Sena Mulalutambula Lugwasyo Lwa Jehova?
Sena Mulalutambula Lugwasyo Lwa Jehova?
“Jehova ngomuvuni wangu, takukwe encenjoowa.”—BA-HEBRAYO 13:6.
1, 2. Ino nkaambo nzi ncociyandika kapati kuti tuluzumine lugwasyo abusolozi bwa Jehova mubukkale bwesu?
AMWEEZEEZYE kuti mutanta mulundu mulamfwu. Pele tamuli nyolikke pe, nkaambo kuli musololi walyaaba kuti mweendele antoomwe alimwi mmusololi uucibwene kapati. Ulijisi luzibo lunji alimwi uli anguzu kwiinda ndinywe, pele cakukkazyika moyo weendela munsi lyanu. Wamubona kuti ciindi aciindi mwiile kuliwida. Akaambo kakuti ulibikkilide maano kuti mutalicisi, watambika janza lyakwe kumugwasya abusena bubyaabi kapati. Sena inga mwalukaka lugwasyo lwakwe? Peepe! Muli muntenda!
2 Mbotuli Banakristo, tuli munzila iikatazya kweendela. Sena tweelede kweenda mumugwagwa ooyo uumanikide katuli tolikke buyo? (Matayo 7:14) Peepe, Ibbaibbele litondezya kuti musololi mubotu kapati ngotujisi Jehova Leza, ulabazumizya bantu kweenda anguwe. (Matalikilo 5:24; 6:9) Sena Jehova ulabagwasya babelesi bakwe nobeenda? Mboobu mbwaamba: “Mebo nde-Jehova njookujata kujanza lyalulyo, njookwaambila kuti, utayoowi, ndime sikugwasya wako.” (Isaya 41:13) Mbuli musololi mucikozyanyo cesu, Jehova calubomba ulatambika janza lyakwe likwabilila alimwi akubamba cilongwe kuli baabo bamulangaula kuti beende anguwe. Masimpe kunyina wesu uunga wayanda kulukaka lugwasyo lwakwe!
3. Ino mmibuzyo nzi njotutiilange-lange mumubandi ooyu?
3 Mucibalo cainda, twakabandika nzila zyone Jehova mbwaakagwasya bantu bakwe kaindi. Sena ulabagwasya bantu bakwe munzila zikozyene amazubaano? Alimwi ino mbuti mbotukonzya kuba masimpe kuti tulalutambula kufwumbwa lugwasyo luli boobo? Atwiilange-lange mibuzyo eeyi. Kwiinda mukucita boobo, inga twasyoma kapati kuti Jehova ngo Muvwuni wesu ncobeni.—Ba-Hebrayo 13:6.
Lugwasyo Kuzwa Kubangelo
4. Nkaambo nzi babelesi ba Leza mazubaano ncobakonzya kusyoma kuti bangelo balabagwasya?
4 Sena bangelo balabagwasya babelesi ba Jehova bamazubaano? Inzya balabagwasya. Masimpe, mazubaano tabalibonyi cacigaminina kutegwa babavwune kumapenzi bakombi bakasimpe. Nomuba muciindi cansiku, muuziindi buyo zisyoonto bangelo nobakali kunjilila boobo. Bunji bwazintu nzyobakali kucita tiizyakali kuboneka kubantu mbubwena mbuli mazubaano. Nokuba boobo, babelesi ba Leza ibakazyi kuti bangelo bakali kubagwasya bakayumizyigwa kapati aluzibo oolo. (2 Bami 6:14-17) Aswebo tulijisi twaambo tubotu ncotweelede kulimvwa munzila iikozyenye.
