Sena ‘Mulakondelwa Mulawo Wa Jehova’?
Sena ‘Mulakondelwa Mulawo Wa Jehova’?
‘Ngusicoolwe uukondelwa Mulawo wa Jehova.’—INTEMBAUZYO 1:1, 2.
1. Ino nkaambo nzi ncotukkomenyi tobabelesi ba Jehova?
JEHOVA ulatugwasya alimwi ulatupa bulumbu tobabelesi bakwe basyomeka. Masimpe tulasikilwa mapenzi manji. Pele alimwi tulajana lukkomano lwini-lwini. Eeci tacilamyi nkaambo tubelekela ‘Leza uukkomenyi,’ alimwi muuya wakwe uusalala ulatupa kukkomana mumyoyo yesu. (1 Timoteo 1:11; Ba-Galatiya 5:22) Ikukondwa nkukkomana kwini-kwini kuboola kwiinda mucintu cilangilwa naa cintu cibotu cajanika. Masimpe Taateesu wakujulu ulatupa zipego zibotu. (Jakobo 1:17) Nkakaambo kaako ncotukkomenyi.
2. Ino nzibalo nzi nzyotulaalange-lange zyantembauzyo?
2 Ikukondwa kulakankaizyigwa kapati mubbuku lya Intembauzyo. Mucikozyanyo, aaya mmasimpe kuti twabala ku Intembauzyo 1 a 2. Basikwiiya ba Jesu Kristo bakutaanguna bakatondezya kuti majwi aantembauzyo 2 akalembwa a Davida Mwami wa Israyeli. (Incito 4:25, 26) Sikwiimba uutaambidwe zina iwakaimba intembauzyo 1 ulatalika kwiimba lwiimbo lwakwe lwakasololelwa amuuya amajwi aaya aakuti: “Ngusicoolwe uuteendi mululayo lwababi, uutiimikani munzila yabasizibi.” (Intembauzyo 1:1) Mucibalo eeci aciccilila, atubone kaambo ku Intembauzyo 1 a 2 katupa kukondwa.
Icipa Kukondwa
3. Ikweelana a Intembauzyo 1:1, ino ntwaambo nzi tumwi itupa kuti muna Leza kakondedwe?
3 Intembauzyo 1 ilatondezya kaambo muna Leza icimupa kukondwa. Kapa twaambo itupa kukondwa, sintembauzyo ulaimba kuti: “Ngusicoolwe uuteendi mululayo lwababi, uutiimikani munzila yabasizibi, uutakali mubukalo bwabasampauzi.”—Intembauzyo 1:1.
4. Ino ncikozyanyo nzi cibotu ba Zakariya a Elizabeta ncobakatondezya?
4 Ikutegwa katukondedwe ncobeni, tweelede kuccilila malailile aa Jehova aaluleme. Zakariya a Elizabeta ibakajisi coolwe citalikomeneni cakuba bazyali ba Johane Mubbapatizi, “bakaliluleme kumeso aa-Leza, bakali kweenda mumilazyo emilao yoonse ya-Jehova, tabakwe nobakajisi kaambo.” (Luka 1:5, 6) Tulakonzya kukondwa ikuti twaccilila nzila iili mbuli bwayeeyi akukaka ‘kweenda mululayo lwabasizibi’ naa kumvwida lulayo lwabo lutali lwanjiisyo zya Leza.
5. Ino ncinzi cinga catugwasya kuteenda “munzila yabasizibi”?
5 Ikuti naa twakaka kucita mbobayeeya basizibi, ‘tatukaimi munzila zyabasizibi.’ Masimpe, tatukajaniki mumasena mobajanika-janika—nkokuti mumasena aakulikondelezya mwalo mobalangilila zintu zyamantanda. Ino mbuti ikuti toongwa akutalika kuccilila basizibi mukulilemeka kwabo ikutali kwamu magwalo? Ikuti kwaba boobo, atupailile lugwasyo lwa Leza kutegwa tucite kweelana amajwi amwaapostolo Paulo aakuti: “Mutabi [ni]musungwa mujoko antoomwe abaabo batali bazumini mbumupambukene abo. Nkaambo bululami bulaswaana buti abusendami? Awalo mumuni ulavwelana buti amudima?” (2 Ba-Korinto 6:14) Ikuti katusyoma kuli Leza akuba “basalala mumyoyo,” tuya kuukaka muuya abuumi bwabasizibi, aboobo tuya kuba amizeezo amakanze aasalala kubikkilizya ‘alusyomo lwini-lwini.’—Matayo 5:8; 1 Timoteo 1:5.
