1-2. (a) Kweelana alugwalo lwa Tusimpi 16:31, ino tweelede kubabona buti bacembeede basyomeka? (b) Mibuzyo nzi njotutiingule mucibalo eeci?

BASIKUSWAYA paakki iili ku Arkansas, U.S.A., balakonzya kujana madaimondi aakkede-kkede buyo ansi. Nokuba boobo, madaimondi aayo inga taanasanzigwa kutegwa ayelele kubelesyegwa kupanga zintu zimwi ziyandisi. Akaambo kaceeci, banji tabakonzyi kubona kuti mabwe aaya mayandisi alimwi ambweni buya inga tiibaakkomanina.

² Mbubwenya mbuli madaimondi aayo, bacembeede basyomeka ndubono luyandisi. Jwi lya Leza likozyanisya mvwi zyabo kumusini. (Amubale Tusimpi 16:31; 20:29) Nokuba boobo, lubono oolu lulakonzya kutabikkilwa maano. Bakubusi ibamvwisya mpindu njobajisi bacembeede balakonzya kujana cintu cigwasya kapati kwiinda lubono lwini kulugama. Mucibalo eeci, tulaingula mibuzyo yotatwe: Nkaambo nzi Jehova ncabona bacembeede basyomeka kuti ndubono? Nkaambo nzi bacembeede aaba ncobayandika mumbunga ya Jehova? Ncinzi ncotukonzya kucita kutegwa twiiye kuzikozyanyo zyabo?

3. Kweelana a Intembauzyo 92:12-15, nkaambo nzi bacembeede basyomeka ncobayandika kapati kuli Jehova?

³ Bacembeede basyomeka balayandika kapati kuli Jehova Leza. Ubabona bwini mbobabede mukati, ulibuzyi bube bwabo bubotu alimwi ulabubikkila maano. Ulakkomana ciindi bacembeede nobapa bakubusi luzyibo ndobakajana mumyaka yabo minji njobabelekela Jehova cakusyomeka. (Job. 12:12; Tus. 1:1-4) Alimwi Jehova ulakukkomanina kuliyumya kwabo. (Malk. 3:16) Bali kujana mapenzi mubuumi bwabo; nokuba boobo, lusyomo lwabo muli Jehova kunyina nolwazungaana  pe. Bulangizi bwabo bwakumbele bwayuma kapati kwiinda mbobwakabede nobakaiya kasimpe ciindi cakusaanguna. Alimwi Jehova ulabayanda nkaambo bazumanana kwaambilizya zina lyakwe “nokuba kubucembele.”—Amubale Intembauzyo 92:12-15.

4. Ncinzi cikonzya kubakulwaizya bakwesu abacizyi bacembeede?

⁴ Ikuti naa muyaabucembaala, amusyome kuti Jehova ulaiyeeya milimo njomwakacita musyule. (Heb. 6:10) Cabusungu mwalikugwasyilizya mumulimo wakwe wakukambauka, alimwi eeci cilamukkomanisya Taateesu wakujulu. Mwaliyumya mumasunko, naaba yaayo aatyompya kapati, mwalikuzitobela zyeelelo zyamu Bbaibbele ziluleme, kulanganya mikuli mipati mumbunga ya Jehova alimwi akuyiisya bamwi. Mwacita zyoonse nzyomukonzya kutegwa kamweendela antoomwe ambunga ya Jehova iili mukweenda cakufwambaana. Mwalikubakulwaizya bamwi ibali mumulimo waciindi coonse. Jehova Leza ulamuyanda kapati akaambo kakusyomeka. Usyomezya kuti “takabalekelezyi pe bantu bakwe basyomeka”! (Int. 37:28) Alimwi umusyomezya kuti: “Kusikila mukatube mvwi, mebo ndilazumanana kumuyumuna.” (Is. 46:4) Aboobo mutanikuyeeyi kuti akaambo kakuti mwacembaala, tamuciyandiki mumbunga ya Jehova. Mubwini, mulayandika kapati!

