Nkotukonzya Kujana Inzila Yakubumanina Limwi Bucete

NOKUBA kuti kuli makani aatyompya munyika yoonse kujatikizya bucete, kuli bamwi basyoma kuti kuli cintu cibotu cikonzya kucitwa. Mucikozyanyo, ikweelana amutwe wamakani mumakani aa Manila Bulletin, ibbanga litegwa Asia Development Bank lyakaamba kuti, “ku Asia bucete inga bwamanizyigwa mumyaka ili 25.” Ibbanga lyakakulwaizya kusumpula buvwubi bwacisi kuba nzila yakumana bucete bwabantu.

Imbunga zimwi amfwulumende zyakalemba mulongo mulamfwu wanzila amakanze aakusoleka kumana penzi. Nzeezi zimwi nzila: mapulogilamu akukwabilila bantu mucilawo, kusumpula lwiiyo, ikuzimaazya zikwelete kumasi aatasumpukide ngozijisi kumasi aasumpukide, ikugwisya zisinkilizyo zisinkilila kunjizya zintu zimwi mucisi kutegwa masi imuli bacete banji kaakonzya kusambala zintu zyabo kakunyina penzi, alimwi akucesya muulo wakubbadalela maanda aamfwulumende imukkala bantu bacete.

Mumwaka wa 2000, United Nations General Assembly yakabikka mbaakani zyeelede kuzuzikizyigwa kusika mu 2015. Eezi zibikkilizya kumanizya bucete butaambiki anzala kubikkilizya akuteelana caboola kumali bantu ngobavwola muzisi. Nokuba kuti makanze aayo mabotu kapati, ibanji baladooneka naa alakonzya kuzwidilila munyika eeyi bantu mobatakamantene.

 Inzila Zigwasya Kumana Bucete

Mbwaanga bulangizi bwalusumpuko lwini-lwini munyika talulangilwi, ino nkuukuli muntu nkwakonzya kujana lugwasyo? Mbuli mbokwaambidwe musyule oomu, kuli cintu cimwi cijisi busongo bugwasya icikonzya kubagwasya bantu lino. Ino ncinzi eeco? Ndi Jwi lya Leza, Ibbaibbele.

Ino nkaambo nzi Bbaibbele ncoliindeene amoonse motujana makani? Nkaambo kakuti lizwa kuli singuzuzyoonse, Mulengi wesu. Wakabikkilizya mulindilyo busongo ibugwasya, nkokuti njiisyo zibeleka kubantu boonse, mumasena oonse alimwi amuziindi zyoonse. Ikuti naa zyatobelwa, njiisyo eezi zilakonzya kubagwasya bacete kupona buumi bukkomanisya noliba lino. Atulange-lange zikozyanyo zili mbozibede.

Amwaalange munzila yeelede mali. Ibbaibbele lyaamba kuti: “Busongo bulatabilila mbubonya mbuli mali mbwaatabilila, aluzibo lulagwasya nkaambo busongo bulavuna buumi bwabaabo babujisi.” (Mukambausi 7:12) Ino ncinzi cili mukwaambwa aawa? Mali tacili ncecintu buyo ciyandika. Masimpe, alakwabilila munzila imwi. Mali aapa kuti tucikonzye kuula zintu zimwi nzyotuyandika, pele kuli mpaagolela. Kuli zintu zimwi ziyandika kapati mali nzyaatakonzyi kuula. Ikuzyiba kaambo aaka kuyootugwasya kuzilanga bweelede zintu, eeci ciyakupa kuti tutatyompwi ibutyompwa baabo ibabikkilide maano ikujana mali. Mali taapi buumi pe, pele ikucita zintu cabusongo kulakonzya kumukwabilila muntu lino alimwi nokuba kujula nzila iisololela kubuumi butamani.

Amukkomane Azintu Nzyomujisi. Izintu nzyotuyanda kuba anzizyo mubwini tazikozyanyi anzintu ziyandika kapati. Tweelede kusaanguna kubikkila maano kuzintu nzyotuyandika kapati. Tulakonzya kulicenga kuyeeya kuti tuyandika cimwi cintu kakuli mubwini cintu eeco tuciyanda buyo kuba acalo pele taciyandiki kapati. Imuntu musongo ulasaanguna kubikka ambali mali akuula zintu ziyandika mpoonya-mpoonya—icakulya, zyakusama, aakoona azimwi-zimwi. Kuzwawaawo, katana kwaabelesya, ulalanga-langa naa mali aacaala alakkwana kuula zintu zimwi. Mucikozyanyo cakwe cimwi, Jesu wakakulwaizya kuti muntu weelede ‘kusaanguna kukkala sansi, abale mali ngati yasye ŋanda, abone naa ulijisi aakwene.’—Luka 14:28.