6. Ino nkaambo nzi ncotweelede kucenjela kubantu basampaula?
6 Ikutegwa tumukkomanisye Jehova, masimpe ‘tatweelede kukkala mubukkale bwabasampauzi.’ Bamwi balakusampaula kuccilila mulawo wa Leza “kumazuba aakumamanino” aano, pele ibakali Banakristo sunu mbaasiluleyo, ziindi zinji mbabainda kusampaula. Imwaapostolo Petro wakacenjezya basyominyina kuti: “Nomuyandwa, . . . mulazibisya kuti kumazuba aakumamanino kuyoosika basabuzi beenda muzisusi zibi zyamyoyo yabo beni, bayoosabula cakwaamba kuti, Ino kuli kuli kuboola kwakwe ukwakasyomezegwa? Nkaambo kakuti kuzwa kuciindi nibakafwa [ba]mataateesu, zintu zyoonse zicili mbubonya mbozyakabede kuzwa kumalengelo.” (2 Petro 3:1-4) Ikuti twatasola ‘kukkala mubukkale bwabasampauzi,’ cakutadooneka tatukajatikizyigwi kumapenzi aaya kubasikila.—Tusimpi 1:22-27.
7. Ino nkaambo nzi ncotweelede kwaabikka kumoyo majwi aa Intembauzyo 1:1?
7 Ccita kuti twaabikka kumoyo majwi aakutaanguna aa Intembauzyo 1, buyo-buyo inga twaleka kuba basungu kumuuya kwalo nkotwakajana kwiinda mukwiiya Magwalo. Masimpe ibuumi bwesu bulakonzya kubija kapati. Ikuya ansi kumuuya kulakonzya kuba ikuti twaccilila lulayo lwabasizibi. Eelyo inga twatalika kuba akati kabo ciindi aciindi. Mukuya kwaciindi, inga twaba basiluleyo ibatajisi lusyomo basampaula. Cakutadooneka, kuba mulongwe abasizibi kulakonzya kutuletela muuya uutali wabuna Leza walo uukonzya kumanya cilongwe cesu a Jehova Leza. (1 Ba-Korinto 15:33; Jakobo 4:4) Tutacilekeli eeci kuti cicitike kulindiswe!
8. Ino ncinzi ciya kutugwasya kubikkila maano kuzintu zyakumuuya?
8 Imupailo uya kutugwasya kubikkila maano kuzintu zyakumuuya kwalo kuya kutugwasya kutaba balongwe abasizibi. Paulo wakalemba kuti: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza, elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.” Imwaapostolo wakakulwaizya kulanga-langa zintu zisinizyide, zilemekwa, ziluleme, zisalala, ziyandika, zili ampuwo mbotu alimwi azitembaulika. (Ba-Filipi 4:6-8) Atucite kweelana alulayo lwa Paulo alimwi tutasoli kujoka munsi kusika kuciimo cabasizibi.
9. Nokuba kuti tulaikaka milimo mibi, ino mbuti mbotusola kugwasya bantu boonse?
9 Nokuba kuti tulaikaka milimo yabasizibi, tulapa bumboni cabupampu kubantu mbuli mwaapostolo Paulo mbwaakakambaukila Felike Mupati waba Roma naakali “kwaamba aabululami, akulijata, alubeteko [luboola].” (Incito 24:24, 25; Ba-Kolose 4:6) Tulakambauka makani mabotu aa Bwami kubantu boonse, alimwi tulabeendelezya munzila yaluzyalo. Tulisinizyide kuti aabo “basalidwe buumi butamani basyoma” baya kuba basyomi akukondelwa mulawo wa Leza.—Incito 13:48.
Ulakondelwa Mulawo wa Jehova
10. Ino ncinzi ciya kugwasya kuti nzyotubala zitazwi mumizeezo amumoyo notucita ciiyo cesu citugemi?
10 Ikujatikizya muntu uukondedwe, mboobu sintembauzyo mbwamwaamba: “Ulakondelelwa Mulao wa-Jehova, amulao wakwe ulauyeeya lyoonse masiku asikati.” (Intembauzyo 1:2) Mbotuli babelesi ba Leza, ‘tulaukondelwa mulawo wa Jehova.’ Ikuti kacikonzyeka, ziindi notucita ciiyo cesu citugemi alimwi anotukkala ansi kuyeeya, tulakonzya ‘kubikkila mizeezo’ kwiinda mukubala cakupozya. Ikucita boobu notubala kufwumbwa cibalo ca Magwalo kuya kutugwasya kuti zintu nzyotwabala zitazwi mumizeezo amumoyo.
