Amusalale ‘Cakuyoowa Leza’

NOLYAAMBA mbwasalala cakumaninina Jehova Leza, Bbaibbele lyaamba kuti: “Ulasalala! Ulasalala! Ulasalala Jehova.” (Is. 6:3; Ciy. 4:8) Ibbala lyamu Chihebrayo alya Chigiliki lyaamba ‘kusalala’ lipa muzeezo wacintu citako butongo antela kubula kampenda mubukombi, ikutakwe busofwaazi. Kusalala kwa Leza caamba kulondoka kwabukkale bubotu mbwajisi.

Sena Leza uusalala Jehova takonzyi kulangila baabo ibamukomba kuti kabasalala, nkokuti kusalala amubili, mukulilemeka alimwi akumuuya? Ibbaibbele lilasalazya kwaamba kuti Jehova uyanda kuti bamukomba kabasalala. Kulugwalo lwa 1 Petro 1:16 tubala kuti: “Amusalale, nkaambo ndasalala mebo.” Sena bantu batalondokede balakonzya kweelana a Jehova mukusalala? Inzya, nokuba kuti tabakonzyi kusika eeni abusalali bwa Jehova. Leza ulakonzya kutubona kuti tulasalala ikuti katumukomba cakusalala kumuuya akuba acilongwe cini-cini anguwe.

Pele ino mbuti mbotukonzya kusalala munyika iitasalali mumakani aakulilemeka? Ino micito nzi njotweelede kutantamuka? Ino tweelede kucinca buti mukwaambaula alimwi amukulilemeka? Atubone ncotukonzya kwiiya mumakani aaya kuzwa kuzyintu Leza nzyaakali kuyanda kuba Juda bakali kuzwida ku Babuloni kuya kunyika yabo mu 537 B.C.E.

‘Kuyooba Nzila Iisalala’

Jehova wakasinsimide kuti bantu bakali kuyoozwa mubuzike ku Babuloni akuunka kunyika yabo. Ibusinsimi bwakali kwaamba makani aakupilusyigwa bwakalijisi cisyomezyo eeci: “Kuyooba mugwagwa anzila. Iyootegwa Inzila yabusalazi.” (Is. 35:8a) Majwi aaya atwaambila kuti Jehova tanaakapa buyo kuti ba Juda bapiluke kunyika yabo pe, pele alimwi wakabasyomezya kuti uyoobakwabilila mulweendo lwabo.

Kubabelesi bakwe bali anyika mazuba aano, Jehova wabamba “nzila yabusalazi” yakuzwida mu Babuloni Mupati, ibwami bwanyika yoonse bwabukombi bwakubeja. Mu 1919 wakabaangununa Banakristo bananike kuzwa mubuzike bwabukombi bwakubeja, eelyo bakali kuya busalazya bukombi bwabo kwiinda mukuleka ziyiisyo zyoonse zyakubeja. Imbungano yabakombi ba Jehova mazuba aano ilasalala alimwi kuli kuliiba nkaambo tulakonzya kukomba Jehova alimwi tulamvwana anguwe alimwi abantuma.

“Katanga kaniini” ika Banakristo bananike alimwi “inkamu impati” iiyaabukomena iya “mbelele zimwi” bakasala kweenda munzila iisalala alimwi bali mukutamba bantu bamwi kuti beendele antoomwe. (Lk. 12:32; Ciy. 7:9; Joh. 10:16) “Nzila yabusalazi” ilakonzya kujanika kubantu boonse balisungwide ‘kutuula mibili  yabo kuti ibe cipaizyo cuumi, cisalala, ncakonzya kutambula Leza.’—Rom. 12:1.

