Ijwi lya Jehova Lili Abuumi Twaambo Tugwasya Mumagwalo Aakalembelwa Bana Korinto
Ijwi lya Jehova Lili Abuumi Twaambo Tugwasya Mumagwalo Aakalembelwa Bana Korinto
MWAAPOSTOLO Paulo wabikkila maano kapati kujatikizya bukkale bwakumuuya bwambungano yamu Korinto. Wamvwa kuti kuli kuzwangana akati kabakwesu ookuya. Kutalilemeka kapati kulazumizyigwa. Ayalo mbungano yamulembela lugwalo Paulo kubuzya twaambo tumwi. Aboobo kakunyina kusowa ciindi mu 55 C.E., kali mu Efeso mulweendo lwakwe lwatatu lwabumisyinali, Paulo walemba lugwalo lwakwe lwakusaanguna kumagwalo ngaakalembela bana Korinto.
Lugwalo lwabili lwalo lulangilwa kuti lwakalembwa myezi misyoonto buyo kuzwa nolwakalembwa lwakusaanguna, luzumanana buyo kwaamba zyakalembwa muli lwakusaanguna. Mbokunga bukkale bwakunze alimwi amukati kambungano yamumwaanda wamyaka wakusaanguna yaku Korinto bulakozyanya munzila zinji abwamazuba aano, mulumbe uuli mumagwalo Paulo ngaakalembela bana Korinto alatugwasya kapati.—Heb. 4:12.
‘AMULANGILE, MUKAKATILE, MUYUME’
Paulo ukulwaizya kuti: “Mwaambe cintu comwe.” (1 Kor. 1:10) Taakwe ‘ntalisyo iimbi kunze lya Jesu Kristo,’ aawo bube bwa Bunakristo mpobuyakilwa. (1 Kor. 3:11-13) Kujatikizya sibwaamu mumbungano, Paulo waamba kuti: “Amumutande oyo mubi kuzwa kulindinywe.” (1 Kor. 5:13) Waamba kuti: “Mubili tuuli wabwaamu pe, ngwa-Mwami.”—1 Kor. 6:13.
Mukwiingula ‘makani ngobakamulembela,’ Paulo wapa lulayo lubotu alimwi lugwasya kubana Korinto lujatikizya lukwatano alimwi akutakwata naa kutakwatwa. (1 Kor. 7:1) Naamana kwaamba kujatikizya busilutwe bwa Bunakristo, kweenzya kabotu zyintu lyamiswaangano ya Bunakristo, alimwi akujatikizya mbobuli bwamasimpe bubuke, Paulo wakulwaizya kuti: “Amulangile, mukakatile mulusyomo. Amube baalumi benibeni, muyume.”—1 Kor. 16:13.
Kwiingula Mibuzyo Yamu Magwalo:
1:21—Sena ncobeni Jehova ubelesya “bufubafuba” kufwutula baabo basyoma? Peepe. Nokuba boobo, mbokunga ‘nyika kwiinda mubusongo bwayo tiiyakamuzyiba Leza,’ ncabelesya kufwutula bantu cilibonya mbuli kuti mbufwubafwuba kunyika.—Joh. 17:25.
7:33, 34—Ino ncinzi cipandululwa amajwi aakuti “makani aansi” aayo mwaalumi uukwete naa mukaintu uukwetwe ngalipakasizya? Paulo waamba zyintu zijatikizya buumi bwabuzuba abuzuba zyalo Munakristo uukwete naa uukwetwe nzyayelede kubikkila maano. Eezyi zibikkilizya zyakulya, zyakusama alimwi akwakoona, pele tazibikkilizyi zyintu zibyaabi zyamunyika eeyi zyalo Banakristo nzyobatantamuka.—1 Joh. 2:15-17.
11:26—Ino nziindi zinji buti lufwu lwa Jesu nolweelede kwiibalukwa, alimwi ino “mane do” lili? Paulo tanaakali kwaamba kuti lufwu lwa Jesu lweelede kwiibalukwa ziindi zinji. Muciindi caboobo, wakali kwaamba kuti “ciindi coonse” Banakristo bananike nobalya zitondezyo zya Ciibalusyo ciindi comwe amwaka mu Nisani 14, ‘batondezya lufwu lwa Mwami.’ Balacita oobo “mane do akasike,” nkokuti kusikila mane wabatambula kujulu kwiinda mububuke.—1 Tes. 4:14-17.