5. Ino mbuti Bbaibbele mbolitondezya kuti bangelo balijatikizyidwe mumulimo wakukambauka uucitwa sunu?
5 Bangelo ba Jehova balibikkide maano ikapati kumulimo uulibedelede motujatikizyidwe. Ino mmulimo nzi ooyo? Inga twajana bwiinguzi kubbuku lya Ciyubunuzyo 14:6 lyaamba kuti: “Ndakabona angelo umbi uuluka mujulu, wakalijisi Makani Mabotu aateeli aakukambaukila kulibaabo ibakala ansi akubamasi boonse akumisyobo yoonse akumyaambo yoonse akumikowa yoonse.” Aaya “Makani Mabotu aateeli” aliswaangene kapati a “Makani Mabotu aa-Bwami,” aayo kweelana a Jesu mbwaakasinsima “azookambaukwa munyika yoonse kuti abe citondezyo kumisyobo yoonse” mamanino aabweende oobu bwazintu kaatanasika. (Matayo 24:14) Masimpe, ibangelo tabakambauki cacigaminina. Jesu wakapa bantu mulimo ooyu uuyandika kapati. (Matayo 28:19, 20) Sena tacili cintu cikulwaizya kuzyiba kuti notuzuzikizya mulimo ooyo, tulagwasyigwa abangelo basalala, ibasongo alimwi izilenge zyamuuya zilaanguzu?
6, 7. (a) Ino ncinzi citondezya kuti bangelo balatugwasya mumulimo wesu wakukambauka? (b) Ino mbuti mbotunga twaba masimpe kuti tuyootambula lugwasyo kubangelo ba Jehova?
6 Kuli bumboni bunji butondezya mbobatugwasya bangelo mumulimo wesu. Mucikozyanyo, ziindi zinji tulamvwa kuti Bakamboni ba Jehova nobakali mumuunda, bakajana muntu wakali kupaila kuli Leza kulomba lugwasyo kuti ajane kasimpe. Zyakuluula zili boobu zilacitika kanji-kanji cakuti tazikonzyi kwaambwa kuti zilicitikila buyo. Akaambo kalugwasyo lwabangelo luli boobo, bantu banji bali mukwiiya kucita mbuli ‘mungelo uuluka mujulu’ mbwaakaambilizya kuti: “Amuyoowe Leza akumupa bulemu.”—Ciyubunuzyo 14:7.
7 Sena mulombozya kugwasyigwa abangelo ba Jehova basinguzu? Nkokuti mweelede kubeleka kusikila mpomugolela mumulimo wanu. (1 Ba-Korinto 15:58) Mbotuya buzumanana kulyaaba cakukondwa alimwi cabuuya mukubeleka mulimo ooyu uulibedelede kuzwa kuli Jehova, cakutadooneka tulakonzya kutambula lugwasyo kuzwa kubangelo bakwe.
Lugwasyo Kuzwa ku Mupati Wabangelo
8. Ino ncuuno nzi caatala ncajisi Jesu kujulu, alimwi ino nkaambo nzi eeco ncocikatalusya kulindiswe?
8 Jehova alimwi ulatupa alumbi lugwasyo kuzwa kubangelo. Ibbuku lya Ciyubunuzyo 10:1 lipandulula “angelo umbi singuzu” uugambya wakajisi “busyu . . . bwakali mbuli izuba.” Ooyu mungelo iwakabonwa mucilengaano wiiminina Jesu Kristo iwakasumpulwa mubulelo bwakujulu. (Ciyubunuzyo 1:13, 16) Sena Jesu mungelo ncobeni? Ibbala lyakuti ‘mungelo’ lilakonzya kubelesyegwa akuli Jesu, mbwaanga ngomungelo mupati. (1 Ba-Tesalonika 4:16) Jesu nguuyinda nguzu akati kabana ba Jehova bamuuya boonse. Jehova wamubikka kuti ayendelezye makamu-makamu aabangelo Bakwe boonse. Mbwali mungelo mupati, masimpe ulapa lugwasyo lutalivwulili. Munzila zili buti?
9, 10. (a) Mbuti Jesu mbwabeleka kali “mugwasyi” ciindi nitwabisya? (b) Ino ndugwasyo nzi ndotukonzya kujana mucikozyanyo ca Jesu?
