Kutondezya bulemu Kumiswaangano Yesu Iisetekene

“Nzoobaleta kucilundu cangu cisalala akubasekelezya muŋanda yangu yakukomba.”—ISAYA 56:7.

1. Ntwaambo nzi twamu Magwalo tutupa kutondezya bulemu bweelede amiswaangano yesu?

JEHOVA wabunganya bantu bakwe, Banakristo bananike alimwi abeenzinyina, kuti bamukombe ‘acilundu cakwe cisalala.’ Ulabasekelezya mukati ‘kaŋanda yakwe yakukombela,’ itempele yakwe yakumuuya, yalo iili “niŋanda yakukombela yamasi oonse.” (Isaya 56:7; Marko 11:17) Eeci ncaacita Jehova citondezya kuti bukombi bwesu bulasalala, bulisetekene alimwi bulisumpukide. Kwiinda mukutondezya bulemu bweelede amiswaangano yesu nkotwiiya alimwi akukomba, tutondezya kuti zintu zisetekene tuzibona mbwazibona Jehova.

2. Ncinzi citondezya kuti Jehova wakali kubona busena mbwaakasala kuti kakombelwa kuti bulisetekene, alimwi ino mbuti awalo Jesu mbwaakatondezya oobo?

² Mu Israyeli yansiku, ibusena mbwaakasala Jehova kuti bube busena bwabukombi bwakwe bwakeelede kubonwa kuti bulisetekene. Itente lyakubunganina alimwi azibelesyo zyalyo zyakeelede kunanikwa akusalazigwa “kuti zisalalisye loko.” (Kulonga 30:26-29) Zibeela zyobile zyacikombelo zyakali kwiitwa kuti “busena busalala” alimwi a “Busena Busalalisya cakwiinda.” (Ba-Hebrayo 9:2, 3) Kumbele itente lyakubunganina lyakanjililwa busena atempele yakali ku Jerusalemu. Mbwaanga munzi wa Jerusalemu wakaba busena bwabukombi bwa Jehova, wakali kwiitwa kuti “munzi uusalala.” (Nehemiya 11:1; Matayo 27:53) Mumulimo wakwe anyika, Jesu lwakwe wakatondezya bulemu bweelede kutempele. Wakabakalalila bantu akaambo kakunyansya nkobakatondezya kwiinda mukubelesya busena bwatempele kucitila makwebo alimwi akupanga nzila iikosola.—Marko 11:15, 16.

3. Ncinzi citondezya kusetekana kwa miswaangano yamu Israyeli?

³ Bana Israyeli bakali kuswaangana lyoonse ikukomba Jehova alimwi akuswiilila kubalwa kwa Mulawo wakwe. Mazuba amwi aamapobwe aabo akali kwaambwa kuti imbungano iisalala ikutondezya kusetekana kwa miswaangano eeyo. (Levitiko 23:2, 3, 36, 37) Amuswaangano wabuleya mumazuba aa Ezara a Nehemiya, ba Levi “bakapandulwida bantu mulao.” Mbwaanga “bantu boonse bakali kulila nibakamvwa majwi aamulao,” ba Levi “bakaumuzya bantu boonse. Bakati, Amuumune, nkaambo buzuba obuno mbuzuba busalalisya.” Mpoonya bana Israyeli bakasekelela Pobwe lya Zilawo lyamazuba aali ciloba “[a]kusekelela kupati loko.” Kunze lyaboobo, “buzuba bumwi abumwi, kuzwa kubuzuba butaanzi kusikila kubuzuba busyaalizi, wakabala mubbuku lyamulao wa-Leza. Nkabela bakalya ipobwe mazuba aali musamu aabili, elyo mubuzuba bwamusanu aatatu kwakaba imbungano mbubonya mbukulaililwa.” (Nehemiya 8:7-11, 17, 18) Masimpe eezi zyakali ziindi zisetekene izyakali kuyandika kuti aabo bajanika kabaswiilila akulilemeka.

Miswaangano Yesu Ilisetekene

4, 5. Nzibeela nzi zyamiswaangano yesu zitondezya kuti ilisetekene?

