Amuliibe Nomuli Akati Kabantu ba Leza
Amuliibe Nomuli Akati Kabantu ba Leza
“Njookulumba mumbungano impati.”—INT. 35:18.
1-3. (a) Ino ncinzi cikonzya kubapa Banakristo kuti banjile mumapenzi kumuuya? (b) Ino nkuli bantu ba Leza nkobakonzya kutijila kutegwa bakwabililwe?
NIBAKALI kulyookezya, ba Joe abakaintu babo bakali kusaya mulwaanje mwakali nswi zinji zyamisyobo iindene-indene zipati azisyoonto. Bakasaya kuya mukati asyoonto kutegwa beebelele zyintu zili mulwaanje. Nibakasika mukati alimwi maanzi mpaakali manji, bakaintu baba Joe bakaamba kuti: “Ndiyeeya kuti twasakana.” Mpoonya ba Joe bakaamba kuti: “Utapengi musa, ndilicizyi ncondicita.” Nikwakainda buyo ciindi cisyoonto kuzwa ciindi eeci bakabona kuti taaku nswi zyakali kulibonya. Kabayoowede, bakabona muswi mupati wakali kuboola kuli ba Joe. Ba Joe bakanyina kwakutijila. Muswi ooyu niwakasika afwaafwi aba Joe, wakanyona kuya kumbi.
2 Munakristo ulakonzya kutalika kulombozya zyintu zyamunyika ya Saatani—kulikondelezya, kubeleka, zyintu zyakumubili—cakuti takonzyi kuzyiba kuti uyaabubbila mumaanzi. Ba Joe baalu Banakristo bakaamba kuti: “Cakandicitikila cakandipa kuyeeya beenzuma mbotumvwana limwi. Kamusayila aali kabotu alimwi mpomukonzya kuliiba—mumbungano.” Mutani kusayili maanzi nkwaali manji nkomukonzya kulijana kuti muli molikke kumuuya alimwi akwakuti cibi inga camucitikila. Ikuti naa mwabona kuti mwaunka kumaanzi manji, mweelede kujoka cakufwambaana. Ibuyo-buyo, mulakonzya kuleka kumvwana a Jehova.
3 Aano mazuba, inyika taili kabotu ku Banakristo. (2 Tim. 3:1-5) Saatani ulizyi kuti ciindi camumanina, alimwi uyanda kuti abanyonganye aabo batacenjede. (1 Pet. 5:8; Ciy. 12:12, 17) Nokuba boobo, tulikwabilidwe. Jehova watubikkila busena nkotukonzya kubalikila kuti tukwabililwe—imbungano ya Banakristo.
4, 5. Ino bantu banji balimvwa buti kujatikizya buumi bwabo bwakumbele, alimwi ino nkaambo nzi?
4 Zyintu zyamunyika zilakonzya kutukwabilila buyo asyoonto—kumubili naa mumizeezo. Bantu banji balimvwa kuti tabakwabilidwe kabotu akaambo kalunya, inkondo, kudula kwazyintu akusofwaala kwabusena mpobakkala. Bantu boonse balapenga akaambo kakucembaala akuciswa. Bamwi ibabeleka, ibajisi maanda, mali alimwi ibataciswi-ciswi abalo balakonzya kulibuzya kuti naa baya kupona kwaciindi cilamfwu buti.
5 Alimwi bantu banji baalilwa kuliiba mumizeezo. Cuusisya ncakuti, ibanji ibakali kuyeeya kuti baya kuliiba baakukwata naa kukwatwa akuba abana, bajana kuti zyoonse nzibakali kuyeeyela tiizyakacitika pe. Bazikombelo banji babona kuti tabasololelwi kabotu muzyikombelo zyabo. Balalimvwa oobo akaambo kakutalilemeka anjiisyo zitali zyamumagwalo. Aboobo bantu banji balimvwa kuti elikke sayaansi naa bantu bacita zibotu mbabakonzya kubagwasya. Aboobo tacigambyi kuti bantu mbotukkala limwi balimvwa kuti tabakwabilidwe alimwi bamwi tabayandi akuyeeya buumi bwabo bwakumbele.
6, 7. (a) Ino ncinzi cipa kuti bantu ba Leza kabatalibiliki mbuli mbobalibilika bantu batali Banakristo? (b) Ino ncinzi ncotutiilange-lange?
