1-2. Ncinzi ncotukonzya kulibuzya kujatikizya mipailo yesu?

 SENA kuli nomwakalibuzyide kale naa Jehova ulayiingula mipailo yanu? Ikuti kacili boobo, tamuli nyolikke pe. Bunji bwabakwesu abacizyi bakaamba kuti abalo bakalibuzya kale oobo, kwaambisya ciindi nobakali mubukkale bukatazya kapati. Ikuti katuli mumapenzi, andiswe cilakozya kutukatazya kubona Jehova mbwayiingula mipailo yesu.

² Lino atulange-lange kaambo ncotukonzya kuba masimpe kuti Jehova ulayiingula mipailo yabakombi bakwe. (1Joh. 5:15) Mpoonya alimwi tulabandika mibuzyo eeyi yakuti: Nkaambo nzi zimwi ziindi ncocikonzya kulibonya mbuli kuti Jehova tayiinguli mipailo yesu? Muunzila nzi Jehova mwayiingula mipailo yesu mazuba aano?

3. Nkaambo nzi Jehova ncayanda kuti katupaila kulinguwe?

³ Magwalo atwaambila kuti Jehova ulatuyanda kapati alimwi akuti tuli bantu bayandisi kulinguwe. (Hag. 2:7; 1Joh. 4:10) Nkakaambo kaako ututamba kuti katulomba lugwasyo lwakwe kwiinda mukupaila. (1Pet. 5:6, 7) Uyanda kuti tuzumanane kuba acilongwe anguwe akuliyumya kumapenzi ngotujisi.

4. Ino tuzyi buti kuti Jehova ulayiingula mipailo yabakombi bakwe? (Amubone acifwanikiso.)

⁴ Mu Bbaibbele, kanji-kanji tulabala kuti Jehova wakali kuyiingula mipailo yabakombi bakwe. Sena kuli cikozyanyo ncomuyeeya? Cikozyanyo cimwi nca Mwami Davida. Mubuumi bwakwe boonse, wakajisi basinkondonyina banji ibakali kuyoosya alimwi kanji-kanji wakali kupaila kuli Jehova kulomba kuti amugwasye. Aciindi cimwi, wakakombelezya Jehova kuti: “O Jehova, komvwa mupailo wangu; koswiilila nendikukombelezya  kuti undigwasye. Kondivwiila mukusyomeka kwako amubululami bwako.” (Int. 143:1) Jehova wakawiingula mupailo wa Davida wakulomba kufwutulwa. (1Sam. 19:10, 18-20; 2Sam. 5:17-25) Aboobo Davida wakali kukonzya kwaamba cakusinizya kuti: “Jehova ulaafwaafwi abaabo boonse bamwiita.” Andiswe tulakonzya kusyoma oobo.—Int. 145:18.

5. Sena lyoonse Jehova wakali kuyiingula mipailo yabakombi bakwe bakaindi, kweelana ambobakali kuyeeyela? Amupe cikozyanyo. (Amubone acifwanikiso.)

⁵ Zimwi ziindi, Jehova ulakonzya kwiingula mipailo yesu munzila njotutayeeyeli. Eeci ncecakacitika kumwaapostolo Paulo. Wakalomba Leza kuti agwisye “mumvwa mumubili” wakwe. Kwaziindi zyotatwe, Paulo wakapaila kujatikizya penzi eeli ilyakali kumukatazya kapati. Sena Jehova wakayiingula mipailo eeyi? Inzya, pele kutali munzila njaakali kuyeeyela. Muciindi cakuligwisya penzi, Jehova wakamupa buyo nguzu nzyaakali kuyandika kutegwa azumanane kumubelekela cakusyomeka.—2Kor. 12:7-10.

6. Nkaambo nzi zimwi ziindi ncocikonzya kulibonya mbuli kuti Jehova tayiinguli mipailo yesu?

⁶ Zimwi ziindi, andiswe tulakonzya kwiingulwa munzila njotwatali kuyeeyela. Pele tuli masimpe kuti Jehova ulizyi nzila yiinda kubota yakutugwasya. Mane buya zimwi ziindi ulakonzya “kucita zintu zinji kapati kwiinda aali zyeezyo nzyotumulomba naa nzyotuyeeyela.” (Ef. 3:20) Akaambo kaceeci, ulakonzya kwiingula mipailo yesu aciindi ncotutayeeyeli naa munzila njotutayeeyeli.

