Amulibonye Kuti Mucita Kabotu Kumuuya
Amulibonye Kuti Mucita Kabotu Kumuuya
“Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako.”—1 TIM. 4:15.
1, 2. Ino ncinzi ncotuzyi kujatikizya Timoteo naakacili mwana alimwi akucinca kwakacitika naakajisi myaka iitandila ku 20?
NAAKACILI mwana, Timoteo wakali kukkala mucisi ca Roma ku Galatiya, iciitwa kuti Turkey mazuba aano. Imbungano zya Banakristo zinji zyakatalisyigwa kubusena ooku nokwakainda myaka minji kuzwa ciindi Jesu naakafwa. Timoteo abanyina alimwi abakaapanyina bakazyi kuba Banakristo mumbungano imwi yakubusena ooku alimwi bakali basungu. (2 Tim. 1:5; 3:14, 15) Timoteo naakacili mwana wakali Munakristo uukkomene kali mumukwasyi wakwe. Cakutayeeyela, zyintu zyakatalika kucinca.
2 Eeci cakatalika ciindi mwaapostolo Paulo naakaswaya busena oobu ciindi cabili. Aciindi eeci, kuboneka kuti Timoteo tanaakaninga kkwanya myaka iili 20 naa iinda aawo. Kulangilwa kuti Paulo naakali kuswaya ku Lustra, wakamvwa kuti Timoteo “wakali empuwo mbotu kulibabunyina” mumbungano zyakooko. (Inc. 16:2) Timoteo wakatondezya kuti wakalisimide nokuba kuti wakali mwana. Aboobo, kwiinda mukusololelwa aamuuya uusalala, Paulo alimwi abaalu bamumbungano eeyi bakabikka maanza aabo aali Timoteo, kuti atalike kubeleka mulimo waalubazu mumbungano.—1 Tim. 4:14; 2 Tim. 1:6.
3. Ino mulimo nzi ngwaakapegwa Timoteo?
3 Timoteo wakatambwa kuti akabeleke amwaapostolo Paulo. (Inc. 16:3) Kamuyeeya buyo Timoteo mbwaakakkomana naakaambilwa makani aaya. Kwamyaka minji kuzwa ciindi eeco, Timoteo wakali kuunka a Paulo alimwi zimwi ziindi wakali kubeleka abantu bambi, kabacita milimo njibakali kubapa baapostolo abaalu. Mulimo wakuswaya mbungano ngobakali kucita ba Paulo a Timoteo wakabagwasya kubayumya bakwesu kumuuya. (Amubale Incito 16:4, 5.) Aboobo, Banakristo banji bakamuzyiba Timoteo akaambo kakuti wakali kucita kabotu kumuuya. Nokwakainda myaka iili kkumi kuzwa ciindi naakatalika kubeleka a Timoteo, mwaapostolo Paulo wakalembela bana Filipi kuti: “Taakwe umbi uuli amoyo mbuli [wa Timoteo] uukonzya kumususunkana alususunkano lwinilwini. . . . Mulibwene ziyanza zyakwe mbuzibede, mulizi kuti mbubonya mbuli mwana mbwabelekela wisi, alakwe wabelekela ndime cakugwasya milimo ya-Makani Mabotu.”—Flp. 2:20-22.
4. (a) Ino mukuli nzi ngwaakapegwa Timoteo? (b) Ino mibuzyo nzi iikonzya kubuzyigwa kumajwi aa Paulo aali kulugwalo lwa 1 Timoteo 4:15?
4 Ciindi Paulo naakali kulembela bana-Filipi, wakalimupede kale mukuli Timoteo wakusala baalu alimwi abakutausi. (1 Tim. 3:1; 5:22) Timoteo wakaba mulangizi Munakristo uusyomeka. Nokuba boobo, mulugwalo oolu, Paulo wakakulwaizya Timoteo kuti abaleke ‘bantu boonse kuti bamubone mbwayaabukomena.’ (1 Tim. 4:15) Mbokunga Timoteo wakalilitondezyede kale kuti uulisimide kumuuya, ino ncinzi Paulo ncaakali kupandulula mumajwi aaya alimwi ino lulayo oolu inga lwatugwasya buti?
Milimo ya Bunakristo Yalibonya
5, 6. Ino bantu bamumbungano yaku Efeso bakali apenzi nzi, alimwi ino ncinzi Timoteo ncaakeelede kucita kutegwa abakwabilile?
