1-2. Ikuti naa tamunalibambila kubbapatizyigwa, nkaambo nzi ncomuteelede kutyompwa? (Amubone cifwanikiso icili aacivwumbyo.)

 IKUTI naa mujisi makanze aakubbapatizyigwa, eeyo nimbaakani mbotu kapati. Pele sena mulilibambilide kubweza ntaamu eeyo lino? Ikuti mulimvwa kuti mulilibambilide alimwi abaalu balazumina oobo, mutawayiwayi kucita boobo. Ikuti naa mwabbapatizyigwa, muyooba abuumi bukkomanisya nomubelekela Jehova.

² Kulubazu lumwi, sena kuli umwi iwakamwaambila kuti kuli mpomuyandika kubelekela kamutanabweza ntaamu eeyi yakubbapatizyigwa? Naa nywebo lwanu mulimvwa kuti kuli mpomweelede kubelekela? Kuti naa mbocibede oobo, mutatyompwi pe. Mulakonzya kuyaambele akusika ambaakani eeyi iiyandika kapati, tacikwe makani muli bana naa muli bapati.

3. Ncinzi sinkuta muna Etiopiya ncaakabuzya Filipo, alimwi ino eeci cipa kubuzya mubuzyo nzi? (Milimo 8:36, 38)

³ Amubale Milimo 8:36, 38. Sinkuta muna Etiopiya wakabuzya Filipo mukambausi kuti: “Ino ncinzi cindilesya kubbapatizyigwa?” Mwaalumi ooyu wakaliyandide kubbapatizyigwa, pele sena wakalilibambilide ncobeni kubweza ntaamu eeyi iiyandika kapati?

4. Ino mwaalumi muna Etiopiya wakatondezya buti kuti wakali kuyanda kuzumanana kwiiya?

⁴ Mwaalumi ooyu muna Etiopiya “wakaunkide ku Jerusalemu kuyookomba.” (Mil. 8:27) Aboobo kweelede kuti wakasanduka buya kuba mu Juda. Tacidoonekwi kuti wakaiya kujatikizya Jehova kuzwa mumalembe aasetekene aa Magwalo aa Chihebrayo.  Nokuba boobo, wakacili kuyanda kwiiya zinji. Ciindi Filipo naakaswaangana amwaalumi ooyu mumugwagwa, ino mwaalumi ooyu wakali kucita nzi? Wakali kubala bbuku lyakuvwunga lyamusinsimi Isaya. (Mil. 8:28) Eeci cakali cakulya cakumuuya ciyumu. Mwaalumi ooyu tanaakakkutila ikuzyiba buyo njiisyo zyantalisyo zyamu Bbaibbele; wakali kuyanda kuzumanana kwiiya.

5. Ino mwaalumi muna Etiopiya wakacita buti kujatikizya zintu nzyaakaiya?

⁵ Mwaalumi ooyu wakali kulemekwa mubwami bwa Kandake Mwami Mukaintu wabana Etiopiya; “nguwakali kulanganya lubono loonse lwamwami mukaintu ooyu.” (Mil. 8:27) Aboobo, kweelede kuti wakali muntu iwakajisi zinji zyakucita. Nokuba boobo, wakajana ciindi cakukomba Jehova. Tanaakayanda kugolela buyo akuzyiba kasimpe, pele wakazibelesya zintu nzyaakaiya. Aboobo wakeenda kuzwa ku Etiopiya kuya ku Jerusalemu kutegwa akakombe Jehova kutempele. Kweelede kuti lweendo oolu lwakali kuyandika ciindi alimwi amali, pele mwaalumi ooyu wakacita zyoonse izyakali kuyandika kutegwa akakombe Jehova.

6-7. Mbuti luyando ndwaakajisi muna Etiopiya kuli Jehova mbolwakazumanana kukomena?