⁴ Masimpe, mazubaano Jehova tajisi munzi wini-wini uusalala anyika walo uujisi tempele iilibedelede yaabidwe kubukombi bwakwe. Nokuba boobo, tatweelede kuluba kuti miswaangano  yabukombi bwa Jehova ilisetekene. Ziindi zyotatwe amvwiki, tulaswaangana kutegwa tubale alimwi akwiiya Magwalo. Ijwi lya Jehova ‘lilabalwa kabotu,’ alimwi mbuli kumazuba a Nehemiya, kulaba “akupandulula majwi mbwaamba.” (Nehemiya 8:8) Miswaangano yesu yoonse ilatalika alimwi akujalwa amupailo, alimwi amiswaangano minji, tulaimba nyimbo zyakutembaula Jehova. (Intembauzyo 26:12) Masimpe miswaangano yesu yambungano ncibeela cabukombi bwesu alimwi iyandika kuti katulyaaba akuswiilila alimwi akulilemeka.

⁵ Jehova ulabalongezya bantu bakwe nobaswaangana antoomwe kuti bamukombe, baiye Jwi lyakwe alimwi babe akuyanzana kubotu kwa Bunakristo. Nokuli muswaangano, tulakonzya kusyoma kuti nkonkuko ‘Jehova nkwalailila kuti kube coolwe.’ (Intembauzyo 133:1, 3) Tulatambula coolwe eeco ikuti naa katujanika alimwi akuswiililisya kutwaambo twakumuuya. Kuyungizya waawo, Jesu wakati: “Nkubabede bantu bobile nanka botatwe babungene muzina lyangu, nkukonya oko nkumbede ambebo akati kabo.” Kweelana acakali kwaambwa, majwi aaya aamba ciindi baalu Banakristo nobayaana kutegwa balange-lange mapenzi mapati akati kabantu, pele njiisyo eeyi ilabeleka akumiswaangano yesu. (Matayo 18:20) Ikuti Kristo, kwiinda mumuuya uusalala ulajanika ciindi Banakristo nobabungana muzina lyakwe, sena miswaangano iili boobo tayeelede kubonwa kuti ilisetekene?

6. Ncinzi cikonzya kwaambwa kujatikizya masena aakuswaanganina, mapati amaniini?

⁶ Ncamasimpe kuti Jehova takkali mutempele ziyakwa abantu. Nokuba boobo, Maanda aa Bwami eesu mmasena aabukombi bwakasimpe. (Incito 7:48; 17:24) Nkotuswaanganina kutegwa twiiye Jwi lya Jehova, kupaila kulinguwe alimwi akumwiimbila ntembauzyo. Ncimwi buyo a Maanda aa Miswaangano Mipati. Mayake aabbadelelwa kucitila miswaangano yesu mipati—mbuli maanda mapati, maanda aakutondezyela zintu zyakupanga-panga naa mabbuwa aazisobano—alaba masena aakukombela ciindi naabelesyegwa  kucitila miswaangano yesu iisetekene. Miswaangano eeyi yabukombi, mipati aminiini tweelede kwiilemeka alimwi tweelede kutondezya oobo kwiinda mukulilemeka.

Mbotukonzya Kutondezya Bulemu Amiswaangano Yesu

7. Muunzila nzi iigaminide motunga twatondezya bulemu kumiswaangano yesu?

⁷ Kuli nzila zigaminide motunga twatondezya bulemu amiswaangano yesu. Imwi nzila nkwiinda mukujanika nokwiimbwa nyimbo zya Bwami. Ibunji bwanyimbo eezi zili mbuli mipailo aboobo zyeelede kwiimbwa cabulemu. Ikuzubulula Intembauzyo 22, imwaapostolo Paulo wakalemba boobu kujatikizya Jesu: “Ndiyoolungulula zina lyako kubanabakwesu, alimwi ndiyookutembaula mumbungano.” (Ba-Hebrayo 2:12) Aboobo, tuyandika kuba acilengwa cakujanika katukkede ciindi sicuuno naamba lwiimbo lwakujalula mpoona akwiimba kumwi katubikkide maano ncaamba majwi. Ikwiimba kwesu akutondezye mbwaakalimvwa sintembauzyo iwakalemba kuti: “Noolumba Jehova amoyo wangu woonse, munkuta yabaluleme amumbungano.” (Intembauzyo 111:1) Inzya, ikwiimba ntembauzyo kuli Jehova kweelede kutupa kufwambaana kusika kumiswaangano yesu akukkala mane kumamanino.