7. Nkaambo nzi ncotunga twayandika kucinca zintu nzyotupailila? Amupe cikozyanyo.

⁷ Zimwi ziindi, inga twayandika kucinca zintu nzyotupailila twazyiba kuyanda kwa Jehova. Amubone cikozyanyo camukwesu Martin Poetzinger. Nokwakainda buyo ciindi cisyoonto kuzwa naakakwata, Mukwesu Poetzinger wakaangwa akubikkwa mucilabba cakupenzezya caba Nazi. Kumatalikilo, wakali kulomba Jehova kuti amugwisye mucilabba eeci, kutegwa akalanganye bakaintu bakwe akutalika kukambauka alimwi. Nokuba boobo, nokwakainda nsondo zyobilo, cakalibonya kuti Jehova tanaakali kulangilwa kupa kuti agwisyigwe muntolongo. Aboobo wakatalika kupaila kuti: “Akaka Jehova, ndigwasye kubona ncoyanda kuti ndicite.” Kumane wakatalika kuyeeya mapenzi ngobakali kuliyumya bakwesu bamwi mucilabba. Bunji bwabo abalo bakali kulibilika kujatikizya bamakaintu babo abana  babo. Aboobo mukwesu Poetzinger wakatalika kupaila kuti: “Jehova, ndalumba kapati akaambo kamulimo ngondijisi. Ndalomba kuti undigwasye kukulwaizya bakwesu aaba.” Mukwesu ooyu wakakkala myaka iili 9 muzilabba kaujisi kukulwaizya bakwesu.

8. Ncintu nzi ciyandika kapati ncotweelede kuyeeya ciindi notupaila?

⁸ Tweelede kuyeeya kuti Jehova ulijisi makanze, alimwi akuti uyakwaazuzikizya aciindi ncabikkide walo. Makanze aaya abikkilizya kugwisya mapenzi woonse aatupenzya mazuba aano, mapenzi mbuli ntenda zilicitikila, kuciswa alimwi alufwu. Jehova uyakwaazuzikizya makanze aakwe kwiinda mukubelesya Bwami bwakwe. (Dan. 2:44; Ciy. 21:3, 4) Pele kusikila mane cikasike ciindi eeco, Jehova wamuzumizya Saatani kweendelezya nyika. b (Joh. 12:31; Ciy. 12:9) Ikuti naa Jehova waagwisya mapenzi woonse ngobajisi bantu lino, cilakonzya kulibonya mbuli kuti Saatani wacikonzya kuyeendelezya kabotu nyika. Pele nokuba kuti tweelede kulindila Jehova kuti azizuzikizye zisyomezyo zyakwe, tacaambi kuti lino kunyina natugwasya. Aboobo amuleke tubandike zintu zimwi nzyacita kutegwa atugwasye.

9. Mbuti Jehova mbwakonzya kutugwasya ciindi notuyanda kusala cintu cimwi? Amupe cikozyanyo.

⁹ Ulatupa busongo. Jehova usyomezya kutupa busongo mbotuyandika kutegwa katusala kabotu. Tuyandika busongo buzwa kuli Jehova kwaambisya ciindi notuyanda kusala zintu zikonzya kubujatikizya buumi bwesu boonse, zintu mbuli kusala kukwata naa kukwatwa naa pe. (Jak. 1:5) Amumvwe cakuluula camucizyi uutakwetwe uutegwa Maria. c Wakalikkomene kubeleka kali painiya waciindi coonse katanatalika kweebana amukwesu umwi. Wakaamba kuti: “Cilongwe cesu mbocakali kuyaabuyuma, twakatalika kuyandana kapati. Ndakalizyi kuti ndakeelede kusala kujatikizya makani aaya. Aboobo ndakatalika kwaapailila. Ndakali kuyandika busolozi bwa Jehova pele alimwi ndakalizyi kuti Jehova tanaakali kuyoondisalila cakucita.” Mucizyi ooyu ulimvwa kuti Jehova wakawiingula mupailo wakwe wakulomba busongo. Munzila nzi? Ciindi naakali kuvwuntauzya muzyakumwaya zyesu, wakajana zibalo zimwi izyakamugwasya kujana bwiinguzi bwamibuzyo yoonse njaakajisi. Alimwi wakaluswiilila lulayo lwabusongo ndobakamupa banyina, imucizyi uusyomeka. Lulayo oolu lwakamugwasya mucizyi Maria kubikkila maano kujatikizya mbwaakali kulimvwa. Aboobo, wakacikonzya kusala cabusongo.

10. Kweelana alugwalo lwa Bafilipi 4:13, ncinzi ncayoocita Jehova kugwasya bakombi bakwe? Amupe cikozyanyo. (Amubone acifwanikiso.)