“Mulinjiyo Tamukooyooinda Basofweede”

Mu 537 B.C.E., ba Juda ibakali kupiluka kunyika yabo bakeelede kuzuzikizya cintu cimwi ciyandika kapati. Nolyaamba baabo ibakali kweelela kweenda ‘munzila yabusalazi,’ bbuku lya Isaya 35:8b lyaamba kuti: “Mulinjiyo tamukooyooinda basofweede. Pele iyooba yabantu bakwe. Sinyenda abafubafuba tabakooyooleya mulinjiyo.” Mbwaanga kaambo keni kakapa kuti ba Juda bapiluke ku Jerusalemu kakali kakuti bakatalisye bukombi bwakasimpe, bantu bajisi makanze aabo beni tiibakali kuyandika pe, nobaba baabo batalemeki zyintu zisetekene alimwi abaabo batakali kusalala kumuuya. Basikupiluka bakaleelede kulilemeka kweelana azyeelelo zya Jehova zisumpukide. Aabo bayanda kuti Leza kabakkomanina mazuba aano beelede kucita mbubwenya oobu. Baleelede kuyandisya bulasalazi “cakuyoowa Leza.” (2 Kor. 7:1) Pele ino mmicito nzi njotweelede kutantamuka?

Mwaapostolo Paulo wakalemba kuti: “Milimo yanyama ilibwenekede, njeeyi:—bwaamu, busofwaazi, zisusi zibi.” (Gal. 5:19) Bwaamu caamba micito yoonse iijatikizya kubelesya busankwa naa bukaintu kutali mulukwatano. Zisusi zibi zibikkilizya “kutalilemeka; bwaamu; busofwaazi; milimo yamamfwunze.” Cilasalala kuti bwaamu alimwi akutalilemeka tazilyatani abusalali bwa Jehova. Aboobo, aabo ibazumanana kucita zyintu eezyi tabazumizyigwi kuba mumbungano ya Banakristo naa kuti balagusyigwa mumbungano. Ncimwi buyo abaabo bacita zibi zitaambiki, nkokuti “milimo yoonse iisofweede cakulikumbuzya.”—Ef. 4:19.

Mabala aakuti ‘milimo iisofweede’ alabikkilizya azibi zinji ziindene-indene. Ibbala ndyobabelesya mu Chigiliki lyaamba tombe lili lyoonse lisesemya—mukulilemeka, mukwaambaula alimwi amukubamba cilongwe abantu batali Bakamboni. Lilabikkilizya amicito yabusofwaazi ambweni iitakonzyi kuyanda kuti muntu abetekwe buya. * Pele sena bantu bacita milimo eeyi iisofweede balayandisya kusalala?

Amweezyeezye buyo kuti Munakristo watalika kweebelela naa kubala zyintu ziletela muzeezo wakoonana. Mizeezo mibi ilatalika asyoonto-syoonto, eelyo makanze aakwe aakuzumanana kusalala kumeso aa Jehova alatalika kuyaabumana. Mmasimpe kuti kulilemeka kwakwe takunasika aciimo mpokukonzya kwaambwa kuti mbusofwaazi butaambiki, pele ciindi eeci tacizumanani kubikkila maanu ‘kuzyintu zisalala, zyintu zijisi mpuwo mbotu, ciyanza cibotu alimwi acintu citembaulika.’ (Flp. 4:8) Kweebelela naa kubala zyintu ziletela muzeezo wakoonana ncintu cisofweede alimwi cinyonganya cilongwe muntu ncajisi a Jehova. Taakwe zyintu zisofweede noziba buti izyeelede kwaambwa akati kesu.—Ef. 5:3.

Amubone cikozyanyo acimbi. Atwaambe kuti Munakristo ulalisobanya kubusankwa naa kubukaintu—ikulisobanya kutegwa alimvwe mbuli kuti ucita cilengwa cakoonana—kufwumbwa  naa wacita oobu akaambo kakweebelela naa kubala zyintu ziletela muzeezo wakoonana naa pe. Nokuba kuti kulisobanya kubusankwa naa kubukaintu takwaambidwe mu Bbaibbele, sena inga kwaba kudooneka kuti kucita boobu kulakonzya kusofwaazya mizeezo yamuntu? Sena kuzumanana kulisofwaazya munzila eeyi inga takukonzyi kunyonganya cilongwe muntu ncajisi a Jehova akupa kuti muntu ooyu atasalali kumeso aa Leza? Atuyeeye lulayo lwa mwaapostolo Paulo lwakuti “atulisonzole busofwaazi boonse nibuba bwamubili” amuuya alimwi a “kufwidwa zizo [zyesu] zyaansi. [Akuleka] bwaamu abusofwaazi amujamuja azisusi zibi akulikumbuzya.”—2 Kor. 7:1; Kol. 3:5.