8. Ncikozyanyo nzi camu Bbaibbele citondezya kuti mipailo amiswaangano yesu tweelede kwiibikkila maano?

⁸ Acimbi cibeela icipa kuti miswaangano yesu yoonse ibote kulubazu lwakumuuya, mmupailo uupailwa camoyo woonse ikwiiminina baabo boonse babungene. Aciindi cimwi, Banakristo bamumwaanda wamyaka wakusaanguna mu Jerusalemu bakabungana alimwi cakulitakata “bakoompolola kuli-Leza ejwi lyamoyo omwe” mumupailo. Icakatobela, bakazumanana—kunyina makani akupenzegwa—“kwaamba makani aa-Leza akaanzambwene.” (Incito 4:24-31) Sena akati kabo kuli mbotunga twayeeyela kuti mumupailo tiibakali kubikkila maano? Peepe, bakapaila “ejwi lyamoyo omwe.” Mipailo iipailwa amiswaangano yesu itondezya mbobalimvwa aabo boonse ibajanika. Tweelede kwiibikkila maano.

9. Mbuti mbotunga twatondezya bulemu amiswaangano yesu iisetekene kwiinda mukusama amukulilemeka?

⁹ Alimwi tulakonzya kutondezya kuti tulakulemeka kapati kusetekana kwa miswaangano yesu kwiinda munsamino yesu. Mbotulibonya caboola kunsamino alimwi ambotubamba masusu kulakonzya kupa kuti miswaangano yesu ilemekwe kapati. Imwaapostolo Paulo wakalailila kuti: “Ndayanda kuti baalumi kabanga kabakomba koonse koonse, kabagamine kunyamuna maboko aasalala, kakutakwe bukali akuzwangana. Mbubonya obo abalo bakaintu kabanga kabasama cakulibombya mbubonya mbokweelede, babe aciwa cibotu. Lusakatilo ndobalisakatizya talweelede kuba lwakupesa masusu akusama ingolida neziba ingale naaba malogwe aaulwa mali manjimanji, luleelede kuba lwakusama milimo mibotu, mbubonya mbobeelede bakaintu bana-Leza.” (1 Timoteo 2:8-10) Notujanika kumiswaangano mipati iicitilwa mumabbuwa aazisobano, tulakonzya kusama kweelana ambokwaca pele cabulemu. Kunze lyaboobo, ikulilemeka kwesu aciindi eeco kuyoopa kuti tutalyi naa kutafwuna ccungamu ciindi makani nali mukukananwa. Ikusama kabotu akulilemeka kabotu kumiswaangano yesu kupa bulemu kuli Jehova Leza, kubukombi bwakwe alimwi akubakombima.

Kulilemeka Kuyandika Muŋanda ya Leza

10. Mbuti mwaapostolo Paulo mbwaakatondezya kuti ikulilemeka kabotu kulayandika kumiswaangano yesu ya Bunakristo?

¹⁰ Ku 1 Ba-Korinto, candaano 14, tujana lulayo lubotu lwa mwaapostolo Paulo kujatikizya mboyeelede kucitwa miswaangano ya Bunakristo. Wakamanizya kwiinda mukwaamba kuti: “Zintu zyoonse buyo zicitwe kabotu akucililana.” (1 Ba-Korinto 14:40) Miswaangano yesu ncibeela ciyandika kapati camulimo wambungano ya Bunakristo alimwi kuyandika kulilemeka ikweelede muŋanda ya Jehova.

11, 12. (a) Ncinzi ncobeelede kuziba bana ibajanika kumiswaangano yesu? (b) Munzila nzi bana mobakonzya kwaamba zyalusyomo lwabo amiswaangano yesu?

