CIBALO CAKWIIYA 44
Amuzumanane Kuyumya Bulangizi Bwanu bwa Bunakristo
“Kolangila Jehova.”—INT. 27:14.
LWIIMBO 144 Amubikkile Maano Kubulumbu!
IZILI MUCIBALO *
1. Mbulangizi nzi mbwaakatupa Jehova?
JEHOVA wakatupa bulangizi bubotu kapati bwabuumi butamani. Bamwi bajisi bulangizi bwakuyoopona kukabe kutamani kujulu kabali zilenge zyamuuya zitafwi. (1Kor. 15:50, 53) Pele bunji bwesu, tujisi bulangizi bwakuyoopona anyika mane kukabe kutamani katujisi buumi bubotu alimwi alukkomano. (Ciy. 21:3, 4) Kufwumbwa naa tulangila buumi butamani kujulu naa anyika, bulangizi bwesu bulayandika kapati kulindiswe.
2. Ino bulangizi bwesu buyeeme anzi, alimwi nkaambo nzi ncotwaambila boobo?
2 Ibbala lyakuti “bulangizi,” kweelana ambolibelesyedwe mu Bbaibbele, lilakonzya kwaambwa kuti “mbulangizi bwakuti zintu zibotu ziyoocitika.” Bulangizi bwesu bulisinizyide nkaambo buzwa kuli Jehova. (Rom. 15:13) Tulizyi ncaakasyomezya, alimwi tulizyi kuti lyoonse ulazuzikizya zisyomezyo zyakwe. (My. 23:19) Tulisinizyide kuti Jehova ulijisi makanze mabotu alimwi anguzu zyakuzuzikizya zintu zyoonse nzyaamba kuti uyoozicita. Aboobo bulangizi bwesu tabuyeeme azintu zyakuyeeyela buyo naa azintu nzyotuyanda kuti zicitike; pele buyeeme abumboni businizyide alimwi bwamasimpe.
3. Ncinzi ncotutiibandike mucibalo eeci? (Intembauzyo 27:14)
3 Taateesu wakujulu ulatuyanda, alimwi uyanda kuti katumusyoma. (Amubale Intembauzyo 27:14.) Kuti bulangizi bwesu muli Jehova kabuli buyumu, tuyoocikonzya kuliyumya kumasunko alimwi tunooli basicamba akuba alukkomano, tacikwe makani azikonzya kutucitikila. Atulange-lange bulangizi bwesu mbobutukwabilila. Pele tulasaanguna kulanga-langa bulangizi mbobuli mbuli ngobyo alimwi acimpoompo. Mpoonya tulabandika mbotukonzya kubuyumya bulangizi bwesu.
BULANGIZI BWESU BULI MBULI NGOBYO
4. Mbuti bulangizi mbobuli mbuli ngobyo? (Bahebrayo 6:19)
4 Mulugwalo ndwaakalembela bana Hebrayo, mwaapostolo Paulo wakakozyanisya bulangizi bwesu kungobyo. (Amubale Bahebrayo 6:19.) Kanji-kanji wakali kweenda mulwizi, aboobo Paulo wakalizyi kuti ngobyo zilabelesyegwa kwiimika bwato kutegwa butatontwi amaanzi. Aciindi cimwi, wakali mubwato ciindi guwo pati nolyakabbubbula. Ciindi guwo eelyo nolyakali kubbubbula, wakabona sikweenzya bwato kafwusa ngobyo mumaanzi kutegwa akwabilile bwato kuti butatontwi aguwo akuyoolipwaya kumabwe aakonzya kuleta ntenda. (Mil. 27:29, 39-41) Mbubwenya ngobyo mboikwabilila bwato, abwalo bulangizi bwesu bulatuyumya kutegwa tutaleyi kuli Jehova ciindi notwalijana mumasunko aali mbuli guwo pati. Bulangizi bwesu buyumu bulatugwasya kubatama ciindi notwajana mapenzi nkaambo tulijisi lusyomo lwakuti zintu ziyoobota ino-ino. Mutalubi kuti Jesu wakacenjezya kuti tuyoopenzyegwa. (Joh. 15:20) Aboobo kuzinzibala kuyeeya zintu nzyaakatusyomezya Jehova kulatugwasya kuzumanana kumubelekela.