13:13—Ino muunzila nzi luyando mboluli lupati ikwiinda lusyomo alimwi abulangizi? Ciindi cintu “ncotulangila” nocicitika alimwi ‘zyintu nzyotulangila kuti zilacitika ncobeni nozizuzikizyigwa, mulimo walusyomo alimwi abulangizi ulamana. (Heb. 11:1) Luyando ndupati ikwiinda lusyomo alimwi abulangizi akaambo kakuti lwalo talumani pe.
15:29—Ino cipandulula nzi ‘kubbapatizyigwa nkaambo kabafwu’? Paulo tanaakali kwaamba kuti bantu baumi kababbapatizyigwa mubusena bwabaabo bakafwa kabatana kubbapatizyigwa. Aawa Paulo wakali kwaamba kubbizyigwa kwa Banakristo bananikidwe amuuya mubukkale bubapa kusyomeka kusikila kulufwu eelyo akubusyigwa kubuumi bwamuuya.
Ziiyo Kulindiswe:
1:26-31; 3:3-9; 4:7. Kulikankaizya cakulibombya muli Jehova kutali kulikankaizya tobeni, kuletela lukamantano mumbungano.
2:3-5. Naakali kukambauka mu Korinto imunzi wabusyaabusongo alimwi aluzyibo lwa Chigiliki, kweelede kuti Paulo wakabikkila maano kujatikizya mbwaakali kunga wakonzya kupa kuti bakali kumuswiilila bamvwisye. Nokuba boobo, kunyina naakalekela kuti kukompama naa kuyoowa nkwaakali kukonzya kuba akwalo kuti kumulesye kubeleka mulimo ngwaakamupede Leza. Mbubwenya buyo, tatweelede kuzumizya bukkale buyumu naa mbotutazyibide kuti butulesye kwaambilizya makani mabotu aa Bwami bwa Leza. Tulakonzya kulangila kuli Jehova calusyomo kuti atugwasye mbubwenya mbwaakacita kuli Paulo.
2:16. Kuba “[a]miyeeyo ya-Kristo” nkuzyiba mbwayeeya alimwi acimupa kuyeeya boobo, kuyeeya mbwayeeya, kubuzyiba kabotu-kabotu bube bwakwe, alimwi akutobela cikozyanyo cakwe. (1 Pet. 2:21; 4:1) Elo kaka cilayandika kuti twaayiye cakusitikila makani aabuumi alimwi amulimo wa Jesu!
3:10-15; 4:17. Tweelede kululingula alimwi akuluyungizya luzyibo ndotujisi lwakuyiisya alimwi akugwasya bantu kuba basikwiiya. (Mt. 28:19, 20) Ikuti katutayiisyi kabotu, bantu mbotuyiisya inga tiibakonzya kwaazunda masunko aajatikizya lusyomo lwabo, alimwi kusweekelwa ooku kulakonzya kutucisizya moyo cakuti lufwutuko lwesu luyooba mbuli kuti ‘lwakwempwa kumulilo.’
6:18. ‘Kuccija bwaamu’ nkutatamuka ikutali buyo micito ya por·neiʹa pele alimwi akweebelela naa kubala zyintu ziletela muzeezo wakoonana, busofwaazi bwakutalilemeka, mizeezo iijatikizya koonana, kusobanya musimbi naa musankwa munzila yakuyanda koonana—kufwumbwa cintu cikonzya kupa kucita bwaamu.—Mt. 5:28; Jak. 3:17.
7:29. Banabukwetene beelede kupakamana kutegwa batabikkili buyo maano kulukwatano lwabo cakuti kucita mulimo wa Bwami bakuyumbile mubusena bwabili mubuumi bwabo.
10:8-11. Jehova wakanyema kapati ciindi bana Israyeli nobakaŋuŋuna kujatikizya Musa a Aroni. Cilagwasya kutaba acilengwa cakuŋuŋuna.
16:2. Kusanga mali nkotucita kutegwa mulimo wakukambuka munyika yoonse uyaambele kuyoozumanana ikuti katulibambila kakucili ciindi alimwi ikuti kakucitwa kweelana abubambe.
KAMULULAMIKWA LYOONSE
Paulo waambila bana Korinto kuti beelede ‘kulekelela caluzyalo akuumbulizya’ sizibi weempwa walo wasinswa. Nokuba kuti lugwalo lwakwe lwakusaanguna lwakabaletelede buusu, Paulo wakkomana akaambo kakuti ‘buusu bwabo bwakabaletela lweempo.’—2 Kor. 2:6, 7; 7:8, 9.
‘Mbubwenya mbubainda kucita kabotu muzyintu zyoonse,’ Paulo wakulwaizya bana Korinto kuti ‘bainde kucita kabotu mumilimo yaluzyalo.’ Naamana kwiingula basikukazya, wabapa lulayo lwamamanino boonse kati: “Kamusyaala kabotu. Amubambe kabotu buumi bwanu. Amupangike myoyo yanu kumajwi aangu. Amube amoyo omwe mukale caluumuno.”—2 Kor. 8:1, 2, 4, 7; 13:11.