¹¹ Ikapati bana bayandika kuyiisyigwa  mbobeelede kulilemeka kumiswaangano yesu. Bazyali Banakristo baleelede kubapanduluda bana babo kuti Ŋanda ya Bwami alimwi abusena bwa Ciiyo Cabbuku Cambungano taali masena aakusobanina. Mmasena nkotukombela Jehova akwiiya Jwi lyakwe. Mwami musongo Solomoni wakalemba kuti: “Bamba kabotu kweenda kwako ciindi cakuya kuŋanda ya-Leza. Kuza kukuswiilila.” (Mukambausi 5:1) Musa wakayiisya bana Israyeli kubungana, bapati “abana.” Wakati: “Amubunganye bantu boonse . . . kuti baswiilile, baiye, balemeke Jehova Leza wanu akucenjela kubamba majwi oonse aa-Mulao oyu; abalo bana babo batana kuziba makani baswiilile, baiye kulemeka Jehova.”—Deuteronomo 31:12, 13. *

¹² Ncimwi buyo amazubaano, bana balajanika kumiswaangano abazyali babo ikapati kutegwa baswiilile akwiiya. Mbubatalikila buyo kutobelezya alimwi akumvwa njiisyo zya Bbaibbele zyantalisyo, bana balakonzya “kwaamba zyalusyomo” lwabo kwiinda mukupa bwiinguzi bufwaafwi. (Baloma 10:10, Ci) Imwana muniini ulakonzya kutalika kwiinda mukwaamba majwi masyoonto ikwiingula mubuzyo ngwamvwa. Kumatalikilo, inga wayandika kubala bwiinguzi, pele mukuya kwaciindi, uyoosoleka kwaamba mumajwi aakwe. Eeci cilagwasya alimwi ciyoomukkomanisya mwana, alimwi ikwaamba zyalusyomo kuli boobo ikuzwa aansi amoyo kulabakkomanisya bapati baswiilila. Mbuli cilengwa, bazyali balapa cikozyanyo kwiinda mukupa bwiinguzi balo. Ikuti kacikonzyeka, ncibotu kuti bana kabajisi Bbaibbele lyabo, bbuku lyanyimbo alimwi abbuku naa magazini iyiigwa. Beelede kwiiya kutondezya bulemu bweelede kumabbuku aayo. Eezi zyoonse ziyoopa kuti bana bamvwisye kuti miswaangano yesu ilisetekene.

13. Ncinzi ncotulangila kujatikizya baabo ibajanika ciindi cakusaanguna kumiswaangano yesu?

¹³ Masimpe, tatuyandi kuti miswaangano yesu ikozyanye amiswaangano yazikombelo zya Bunakristo bwanyika. Eeyi tiisangalizyi alimwi ilacitwa abulemu bwiindilide naa balayobeka kapati mbuli kuti kuli nkosaadi. Tuyanda kuti miswaangano yesu a Ŋanda ya Bwami kiisangalizya alimwi kiikulwaizya pele kutali kuti mane yaba mbuli kuti nkunkolola. Tulaswaangana kutegwa tukombe Jehova, aboobo miswaangano yesu lyoonse yeelede kupa bulemu. Ncotulombozya ncakuti bamana kuswiilila kumakani aabandikwa alimwi akulangilila mbotulilemeka swebo alimwi abana besu, aabo ibajanika ciindi cakusaanguna bakonzye kwaamba kuti: “Ncobeni Leza mpali akati kanu.”—1 Ba-Korinto 14:25.

Cibeela Cabukombi Bwesu Cinooliko Lyoonse

14, 15. (a) Mbuti mbotutakonzyi ‘kulekelezya ŋanda ya Leza’? (b) Muunzila nzi lugwalo lwa Isaya 66:23 mboluli kale mukuzuzikizyigwa?

¹⁴ Mbuli mbokwaambwa kale, Jehova uli mukubunganya bantu bakwe akubakkomanisya ‘muŋanda yakwe yakukombela,’ itempele yakwe yakumuuya. (Isaya 56:7) Imwaalumi uusyomeka Nehemiya wakayeezya bama Judanyina kuti beelede kutondezya bulemu bweelede kutempele ini-ini kwiinda mukupa lugwasyo lwakumubili. Wakati: “Tatukooyooleka iŋanda ya-Leza wesu.” (Nehemiya 10:39) Alimwi tatweelede kuyalampya bwiite bwa Jehova bwakuti tumukombe ‘muŋanda yakwe yakukombela.’