5. Mbuti bulangizi mbobwakamugwasya Jesu ciindi naakali afwaafwi kufwa?
5 Amubone bulangizi mbobwakamugwasya Jesu kuzumanana kusyomeka nokuba kuti wakalizyi kuti uyoofwa lufwu lucisa. Mubuzuba bwa Pentekoste 33 C.E., mwaapostolo Petro wakazubulula businsimi kuzwa mubbuku lya Intembauzyo ibwaamba Jesu mbwaakabateme alimwi akuba alusyomo lwakuti: “Ndinookkede kandilangila; nkaambo tokandisiyi mu Cuumbwe nokuba kulekela uusyomeka wako kuti abole. . . . Uyoondipa kukondwa kapati kumbele lyako.” (Mil. 2:25-28; Int. 16:8-11) Nokuba kuti Jesu wakalizyi kuti ulafwa, wakalijisi bulangizi buyumu bwakuti Leza uyoomubusya alimwi akuti wakali kuyooba alukkomano lwakuba antoomwe alimwi a Bausyi kujulu.—Heb. 12:2, 3.
6. Ncinzi mukwesu umwi ncaakaamba kujatikizya bulangizi?
6 Bulangizi bwesu bwa Bunakristo bwabagwasya bakwesu abacizyi kuliyumya. Amubone cikozyanyo caba Leonard Chinn, mukwesu uusyomeka iwakali kukkala ku England. Lya Nkondo Yanyika Yoonse Yakusaanguna, wakaangwa akaambo kakukaka kunjila mulimo wabusikalumamba. Kwamyezi yobilo, wakalizandwidwe. Kuzwa waawo, wakali kusinikizyigwa kubeleka milimo miyumu kapati. Kumbele wakalemba kuti “Izyakandicitikila zyakandigwasya kubona mbotuyandika bulangizi kutegwa tucikonzye kuliyumya. Tulijisi cikozyanyo ca Jesu, baapostolo, basinsimi alimwi azisyomezyo zyamu Bbaibbele zibotu kapati. Zyoonse eezyi zilatupa kuba abulangizi bwakumbele alimwi akutugwasya kuliyumya.” Bulangizi bwakali mbuli ngobyo kuli ba Leonard, alimwi bulakonzya kuba mbuli ngobyo akulindiswe.
7. Mbuti masunko mbwaayumya bulangizi bwesu? (Baroma 5:3-5; Jakobo 1:12)
7 Bulangizi bwesu bulayuma ciindi notwamana kuliyumya mumasunko akubona lugwasyo lwa Jehova alimwi akuzyiba kuti ulatukkomanina. (Amubale Baroma 5:3-5; Jakobo 1:12.) Aboobo tulaba abulangizi buyumu kwiinda leelyo notwakaatambula makani mabotu. Saatani uyanda kuti tutyompwe akaambo kamasunko eesu, pele kwiinda mukugwasyigwa a Jehova, tulakonzya kwaazunda.
BULANGIZI BWESU BULI MBULI CIMPOOMPO
8. Mbuti bulangizi bwesu mbobuli mbuli cimpoompo? (1 Batesalonika 5:8)
8 Bbaibbele alimwi likozyanisya bulangizi bwesu kucimpoompo. (Amubale 1 Batesalonika 5:8.) Sikalumamba ulasama cimpoompo kukwabilila mutwe ciindi nalwana abasinkondonyina. Munkondo yesu yakumuuya, tweelede kukwabilila mizeezo yesu kukulwanwa a Saatani. Ulabelesya zintu zinji ziindene-indene kutegwa anyonganye mizeezo yesu. Aboobo mbubwenya cimpoompo mbocikwabilila mutwe wasikalumamba, abwalo bulangizi bwesu bulaikwabilila mizeezo yesu kutegwa tuzumanane kusyomeka kuli Jehova.
