Aristotle wakalemba kujatikizya zintu zyakuzekaula, nyenyeezi azintu zimwi zyamujulu, zintu zipona, kulilemeka, mwaambo, mulawo, kusinizya mbwaaluzi makani kwiinda mukupa twaambo tumvwika (logic), kukwelana kwalubulo, metaphysics, kweenda kwazintu, lukkomano, kweema, zyatwaambo twacisi, mbobayeeya bantu, rhetoric, alimwi a soul, yalo njaakali kubona kuti ilafwa. Nokuba boobo, mpuwo yakwe yakazyibwa kapati akaambo kamilimo yakwe yakuzyiba zintu zipona alimwi a logic.

Basyaazibwene bakaindi ba Giriki bakali kusyoma zintu nzyobakali kubona, twaambo twamasimpe kutegwa bakosole kaambo, alimwi a logic ikupandulula zilengwaleza. Kutalikila kuli ceeco ncobakali kubona kuti ncamasimpe, bakali kusyoma kuti ikuti batulanga-langa cakulomya twaambo ooto twamasimpe, bakali kukonzya kukosola makani munzila iiluzi.

Kwiinda mukubelesya nzila eeyi, bakakosola makani manji munzila iiluzi—amwi makani ngobakakosola munzila iiluzi ngakuti kuli milawo yeendelezya bubumbo. Nokuba boobo, penzi pati ndyobakajisi ndyakuti, kuli mpobakali kugolela kujatikizya zintu nzyobakali kukonzya kubona—calo icakapa kuti baalumi basongo kubikkilizya a Aristotle, baimpye. Mucikozyanyo, bakali kusyoma kuti mapulaneti alimwi anyenyeezi  zyakali kuzinguluka nyika. Aciindi eeco, kaambo aaka kakali kubonwa kuti nkaambo kamasimpe ikatakonzyi kukazyigwa. Bbuku litegwa The Closing of the Western Mind lyakaamba kuti: “Kuboneka kuti zintu nzyobakali kuyeeya alimwi azyakali kucitika zyakali kusinizya muzeezo waba Giriki wakuti nyika njeyakali akati kabubumbo.”

Nikwali kuti muzeezo ooyu uulubide wakazwa kuli basayaansi kubagama, nokunga taakwe abubi pe. Pele tiiwakazwa kulimbabo pe.

Kaindi “Bunakristo” bwaku Europe, bwakazumina njiisyo zimwi zya Aristotle kuti nkasimpe, nkokuti zyakazuminwa kuti zyakaliluzi. Basyaazibwene mulwiiyo lwabukombi baci Katolika kwaambisya Thomas Aquinas (c. 1224-1274)—wakabikkilizya malembe a Aristotle mulwiiyo lwabo. Aboobo, njiisyo ya Aristotle yakuti nyika ili akati kabubumbo yakaba njiisyo yaci Katolika. Njiisyo eeyi alimwi yakatalika kubelesyegwa abasololi baci Protestanti, mbuli Calvin alimwi a Luther, balo bakaamba kuti ileendelana a Bbaibbele.—Amubone kabbokesi kakuti “ Bakalibala Kapati Bbaibbele.”

Mulembi uutegwa Charles Freeman wakaamba kuti: “Muzibeela zimwi zyanjiisyo zya Aristotle alimwi azyaci Katolika kwakanyina kwiindana.” Aboobo, kwaambwa kuti Aquinas “wakabbapatizya” Aristotle munjiisyo zyaci Katolika. Pele mubwini, kweelana ambwaakalemba Freeman, “Aquinas nguwakasandulwa anjiisyo zya Aristotle.” Alimwi munzila imwi inga twaamba kuti tanaakali buyo Aquinas alikke pele acikombelo coonse. Akaambo kaceeci, Galileo, syaazibwene mulwiiyo lwanamba amubweende bwanyenyeezi azintu zimwi zyamujulu waku Italy, walo iwakasola kupa bumboni bwakuti nyika njiizinguluka zuba kweelana anzyaakabona, wakaunka kuyoobuzyigwa-buzyigwa alimwi wakasinikizyigwa kuti aikake njiisyo eeyi njaakaamba. * Cikkomanisya ncakuti, Aristotle wakazumina kuti luzyibo lwasayaansi lulasumpuka mukuya kwaciindi alimwi lulakonzya kucinca alimwi. Eelo kaka nicakabota ikuti acalo cikombelo nocakajisi muzeezo nguwenya ooyu!