¹⁰ Ulatupa nguzu zyakuliyumya. Mbubwenya  mbwaakacita kumwaapostolo Paulo, Jehova uyootupa nguzu nzyotuyandika kutegwa tucikonzye kuliyumya kumapenzi eesu. (Amubale Bafilipi 4:13.) Mucikozyanyo, amubone Jehova mbwaakagwasya mukwesu Benjamin kuliyumya mubukkale bukatazya. Kacili mukubusi, walo amukwasyi wakwe bakali kukkala munkambi yabazangalisi mu Africa. Mukwesu Benjamin wakaamba kuti: “Lyoonse ndakali kupaila kuli Jehova, kulomba nguzu kutegwa ndicikonzye kucita zintu zimukkomanisya. Jehova wakayiingula mipailo yangu kwiinda mukundipa luumuno lwamumizeezo, busicamba bwakuzumanana kukambauka alimwi azyakumwaya izyakandigwasya kuzumanana kuyuma kumuuya.” Mukwesu ooyu wakazumanana kwaamba kuti: “Kubala zyakuluula zyabakwesu abacizyi alimwi akubona Jehova mbwaakabagwasya kuliyumya, cakapa kuti ndizumanane kusyomeka.”

11-12. Mbuti Jehova mbwakonzya kubelesya bakwesu abacizyi kwiingula mipailo yesu? (Amubone acifwanikiso.)

¹¹ Ubelesya mukwasyi wesu wakumuuya. Busiku katanaaba buumi bwakwe, Jesu wakapaila cakuzwa ansi aamoyo. Wakakombelezya Jehova kuti amukwabilile kutegwa bantu batamwaambi kuti ngusikusampaula Leza. Pele muciindi cakumukwabilila, Jehova wakamugwasya Jesu kwiinda mukutuma mungelo kuti amuyumye-yumye. (Lk. 22:42, 43) Alimwi Jehova ulakonzya kutugwasya kwiinda mukupa kuti mukwesu naa mucizyi uumwi atutumine fooni naa kutuswaya buya. Aboobo toonse tweelede kusolekesya kujana nzila yakwaamba “jwi libotu” kubakombima.—Tus. 12:25.

¹² Amumvwe cakacitikila mucizyi Miriam. Nokwakainda nsondo zisyoonto kuzwa nobakafwa balumi bakwe, wakasyaala alikke aŋanda katyompedwe kapati. Wakali kulila citaambiki alimwi wakali kuyanda kuba amuntu wakubandika limwi. Wakaamba kuti: “Ndakanyina nguzu zyakutumina muntu uuli woonse, aboobo ndakapaila kuli Jehova. Ciindi nondakacili kupaila kumwi kandilila, fooni yangu yakalila. Mulongwe wesu umwi mwaalu, nguwakali kutuma.” Ba Miriam bakaumbulizyigwa kapati amwaalu ooyu antoomwe amukaintu wakwe. Bakali masimpe kuti Jehova nguwakakulwaizya mukwesu ooyu kutuma fooni.

13. Amupe cikozyanyo icitondezya Jehova mbwakonzya kubelesya bantu ibatali bakombi bakwe kwiingula mipailo yesu.

 ¹³ Ulakonzya kubelesya bantu ibatali bakombi bakwe. (Tus. 21:1) Zimwi ziindi, Jehova ulayiingula mipailo yabantu bakwe kwiinda mukukulwaizya baabo ibatali bakombi bakwe kubagwasya. Mucikozyanyo, wakakulwaizya Mwami Aritasasita kuzumizya Nehemiya kupiluka ku Jerusalemu kutegwa akagwasyilizye kuyakulula munzi. (Neh. 2:3-6) Mbubwenya buyo amazuba aano, Jehova ulakonzya kukulwaizya baabo batali bakombi bakwe kutugwasya ciindi notuyandika lugwasyo.

