Sena Kuli Notuya Kuba Mulukwabililo Lwini-Lwini?

BANA cakutangala balasobana abazyali babo basiluyando—ino ngwani uutakonzyi kukkomana kulangilila ceeci kacicitika? Mubukkale buli boobu bana balimvwa kuti balicingilidwe kuti bazyali babalanganya kabaliko. Pele bunji bwabana, ziindi zili boobu zyakutangala tabazyiboni-boni pe. Muciindi caboobo, bamwi bana abuzuba balalibilika kuyeeya nkobaya koona. Sena kuli bulangizi buliko kubana bali boobo batakwe akoona alimwi abamwi bapona kakunyina lukwabililo?

Nokuba kuti kumpela inga kwalibonya kuba kwabuyo, Ijwi lya Leza lilapa bulangizi. Musinsimi Isaya wakasinsima kuti buya kusika buzuba boonse nibaya kuba mulukwabililo lwini-lwini. Wakalemba kuti: “Bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe.”—Isaya 65:21, 22.

Pele, sena bulangizi oobu mbwamasimpe ncobeni? Kayi ibbala lyakuti “bulangizi” talili lyoonse nolyaamba kuti cintu eeco ciya kucitika ncobeni. Mucikozyanyo, mu Brazil inga bantu balamvwa majwi aakuti: “Bulangizi ncecintu cicaalizya kufwa, calo caamba kuti . . . “ bantu banji balazumanana kuba alusyomo nokuba kuti taku aalomenyi aayeeme kaambo keni-keni kapa bulangizi. Nokuba boobo, ibulangizi Leza uupona mbwatusyomezya buliindenyi. Imwaapostolo Paulo wakalemba kuti: “Taakwe naba omwe uumusyoma [Leza] uunoousigwa bwee[mya].” (Ba-Roma 10:11) Businsimi bwamu Bbaibbele bwakazuzikizyigwa kale bulatupa lusyomo lwakuti zisyomezyo azimwi zyoonse Jehova Leza nzyaakasyomezya azyalo ziya kuzuzikizyigwa. Eelyo zisyomezyo eezyi zyaakuzuzikizyigwa, buumi oobu bupa kuti bana kabaile kwiingaila mumigwagwa ciya kuba cintu cakale.

Kufwumbwa buya sunu, ilulayo lugwasya lujanwa mu Bbaibbele lulakonzya kubagwasya aabo batajisi bulangizi, kuba abuumi buli kabotu akujana lukwabililo lwini-lwini. Ino eeci inga cakonzyeka buti? Bakamboni ba Jehova bali mucilawo ncomukkala baya kukondwa kumugwasya kujana bwiinguzi kumubuzyo ooyu.