5 Atulange-lange kaambo kali ku 1 Timoteo 4:15. (Amubale 1 Timoteo 4:11-16.) Katanalemba majwi aaya, Paulo wakaunka ku Makedoniya pele wakaambila Timoteo kuti acaale ku Efeso. Ino nkaambo nzi? Bantu bamwi mudolopo eeli bakatalika kuyiisya zyakubeja mumbungano. Timoteo wakeelede kwiikwabilila mbungano kuti itasofwaali. Ino mbuti mbwaakali kukonzya kucita oobu? Nzila yomwe njakuti, wakeelede kuba acitondezyo cibotu cakuti bamwi batobele.
6 Paulo wakalembela Timoteo kuti: “Ube ciilizyo cabaabo bazumina, mukwaamba amukweenda amukuyandana amukusyoma amukusalala.” Mpoonya wakayungizya kuti: “Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako.” (1 Tim. 4:12, 15) Ooku kuyaambele kwakali kujatikizya mbwaakali kucita kabotu kumuuya Timoteo kutali mulimo ngwaakajisi mumbungano. Oobu mbobeelede kucita Banakristo boonse.
7. Ino bantu boonse mumbungano beelede kucita nzi?
7 Mbubwenya mbucakabede mumazuba aa Timoteo, mazuba aano kuli milimo iindene-indene mumbungano. Bamwi mbaalu naa bakutausi. Bamwi mbapainiya baciindi coonse. Alimwi bamwi bajisi milimo yakuswaya mbungano, kubelekela ku Bbeteli naa bumisyinali. Baalu balayiisya kumiswaangano yaalubazu, yabbazu alimwi ayacooko. Nokuba boobo, Banakristo boonse—basankwa, bamakaintu alimwi abana—balakonzya kutondezya kuti bacita kabotu kumuuya. (Mt. 5:16) Mbubwenya mbwaakeelede kucita Timoteo, abalo Banakristo ibajisi milimo yaalubazu beelede kutondezya kubantu boonse kuti bacita kabotu kumuuya.
Kamwaambaula Kabotu Kutegwa Bamwi Baiye Kulindinywe
8. Ino zyintu nzyotwaamba zibujatikizya buti bukombi bwesu?
8 Timoteo wakeelede kwaambaula kabotu kutegwa bantu baiye kulinguwe. Ino mbuti mbotukonzya kutondezya kuti tucita kabotu notwaambaula? Kweelana ambotwaambaula ibantu balakonzya kuzyiba mbotubede. Jesu wakaliluzi naakaamba kuti: “Mulomo ulagwisya aata mumoyo.” (Mt. 12:34) Jakobo mwanaakwabo Jesu awalo wakalizyi kuti nzyotwaamba zilabujatikizya bukombi bwesu. Wakalemba kuti: “Na nkwali uuliyeeya kuti musyomi, nekubaboobo taangi lulimi lwakwe pele walyeena mumoyo wakwe mwini, busyomi bwayooyo mbwabuyo.”—Jak. 1:26.
9. Ino muunzila nzi motweelede kupa cikozyanyo cibotu notwaambaula?
9 Zyintu nzyotwaamba zilakonzya kutondezya bantu mumbungano mbotucita kumuuya. Muciindi cakwaambaula munzila yakufwubaazya, kutongooka naa kuvwiya, Banakristo basimide balaamba zyintu ziyaka, zyuumbulizya alimwi zikulwaizya. (Tus. 12:18; Ef. 4:29; 1 Tim. 6:3-5, 20) Ikuti katulibambide lyoonse kwaambila bantu nzyotusyoma alimwi akuzitobela tulakonzya kutondezya kuti tulamuyanda Leza. (Rom. 1:15, 16) Bantu babombe myoyo balabona mbotwaambaula alimwi balakonzya kutobela cikozyanyo cesu.—Flp. 4:8, 9.
Mbotukonzya Kulilemeka Akusalala
10. Ino nkaambo nzi lusyomo lwakutaupa-upa ameso ncoluyandika kutegwa tucite kabotu kumuuya?
10 Tamuli buyo mukwaambaula Imunakristo mweelede kupa cikozyanyo cibotu. Ikuti muntu kaamba zyintu zibotu pele kataziciti nkokuti ngusikuupa-upa ameso. Paulo wakalizyi kuti ba Farisi bakali kuupa-upa ameso alimwi wakalicizyi cakali kucitika akaambo kakulilemeka kwabo. Wakali kwiinduka-induluka kumucenjezya Timoteo kujatikizya zyintu nzibakali kucita zyakutasyomeka akulicengeezya. (1 Tim. 1:5; 4:1, 2) Pele Timoteo tanaakali kuupa-upa ameso pe. Mulugwalo lwakwe lwabili kuli Timoteo, Paulo wakalemba kuti: “Nsikonzyi kuluba lusyomo lwako lwinilwini.” (2 Tim. 1:5) Nokuba boobo, Timoteo wakeelede kutondezya kuti masimpe Munakristo mwini-mwini. Wakeelede kulilemeka kabotu.