5. Nkaambo nzi nkobeelede kuyeeya bacembeede?

⁵ Bacembeede balakonzya kubelesyegwa mumbunga ya Jehova munzila zinji. Nokuba kuti ambweni tabacijisi nguzu, balijisi luzyibo lunji ndobakajana kwamyaka minji. Jehova ulakonzya kuzumanana kubabelesya mumbazu ziindene-indene, kweelana ambotutiibone kuzikozyanyo zyakaindi alimwi azyamazuba aano.

6-7. Amwaambe zikozyanyo zyamu Bbaibbele izitondezya Jehova mbwaakabalumbula bacembeede ibakamubelekela cakusyomeka.

⁶ Mu Bbaibbele tulakonzya kujana zikozyanyo zibotu zyabantu basyomeka ibakamubelekela Jehova cakusyomeka mubucembele bwabo. Mucikozyanyo, Musa wakajisi myaka iili 80 ciindi naakatalika kubeleka kali musinsimi wa Jehova alimwi mwiiminizi wacisi ca Israyeli. Ciindi Daniele naakajisi myaka yakuma  90, Jehova wakacili kumubelesya kali musinsimi wakwe. Awalo mwaapostolo Johane kweelede kuti wakajisi myaka yakuma 90 ciindi naakasololelwa amuuya kulemba bbuku lya Ciyubunuzyo.

⁷ Bantu banji ibakali kusyomeka tiibakajisi mpuwo, alimwi cakali cuuba-uba kutababikkila maano. Nokuba boobo, Jehova wakababikkila maano alimwi wakabalumbula akaambo kakusyomeka kwabo. Mucikozyanyo, mwaalumi “mululami alimwi mukombi” Simeoni ooyo waambidwe buyo asyoonto mu Bbaibbele, pele Jehova wakali muzyi kabotu-kabotu alimwi wakamupa coolwe cakubona muvwanda Jesu akusinsima kujatikizya mwana ooyo abanyina. (Lk. 2:22, 25-35) Alimwi amuyeeye buyo imusinsimi mukaintu alimwi mukamufwu Ana. Wakajisi myaka iili 84, pele “kunyina naakali kulovwa kutempele.” “Kujanika kumiswaangano” nkwaakali kucita cakusyomeka, kwakalumbulwa nkaambo aciindi cimwi awalo wakamubona Jesu kali muvwanda. Boonse bobilo, Simeoni alimwi a Ana bakali kuyandika kapati kuli Jehova.—Lk. 2:36-38.

8-9. Ndubazu nzi ndobajisi bamukabafwu mumbunga ya Jehova?

⁸ Mazuba aano, bacembeede banji ibasyomeka nzikozyanyo zibotu kapati kubakubusi. Amubone cikozyanyo ca Mucizyi Lois Didur. Wakajisi buyo myaka iili 21 ciindi naakatalika kubeleka kali mupainiya waalubazu ku Canada. Mpoonya walo abalumi bakwe ba John, bakabeleka mumulimo wamubbazu kwamyaka minji. Mpoonya bakabeleka ku Beteli yaku Canada kwamyaka iinda ku 20. Ciindi mucizyi Lois naakali amyaka iili 58, walo aba John bakalombwa kuyoobelekela ku Ukraine. Ino bakacita buti? Sena bakayeeya kuti bacembaala kuyoobelekela kucisi cimbi? Bakazumina kuunka ooko alimwi ba John bakasalwa kubeleka mu Kkomiti Yamutabi kucisi eeco. Nokwakainda myaka iili ciloba kuzwa nobakafwa ba John, mucizyi Lois wakasala kuzumanana mumulimo wakwe. Lino ujisi myaka iili 81. Pele ucimubelekela Jehova cakusyomeka antoomwe amukwasyi wa Beteli yaku Ukraine alimwi boonse balamuyanda kapati.

⁹ Bamukabafwu mbuli mucizyi Lois ambweni inga kabatabikkilwi maano mbuli mbocakabede ciindi bamaalumi babo nobakacili kupona, pele baciyandika kapati. Jehova ulababikkila maano kapati bacizyi aabo ibakagwasyilizya bamaalumi babo kwamyaka minji alimwi lino ibazumanana kumubelekela cakusyomeka. (1Tim. 5:3) Kuyungizyigwa waawo, balabakulwaizya bakubusi.