¹⁵ Ikutondezya mbociyandika lyoonse ikuswaangana kutegwa tukombe, Isaya wakasinsima kuti: “Kuzwa kumwezi mupya akusikila kulyuumwi mupya, akuzwa kubuzuba bwa-Sabata akusikila kulibumwi bwa-Sabata, bantu boonse bayoosika kuzookomba kubusyu  bwangu, mbwaamba Jehova.” (Isaya 66:23) Eeci cili mukucitika mazuba aano. Lyoonse, mvwiki amvwiki, Banakristo balyaabide balabungana kutegwa bakombe Jehova. Nzila zimwi mbobacita oobo nkwiinda mukujanika kumiswaangano ya Bunakristo alimwi akutola lubazu mumulimo wabuleya. Sena muli akati kabaabo ‘bakomba kubusyu bwa Jehova’ lyoonse?

16. Nkaambo nzi ikujanika lyoonse kumiswaangano ncokweelede kuba cibeela cicitwa lyoonse mubuumi bwesu lino?

¹⁶ Lugwalo lwa Isaya 66:23 luyoozuzikizyigwa kapati kujatikizya buumi munyika mpya yakasyomezyegwa a Jehova. Eeco ciindi, “bantu boonse,” munzila yacigaminina, nkokuti mvwiki amvwiki, mwezi amwezi “bayoosika kuzookomba” Jehova mane kukabe kutamani. Mbwaanga kuswaangana antoomwe ikukomba Jehova kunooli cibeela calyoonse cabukkale bwesu bwakumuuya mubukkale bupya, sena ecino tacili nceciindi cakucita kuti kujanika lyoonse kumiswaangano yesu iisetekene kube cibeela cicitwa lyoonse mubuumi bwesu?

17. Nkaambo nzi ncotuyandika miswaangano “mbo[tu]kubwene kuti buzuba bwa-Kristo buli afwaafwi”?

¹⁷ Mamanino mbwali afwaafwi, kwiinda lyoonse tweelede kukanza kunoojanika amiswaangano yesu ya Bunakristo yabukombi. Akaambo kabulemu mbotujisi kukusetekana kwa miswaangano yesu, tatuzumizyi mulimo wakumubili, milimo yakucikolo iicitilwa kuŋanda naa lwiiyo luyungizyidwe kutupa kuti katutaswaangani lyoonse abasyomima. Tuyandika kuyumizyigwa kwiinda mukuyanzana. Miswaangano yesu yambungano itupa coolwe cakuzibana, kuyumizyanya alimwi akukulwaizyanya “mukuyandana akucita milimo mibotu.” Tweelede kucita obu “mbo[tu]kubwene kuti buzuba bwa-Kristo buli afwaafwi.” (Ba-Hebrayo 10:24, 25) Aboobo, lyoonse atutondezye bulemu bweelede kumiswaangano yesu iisetekene kwiinda mukujanika lyoonse, kusama kabotu alimwi akulilemeka kabotu. Kwiinda mukucita oobo, tutondezya kuti zintu zisetekene tuzibona mbwazibona Jehova.

Bupanduluzi buyungizidwe

Ikwiinduluka

• Ncinzi citondezya kuti miswaangano yabantu ba Jehova yeelede kubonwa kuti ilisetekene?

• Nzibeela nzi zyamiswaangano yesu zitondezya kuti ilisetekene?

• Mbuti bana mbobakonzya kutondezya kuti balalemeka kusetekana kwamiswaangano yesu?

• Nkaambo nzi kujanika lyoonse kumiswaangano ncokweelede kuba cibeela cicitwa lyoonse mubuumi bwesu?

[Mibuzyo yaciiyo]

[Zifwanikiso izili apeeji 28]

Miswaangano yabukombi bwa Jehova ilisetekene kufwumbwa nkoicitilwa

[Cifwanikiso icili apeeji 31]

Bana besu baniini balajanika kumiswaangano kutegwa baswiilile akwiiya