14. Ino cakuluula caba Soo Hing camukulwaizya buti? (Amubone acifwanikiso.)

¹⁴ Mucizyi Soo Hing wakalimvwa kuti Jehova wakamugwasya kwiinda mukubelesya dokota wakwe. Mwanaakwe musankwa uciswa malwazi aakunyongana mizeezo aali mbwaabede. Aboobo ciindi mwana ooyu naakaba muntenda imwi mbyaabi, mucizyi ooyu abalumi bakwe bakaleka kubeleka kutegwa bamulanganye. Akaambo kaceeci, bakatalika kuba apenzi lyakujana mali. Ba Soo Hing bakaamba kuti bakatyompwa citaambiki cakuti bakalimvwa mbuli kuti ndilegeni ilyadonswa kapati. Mpoonya bakapaila kuli Jehova kulomba lugwasyo. Kumane dokota wakayanda kubagwasya antoomwe amukwasyi wabo. Eeci cakapa kuti mfwulumende italike kubagwasya alimwi akujana busena bwakukkala mbobakali kukonzya kunoobbadelela. Ba Soo Hing bakaamba kuti: “Twakalibonena Jehova mbwaakatugwasya mubukkale oobu. Masimpe ‘Ngusikuswiilila mipailo.’”—Int. 65:2.

15. Ncinzi cakagwasya mucizyi umwi kubona kuti Jehova wakali kuyiingula mipailo yakwe?

¹⁵ Kanji-kanji mipailo yesu tayiingulwi munzila yaalubazu. Pele bwiinguzi mbotutambula inga mboobo mbotuyandika, kutegwa tuzumanane kusyomeka kuli Taateesu wakujulu. Aboobo amubikkile maano kubona Jehova mbwayiingula mipailo yanu. Mucizyi Yoko wakalimvwa mbuli kuti Jehova tanaakali kuyiingula mipailo yakwe. Mpoonya wakatalika kulemba mukabbuku zintu nzyaakali kulomba Jehova. Nokwakainda ciindi cili mbocibede, wakazilanga alimwi zintu eezyo nzyaakalembede akujana kuti Jehova wakayiingula mipailo, kubikkilizya ayeeyo njaakalubide buya. Aboobo ciindi aciindi, tuyandika kujana ciindi cakuyeeya akubona Jehova mbwayiingula mipailo yesu.—Int. 66:19, 20.

16. Mbuti mbotukonzya kutondezya lusyomo caboola kumipailo? (Bahebrayo 11:6)

 ¹⁶ Tulatondezya kuti tulaalusyomo ikutali buyo kwiinda mukupaila kuli Jehova, pele alimwi akuzumina bwiinguzi bwakwe kumipailo yesu kufwumbwa naa buli buti. (Amubale Bahebrayo 11:6.) Amumvwe cakacitikila ba Mike abakaintu babo ba Chrissy. Banabukwetene aaba bakajisi mbaakani yakuyoobelekela ku Beteli. Ba Mike bakaamba kuti: “Twakalembela kwaziindi zinji akupaila kuli Jehova cakwiinduluka-induluka kujatikizya mbaakani eeyi, pele kunyina notwakaitwa.” Ba Mike aba Chrissy bakazumanana kuba alusyomo lwakuti Jehova wakalizyi nzila yiinda kubota mbwakonzya kubabelesya mumulimo wakwe. Aboobo bakazumanana kucita zyoonse nzyobakali kukonzya, kubeleka kabali bapainiya baciindi coonse kubusena bwakabulide basikumwaya alimwi akugwasyilizya mumulimo wamayake. Lino bali mumulimo wakweendeenda. Ba Mike bakaamba kuti: “Jehova tanaali kwiingula mipailo yesu lyoonse kweelana ambotwakali kuyeeyela, pele wali kuyiingula alimwi munzila mbotu kapati kwiinda njotwakali kuyeeyela.”

17-18. Kweelana a Intembauzyo 86:6, 7, ncinzi ncotukonzya kuba masimpe?

¹⁷ Amubale Intembauzyo 86:6, 7. Sintembauzyo Davida wakalisinizyide kuti Jehova wakaimvwa mipailo yakwe alimwi akuyiingula. Andinywe mulakonzya kuba alusyomo luli boobo. Zikozyanyo izyabandikwa mucibalo eeci, zitusyomezya kuti Jehova ulakonzya kutupa busongo alimwi anguzu nzyotuyandika kutegwa tucikonzye kuliyumya. Zimwi ziindi ulakonzya kubelesya bakwesu abacizyi naa bantu ibatali bakombi bakwe kuti batugwasye.

¹⁸ Nokuba kuti talili lyoonse Jehova naingula mipailo yesu munzila njotuyeeyela, pele tulizyi kuti ulayiingula. Ulakonzya kutupa buyo ceeco ncotuyandika alimwi aciindi ceelede. Aboobo, amuzumanane kupaila kamujisi lusyomo lwakuti Jehova uyoomumvwa akumulanganya alimwi akuti ‘uyookkutya cilenge coonse cipona kwiinda mukucipa ncociyanda’ munyika mpya iiboola.—Int. 145:16.