatijigwa abalumi babo bakabasiya acikwelete cisika ku $15,000 (K67,000,000) abana bone, baamba kuti: “Ibakwesu abacizyi bakatugwasya kapati. Tandizyi naa nitwakapona buti nibatakatugwasya. Ndilimvwa kuti Jehova wakandipa bakwesu babotu, bakandigwasyila bana bangu. Ndakakkomana kubona bana bangu kabakomena kumuuya akaambo kakugwasyigwa kuli boobu. Ikuti naa  ndilaamubuzyo, baalu bakali kundigwasya. Ikuti naa ndayanda kubaambila cimwi cintu, bakali kuswiilila.”—Mk. 10:29, 30.

Masimpe, mulongwe ulazyiba nateelede kwaamba makani ajatikizya mapenzi aakacitikila mweenzinyina. (Muk. 3:7) Ba Margarita baamba kuti: “Lyoonse ndakali kukkomana kubandika abacizyi bamumbungano yangu mpya kujatikizya zyintu zyoonse—mbotubeleka mumulimo wakukambauka, ziiyo zya Bbaibbele, bana besu—kuleka buyo mapenzi angu. Ndakalumba kuti bakandigwasya kuti ndilube zyintu zyakandicitikila kaindi akutalika buumi bupya.”

Mutapilusyi Cibi Kucibi

Cimwi ciindi, muciindi cakulipa mulandu akaambo kacibi ncaakacita ooyo ngomwakakwetene limwi, ndiza inga mwanyema akaambo kacibi cakwe. Ikuti naa mwazumanana kunyema, cilakonzya kumupa kuti muleke kusyomeka kuli Jehova. Mucikozyanyo, mulakonzya kuyeeya mbomukonzya kupilusya cibi kumweenzinyoko uutasyomeki.

Ikuti naa muyanda kupilusya cibi, mweelede kuyeeya cikozyanyo ca Joshua a Kalebe. Aaba basankwa basyomeka bakabikka buumi bwabo muntenda kutegwa batwele Nyika Yakasyomezyegwa. Basikutwela bamwi tiibakajisi lusyomo aboobo bakapa kuti bantu batamumvwidi Jehova. Bana Israyeli bamwi bakali kuyanda kubauma mabwe ba Joshua a Kalebe nibakali kubakulwaizya kuti bazumanane kusyomeka. (My. 13:25–14:10) Akaambo kakuti bana Israyeli bakacita boobu, Joshua a Kalebe bakasinikizyigwa kuti bakkale munkanda myaka iili 40, kutali akaambo kakuti bakabisya pele akaambo kakubisya kwabamwi.

Nokuba kuti Joshua a Kalebe bakatyompwa, tiibakalekela zibi zyabeenzinyina kuti zibanyemye. Bakabikkila buyo maano kumulimo wabo kuli Jehova. Kumamanino aamyaka iili 40 kabali munkanda, bakafwutuka aba Levi akunjila mu Nyika Yakasyomezyegwa.—My. 14:28-30; Jos. 14:6-12.

Nzyaakacita ngomwakakwetene limwi zilakonzya kupa kuti mupenge kwaciindi cili mbocibede. Mulakonzya kulekana, pele mulakonzya kupenga mumoyo akubula mali. Nokuba boobo, muciindi cakukatazyigwa mumizeezo, kamuyeeya kuti Jehova ulizyi mbwaya kubacita aabo batatobeli acaali zyeelelo zyakwe, mbubwenya mbwaakacita kubana Israyeli batasyomeki.—Heb. 10:30, 31; 13:4.

Inga Mwacikonzya

Muciindi cakulekela mizeezo iitali kabotu kuti imutyompye, mweelede kuyeeya mbuli mbwayeeya Jehova. Ba Jane baamba kuti: “Ikuswiilila kumateepu aakalekkodwa aa Ngazi Yamulindizi a Sinsimuka! kwakandigwasya kapati. Miswaangano ayalo yakandiyumya kapati. Kutola lubazu mumiswaangano kwakandigwasya kuluba mapenzi ngondijisi. Mulimo wakukambauka awalo wakandigwasya mbubwenya. Kwiinda mukugwasya bamwi kuti bamuzyibe Jehova candigwasya kuti ndibe alusyomo luyumu. Alimwi akuyiisya basikwiiya Bbaibbele kwakandigwasya kuti kandibikkila maano kuzyintu ziyandika kapati.”

Ba Monique baambwa kale, baamba kuti: “Kwiinda mukujanika kumiswaangano ciindi coonse akutola lubazu lyoonse mumulimo wamumuunda ndakacikonzya kuliyumya. Tulikamantene mumukwasyi alimwi amumbungano. Mapenzi aangu akandigwasya kubona mpondilezya. Ndakasunkwa, pele Jehova wakandigwasya kuliyumya.”

Andinywe mulakonzya kuliyumya mumapenzi aanu. Nokuba kuti mulapenga mumoyo akaambo kakuti wakamukaka ngomwakakwetene limwi, amutobele lulayo lwa Paulo lwakuti: “Tutalengaani mukucita kabotu, nkaambo kuciindi ceelede tulatebula, twatafunuka.”—Gal. 6:9.

Bupanduluzi buyungizidwe

[Cifwanikiso icili apeeji 31]

Bakalekwa balabalumba aabo babagwasya mumulimo wamumuunda