9 Imwaapostolo mudaala Johane wakalemba kuti: “Kuti naa umwi wabisya, tulijisi mugwasyi uutwaambilila kuli Taata, ooyu ngu Jesu Kilisito uululeme.” (1 Joni 2:1, Ci) Ino nkaambo nzi Johane ncaakaambila kuti Jesu “mugwasyi” wesu ikapati kuti “[twa]bisya”? Abuzuba tulabisya alimwi cibi cisololela kulufwu. (Mukambausi 7:20; Ba-Roma 6:23) Nokuba boobo, Jesu wakaaba buumi bwakwe kacili cipaizyo kuzibi zyesu. Alimwi uli kumbali lya Taateesu siluzyalo kutegwa atwiiminine mukukombelezya kuti tulekelelwe. Aumwi wesu ulayandika lugwasyo luli boobu. Ino inga twagwasyigwa buti? Tweelede kweempwa kuzibi zyesu alimwi akulomba kulekelelwa kwiinda mucinunuzyo ca Jesu. Alimwi tatweelede kuziinduluka zibi zyesu.
10 Kunze lyakutufwida, Jesu wakatubeda citondezyo cibotu. (1 Petro 2:21) Icikozyanyo cakwe cilatusololela, cilatugwasya kweendelezya buumi bwesu kutegwa tutaciti cibi cipati alimwi akuti tumukkomanisye Jehova Leza. Sena tatukkomani kuba alugwasyo luli boobu? Jesu wakasyomezya basikumutobela kuti bakali kuyoopegwa mugwasyi aumbi.
Lugwasyo lwa Muuya Uusalala
11, 12. Ino muuya wa Jehova ninzi, ino ujisi nguzu zili buti, alimwi nkaambo nzi ncotuyandika kuba anguwo mazubaano?
11 Jesu wakasyomezya kuti: “Ndiyookumbila Taata, uyoomupa Mugwasyi umbi kuti akale anywebo lyoonse. Ngonguwe Muuya wabwini, oyo inyika ngwiitakonzya kutambula.” (Johane 14:16, 17) Ooyu “Muuya wabwini” naa muuya uusalala tali muntu pe, pele ninguzu, nkokuti inguzu Jehova mwini nzyabelesya. Inguzu eezyi tazyeeli pe. Nenguzu Jehova nzyaakabelesya mukulenga ijulu anyika, ikucita maleele mapati alimwi amukuyubununa makanze aakwe kwiinda muzilengaano. Mbwaanga Jehova tabelesyi muuya wakwe munzila eezyo zigaminide mazubaano, sena eeco caamba kuti tatuyandiki muuya ooyu?
12 Peepe! ‘Muziindi zikatazya’ eezyi, tuyandika muuya wa Jehova kwiinda lyoonse. (2 Timoteo 3:1) Utugwasya kuliyumya mumasunko. Ulatugwasya kuba abube butaliboteli butupa kuba balongwe a Jehova alimwi abakwesu abacizyi bakumuuya. (Ba-Galatiya 5:22, 23) Aboobo mbuti mbotunga twajana mpindu kulugwasyo oolu lubotu kuzwa kuli Jehova?
13, 14. (a) Ino nkaambo nzi ncotukonzya kuba masimpe kuti Jehova cakulisungula ulapa muuya wakwe uusalala kubantu bakwe? (b) Nkwiinda mumucito uuli buti motunga twatondezya kuti tatucitambuli cipego camuuya uusalala?
13 Cakusaanguna, tweelede kupaila kulomba muuya uusalala. Jesu wakati: “Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Usalala abakumbila kulinguwe?” (Luka 11:13) Inzya, Jehova ngu Taata uutakonzyi kweelanisyigwa amuntu uumbi. Ikuti calusyomo acakusinizya twamulomba muuya uusalala, uya kutupa. Tutayeeyi kuti inga watwiima cipego eeci. Imubuzyo lino ngwakuti, Sena tulaupailila muuya uusalala? Tweelede kuulomba mumipailo yesu abuzuba.