Kwiingula Mibuzyo Yamu Magwalo:
2:15, 16—Ino mbuti mbotuli “bweema bubotu bwa-Kristo”? Cili boobu akaambo kakuti tutobela ncolyaamba Bbaibbele alimwi akutola lubazu mukukambauka mulumbe ngolijisi. Nokuba kuti “bweema bubotu” oobu inga kabusesemya kubantu bataluleme, mbweema bununkilila kabotu kuli Jehova alimwi akubantu babombe myoyo.
5:16—Mbubuti Banakristo bananike ‘mbobataambi muntu naba omwe kuti muntu buyo’? Bantu tababalangi munzila yakumubili pe, nkokwaamba kuti kutondezya kusalulula akaambo kabuvwubi, mubala, mwaambo naa cisi nkobazwa. Cintu ciyandika kulimbabo ncilongwe cakumuuya ncobajisi abasyominyina.
11:1, 16; 12:11—Sena Paulo wakali mufwubafwuba kubana Korinto? Peepe. Nokuba boobo, kulibonya kuti wakalibonya kulisumpula alimwi akufwubaala kubantu bamwi akaambo kazyintu nzyaakasinikizyigwa kwaamba kutegwa akwabilile bwaapostolo bwakwe.
12:1-4—Ino nguni “wakakwempelwa ku-Paradaiso”? Mbokunga Bbaibbele talyaambi muntu uumbi uuli woonse iwakaba acilengaano cili mbuli ceeci alimwi cibalo caamba kukwabilila bwaapostolo nkwaakacita Paulo, kulangilwa kuti wakali kwaamba cakamucitikila. Ncaakabona mwaapostolo mucilengaano cilangilwa kuti nguparadaiso wakumuuya moibede mbungano ya Bunakristo “kumamanino aaciindi.”—Dan. 12:4.
Ziiyo Kulindiswe:
3:5. Kapango aaka katwaambila kuti Jehova nguupa kuti Banakristo beelele kubeleka mulimo wabukambausi kwiinda mu Jwi lyakwe, muuya wakwe, alimwi ambunga yakwe yaanyika. (Joh. 16:7; 2 Tim. 3:16, 17) Inga catugwasya kubala Bbaibbele alimwi amabbuku aamba zyamu Bbaibbele cabusungu, kulomba muuya uusalala kwiinda mukupaila lyoonse, alimwi akujanika alimwi akutola lubazu kumiswaangano ya Bunakristo.—Int. 1:1-3; Lk. 11:10-13; Heb. 10:24, 25.
4:16. Mbokunga Jehova ulabulengulula ‘buntu bwesu bwamukati mazuba oonse,’ tweelede kububelesya bubambe bwa Jehova lyoonse, caamba kuti buzuba tabweelede kwiinda buyo kakunyina kucita cintu cili coonse cikonzya kuyumya cilongwe cesu a Leza.
4:17, 18. Kwiibaluka kuti “mapenzi esu maubauba aakaindi kaniini alainda” kulakonzya kutugwasya kuzumanana kusyomeka kuli Jehova ciindi notuli mumapenzi.
5:1-5. Elo kaka Paulo ulaamba cakusalazya mbobalimvwa alimwi ambobayeeya Banakristo bananike kujatikizya bulangizi bwabo bwabuumi bwakujulu!
10:13. Kweelana amulawo mbuubede, ccita kuti twatumwa kuyoogwasya kubusena kubulide babelesi, tweelede kubelekela buyo mucilawo ncoipedwe mbungano yesu.
13:5. Kutegwa ‘tulisukusye tobeni naa tuliimvwi mulusyomo,’ tweelede kubona masimpe kuti tupona bukkale bweendelana ancotwiiya mu Bbaibbele. Kucita kuti ‘tulilingule tobeni,’ tweelede kulanga-langa mbocili ciyumu cilongwe cesu a Leza, nguzu zyesu zyakubelesya “miyeeyo” yesu, alimwi amboili minji milimo yalusyomo njotubeleka. (Heb. 5:14; Jak. 1:22-25) Kwiinda mukutobela lulayo ilugwasya ndwaakapa Paulo, tulakonzya kuzumanana kweenda mukasimpe.
[Cifwanikiso icili apeeji 26]
Ino majwi aakuti “ciindi coonse kufumbwa ncimulya mukamu oyu akunywa cinywido eci” apandulula nzi?—1 Kor. 11:26