Inyika eeyi yeendelezyegwa a Saatani taikasyi kucita micito iisofweede pe, mane buya ilakulwaizya kucita micito iili boobo. Ikukaka kulinjizya mumicito iisofweede tacili cuuba-uba pe. Pele Banakristo bakasimpe tabeelede kweenda “mbuli mbubeenda bamasi mubufubafuba bwamyoyo yabo.” (Ef. 4:17) Ccita kuti twaleka kucita micito iisofweede cakusisikizya naa caantangalala, buyo-buyo Jehova takatuzumizyi kuzumanana kweenda ‘munzila yabusalazi.’

“Takukooyooba Mulavu oko”

Ikutegwa Leza uusalala Jehova atukkomanine, kulakonzya kuyandika kuti aabo batalilemeki abaabo babelesya majwi mabi bacince cakufwambaana. Ibbuku lya Isaya 35:9 lyaamba kuti: “Takukooyooba mulavu oko, takukooyooinda banyama bamwi baluma,” nkokwaamba kuti, ‘munzila yabusalazi.’ Bantu basilunya alimwi bacita zyintu cabukali akwaambaula cabukali mumaambilambali bakozyanisyigwa kubanyama bamusokwe. Tabakazumizigwi kunjila munyika mpya iya Leza imunooli bululami. (Is. 11:6; 65:25) Aboobo aabo bayanda kuzuminwa a Leza baleelede kutuleka tumpenda twabunyama ootu akuyandisya kuba bantu basalala.

Imagwalo atulaya kuti: “Azizwe kulindinywe zintu ezi zyoonse–ndutiluti zili buti, alunyemo, abukali, amaambani, akutuka, alusulo loonse.” (Ef. 4:31) Kulugwalo lwa Ba-Kolose 3:8, tubala kuti: “Muleelede kuzileka zyoonse. Amuleke bukali, lunyemo, inkoyeko, kusanka, azisapi zizwa mukanwa.” Mabala aakuti “kutuka” akuti “kusanka” aabelesyedwe mutupango ootu tobilo aamba kwaambaula cakusampaula, kudyakaizya naa kutukana.

Mazuba aano, majwi aacisizya moyo alimwi akufwubaazya alabelesyegwa koonse-koonse, nomuba mumaanda buya. Banabukwetene balabelesya majwi mabi kapati kufwubaazyanya lwabo alimwi akufwubaazya bana babo. Ikwaambaula calunya ooku takweelede kujanika mumaanda aa Banakristo.—1 Kor. 5:11.

Ikuyandisya ‘Kusalala Cakuyoowa Leza’ Ncileleko!

Elo kaka ncoolwe citalikomeneni ikubelekela Leza uusalala, Jehova! (Jos. 24:19) Paradaiso yakumuuya Jehova mwaatunjizya nimbotu kapati. Ikuzumanana kusalala mukulilemeka kumeso aa Jehova masimpe mbobuumi bwiinda kubota.

Kuceede buyo ciindi cisyoonto kuti Paradaiso yaanyika Leza njaakasyomezya ibe. (Is. 35:1, 2, 5-7) Aabo ibalombozya Paradaiso alimwi ibazumanana kuyandisya kweenda munzila yabunaleza mbabayookkala mulinjiyo. (Is. 65:17, 21) Aboobo, atuzumanane kukomba Leza cakusalala kumuuya akucibamba lyoonse cilongwe cesu anguwe.

Bupanduluzi buyungizidwe

[Cifwanikiso icili apeeji 26]

Ino ncinzi cakali kuyandika ikutegwa ba Juda beende ‘munzila yabusalazi’?

[Cifwanikiso icili apeeji 27]

Kweebelela naa kubala zyintu ziletela muzeezo wakoonana kunyonganya cilongwe muntu ncajisi a Jehova

[Cifwanikiso icili apeeji 28]

“Azizwe kulindinywe zintu ezi zyoonse . . . maambani, akutuka”