11. Ino ncinzi Paulo ncaakalembela Timoteo naakali kwaamba kuvwuba?
11 Mumagwalo obilo ngaakalembela Timoteo, Paulo wakapa lulayo lwakulilemeka muzibeela ziindene-indene. Mucikozyanyo, Timoteo tanaakeelede kuyandisya kuvwuba. Paulo wakalemba kuti: “Kuyandisya lubono ngomuyanda wabubi boonse, eno nkaambo kakuluyandisya bamwi ncobaleela kulusyomo, elyo zyabajaya insoni zinjizinji.” (1 Tim. 6:10) Kuyandisya kuvwuba ncitondezyo cakuti muntu taciti kabotu kumuuya. Kulubazu lumwi, Banakristo ibakkomana nokuba kuti bajisi buyo zyintu zisyoonto, “cakulya acakulivumba,” batondezya kuti bacita kabotu kumuuya.—1 Tim. 6:6-8; Flp. 4:11-13.
12. Ino mbuti mbotukonzya kutondezya kuti tucita kabotu kumuuya?
12 Paulo wakaambila Timoteo mbociyandika kuti bamakaintu Banakristo “kabasama cakulibombya mbubonya mbokweelede, babe aciwa cibotu.” (1 Tim. 2:9) Bamakaintu ibalibombya alimwi ibasala kabotu zyakusama zyabo, ibalibamba kabotu lyoonse mubuumi bapa cikozyanyo cibotu. (1 Tim. 3:11) Njiisyo eeyi ilabajatikizya abalo basankwa. Paulo wakaambila balangizi kuti beelede ‘kusitikila, kulibatamika, kabatakwe kancimwa.’ (1 Tim. 3:2) Ikuti katucita oobu muzyintu nzyotucita aabuzuba, bantu baya kubona kuti tucita kabotu kumuuya.
13. Mbubonya mbuli Timoteo, ino mbuti mbotukonzya kulilemeka?
13 Timoteo wakeelede kutondezya cikozyanyo cibotu amukusalala. Paulo naakabelesya bbala eeli, wakali kwaamba makani aakoonana. Timoteo wakeelede kulilemeka ikapati naakali abamakaintu. Wakeelede kulemeka ‘bamacembele mbuli banyina, abanakalindu mbuli bacizyi bakwe, camoyo uusalala.’ (1 Tim, 4:12; 5:2) Noiba micito yakoonana kutazumizyidwe iiboneka mbuli kuti ilisisidwe, Leza uliizyi alimwi bantu bamwi abalo baya kwiizyiba mukuya kwaciindi. Ayalo milimo mibotu ya Munakristo taikonzyi kusiswa pe. (1 Tim. 5:24, 25) Bantu boonse mumbungano balakonzya kulilemeka.
Luyando Alusyomo Zilayandika
14. Ino Magwalo atondezya buti kuti tulayandika kuba aluyando akati kesu?
14 Cintu ciyandika kapati ku Banakristo bakasimpe nduyando. Jesu wakaambila basikwiiya bakwe kuti: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Joh. 13:35) Ino mbuti mbotutondezya kuti tuli aluyando iluli boobu? Ijwi lya Leza litukulwaizya kuti ‘katukkazikilana moyo akuyandana,’ ‘kuusilana buuya, kuba batete moyo, akuba aluzyalo lwakulekelelana milandu,’ alimwi akusamausyanya. (Ef. 4:2, 32; Heb. 13:1, 2) Mwaapostolo Paulo wakalemba kuti: “Amuyandane aluyandisyo lwabunyina.”—Rom. 12:10.