6 Eelyo kaka kuli kwiindana kuliko akati kabantu bali mumbungano ya Banakristo alimwi abaabo ibatali Bakamboni! Nokuba kuti swebo ibantu ba Jehova tulaba amapenzi ngamunya ngobajana basimukoboma, tatulibiliki. (Amubale Isaya 65:13, 14; Malaki 3:18.) Ino nkaambo nzi? Akaambo kakuti Bbaibbele lilatwaambila cakapa kuti muntu kapenga, aboobo tulizyi mbotunga twaliyumya mumapenzi ngotujisi. Akaambo kaceeci, tatulibiliki kujatikizya buumi bwakumbele. Kuba bakombi ba Jehova kulatukwabilila kukuyeeya kutali kabotu, ikutalilemeka akumapenzi aaboola akaambo kakucita zyeezyi. Aboobo, ibantu boonse ibali mumbungano ya Banakristo balaaluumuno ndobatajisi bantu bambi.—Is. 48:17, 18; Flp. 4:6, 7.
7 Zikozyanyo zimwi zilakonzya kutugwasya kubona kuti bantu ba Jehova balaaluumuno kutali bantu batali bantu bakwe. Eezyi zikozyanyo zilakonzya kutupa kuti tuliyeeye nzyotucita akubona naa kuli nzyotuyandika kucita kutegwa katuucilila mulawo wa Leza walo iwakabambilwa kuti utukwabilile.—Is. 30:21.
‘Maulu Aangu Akali Kuyanda Kutezeleka’
8. Ino ncinzi ncobali kucita lyoonse babelesi ba Jehova?
8 Kuzwa kaindi, bantu bakali kubelekela Jehova tiibakali kumvwana abantu ibatakali kumubelekela. Masimpe, Jehova wakaamba kuti kuya kuba kutamvwana akati kabakombi bakwe abantu ba Saatani. (Matl. 3:15) Akaambo kakutobela njiisyo zya Leza, bantu ba Leza balacita zyintu munzila iindene abantu bambi. (Joh. 17:15, 16; 1 Joh. 2:15-17) Kucita boobu tacili cuuba-uba pe. Zimwi ziindi, abalo babelesi ba Jehova bamwi balabudooneka busongo bwakutobela bukkale bwa Bunakristo.
9. Amwaambe penzi ndyaakajisi mulembi wa Intembauzyo 73.
9 Umwi wababelesi ba Jehova iwakali kudooneka ikuti naa wakacita kabotu kubelekela Leza mulembi wa Intembauzyo 73, uuyeeyelwa kuti ngwaluzubo lwa Asafu. Sintembauzyo wakali kuyanda kuzyiba bantu babi ncobakkalila kabotu, kukkomana akuzwidilila, bantu ba Leza kabapenga.—Amubale Intembauzyo 73:1-13.
10. Ino nkaambo nzi makani ngaakaamba sintembauzyo ncaayandika kapati kuli ndinywe?
10 Sena kuli nomwakalibuzyide mibuzyo iili mbuli njaakalemba sintembauzyo? Ikuti naa mboobo, tamweelede kuyeeya kuti tamujisi lusyomo. Ibabelesi ba Jehova banji kubikkilizya abamwi mbaakabelesya kulemba Bbaibbele, bakali kuyeeya mbuli sintembauzyo ooyu. (Job. 21:7-13; Int. 37:1; Jer. 12:1; Hab. 1:1-4, 13) Masimpe, boonse ibayanda kubelekela Jehova beelede kuyeeya akubuzumina bwiinguzi kumubuzyo ooyu wakuti: Sena kubelekela akumumvwida Leza ncintu cibotu kucita? Ooyu mubuzyo ulikozyenye kukaambo nkaakaamba Saatani mumuunda wa Edeni. Aaka nkakaambo kajatikizya bweendelezi bwa Leza. (Matl. 3:4, 5) Aboobo toonse tweelede kukabikkila maano kaambo nkaakaamba sintembauzyo. Sena mulakonzya kulombozya bantu babi ibalidunda akwaamba kuti tabajisi mapenzi? Sena tweelede kucileka kubelekela Jehova akutalika kubaccilila? Eeci ncencico Saatani ncayanda kuti tucite.
11, 12. (a) Ino mbuti sintembauzyo mbwaakacileka kudooneka, alimwi ino eeci cituyiisya nzi? (b) Ino ncinzi camugwasya andinywe kuti muyeeye mbuli sintembauzyo?