11. Ino nkaambo nzi ncotweelede kubala Bbaibbele “masiku asikati”?
11 “Muzike musyomesi uucenjede” utuyumya-yumya kubala Bbaibbele abuzuba. (Matayo 24:45) Akaambo kaluyandisyo lwakuyanda kuzyiba kapati mulumbe wa Jehova ngwatupede, cilayandika kulibala Bbaibbele “masiku asikati”—ee, kufwumbwa ciindi nitwabula ŋonzi akaambo kacilabila. Petro wakatukulwaizya kuti: “Mbuli bavwanda kukuyandisya mukupa wamuuya uutavwelwi acintu, kuti mukomene anguwo mulufutuko.” (1 Petro 2:1, 2) Sena mulakondelwa ikubala Bbaibbele abuzuba alimwi akukkala ansi kuyeeya ku Jwi lya Leza amakanze aandilyo ciindi camasiku? Sintembauzyo wakacita.—Intembauzyo 63:6.
12. Ino ncinzi ncotuya kucita ikuti naa katukondelwa mulawo wa Jehova?
12 Ikukkomana kwesu kukabe kutamani kuyeeme akukondelwa mulawo wa Leza. Ulilondokede alimwi uliluleme, kuli mpindu mpati iijanwa kwiinda mukuubikkila maano. (Intembauzyo 19:7-11) Sikwiiya Jakobo wakalemba kuti: “Anukuti uusondela mumulao mulondosi wabulubusi, akukakatila kulinguwo, mbwaatali sikuswiilila amatwi buyo uuluba pele sikumana mulimo, ngonguwe uuti longezegwe mukucita kwakwe.” (Jakobo 1:25) Ikuti naa masimpe tulaukondelwa mulawo wa Jehova, takukabi buzuba nebuba bomwe buya kwiinda katutalangi-langi makani aakumuuya. Inzya, tuya kukulwaizyigwa ‘kulanga-langa makani mapati aabulondo bwa Leza’ akubikka makani aa Bwami mubusena bwakutaanguna mubuumi.—1 Ba-Korinto 2:10-13; Matayo 6:33.
Waba Mbubonya Mbuli Cisamu
13-15. Ino muunzila nzi mbotukonzya kuba mbuli cisamu cisyangidwe munsi aakasensa kameenda manji?
13 Kaamba muntu uululeme, sintembauzyo wakaya kumpela kwaamba kuti: “Uyooba mbubonya mbuli musamu uuzikidwe kumbali atulonga twamaanzi, uuzyala micelo yawo kuciindi ceelede, uujisi matu aatayumi; zyoonse nzyacita ziyooba acoolwe.” (Intembauzyo 1:3) Mbweena mbuli bamwi batalondokede, aswebo notubelekela Jehova tulasikilwa mapenzi mubuumi. (Jobu 14:1) Tulakonzya kupenzyegwa alimwi akusikilwa mapenzi aamwi aajatikizya lusyomo lwesu. (Matayo 5:10-12) Nokuba boobo, kwiinda mulugwasyo lwa Leza tulaliyumya akuzwidilila mumisunko eeyi mbweena mbuli cisamu cizyandamene mbociliyumya kumuwo uunga kapati.
14 Icisamu cisyangidwe akasensa kameenda taku niciyuma ciindi cacilimo naa lyaciyumayuma. Ikuti katuli bantu bayoowa Leza, inguzu zyesu zizwa ku Kasensa katayuminini—Jehova Leza. Paulo wakasyoma kuli Leza kugwasyigwa alimwi wakakonzya kwaamba kuti: “Zintu zyoonse buyo ndazikonzya nkaambo kanguzu nzimpedwe kuli [Jehova].” (Ba-Filipi 4:13) Notusololelwa akusaninwa kumuuya kwiinda mumuuya uusalala wa Jehova, tatuneti ikutakonzya kuzyala micelo nikuba kufwa kumuuya. Tuli bantu bazyala micelo mumulimo wa Leza alimwi tulatondezya micelo yamuuya.—Jeremiya 17:7, 8; Ba-Galatiya 5:22, 23.