Mucisi ca Philippines, imuzyali uuli alikke wazina lya Eufrosina uujisi bana botatwe, wali mupenzi lyakujana zintu ziyandika alimwi akwaabelesya kabotu mali ngajana kuzwa ciindi naakamusiya mulumaakwe myaka iili mbwiibede yainda. Kali mupenzi eeli, wabaisya bana bakwe mbobeelede kwaabelesya mali amukwasyi. Mucikozyanyo, bana balakonzya kubona cimwi cintu ncobayanda. Muciindi cakubaambila buyo kuti peepe, ulabandika abalo kati: “Mulakonzya kuula ikuti naa mwaciyanda, pele mweelede kusala. Tujisi buyo mali aakwana cintu comwe. Ikuti kamuyanda tulakonzya kuula cintu eeci ncomuyanda, naa tulakonzya kuula nyama naa cisyu mani cakulisya mupunga nsondo iino. Lino, nceecili ncomuyanda? Amulisalile.” Ikanji-kanji bana balafwambaana kukabona kaambo akusala cakulya ikutali cintu cimbi.

Amuzulile. Injiisyo aimbi yamu Bbaibbele yaamba kuti: “Kufwumbwa twanoojisi cakulya acakulivumba, nciconya eco mbubo ncinji.” (1 Timoteo 6:8) Imali kwaagama tapi lukkomano. Ibunji bwabantu bavwubide tabakkomene, kakuli banji bacete balikkomene kapati. Bacete baiya kuzulila azintu buyo zisyoonto iziyandika mubuumi. Jesu wakaamba kujatikizya kuba  aliso lilulamikidwe lyalo libikkilide buyo maano kuzintu ziyandika kapati. (Matayo 6:22) Eeci cilamugwasya muntu kuzulila azintu nzyajisi. Bacete banji balikkomene akaambo kakuti bajisi cilongwe cibotu a Leza alimwi abuumi bukkomanisya mumukwasyi, izintu zitakonzyi kuulwa amali.

Eezi nzikozyanyo buyo zisyoonto zyanzila zibeleka zili mu Bbaibbele izikonzya kugwasya aabo bacete kuti baliyumye mubukkale bwabo. Kuli azimbi nzila zinji. Mucikozyanyo, zilengwa zibyaabi mbuli kufweba akubbeja, zimana mali azintu; amubone zintu ziyandika kapati mubuumi, ikapati mbaakani zyakumuuya; ooko milimo nkoikatazya, amusole kucita mulimo umwi bamwi ngobayanda. (Tusimpi 22:29; 23:21; Ba-Filipi 1:9-11) Ibbaibbele likulwaizya kwaatobela “maanu aabusongo” nkaambo ‘ayookubeda buumi.’—Tusimpi 3:21, 22.

Nokuba kuti nzila zyamu Bbaibbele zilakonzya kugwasya kuli baabo ibacete, kuli mibuzyo kujatikizya bulangizi bwakumbele. Sena bantu bapengede bayoozumanana kucetaala mane kukabe kutamani? Sena lwaandaano luliko akati kabantu bavwubide kapati alimwi abacete kapati kuli nokuya kubambululwa? Atulange-lange nzila yakumana bucete eeyo banji njobatazyi.

Ibbaibbele Lilapa Bulangizi

Ibanji balazumina ikuti Ibbaibbele ndibbuku bbotu. Pele, kanji-kanji tabazyi kuti lilapa twaambo tugaminide itutondezya kucinca kupati kulangilwa lino-lino.

Leza ukanzide kubweza ntaamu kuti amanizye mapenzi ngobajisi bantu, kubikkilizya abucete. Mbwaanga mfwulumende zyabantu zyaalilwa naa tazilibambilide kucita boobo, Leza ukanzide kubagwisya. Munzila nzi? Ibbaibbele lilaamba cakaanzambwene kuli Daniele 2:44 kuti: “Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.”