11 Ino ncinzi cakamugwasya sintembauzyo kutegwa aleke kudooneka? Nokuba kuti wakazumina kuti wakali kuyanda kuleka kubelekela Leza, wakacinca kuyeeya ‘naakanjila mucikombelo ca-Leza’—nceciindi naakamvwana abantu bacita kabotu kumuuya bakali kujanika kutente naa kutempele lya Leza alimwi wakayeeya mbwaakeelede kumubelekela Leza. Amane sintembauzyo wakabona kuti tanaakali kuyanda kupegwa mulandu mbuli baabo bacita zibi. Wakabona kuti micito yabo yakali ‘kubabikka mumasena aatezemuka.’ Sintembauzyo wakabona kuti aabo boonse bakaleka kumubelekela Jehova “bayoofwambaana kunyonyoonwa” kakunyina uubakwabilila pele aabo bamubelekela Jehova uyakubakwabilila. (Amubale Intembauzyo 73:16-19, BT, 27, 28.) Cakutadooneka mwakabona kaambo. Ikucita zyintu iziteendelani azili mumagwalo inga zyaboneka mbuli kuti nzibotu pele izizwa kumicito eeyi zilausisya.—Gal. 6:7-9.
12 Ino ncinzi cimbi ncotwiiya kuli zyakamucitikila sintembauzyo? Wakajana luumuno a busongo akati kabantu ba Leza. Wakatalika kuyeeya kabotu naakaunka kubusena nkubakali kukombela Jehova. Mbubwena buyo andiswe mazuba aano, inga twajana bantu ibakonzya kutulaya kabotu kwiinda mumiswaangano yambungano. Nkakaambo kaako Jehova ncaambila babelesi bakwe kuti kabajanika kumiswaangano ya Bunakristo. Imiswaangano eeyi ilabakulwaizya kucita zintu izili kabotu.—Is. 32:1, 2; Heb. 10:24, 25.
Amucizibe Kusala Beenzinyoko
13-15. (a) Ino ncinzi cakamucitikila Dina, alimwi citondezya nzi? (b) Ino nkaambo nzi kuyanzana a Banakristoma ncokukonzya kutukwabilila?
13 Dina mwanaa Jakobo ncikozyanyo camuntu wakalinjizya mumapenzi akaambo kakusobana abantu bakunyika. Ibbuku lya Matalikilo litwaambila kuti wakali acilengwa cakusobana abana basimbi baku Kanana kucilawo ooko kwakali kukkala mukwasyi wakwe. Bana Kanana tiibakali kulilemeka mbuli bwakali kulilemeka bakombi ba Jehova. Muciindi caboobo, nzibakajana basikuvwukula zyintu zyakaindi zitondezya kuti zyintu nzyobakali kucita bana Kanana zyakapa kuti cisi cabo cizyule bantu bakali kukomba mituni, batakali kulilemeka, bakali kucita bukombi bwakubeja bujatikizya koonana alimwi bakali basilunya. (Kul. 23:23; Lev. 18:2-25; Dt. 18:9-12) Amuyeeye cakamucitikila Dina akaambo kakusobana abantu aaba.
14 Sekemu, wakubusena ooko wakali kwaambwa kuti ‘wakali kulemekwa kwiinda basiŋanda boonse bawisi’ naakamubona Dina, ‘wakamutizya, akoona anguwe, akumubisizya.’ (Matl. 34:1, 2, 19) Eelyo kaka cakabija! Sena Dina wakali kuyeeyela kuti cintu camusyobo ooyu cilakonzya kumucitikila? Ndiza wakali buyo kuyanda kuyanzana abakubusi bamumunzi ooyu balo mbaakali kuyeeya kuti bali buyo kabotu. Pele, Dina wakalyeena.
15 Ino makani aaya atuyiisya nzi? Twiiya kuti tatweelede kuyanzana abantu batasyomi mpoonya katuyeeya kuti kunyina cibi cikonzya kutucitikila. Magwalo aamba kuti: “Mweenda abamineme, anywebo mulaminama.” (1 Kor. 15:33) Kulubazu lumwi, kuyanzana abantu mbomukomba limwi, ibalilemeka alimwi ibamuyanda Jehova kulakonzya kumukwabilila. Kuyanzana kuli boobu kulakonzya kumupa kuti kamucita zyintu zili kabotu.—Tus. 13:20.
“Mulisanzizidwe”
16. Ino ncinzi mwaapostolo Paulo ncaakaamba kujatikizya bamwi mumbungano yaku Korinto?
16 Imbungano ya Bunakristo yabagwasya kapati bantu kutegwa basalale kumicito iisofwaazya. Mwaapostolo Paulo naakalemba lugwalo lwakwe lwakusaanguna kumbungano yaku Korinto, wakaamba kujatikizya kucinca nkobakacita Banakristo bakokuya kutegwa kabapona kweelana azyeelelo zya Leza. Bamwi bakali basibwaamu, basikukomba mituni, basimamambe, baalumi boona baaluminyina, babbi, bakolwi alimwi amicito imbi mibi. Paulo wakabaambila kuti: “Pele sunu mulisanzizidwe.”—Amubale 1 Ba-Korinto 6:9-11.