15 Ikwiinda mukubelesya bbala lya Cihebrayo lisanduludwe kuti “mbuli,” sintembauzyo walibelesya mukukozyanyisya. Ukozyanyisya zintu zyobilo ziindenyi, pele zikozyenyi munzila iimwi. Ibantu azisamu ziliindenyi, pele kukomena kabotu kwacisamu cisyangidwe munsi aakasensa kameenda manji cakutadooneka kwakayeekezya sintembauzyo mbuli kuzwidilila kumuuya kwabaabo ‘bakondelwa mulawo wa Jehova.’ Ikuti katukondelwa mulawo wa Leza, mazuba eesu alakonzya kuvwula mbuli yaayo aacisamu. Mubwini tulakonzya kupona kukabe kutamani.—Johane 17:3.
16. Ino nkaambo nzi alimwi muunzila nzi kuti zintu ‘zyoonse nzyotucita zilazwidilila’?
16 Mbotuzumanana kweenda munzila iiluleme, Jehova ulatugwasya kuliyumya mumapenzi amubuyumuyumu. Tulikkomenyi alimwi tulazyala mumulimo wa Leza. (Matayo 13:23; Luka 8:15) ‘Zyoonse nzyotucita zilazwidilila’ nkaambo makanze eesu mapati ngakuyanda kucita kuyanda kwa Jehova. Mbwaanga makanze aakwe lyoonse alazwidilila akuti tulakondelwa milawo yakwe, tulazwidilila kumuuya. (Matalikilo 39:23; Joshua 1:7, 8; Isaya 55:11) Aya masimpe kufwumbwa notusikilwa mapenzi manji.—Intembauzyo 112:1-3; 3 Johane 2.
Basizibi Balibonya Kuzwidilila
17, 18. (a) Ino sintembauzyo wakakozyanyisya basizibi kunzi? (b) Nokuba kuti basizibi balazwidilila muzintu zyakumubili, ino nkaambo nzi ncobatajisi lucingililo kukabe kutamani?
17 Elo kaka buumi bwasizibi buliindenyi kapati abwamululami! Basizibi balakonzya kulibonya kuzwidilila muzintu zyakumubili kwakaindi kaniini, pele kumuuya tabazwidilili. Aya mmasimpe kweelana amajwi aamwi aasintembauzyo aakuti: “Pele basizibi tabali obo pe. Bali mbuli buungu bupupuluka amuuwo. Nkaambo ka[a]ko basizibi tabakooyooima ciindi calubeta, abasimucitazibi tabakooyooima mumbungano yabaluleme.” (Intembauzyo 1:4, 5) Amubone kuti sintembauzyo waamba kuti, “basizibi tabali obo pe.” Ncaamba ncakuti tabali mbuli bantu ba Leza balo bakozyanyisyigwa kucisamu cizyala micelo alimwi icoongola.
18 Nokuba kuti basizibi bazwidilila muzintu zyakumubili, tabajisi lucingililo kukabe kutamani. (Intembauzyo 37:16; 73:3, 12) Bali mbuli muntu muvwubi ooyo uutako maano Jesu ngwaakaamba mucikozyanyo cakwe naakamubuzya kuti asale cakucita kujatikizya lubono. Jesu wakabaambila aabo bakaliko kuti: “Amucenjele, amulilesye kukulikumbuzya koonse, nkaambo buumi bwamuntu tabuzwi kukuvuba kwazintu nzyajisi.” Jesu wakakaamba kaambo aaka kwiinda mukwaamba kuti muunda wamuntu uumwi muvwubi wakamupa cakulya cinji cakunga wakayeeya koola matala aakwe akuyaka mapati kutegwa ayobole zintu zyakwe zyoonse zibotu. Kumane muntu ooyu wakati, lino cacaala nkwiile kulidoomenena kulya, kunywa akulikkomanisya. Pele Leza wakati: “Yebo omufubafuba, ngoonya masiku aya muuya wako ulayandaulwa kulinduwe. Ino ezi zintu nzooyobwede zilaba zyani?” Ikutegwa akakankaizye kaambo aaka, Jesu wakayungizya kuti: “Mbwabede uuliyobweda lubono, anu tajisi buvubi kuli-Leza.”—Luka 12:13-21.
19, 20. (a) Amupandulule mbobakali kuuma akupupulula maila lyansiku. (b) Ino nkaambo nzi basizibi ncobakozyanyisyigwa amankwisyilili?