14 Cabili, tulacitambula cipego eeco kwiinda mukubeleka kweendelana amuuya uusalala. Mucikozyanyo: Atwaambe kuti Munakristo ujisi penzi lyakweebelela akubala makani aaletela muzeezo wakoonana. Lino wali kupaila kuti muuya uusalala umugwasye kuzunda cilengwa eeci cisofweede. Walomba lulayo kubaalu alimwi bamulailila kutola ntaamu zigaminide alimwi akuti aleke nokuba kusika afwaafwi azintu eezyo zisofwaazya. (Matayo 5:29) Ino ncinzi cinga cacitika kuti naa waunduluzya lulayo lwabo kwiinda mukuzumanana kulangilila zintu zili boobo naasunkwa? Sena nzyacita zileendelana amupailo wakwe wakulomba muuya uusalala kuti umugwasye? Antela sena uli muntenda yakupenzya muuya wa Leza alimwi akwaalilwa kutambula cipego eeci? (Ba-Efeso 4:30) Masimpe, toonse tweelede kucita kusikila aagolela inguzu zyesu kutegwa tubone kuti twazumanana kutambula cipego eeci citaliboteli kuzwa kuli Jehova.
Lugwasyo Kuzwa ku Jwi lya Leza
15. Mbuti mbotunga twatondezya kuti tatuluubyi-ubyi Bbaibbele?
15 Ibbaibbele lyabagwasya babelesi ba Jehova basyomeka kwamyaanda yamyaka minji. Muciindi cakwaawubya-ubya Magwalo Aasalala, tweelede kubikkila maano kuzyiba kuti alijisi nguzu zyakutugwasya. Ikutambula lugwasyo oolo kuyandika kusolekesya. Ikubala Bbaibbele tweelede kukucita kuba cilengwa cicitwa lyoonse.
16, 17. (a) Ino mbuti ibbuku lya Intembauzyo 1:2, 3 mbolipandulula mpindu zijanika mukubala mulawo wa Leza? (b) Ino mbuti Intembauzyo 1:3 mboitondezya kuti tweelede kubeleka canguzu?
16 Ibbuku lya Intembauzyo 1:2, 3 lyaamba zyamuntu munaleza kuti: “Ulakondelelwa Mulao wa-Jehova, amulao wakwe ulauyeeya lyoonse masiku asikati. Uyooba mbubonya mbuli musamu uuzikidwe kumbali atulonga twamaanzi, uuzyala micelo yawo kuciindi ceelede, uujisi matu aatayumi; zyoonse nzyacita ziyooba acoolwe.” Sena mwakabona kaambo kapati mutupango ootu? Ncuuba-uba kubala majwi aaya akuyeeya kuti apandulula buyo busena bwaluumuno—cisamu cijisi matu manji cikomena mumbali lyamulonga. Elo cilakondelezya kaka kulyookezya ciindi camasyikati mucimvwule camusamu ooyo! Pele intembauzyo eeyi taitwaambili kuyeeya zyakulyookezya pe. Pele yaamba zyakubeleka canguzu. Munzila nzi?
17 Amubone kuti cisamu caambwa waawa tacili cisamu cacimvwule icilikomenena buyo mumbali lyamulonga. Ncisamu cizyala micelo, ‘cisyangidwe’ buya abusena bwakasalwa—“kumbali atulonga twamaanzi.” Ino mbuti cisamu comwe mbocinga cakomena kumbali lyatulonga tunji? Mumuunda wamicelo, mwini muunda inga wasya tugelo tuleta maanzi aakutilizya misamu yakwe yamicelo iiyandika kapati. Lino twakabona kaambo! Ikuti kumuuya twazwidilila mbuli cisamu eeco, nkokuti nkaambo kakuti muntu umwi wabeleka canguzu kutugwasya. Tuli mumbunga iileta maanzi mabotu aabwini cigaminina kulindiswe, pele tweelede kucita lubazu lwesu. Tweelede kwaabelesya maanzi aaya aataliboteli, kutola lubazu mukuzinzibala kuyeeya alimwi akuvwuntauzya kuyandika kutegwa kasimpe ka Jwi lya Leza kanjile mumizeezo amoyo wesu. Ikuti twacita oobo, andiswe inga twazyala micelo mibotu.