17. Ino kutobela njiisyo zyamu Bbaibbele zyabacinca buti bantu banji?
17 Bantu batajisi lusyomo tabajisi njiisyo zikonzya kubasololela. Tabalilemeki mbumunya mbuli baabo mbobakalene limwi mbuli mbobakali kucita bana Korinto bansiku kabatanaba Banakristo. (Ef. 4:14) Pele luzyibo lwini-lwini lwamu Jwi lya Leza akuyanda kwakwe lulakonzya kucinca buumi bwabaabo baatobela Magwalo. (Kol. 3:5-10; Heb. 4:12) Ibanji bali mumbungano ya Banakristo balakonzya kumwaambila kuti kabatanaiya zyeelelo zya Jehova, tiibakali kulilemeka kabotu. Pele, tiibakali kukkutila akukkomana. Bakaba aluumuno nibakatalika kuswaangana abantu ba Leza akutobela njiisyo zyamu Bbaibbele.
18. Ino ncinzi cakamucitikila mwana umwi, alimwi eeci cituyiisya nzi?
18 Kulubazu lumwi, bamwi ibakasiya ‘maanzi mabotu’ naa mbungano ya Banakristo balityompedwe akaambo kakusala nkobakacita. Mucizyi umwi ngotutaaite kuti Tanya, waamba kuti naakacili mwana wakakomezyegwa mumukwasyi wa Bakamboni, pele naakali amyaka iili 16 wakaleka kuswaangana, wakatalika “kutobela zyintu zyamunyika.” Akati kazyintu zyakamucitikila wakaba ada lyamusyokwe alimwi akugusya da. Lino aano mazuba waamba kuti: “Imyaka yotatwe njindakkala kanditaswaangani cilandinyonganya mumizeezo alimwi ndilizyi kuti eeci tacikamani. Icintu cindikatazya kapati ncakuti ndakajaya mwanaangu katanazyalwa. . . . Ndiyanda kwaambila boonse bacili bana ibayanda kubona nyika mboibede kwaciindi buyo cisyoonto kuti: ‘Batasoli.’ Kumatalikilo inga kacinonezya, pele mukuya kwaciindi inga mwatyompwa. Inyika taku nciipa, pele kuli buyo mapenzi. Ndilizyi. Ndakacisola. Tamweelede kuzwa mumbungano ya Jehova. Nenzila elikke iikonzya kutupa kukkomana.”
19, 20. Ino mbungano ya Banakristo itukwabilila buti, alimwi munzila nzi?
19 Kamuyeeya buyo cikonzya kumucitikila kuti naa mwaleka kukwabililwa ambungano ya Banakristo. Ibanji nobayeeya zyakabacitikila kabatanaiya kasimpe, cilabacima cakuti tabayandi akuziyeeya. (Joh. 6:68, 69) Mulakonzya kuzumanana kujana luumuno akukwabililwa kumapenzi ngaleta Saatani munyika kwiinda mukuzumanana kuba abakwesu abacizyi Banakristo. Ikuba ambabo akujanika lyoonse kumiswaangano yambungano cinakumuyeekezya lyoonse mbociyandika kutobela zyeelelo zya Jehova akumugwasya kuti kamupona kabotu. Mulakonzya ‘kumulumba Jehova mumbungano mpati’ mbubwenya mbuli sintembauzyo mbwaakacita.—Int. 35:18.
20 Masimpe, kuli twaambo tunji itupa kuti Banakristo babe mumapenzi aakonzya kubapa kuti cibakatazye ikuzumanana kusyomeka. Cilakonzya kuti kabayandika buyo kuti umwi abatondezye nzila iili kabotu. Ino ncinzi ncomukonzya kucita nywebo abantu boonse mumbungano kutegwa mubagwasye aabo basyominyoko bali mumapenzi aali boobu? Mucibalo citobela tulalanga-langa mbomukonzya ‘kubagwasya akubayaka’ bakwesu.—1 Tes. 5:11.
Ino Inga Mwaingula Buti?
• Ino ncinzi ncotwiiya kuzyintu zyakamucitikila mulembi wa Intembauzyo 73?
• Ino ncinzi ncotwiiya kucintu cakamucitikila Dina?
• Ino nkaambo nzi ncomukonzya kuliiba mumbungano ya Banakristo?
[Mibuzyo yaciiyo]
[Zifwanikiso izili apeeji 7]
Kamusayila aali kabotu; kamuzumanana kuba mumbungano