19 Basizibi ‘tabajisi buvwubi kuli Leza.’ Akaambo kaceeci, tabajisi lucingililo naaceya alimwi taku ampobaindenyi amakwa aamaila. Lyansiku maila amana kutebulwa, akali kutolwa kulubuwa lwakuumina, ibusena bunji bwaziindi bwakali akauma naa nyika mpoisumpukide alimwi iisasabede. Eezyi zilayi zyakajisi mabwe aabosya naa menyo aazyibulo nkozyili kunsi, zyakali kukwelwa abasune kutyoloola myaangala yamaila kutegwa nseke amakwa zyaandaane. Kwamana boobo, kwakali kubelesyegwa mafwosyolo alo ngobakali kufwosyozya maila aumwa akwaawaala mujulu muwo kawuunga. (Isaya 30:24) Inseke zyakali kuloka alubuwa luuminwa eelyo mankwisyilili akali kuwuuka amuwo. (Rute 3:2) Nseke zyamana kwiinzyigwa munsefwa ikuzwisya makwa, aciindi aawa nseke zyakali kukonzya kuyobolwa naa kuziigwa. (Luka 22:31) Pele aciindi aawa mankwisyilili amana.
20 Mbweena mbuli nseke mbozyakaloka alubuwa luuminwa akuyobolwa kakuli mankwisyilili akaululuka, mbweena buyo baluleme mbobaya kucaala eelyo basizibi baakuzwisyigwa. Masimpe tulikkomenyi kuti basizibi aaba baya kuzwisyigwa kukabe kutamani. Baakugusyigwa, ibantu bakondelwa mulawo wa Jehova baya kulongezyegwa kapati. Masimpe, ibantu bamumvwida Leza mukuya kwaciindi baya kutambula cipego cabuumi butamani.—Matayo 25:34-46; Ba-Roma 6:23.
“Inzila Yabaluleme” Ililelekedwe
21. Ino mbuti Jehova mwazyiba “inzila yabaluleme”?
21 Intembauzyo 1 ilamanizya amajwi aaya aakuti: “Jehova ulizi inzila yabaluleme, pele inzila yabasizibi iyooloba.” (Intembauzyo 1:6) Ino mbuti Leza mbwazyiba “inzila yabaluleme”? Ikuti katweenda munzila iiluleme, tulakonzya kuba masimpe kuti Taateesu wakujulu ulazyiba kuti tulabikkila maano kumilawo yakwe alimwi ulatubona kuba babelesi bakwe bayandika. Aboobo, tulakonzya kuzyiba oobo alimwi tweelede kubikka mapenzi eesu oonse mumaanza aakwe katujisi lusyomo lwakuti masimpe ulatulanganya.—Ezekieli 34:11; 1 Petro 5:6, 7.
22, 23. Ino ncinzi ciya kucitika kuli basizibi alimwi akubaluleme?
22 “Inzila yabaluleme” inakuliko kukabe kutamani, pele bantu basizibi baya kuloba kulubeta lwa Jehova lupati. “Inzila” naa buponi bwabo ziya kulobela antoomwe. Tulakonzya kuba alusyomo mukuzuzikizyigwa kwamajwi aa Davida aakuti: “Kaba kaindi kaniini sizibi takooyooba wo; unooyeeya nkwaakabede, pele takooyooba nkuko. Pele babombemyoyo bayoovuba nyika, bayookondwa muluumuno lunji. Balulami bayookona nyika, bayookala alinjiyo lyoonse.”—Intembauzyo 37:10, 11, 29.
23 Tuya kukkomana kapati ikuba akati kabaabo baya kuba acoolwe cakupona muparadaiso anyika ciindi basizibi nibatani kuliko. Ibabombe myoyo alimwi baluleme kuciindi eeco baya kukkala muluumuno lwini-lwini nkaambo lyoonse bani kukondelwa ‘mulawo wa Jehova.’ Nokuba boobo, kabutana zuzikizyigwa businsimi oobu, ‘makani aa Jehova’ ayelede kuzuzikizyigwa. (Intembauzyo 2:7a) Icibalo ciccilila ciya kutugwasya kubona makani aaya ncaamba kulindiswe alimwi akuciinga cabantu boonse.
Ino Mbuti Mbomunga Mwaingula?
• Ino nkaambo nzi muna Leza ncakondelwa?
• Ino ncinzi citondezya kuti tulaukondelwa mulawo wa Jehova?
• Ino mbuti muntu mbwakonzya kuba mbuli cisamu citililwa lyoonse?
• Ino mbuti nzila yamululami mboyiindenyi ayasizibi?
[Mibuzyo yaciiyo]
[Cifwanikiso icili apeeji 9]
Imupailo uya kutugwasya kutabamba cilongwe abasizibi