10. Ncikozyanyo nzi cibotu ncatondezya mukwesu Tony?

¹⁰ Bacembeede banji basyomeka ibakkala mumaanda mobalanganya bacembeede, abalo balayandika kapati. Mucikozyanyo, mukwesu wazina lya Tony lino ukkala muŋanda iili boobu. Wakabbapatizyilwa ku Pennsylvania, U.S.A., mu August 1942 kajisi myaka iili 20. Tiilyakalampa, wakaambilwa kutola lubazu mumulimo wabusikalumamba. Akaambo  kakuti wakakaka kucita boobo, wakaangwa kwamyaka yobilo acisela. Walo abakaintu bakwe ba Hilda, bakakomezya bana babo bobilo mukasimpe. Kwamyaka minji, mukwesu Tony wakabeleka mumbungano zyotatwe kali mulangizi weendelezya (lino wiitwa kuti sicuuno wa Kabunga Kabaalu) alimwi kali mulangizi wamuswaangano wabbazu. Wakali kusololela miswaangano alimwi aziiyo zya Bbaibbele muntolongo. Lino ujisi myaka iili 98, pele talibambilide kuleka kubelekela Jehova. Wazumanana kubelekela Jehova kusikila mpagolela alimwi akubeleka antoomwe ambungano mwazulilwa!

11. Mbuti mbotukonzya kutondezya kuti tulababikkila maano aabo ibakkala mumaanda mobalanganya bacembeede?

¹¹ Mbuti mbotukonzya kubalemeka bacembeede ibakkala mumaanda mobalanganya bacembeede? Kuti kacikonzyeka, baalu balakonzya kubagwasyilizya kujanika kumiswaangano naa kuswiilila miswaangano alimwi akukambauka. Tulakonzya kutondezya kuti tulababikkila maano kwiinda mukubaswaya naa kubatamba kumubandi waavidiyo. Tuyanda kubabikkila maano kapati bacembeede ibakkala mumaanda mobalanganizyigwa buya kuti kaali kulamfwu akumbungano yabo. Nkaambo kuti naa tiitwabikkila maano, tulakonzya kubaluba. Bamwi ambweni inga cabakatazya naa ambweni inga kabayeeya kuti taciluzi kwaamba makani aajatikizya mbabo. Pele tuyookulwaizyigwa kapati kuti twajana ciindi cakubandika ambabo, kubabuzya mibuzyo alimwi akuswiilila ciindi nobatwaambila kujatikizya lukkomano ndobajana mumbunga ya Jehova.

12. Ncinzi ncotukonzya kujana mumbungano yesu?

¹² Tulakonzya kugambwa kujana kuti mumbungano yesu kuli zikozyanyo zibotu zyabacembeede ibasyomeka. Kwamyaka minji, mucizyi Harriette wakamubelekela Jehova cakusyomeka mumbungano yakucisi nkwazwa ku New Jersey, U.S.A. Mpoonya wakaunka kuyookkala amwanaakwe musimbi. Bakwesu abacizyi kumbungano mpya bakajana ciindi cakuzyibana anguwe, mpoonya bakabona kuti mucizyi ooyu ndubono luyandika kapati. Wakabakulwaizya kwiinda mukubaambila zyakuluula zyamumulimo wamumuunda ciindi naakaiya kasimpe cakuma 1920. Kuciindi eeco, lyoonse wakali kweenda akabbulasho kakulicumbya menyo ciindi naakali kuunka mubukambausi nkaambo ambweni wakali kukonzya kwaangwa. Mane buya, mu 1933 wakaangwa ziindi zyobilo akukkala muntolongo nsondo yomwe. Aciindi eeco, mulumaakwe tanaakali Kamboni pele wakali kumugwasyilizya. Ciindi naakali muntolongo, wakali kubalanganya bana babo botatwe. Cakutadooneka, bacembeede basyomeka mbuli ba Harriette bayandika kulemekwa!