9. Ncinzi cicitika ciindi bantu nobatajisi bulangizi?
9 Bulangizi bwesu bwabuumi butamani bulatugwasya kucita zintu cabusongo alimwi abupampu. Kulubazu lumwi, ikuti bulangizi bwesu bwazungaana alimwi akuti twatalika kubikkila maano kapati kuzintu nzyotuyanda swebo, tulakonzya kubuluba bulangizi bwesu bwabuumi butamani. Atulange-lange icakacitika ku Banakristo ibakali kukkala mu Korinto yakaindi. Bakaleka kucisyoma cisyomezyo ca Leza ciyandika kapati, bulangizi bwabubuke. (1Kor. 15:12) Paulo wakaamba kuti aabo batasyomi mububuke bacita buyo zintu nzyobayanda balo. (1Kor. 15:32) Mazuba aano, banji banyina bulangizi muzisyomezyo zya Leza bapona buyo kweelana ambobayanda, balacita kufwumbwa cibakkomanisya. Pele swebo, tulazisyoma zisyomezyo zya Leza zyakumbele. Bulangizi bwesu buli mbuli cimpoompo cacikozyanyo icikwabilila mizeezo yesu alimwi akutugwasya kutabikkila buyo maano kuzintu nzyotuyandika swebo tobeni, zyalo izikonzya kunyonganya cilongwe cesu a Jehova.—1Kor. 15:33, 34.
10. Mbuti bulangizi mbobukonzya kutukwabilila kukuyeeya kutaluzi?
10 Bulangizi bwesu alimwi bulakonzya kutukwabilila kukuyeeya kuti tatukonzyi kumukkomanisya Jehova. Mucikozyanyo, bamwi balakonzya kwaamba kuti: ‘Kunyina nondikonzya kuba akati kabaabo ibayoopona kukabe kutamani. Tandeeleli. Inga tiindacikonzya kupona kweelana azyeelelo zya Leza.’ Amuyeeye sikuumbulizya Jobu wakubeja Elifazi mbwaakakubelesya kuyeeya kuli boobu kuli Jobu. Elifazi wakaamba kuti: “Ino muntu ngwani kuti asalale?” Mpoonya wakaamba boobu kujatikizya Leza: “Bona! Bangelo bakwe kunyina nabasyoma pe, alimwi naaba majulu taasalede pe mumeso aakwe.” (Job. 15:14, 15) Eelo kaka oobu mbubeji! Kamuyeeya kuti Saatani nguupa kuyeeya kuli boobu. Ulizyi kuti ikuti twazumanana kuyeeya munzila iili boobu, bulangizi bwesu bulatalika kuceya aasyoonto-syoonto. Aboobo amubukake bubeji oobu akubikkila maano kuzisyomezyo zya Jehova. Mutadooneki kuti Jehova uyanda kuti mukapone kukabe kutamani alimwi akuti uyoomugwasya kwiizuzikizya mbaakani eeyo.—1Tim. 2:3, 4.
AMUZUMANANE KUYUMYA BULANGIZI BWANU
11. Nkaambo nzi ncotweelede kukkazika moyo ciindi notulindila kuti bulangizi bwesu buzuzikizyigwe?
11 Talili lyoonse nocili cuubauba kuzumanana kuyumya bulangizi bwesu. Cilakonzya kutuyumina kukkazika moyo kulindila Leza kuti azuzikizye zisyomezyo zyakwe. Pele Jehova lyoonse waliko, alimwi mbwacibona ciindi kuliindene ambotucibona swebo. (2Pet. 3:8, 9) Uyoozizuzikizya nzyaakasyomezya munzila iinda kubota, pele ambweni uyoobweza ntaamu munzila njotutayeeyeli. Ncinzi cikonzya kutugwasya kuzumanana kuyumya bulangizi bwesu ciindi notulindila cakukkazika moyo kuti Leza azuzikizye zisyomezyo zyakwe?—Jak. 5:7, 8.