18. Ino ncinzi ciyandika kutegwa tujane bwiinguzi bwamu Bbaibbele kumibuzyo yesu?
18 Ibbaibbele talikonzyi kutugwasya ikuti katutalibali. Alimwi talili bbuku lyamasalamuzi antela citumwa—cakuti tulakonzya kufwinya buyo, akulekela Bbaibbele lyajaluka apeeji lili lyoonse, mpoonya akulangila bwiinguzi kumubuzyo wesu kulibonya apeeji lijaludwe. Notuyandika kusala kujatikizya makani aamwi, tweelede kuyandaula “luzibo lwa-Leza” mbuli lubono luyandisi luli mubulongo. (Tusimpi 2:1-5) Ikuvwuntauzya kabotu-kabotu alimwi cabusungu kulayandika kanji-kanji kutegwa tujane lulayo lwamu Magwalo lwaamba zintu nzyotuyanda. Tulijisi mabbuku aapandulula Bbaibbele manji aakonzya kutugwasya mukuvwuntauzya kwesu. Mbotuya bubelesya zintu eezyi mukuyandaula cabusungu busongo ibugwasya mu Jwi lya Leza, masimpe tuli mukulubelesya lugwasyo ndwapa Jehova.
Lugwasyo Kuzwa Kubasyomima
19. (a) Ino nkaambo nzi zibalo zyamu Ngazi Yamulindizi alimwi a Galamukani! ncozikonzya kubonwa kuba lugwasyo lupegwa kwiinda mubasyomima? (b) Ino mbuti mbomwagwasyigwa acibalo cimwi camumagazini eesu?
19 Babelesi ba Jehova bantunsi lyoonse bali kugwasyanya. Sena Jehova wakacinca? Peepe. Kakunyina akudooneka, aumwi wesu ulakonzya kuyeeya cimwi ciindi naakatambula lugwasyo ndwaakali kuyandika aciindi ceelede kuzwa kubasyomima. Mucikozyanyo, sena mulayeeya zibalo zimwi mumagazini ya Ngazi Yamulindizi naa Galamukani! izyakamuumbulizya nomwakali kuyanda luumbulizyo antela zyakamugwasya kumana penzi naa kuzunda buyumuyumu bumwi kulusyomo lwanu? Jehova wakamupa lugwasyo oolo kwiinda “[mu]muzike musyomesi uucenjede” iwakabikkwa kwaabila “zilyo . . . kuciindi ceelede.”—Matayo 24:45-47.
20. Ino muunzila nzi baalu Banakristo mbobatondezya kuti ‘nzipego mubantu’?
20 Pele kanji-kanji lugwasyo ndotutambula kubasyomima luligaminide kapati. Mwaalu Munakristo wapa makani alo aatunjila mumoyo naa wacita nyendo yabweembezi yatugwasya kuliyumya muciindi cikatazya, antela watulaya caluzyalo calo catugwasya kubona alimwi akuzunda kukompama kumwi. Munakristo uulumba umwi wakalemba boobu kujatikizya lugwasyo mwaalu ndwaakamupa: “Mumulimo wamumuunda, wakandikulwaizya kwaamba mbondilimvwa. Masiku aakaindide, ndakapaila kuli Jehova kulomba muntu wakubandika anguwe. Buzuba bwakatobela, mukwesu ooyu wakabandika andime munzila yalubomba. Wakandigwasya kubona mbwaali kundigwasya Jehova kwamyaka minji. Ndililumbide kapati kuli Jehova akaambo kakunditumina mwaalu ooyu.” Munzila zyoonse eezyi, baalu Banakristo balatondezya kuti ‘nzipego kubantu’ kuzwa kuli Jehova kwiinda muli Jesu Kristo kuti batugwasye kuliyumya notweenda munzila yakubuumi.—Ba-Efeso 4:8.
21, 22. (a) Ino nimpindu nzi zijanika ciindi aabo bali mumbungano nobatobela lulayo lujanika ku Ba-Filipi 2:4? (b) Ino nkaambo nzi noiba milimo misyoonto yaluzyalo ncoiyandika kapati?