Aakumana kunyonyoonwa “mami” naa imfwulumende, Mweendelezi ngwasalide mwini Leza uyoobweza ntaamu. Mweendelezi ooyo tali muntunsi pe, pele ncilenge cijisi nguzu kapati icikkala kujulu icili mbuli Leza mwini. Cilijisi nguzu zyakupa kuti kube kucinca kupati ikuyandika kutegwa kuteelana kumanizyigwe. Leza wakasala Mwanaakwe kucita mulimo ooyu. (Incito 17:31) Ibbuku lya Intembauzyo 72:12-14 lilapandulula ncayoocita Mweendelezi ooyu noliti: “Ulavuna bacete nibakwiila, abalo bapengede abaabo babula mugwasyi. Bacete abatengwana ulabafwida luzyalo; buumi bwabacete ulabufutula. Ulanununa buumi bwabo kulupenzyo: Bulowa bwabo bulayandika mumeso aakwe.” Elo kaka tabuliboteli bulangizi oobu! Kuyooba lwaanguluko! Mweendelezi ngwasalide Leza uyoobweza ntaamu kuvwuna bantu bacete abatengwana.

Mapenzi manji aswaangene abucete ayoomanizyigwa kuciindi eeco. Kapango 16 ku Intembauzyo caandaano 76 kaamba kuti: “Maila  a[yoovula] ansi, atala lyazilundu.” Kunyina nokuya kuba kuceya kwacakulya akaambo kanzala, kubulilwa mali, naa bweendelezi butali kabotu.

Imapenzi aambi aalo ayakumanizyigwa. Mucikozyanyo, sunu icibeela cipati camweelwe wabantu anyika tabajisi maanda aabageme. Pele, Leza usyomezya kuti: “Bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe, nkaambo mazuba aabantu bangu ayooba mbuli mazuba aamusamu, abantu mbensalide bayoongozya milimo yamaanza aabo.” (Isaya 65:21, 22) Aumwi unoojisi ŋanda yakwe akubotelwa amulimo wakwe. Aboobo Leza usyomezya kubumanina limwi bucete. Kunyina kwiindana akati kabavwubi abacete, kunoonyina bantu banoozwa nkasaalo buya kutegwa bazumanane kupona.

Umwi naamvwa kwaciindi cakusaanguna zisyomezyo eezi zyamu Bbaibbele, ulakonzya kuyeeya kuti tacikonzyeki pe. Pele, kulibala cakubikkila maano Bbaibbele kutondezya kuti zisyomezyo zya Leza zyoonse ikaindi zyakazuzikizyigwa. (Isaya 55:11) Aboobo takali kaambo kakuti naa ziyoocitika. Muciindi caboobo, imubuzyo uuyandika ngwakuti, Ino ncinzi ncomweelede kucita kutegwa mukabe alubazu zyakucitika?

Sena Muyoojanika?

Mbwaanga mfwulumende njiya Leza, tweelede kuba bantu aabo Leza mbayootambula kabali bantu bakwe mubulelo oobo. Kunyina naatusiya buyo mumudima pe kujatikizya mbotunga tweelela kuyoojanika. Malailile alilembedwe mu Bbaibbele.

Mweendelezi uubikkidwe, Mwana aa Leza, uliluleme. (Isaya 11:3-5) Aboobo, aabo batambwidwe kuti bakapone mumfwulumende yakwe abalo bayoolangilwa kuba baluleme. Ibbuku lya Tusimpi 2:21, 22 lyaamba kuti: “Baluleme bayookala munyika; baololokede mbebayoosyala mulinjiyo; pele basizibi bayoonyonyoonwa munyika, abasilweeno bayoogwisigwa.”

Sena kuli nzila iiliko muntu mbwaanga waiya kuzuzikizya zintu eezi ziyandika? Inzya, nkoili. Kwiinda mukwiiya Bbaibbele akutobela busolozi mbolipa, muyookkomana abulangizi bwakumbele oobu butaliboteli. (Johane 17:3) Bakamboni ba Jehova bayookkomana kumugwasya alwiiyo oolo. Twamulomba kuti mucibelesye kabotu coolwe eeci kutegwa mubikkilizyigwe akati kabantu aabo ibatakabi limbi mubucete naa kucitilwa calunya.

[Cifwanikiso icili apeeji 5]

Eufrosina: “Ikwaabelesya kabotu mali kwagwasya mukwasyi wangu kujana ziyandika”

[Zifwanikiso izili apeeji 6]

Icilongwe cibotu a Leza alimwi abukkale bwamukwasyi bukkomanisya tazikonzyi kuulwa amali pe