Sena Mweelede Kuzumanana Kucita Nzyomuyanda Nobeni?

IBANA bobile balasobana antoomwe. Omwe wabo wamunyanga mweenzinyina cintu ncayandisisya kusobanya amane wakwiila kaamba kuti: “Ncintu cangu!” Kuzwa ciindi nobacili baniini, bantu ibatalondokede balatondezya muuya wakuliyanda. (Matl. 8:21; Rom. 3:23) Mukuyungizya, bantu banji munyika bakulwaizya muuya wakuliyanda. Kutegwa tukonzye kuutantamuka muuya ooyu, tweelede kuulwana canguzu. Ikutacita boobu inga kwatupa kutyompya bantu alimwi akunyonganya cilongwe cesu a Jehova.—Rom. 7:21-23.

Kakulwaizya kuti katubikkila maano mbuli micito yesu mboijatikizya bantu bamwi, mwaapostolo Paulo wakalemba kuti: “Zintu zyoonse zilazuminika, pele teensi zintu zyoonse zigwasya. Zintu zyoonse zilazuminika, pele teensi zyoonse ziyasya.” Paulo alimwi wakaamba kuti: “Mutabiki zilebyo munzila yabantu.” (1 Kor. 10:23, 32) Aboobo, mumakani aajatikizya zyintu nzyotuyanda kucita tobeni, cilakonzya kuba cabusongo kulibuzya kuti: ‘Sena ndililisungude kuliimya zyintu zimwi nzyondeelede kuba azyalo ikuti naa zilakonzya kunyonganya luumuno lwamumbungano? Sena ndililibambilide kutobela njiisyo zyamu Bbaibbele, nociba ciindi nocikonzya kukatazya kucita boobo?’

Mukusala Mulimo

Bantu banji babona mbuli kuti aumwi weelede kulisalila mulimo wakucita alimwi akuti cakusala eeci kunyina mbocibajatikizya bantu bamwi. Pele amulange-lange icakacitikila simakwebo umwi mudolopo liniini ku South America. Bantu banji bakamuzyi kuti wakali muntu uuyandisisya kuuma njuka, alimwi akunywa bukoko kapati. Akaambo kakwiiya Bbaibbele a Bakamboni ba Jehova, wakatalika kuyaambele  kumuuya alimwi wakacinca bukkale bwakwe. (2 Kor. 7:1) Ciindi naakayanda kuti atalike kukambaukila banamaleya antoomwe ambungano, mwaalu umwi wakamukulwaizya kuti alange-lange mulimo ngwaakali kucita. Kwaciindi cili mbocibede mwaalumi ooyu nguwakali simakwebo mupati mukusambala bukoko bwiitwa kuti pure cane mudolopo eeli—bukoko oobu bulabelesyegwa kuzyintu zinji, pele kubusena ooko, bulavwelwa azyakunywa zimwi kutegwa muntu akolwe.

Imwaalumi ooyu wakazoozyiba kuti, ikuti kakambaukila banamaleya pele kumwi kasambala bukoko oobu, wakali kukonzya kubisya zyina lyambungano alimwi akunyonganya cilongwe cakwe a Leza. Nokuba kuti wakali kulanganya mukwasyi mupati, wakacileka kusambala bukoko. Lino ulaulanganya mukwasyi wakwe kwiinda mukucita makwebo aamwi buyo. Mwaalumi ooyu, bakaintu bakwe, alimwi abana basimbi bobile akati kabana babo bosanwe balibbapatizidwe. Balakambauka makani mabotu cabusungu alimwi balaangulukide mukukanana.

Notusala Balongwe

Sena ikulikondelezya antoomwe abantu batali Banakristo bakasimpe ncintu aumwi ncayelede kulisalila, naa kuli njiisyo zyamu Bbaibbele zijatikizyidwe? Mucizyi omwe wakali kuyanda kuunka kupobwe amulombwana watakali Munakristo wakasimpe. Nokuba kuti wakacenjezyegwa kujatikizya ntenda zyakucita boobu, wakalimvwa kuti wakalaanguzu zyakulisalila, aboobo wakaunka kupobwe. Naakasika kupobwe, tiikwakainda ciindi cilamfwu, wakapegwa cakunywa mwalo mwakabikkidwe musamu iwakamupa koona. Nokwakainda mawoola manji wakabuka akujana kuti woonwa amuntu ngwaali kwiita kuti mulongwe wakwe.—Amweezyanisye Matalikilo 34:2.

Nokuba kuti talili lyoonse kuyanzana abantu ibatakombi nokukonzya kutunjizya muntenda, Bbaibbele litucenjezya kuti: “Uuenda abasongo ulasongwaala, pele muzwalani wabafubafuba ulabisizigwa.” (Tus. 13:20) Aka kaambo kalisalede kapati—ikusala balongwe babyaabi kulakonzya kutunjizya muntenda. Lugwalo lwa Tusimpi 22:3 lwaamba kuti: “Muntu uucenjede, abona mapenzi, ulayuba, pele bataiyide balaindilila aboobo balapenga.” Ibalongwe besu balakonzya kutujatikizya swebo alimwi acilongwe ncotujisi a Leza.—1 Kor. 15:33; Jak. 4:4.