12. Kweelana a Bahebrayo 11:1, 6, mbuti bulangizi mbobuswaangene alusyomo?
12 Tuyoozumanana kuyumya bulangizi bwesu ikuti twazumanana kuba acilongwe ciyumu a Jehova, nkaambo nguuyoopa kuti bulangizi bwesu buzuzikizyigwe. Kutegwa tube abulangizi, tweelede kuba alusyomo lwakuti Jehova nkwali alimwi akuti ‘ngosikupa bulumbu kuli baabo bamuyandaula cabusungu.’ (Amubale Bahebrayo 11:1, 6.) Ikuti katusyoma ncobeni kuti Jehova nkwali, tuyooba alusyomo luyumu lwakuti uyoozicita zyoonse nzyaakasyomezya. Lino atulange-lange nzila zigwasya kujatikizya mbotukonzya kuyumya cilongwe cesu a Jehova alimwi akuzumanana kuyumya bulangizi bwesu.
Kupaila alimwi akuzinzibala kuyeeya kuyooyumya bulangizi bwesu (Amubone muncali 13-15) *
13. Mbuti mbotukonzya kuba acilongwe a Leza?
13 Amupaile kuli Jehova, alimwi akubala Jwi lyakwe lyoonse. Nokuba kuti tatukonzyi kumubona Jehova, tulakonzya kuba acilongwe anguwe. Tulakonzya kubandika anguwe mumupailo katujisi lusyomo lwakuti ulatumvwa. (Jer. 29:11, 12) Tulakonzya kumuswiilila Leza kwiinda mukubala Jwi lyakwe alimwi akuzinzibala kuyeeya nzyotubala. Ciindi notubala kujatikizya Jehova mbwaakabalanganya aabo ibakali kusyomeka kulinguwe kaindi, bulangizi bwesu bulayuma kapati. Zyoonse zilembedwe mu Jwi lya Leza “zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.”—Rom. 15:4.
14. Nkaambo nzi ncotweelede kuzinzibala kuyeeya nzyaakabacitila bamwi Jehova?
14 Amuzinzibale kuyeeya Jehova mbwazuzikizya zisyomezyo zyakwe. Atubone Leza ncaakacita kuli Abrahamu a Sara. Bakalisikide aciimo cakuleka kuzyala. Nokuba boobo, Leza wakabasyomezya kuti bayoozyala mwana. (Matl. 18:10) Ino Abrahamu wakacita buti? Bbaibbele lyaamba kuti: “Wakasyoma kuti ulakonzya kuba usyi wamisyobo minji.” (Rom. 4:18) Nokuba kuti kuzilanga mubuntu zintu cakali mbuli kuti kucinyina bulangizi, Abrahamu wakalijisi lusyomo lwakuti Jehova uyoocizuzikizya cisyomezyo cakwe. Mwaalumi ooyu iwakali kusyomeka kunyina naakatyompwa. (Rom. 4:19-21) Zibalo zili boobu zituyiisya kuti lyoonse tulakonzya kuba alusyomo lwakuti Jehova uyoozizuzikizya zisyomezyo zyakwe, nokuba kuti cilibonya mbuli kuti tacikonzyeki.