21 Kunze lyabaalu, aumwi Munakristo uusyomeka weelede kwaatobela malailile aakasololelwa amuuya aakuti: “Tamweelede kuyeeya kuligwasya nubeni luzutu, pe, umwi aumwi uleelede kwiingasila kugwasya mweenzinyina.” (Ba-Filipi 2:4) Eelyo boonse mumbungano ya Bunakristo nobatobela malailile aaya, kulaba kucitilana milimo mibotu yaluzyalo. Mucikozyanyo, aciindi citayeeyelwi mukwasyi umwi wakanjila mumapenzi manji. Wisi wakatolezyede mwanaakwe musimbi muniini kucintoolo. Nobakali kujoka kuŋanda, bakajanika muntenda yamumugwagwa. Mwana musimbi wakafwa alimwi bausyi bakalicisa kapati. Wisi naakazwa mucibbadela wakacili kuciswa kapati cakuti kunyina ncaakali kukonzya kulicitila. Bakaintu bakwe bakalinyongene kapati mumizeezo cakuti tiibakali kukonzya kumulanganya balikke. Aboobo banabukwetene bamwi mumbungano bakalonzya banabukwetene aaba bakali mumapenzi akubaleta muŋanda yabo alimwi bakabalanganya kwansondo zinji.
22 Masimpe, taili milimo yoonse yaluzyalo iijatikizya ntenda zili boobo akulyaaba boobo. Lugwasyo lumwi ndotutambula ndusyoonto kapati. Pele noluceya buti luzyalo lwatondezyegwa, tulalumba, tee kayi? Sena kuli ziindi nzyomuyeeya eelyo mukwesu naa mucizyi naakamwaambila naa kumucitila cintu caluzyalo kumupa lugwasyo ndomwakali kuyandika? Jehova lyoonse ulatulanganya munzila zili boobo.—Tusimpi 17:17; 18:24.
23. Ino Jehova ucibona buti notusoleka kugwasyanya?
23 Sena inga mwayanda kuti Jehova amubelesye mukugwasya bamwi? Coolwe eeco cilibedelede nkocili. Mubwini, Jehova ulaibikkila maano milimo iili boobo njomubeleka. Ijwi lyakwe lyaamba kuti: “Uufwida bacete luzyalo ulakolotya Jehova; ulamupa bulumbu bweelede milimo yakwe.” (Tusimpi 19:17) Kulaba kukondwa kapati ciindi notulyaaba kugwasya bakwesu abacizyi. (Incito 20:35) Ikukondwa kujanika akaambo kakupa lugwasyo luli boobu naa kukulwaizyigwa kuboola mukulutambula, tazijaniki kuli baabo ibalyaandaanya kuli bamwi. (Tusimpi 18:1) Aboobo, lyoonse katuswaangana antoomwe kumiswaangano ya Bunakristo kutegwa tukulwaizyanye.—Ba-Hebrayo 10:24, 25.
24. Nkaambo nzi ncotuteelede kulimvwa kuti tatujisi coolwe akaambo kakutabona maleele aa Jehova aakali kucitwa kaindi?
24 Sena tacili cintu cikondelezya kulanga-langa nzila mbwatugwasya Jehova? Nokuba kuti ciindi ncotupona Jehova taciti maleele kutegwa azuzikizye makanze aakwe, tatweelede kulimvwa kuti tatuko coolwe. Iciyandika kapati ncakuti Jehova ulatupa lugwasyo loonse ndotuyandika kutegwa tuzumanane kusyomeka. Alimwi ikuti twaliyumya caantoomwe mulusyomo, tuyoolibonena milimo ya Jehova iigambya kapati alimwi iikondelezya iitana buzuba yacitwa! Atukanze kulutambula alimwi akulubelesya kapati lugwasyo lwaluyando ndwapa Jehova kutegwa tutondezye kuti tulaazumina majwi aali mulugwalo lwesu lwamwaka wa 2005 aakuti: “Lugwasyo lwangu lulazwa kuli-Jehova.”—Intembauzyo 121:2.
Ino Muyeeya Buti?
Ino mbuti mazubaano Jehova mbwatupa lugwasyo ndotuyandika—
• kwiinda mubangelo?
• kwiinda mumuuya wakwe uusalala?
• kwiinda mu Jwi lyakwe ndyaakasololela?
• kwiinda mubasyomima?
[Mibuzyo yaciiyo]
[Cifwanikiso icili apeeji 15]
Cilakulwaizya kuzyiba kuti bangelo balagwasyilizya mumulimo wakukambauka
[Cifwanikiso icili apeeji 17]
Jehova ulakonzya kubelesya umwi wabasyomima kutupa luumbulizyo ndotuyandika