Mukusama Alimwi Akulibamba

Misyobo yazisani alimwi anzila mbozisumwa zilacinca-cinca. Nokuba boobo, njiisyo zyamu Bbaibbele zijatikizya makani aakusama alimwi akulibamba, tazicinci. Paulo wakalailila Banakristo bakaintu kuti: “Kabanga kabasama cakulibombya mbubonya mbokweelede, babe aciwa cibotu”—malailile aaya mbubwenya buyo alabajatikizya baalumi. (1 Tim. 2:9) Paulo kunyina naakali kukulwaizya Banakristo boonse kuti kabasama zisani zitalibonyi kabotu, naa kuti boonse kabasala zisani zikozyene. Pele ino mbuti  kujatikizya kulibombya? Ibbuku limwi lipandulula mabala lyaamba kuti: “Kulibombya nkutalisumpula naa kutalidunda ikapati mumakani aajatikizya zyakusama, kwaambaula, naa kulilemeka.”

Tweelede kulibuzya mibuzyo yakuti: ‘Sena masimpe inga ndaamba kuti ndilalibombya ikuti naa ndilazumanana kusama zisani nzyondiyanda alimwi izipa bantu kundilangisisya? Sena nsamino yangu ipa mpuwo mbyaabi yalo iipa bantu kudooneka bukkale bwangu?’ Tulakonzya kweeleba kubikka “imfumpu niiba yomwe munzila yamuntu” mumakani aaya kwiinda ‘mukutayeeya kuligwasya tobeni luzutu pe, pele akubikkila maano kugwasya beenzuma.’—2 Kor. 6:3; Flp. 2:4.

Mumakani Aamakwebo

Ciindi makani aakatazyide aajatikizya lweeno alimwi akubba mumakwebo naakatalika mumbungano yaku Korinto, Paulo wakalemba kuti: “Sa taciindi kubota kuti mubisizigwe buyo? Sa taciindi kubota kuti muondongwe buyo?” Paulo wakalailila Banakristo kuti cakali kwiinda kugwasya kuleka buyo muciindi cakutola munyina kunkuta. (1 Kor. 6:1-7) Imukwesu umwi ku United States wakalubikkila kapati maano lulayo oolu. Tiibakeendelana kabotu amukwesu ngwaakali kubelekela kujatikizya mali ngaakeelede kuvwozyegwa. Kwiinda mukutobela malailile aamu Magwalo bakwesu bobile aaba bakakkala aansi kutegwa baabandike makani aaya, pele cakabakatazya kulimana penzi. Kumane, bakatola penzi lyabo “kumbungano,” yalo yiimininwa abaalu.—Mt. 18:15-17.

Cuusisya ncakuti akumbungano lyakakatazya kumana penzi. Kwiinda mukukabikka mumupailo kaambo aaka, mubelesi ooyu wakasala kuti asweekelwe buyo mali manji ngaakali kuyeeyela kuti ngaakeelede kuvwola. Ino nkaambo nzi? Nokwakainda ciindi wakaamba kuti: “Makani aaya akali kundimanina lukkomano alimwi aciindi ncondakeelede kubelesya mukucita zyintu zyakumuuya.” Naakamana kucita boobu, mukwesu ooyu wakaba alukkomano, alimwi wakazyiba kuti Jehova wakali kuulongezya mulimo wakwe wakumuuya.

Nomuba Muzyintu Zisyoonto

Kutazumanana kucita nzyotuyanda tobeni nomuba muzyintu zisyoonto akwalo kuletela zilongezyo. Mubuzuba bwakusaanguna bwamuswaangano wacooko, banabukwetene bapainiya bakajana busena bwakukkala mbobakali kuyanda. Mapulogilamu naakatalika, mukwasyi umwi mupati mwalo imwakali bana banji, wakanjila mubantu cakubinda kausola kujana aakukkala. Nobakabona kuti mukwasyi ooyu wakali kuyandaula zyuuno zyobile kutegwa bakkwane boonse, banabukwetene aaba bapainiya bakasiila banamukwasyi aaba zyuuno. Eeci cakagwasya kuti banamukwasyi aaba bakkale aantoomwe. Nowakamana muswaangano, kwakainda buyo mazuba masyoonto, aaba bapainiya bakatambula lugwalo lwakulumba kuzwa kumukwasyi ngubakagwasya. Mulugwalo bakapandulula mbobakatyompedwe akaambo kakumuka kusika kumuswaangano. Nokuba boobo, kulimvwa boobu kwakacinca, bakakkomana alimwi akulumba akaambo kalubomba ndobakatondezyegwa kuli banabukwetene bapainiya.

Kufwumbwa twajana coolwe, atulisungule kuliimya zyintu nzyotuyanda kutegwa tugwasye bamwi. Kwiinda mukutondezya luyando “[iluta]lilangilili cintu,” tugwasya kuti kube luumuno mumbungano alimwi aakati kesu abasimukoboma. (1 Kor. 13:5) Pele iciyandika kapati ncakuti tubamba cilongwe cesu a Jehova.

[Cifwanikiso icili apeeji 20]

Sena mulilisungwide kuliimya nzyomuyanda kujatikizya musyobo wazisani nzyomuyanda?

[Cifwanikiso icili apeeji 21]

Sena mulilisungwide kusiila bakwesu cuuno cenu?