15. Nkaambo nzi ncotweelede kuyeeya zintu nzyaakatucitila kale Leza?
15 Amuyeeye zintu nzyaakamucitila Jehova. Amuyeeye buyo mbomwagwasyigwa kale nywebo kumugama akaambo kakuzuzikizyigwa kwazisyomezyo izili mu Jwi lya Leza. Mucikozyanyo, Jesu wakasyomezya kuti Bausyi bayoomupa zintu nzyomuyandika mubuumi. (Mt. 6:32, 33) Alimwi Jesu wakamusyomezya kuti Jehova uyoomupa muuya uusalala ciindi nomumulomba. (Lk. 11:13) Jehova wazizuzikizya zisyomezyo zyakwe. Ambweni mulakonzya kuyeeya zisyomezyo zimbi nzyaazuzikizya kujatikizya ndinywe. Mucikozyanyo, wakamusyomezya kuti unoomulekelela, kumuumbulizya, alimwi akumusanina kumuuya. (Mt. 6:14; 24:45; 2Kor. 1:3) Ciindi nomuzinzibala kuyeeya nzyaakamucitila kale Leza, muyooyumya bulangizi bwanu muzintu zyoonse nzyayoomucitila kumbele.
AMUKONDWE AKAAMBO KABULANGIZI
16. Nkaambo nzi bulangizi ncobuli cipego citaliboteli kapati?
16 Bulangizi bwesu bwabuumi butamani ncipego citaliboteli kapati kuzwa kuli Leza. Tulangila buumi bubotu kumbele, bwalo mbotusinizyide kuti buyoobako ncobeni. Buli mbuli ngobyo, iitugwasya kutegwa tucikonzye kuliyumya mumasunko, ciindi notupenzyegwa alimwi nociba ciindi notuyanda kujaigwa. Buli mbuli cimpoompo, cikwabilila mizeezo yesu kutegwa tukake zintu zibyaabi alimwi akukakatila kucintu ciluzi. Bulangizi bwesu ibuyeeme a Bbaibbele buyumya cilongwe cesu a Leza alimwi butondezya luyando ndwajisi kulindiswe. Tulagwasyigwa kapati ciindi notuzumanana kuyumya bulangizi bwesu.
17. Nkaambo nzi bulangizi bwesu ncobutupa kukondwa?
17 Mulugwalo ndwaakalembela bana Roma, mwaapostolo Paulo wakabakulwaizya kuti: “Amukondwe akaambo kabulangizi.” (Rom. 12:12) Paulo wakali kukonzya kukondwa nkaambo wakalisinizyide kuti ikuti wazumanana kusyomeka, wakali kuyooba abuumi butamani kujulu. Andiswe tulakonzya kukondwa akaambo kabulangizi bwesu nkaambo tulisinizyide kuti Jehova uyoozizuzikizya zisyomezyo zyakwe. Sintembauzyo wakalemba kuti: “Ulikkomene ooyo . . . uulangila Jehova Leza wakwe, . . . Ooyo uusyomeka lyoonse.”—Int. 146:5, 6.
LWIIMBO 139 Amweezyeezye Kuti Muli Munyika Mpya
^ Jehova wakatupa bulangizi bwakumbele bubotu kapati. Bulangizi oobo bulatukulwaizya alimwi akutugwasya kutabikkila kapati maano kumapenzi ngotujisi lino. Bulatupa nguzu kutegwa tuzumanane kusyomeka kuli Jehova nokuba kuti twajana mapenzi aakatazya kapati. Alimwi bulakonzya kutukwabilila kumizeezo iitaluzi iikonzya kutunyonganya. Mbubonya mbotutiiye mucibalo eeci, ootu toonse ntwaambo tubotu itweelede kutupa kuzumanana kuyumya bulangizi bwesu bwa Bunakristo.
^ BUPANDULUZI BWACIFWANIKISO: Mbubwenya cimpoompo mbocikwabilila mutwe wasikalumamba alimwi angobyo mboipa kuti bwato bwiime, abwalo bulangizi bwesu bulaikwabilila mizeezo yesu alimwi akutuyumya ciindi notusunkwa. Mucizyi ulapaila kuli Jehova cakusinizya. Mukwesu uzinzibala kuyeeya kujatikizya Leza mbwaakazuzikizya zisyomezyo zyakwe kuli Abrahamu. Mukwesu umwi ulayeeya kujatikizya mbwaalongezyegwa.
