Mibuzyo Yabasikubala

Sena lugwalo lwa Ezekiele 18:20, ilwaamba kuti “Mwana takoolemenwa milandu yawisi,” lulakazyanya alugwalo lwa Kulonga 20:5 ilwaamba kuti Jehova “[ula]bweedezya milandu yaba mawisi amitwe yabana babo”?

Kunyina kukazyanya kuliko pe. Lugwalo lomwe lwaamba ziyakucitikila muntu walubizya kakuli lumwi lutondezya kuti kulubizya kwamuntu omwe kulakonzya kubajatikizya bana bakwe.

Majwi aali kubbuku lya Ezekiele caandano 18 akankaizya kaambo kakuti muntu weelede kulivwiilila milandu yakwe alikke mwini. Kapango 4 kaamba kuti: “Muntu uubisya—ngonguwe uuyoofwa.” Ino mbuti kuti “muntu uliluleme [alimwi] ulabamba milao akucita bululami”? “Ncobeni uyoopona.” (Ezk. 18:5, 9) Aboobo aumwi muntu, naa wakomena akusika aciimo cakukonzya kulisalila naa kulyaambilila mwini, ulabetekwa kweelana “[a]nzila zyakwe.”—Ezk. 18:30.

Njiisyo eeyi ilasalazyigwa mucikozyanyo camu Levi uutegwa Kora. Ciindi bana Israyeli nobakali alweendo munkanda, Kora wakaleka kuukkomanina mulimo ngwaakapedwe kucita. Mukusola kuti abe mupaizi, Kora alimwi abantu bamwi bakazangila baiminizi ba Jehova, Musa a Aroni. Jehova wakamunyonyoona Kora abasikuzanganyina akaambo kakuti bakalisumpula akuyanda kucita mulimo ngobatakapedwe kucita. (My. 16:8-11, 31-33) Bana ba Kora kunyina nobakatola lubazu mukuzanga ooku. Leza kunyina naakabapa mulandu akaambo kacibi cabausyi. Akaambo kakusyomeka kuli Jehova, bakafwutuka.—My. 26:10, 11.

 Pele ino mbuti kujatikizya kucenjezya ikulembedwe kulugwalo lwa Kulonga 20:5, kwalo ikuli akati ka Milawo iili Kkumi? Alimwi amulange-lange majwi aaengelede kaambo aaka. Jehova wakatalisya cizuminano ca Mulawo abana Israyeli. Nobakamana kumvwa zyakali kuyandika mucizuminano eeci, bana Israyeli bakaamba cakupozya kuti: “Coonse buyo Jehova ncaamba tulacicita.” (Kul. 19:5-8) Aboobo cisi coonse cakaba acilongwe cilibedelede a Jehova. Nkekaambo kako majwi aalembedwe kulugwalo lwa Kulonga 20:5 cacigaminina akali kwaamba cisi mbocizulwa.

Ciindi bana Israyeli nobakali kusyomeka, cisi coonse cakagwasyigwa alimwi akulelekwa. (Lev. 26:3-8) Kulubazu lumwi, ciindi nobatakali kusyomeka, cisi coonse cakali kunjila mumapenzi. Nobakamukaka Jehova akutalika kukomba baleza bambi, Jehova wakaleka kubaleleka akubakwabilila; cisi coonse cakaba mumapenzi. (Bab. 2:11-18) Mubwini, nokuba kuti cisi coonse cakali kukomba mituni, kwakali bantu bambi ibakazumanana kusyomeka akutobela milawo ya Leza. (1 Bam. 19:14, 18) Kulangilwa kuti bantu ibasyomeka bakapenga akaambo kazibi zyacisi, nokuba boobo, Jehova wakabafwida luzyalo.

Ciindi bana Israyeli nobakaleka kulemeka milawo ya Jehova, cakunga izyina lyakwe tiilyakali kulemekwa abantu bamumasi aambi, Jehova wakasubula bantu bakwe kwiinda mukulekela bana Babuloni kuti babatole mubuzike. Mubwini cisubulo eeci cakabajatikizya bantu aumwi kumugama pele alimwi cakabajatikizya boonse antoomwe. (Jer. 52:3-11, 27) Inzya, Ibbaibbele litondezya kuti cibi ncobakacita bana Israyeli kabali cisi cakali cipati cakunga cakabajatikizya bamumazyalani otatwe, one naa manji kwiinda waawo, mbubonya mbolwaamba lugwalo lwa Kulonga 20:5.

Ibbaibbele alimwi lilijisi makani aamba mboyakajatikizigwa mikwasyi imwi akaambo kazibi zyabazyali. Mupaizi Mupati Eli, wakabisizya Jehova akaambo kakulekela bana bakwe, “bana ba-Saatani,” kuzumanana kabali bapaizi. (1 Sam. 2:12-16, 22-25) Akaambo kakuti Eli wakali kulemeka bana bakwe kwiinda Jehova, Leza wakaamba kuti mukwasyi wa Eli wakali kuya kunyangwa coolwe cakuba bapaizi bapati, calo cakacitika kutalikila kumuzyukululwa wakwe, Abiyatare. (1 Sam. 2:29-36; 1 Bam. 2:27) Injiisyo iili kulugwalo lwa Kulonga 20:5 alimwi ilitondezyedwe mucikozyanyo ca Gehazi. Tanaakacibelesya kabotu coolwe ncaakajisi cakugwasyilizya Elisha mukuyanda kuti alijanine mpindu mukuponesyegwa kwa Naamani, Silutwe wampi yabasikalumamba yaba Aramu. Kwiinda muli Elisha, Jehova wakamusinganya kuti: “Cinsenda ca-Naamani cilakakatila nduwe anyungu zyako lyoonse mane kukabe akutamani.” (2 Bam. 5:20-27) Aboobo bana ba Gehazi bakapenga akaambo kakubisya kwakwe.

Mbwali Mulengi alimwi a Sikupa Buumi, Jehova ulaanguzu zyakusala cisubulo iceelede cakupa muntu. Zyakacitika izyaambwa atala aawa zitondezya kuti bana naa baluzubo lwamuntu balakonzya kujatikizyigwa azibi zyabamasyaanene babo. Nokuba boobo, Jehova ulakumvwa“ kulila kwabatyankwa ansi akwabapengede” alimwi akwabantu ibalomba kulekelelwa alimwi alugwasyo kuzwa kulinguwe.—Job. 34:28.

[Cifwanikiso icili apeeji 29]

Kora abazanginyina bakapegwa mulandu akaambo kamicito yabo