13. Ncinzi ncotwaiya kujatikizya mbobayandika kapati bacembeede mumbunga ya Jehova?

¹³ Bakwesu abacizyi bacembeede balayandika kapati kuli Jehova alimwi akumbunga yakwe. Balibonena Jehova mbwaailongezya mbunga yakwe alimwi ambwaabalongezya balo munzila ziindene-indene. Baiya ziiyo ziyandika kapati kuzwa kukulubizya nkobakacita. Amubabone kuba “kasensa kabusongo,” alimwi akwiiya kulimbabo. (Tus. 18:4) Ikuti mwajana ciindi cakubazyiba, lusyomo lwanu inga lwayuma alimwi muyakwiiya zintu zinji!

14. Ino lugwalo lwa Deuteronomo 32:7 lubakulwaizya kucita nzi bakubusi?

¹⁴ Amujane ciindi cakubandika abacembeede. (Amubale Deuteronomo 32:7.) Mubwini, ambweni tabaciboni kabotu, tabaceendi  cakufwambana, baambaula aasyoonto-syoonto, pele baciyanda kubeleka cabusungu, alimwi bakapanga “zina libotu” a Jehova. (Muk. 7:1) Amuyeeye kaambo Jehova ncabayandila. Amuzumanane kubalemeka. Amube mbuli Elisha. Wakakakatila kuli Elija mubuzuba bwamamanino nobakali antoomwe. Ziindi zyotatwe Elisha wakaamba kuti: “Tandikookuleka pe.”—2Bam. 2:2, 4, 6.

15. Mibuzyo nzi njotukonzya kubabuzya bacembeede?

¹⁵ Amutondezye kuti mulababikkila maano kapati bacembeede kwiinda mukubabuzya mibuzyo iikonzya kubapa kwaanguluka. (Tus. 1:5; 20:5; 1Tim. 5:1, 2) Inga mwababuzya mibuzyo mbuli yakuti: “Nomwakacili bana, ncinzi cakamupa kusyoma kuti mwakakajana kasimpe?” “Mbuti zintu izyakamucitikila mbozyamugwasya kuyumya cilongwe canu a Jehova?” “Ncinzi camugwasya kuzumanana kukkomana mumulimo wa Jehova?” (1Tim. 6:6-8) Mpoonya amuswiilile ciindi nobapandulula.

16. Mbuti kubandisyanya mbokukonzya kumugwasya uucembeede alimwi amukubusi?

¹⁶ Ciindi uucembeede alimwi amukubusi nobabandika, boonse bobilo balakulwaizyigwa. (Rom. 1:12) Nywebo nobakubusi, muyooyumya lusyomo lwanu kubona Jehova mbwabalanganya babelesi bakwe basyomeka, mpoonya bacembeede bayoolimvwa kulemekwa. Uyookkomana kumwaambila mbwaalongezyegwa a Jehova.

17. Nkaambo nzi ncotukonzya kwaamba kuti bacembeede basyomeka balaindila kubota mboiyaabuya myaka?

¹⁷ Kubota kwaciwa kulamana muntu mbwayaabucembaala, pele aabo basyomeka kuli Jehova inga bayabwiindila buya kubota kulinguwe mboiyaabuya myaka. (1Tes. 1:2, 3) Nkaambo nzi kaambo aaka ncokali kamasimpe? Nkaambo mboiyaabuya myaka, bakazumizya muuya wa Leza kubayiisya alimwi akubagwasya kuba abube bubotu. Kuti twabazyiba kabotu bakwesu abacizyi bacembeede, twabalemeka alimwi akwiiya kuzwa kulimbabo, tuyoobabona kuti ndubono luyandisi!

18. Ncinzi ncotuyoolanga-langa mucibalo citobela?

¹⁸ Mbungano ilayuma kapati ciindi bakubusi nobabalemeka bacembeede alimwi abalo bacembeede nobabalemeka bakubusi. Mucibalo citobela, tuyoobandika kujatikizya bacembeede mbobakonzya kutondezya kuti balababikkila maano bakubusi mumbungano.