15. Ino nkaambo nzi bantu boonse ncobeelede kuba aluyando, ikapati balangizi Banakristo?
15 Nokuba kuti Timoteo wakalicizyi kwiisya kabotu alimwi wakali mulangizi mubotu, naatakabalanganya kabotu Banakristonyina nicakapa kuti zyoonse nzyaakali kuyiisya zibe zyabuyo. (Amubale 1 Ba-Korinto 13:1-3.) Kulubazu lumwi, akaambo kakuti wakali kubayanda ncobeni Banakristonyina, wakalicizyi kusamausya bantu alimwi wakali kubacitila milimo mibotu, Timoteo wakatondezya kuti ucita kabotu kumuuya. Aboobo, cakali kweelela kuti mulugwalo lwakwe kuli Timoteo, imwaapostolo Paulo wakaamba kuti kuyanda bamwi kwakali akati kazyintu nzyaakeelede kucita Timoteo.
16. Ino nkaambo nzi Timoteo ncaakeelede kuba alusyomo luyumu?
16 Timoteo naakali kukkala ku Efeso lusyomo lwakwe lwakasunkwa. Kuli bantu ibakali kuyiisya zyintu ziteendelani akasimpe kamu Bbaibbele. Bamwi bakali kwaamba twaambo twakubeja naa kuvwuntauzya makani aatakali kukonzya kubagwasya bantu bamumbungano. (Amubale 1 Timoteo 1:3, 4.) Paulo wakaamba bantu aaba kuti ‘balalisumpula, taakwe ncobazyi. Balaciswa mumoyo nkaambo bayandisya kubuzya akucita nkondo zyamajwi.’ (1 Tim. 6: 3, 4) Sena Timoteo wakeelede kulinjizya mumapenzi kwiinda mukutubikkila maano twaambo tutagwasyi twakali kuletwa mumbungano? Peepe, nkaambo Paulo wakamwaambila Timoteo kuti ‘kayasa lumamba lubotu lwalusyomo’ alimwi akutaamba “kwakasankusanku akukazyanya kwaceeco caambwa cakubeja kuti nduzibo.” (1 Tim. 6:12, 20, 21) Tacidoonekwi buya kuti Timoteo wakalutobela lulayo lwabusongo ndwaakamupa Paulo.—1 Kor. 10:12.
17. Ino mbuti lusyomo lwesu mbolukonzya kusunkwa mazuba aano?
17 Timoteo wakaambilwa kuti “kuciindi ciciza bamwi [baya] kuzwa kulusyomo, [akutalika] kumvwa myuuya yakweena amafundisyo aabadaimona.” (1 Tim. 4:1) Bantu boonse mumbungano, kubikkilizya abaabo ibajisi mikuli, beelede kuba mbuli Timoteo mukutondezya lusyomo luyumu alimwi lutazungaani. Kwiinda mukukaka kuyungwa abasiluleyo, tulakonzya kupa kuti bantu boonse babone kuti tucita kabotu kumuuya alimwi akubona kuti tuli alusyomo.
Kamuzumanana Kucita Kabotu Kumuuya
18, 19. (a) Ino mbuti bantu boonse mbobakonzya kubona kuti mucita kabotu kumuuya? (b) Ino ncinzi ncotuya kulanga-langa mucibalo citobela?
18 Cilasalala kuti, Munakristo mbwalibonya, zyintu nzyakonzya kucita, milimo njacita, naa myaka minji njaakala mumbungano, tazipi kuti acite kabotu kumuuya. Pele muciindi caboobo, kucita kabotu kumuuya kulalibonya notumumvwida Jehova, mbotwaambaula ambotulilemeka. (Rom. 16:19) Tweelede kutobela lulayo lwakuti katuyandana akuba alusyomo luyumu. Inzya, atwaatobele majwi Paulo ngaakalembela Timoteo alimwi akwaabikkila maano kutegwa bantu boonse babone mbotucita kumuuya.
19 Cintu cimwi icitondezya kuti tucita kabotu kumuuya alimwi akuti tuli Banakristo basimide nkukkomana kwalo ikuli akati kamicelo yamuuya uusalala wa Leza. (Gal. 5:22, 23) Cibalo citobela cilatutondezya mbotukonzya kuzumanana kukkomana notuli mumapenzi.
Ino Inga Mwaingula Buti?
• Ino bantu ncinzi ncobakonzya kwiiya kuzyintu nzyotwaamba?
• Ino tweelede kulilemeka buti kutegwa bantu babone kuti tucita kabotu kumuuya?
• Ino nkaambo nzi Banakristo ncobeelede kuba aluyando akusyomeka?
[Mibuzyo yaciiyo]
[Cifwanikiso icili apeeji 11]
Timoteo naakacili mwana, wakali kuzicita kabotu zyintu mbuli muntu mupati
[Zifwanikiso izili apeeji 13]
Sena nomucita kabotu kumuuya bantu balamubona?