⁶ Mwaalumi ooyu muna Etiopiya wakaiya twaambo tumwi tuyandika kapati kuzwa kuli Filipo, mbuli kakuti Jesu ngo Mesiya. (Mil. 8:34, 35) Kweelede kuti mwaalumi ooyu wakakkomana kapati kwiiya zintu nzyaakamucitila Jesu. Ncinzi ncaakacita naakamana kwiiya zintu eezyo? Ikuti naakali kuyanda, naakazumanana kuba buyo muntu uulemekwa, mu Juda musandule. Muciindi caboobo, luyando lwakwe kuli Jehova a Jesu, lwakakomena. Eeci cakamupa kubweza ntaamu iiyandika kapati mubuumi, nkokuti kubbapatizyigwa akuba sikutobela Jesu Kristo. Filipo naakabona kuti mwaalumi ooyu wakalilibambilide, wakamubbapatizya.

⁷ Ikuti andinywe mwatobela cikozyanyo camuna Etiopiya, mulakonzya kweelela kubbapatizyigwa. Alimwi muyoocikonzya kwaamba cakusinizya kuti, “Ino ncinzi cindilesya kubbapatizyigwa?” Lino atulange-lange mbomukonzya kubweza ntaamu nzyaakabweza muna Etiopiya: Wakazumanana kwiiya, wakazibelesya nzyaakaiya alimwi wakazumanana kuyumya luyando ndwaakajisi kuli Leza.

8. Ino lugwalo lwa Johane 17:3 inga lwamugwasya buti?

⁸ Amubale Johane 17:3. Sena majwi aa Jesu aaya ngaakamukulwaizya kutalika kwiiya Bbaibbele? Bunji bwesu akatukulwaizya. Pele sena majwi ngoonya aaya alatukulwaizya akuti tuzumanane kwiiya? Inzya. Kunyina notuyooleka ‘kuzyiba Leza mwini-mwini uuli alikke.’ (Muk. 3:11) Tuyoozumanana kwiiya mane kukabe kutamani. Mbotuyaabuzumanana kwiiya zinji kujatikizya Jehova, cilongwe cesu anguwe ciyooyuma kapati.—Int. 73:28.

9. Ncinzi ncotweelede kucita twamana kuzyiba njiisyo zyantalisyo?

 ⁹ Ciindi notwatalika kwiiya kujatikizya Jehova, inga twiiya buyo njiisyo zyamu Bbaibbele zyantalisyo. Mulugwalo ndwaakalembela bana Hebrayo, mwaapostolo Paulo wakaamba njiisyo eezyi kuti ‘ninjiisyo zyantalisyo,’ alimwi wakazikozyanisya kumukupa wamwana. (Heb. 5:12; 6:1) Aboobo wakakulwaizya Banakristo boonse kuzumanana kwiiya ikutali buyo njiisyo zyantalisyo pele akasimpe kayandika kapati kali mu Jwi lya Leza. Sena mulaaluyandisisyo lwakwiiya njiisyo ziyandika kapati zyamu Bbaibbele? Sena mulayanda kuzumanana kuyaambele, kuzumanana kwiiya kujatikizya Jehova alimwi amakanze aakwe?

10. Nkaambo nzi bamwi ncocibakatazya kwiiya?

¹⁰ Bunji bwesu, cilatukatazya kwiiya. Ino nywebo, mulimvwa buti kujatikizya makani aakwiiya? Nomwakali kucikolo, sena mwakayiya mbomukonzya kubala kabotu akwiiya? Sena mwakali kukukkomanina akulimvwa kuti kulagwasya? Naa mwakalimvwa kuti inga tiimwacikonzya kwiiya kubelesya mabbuku? Kuti kacili boobo, tamuli nyolikke pe. Jehova ulakonzya kumugwasya. Ulilondokede alimwi ngo Mwiiyi wiinda kubota.

11. Mbuti Jehova mbwatondezya kuti ‘Mwiiyi Mupati’?

¹¹ Jehova ulyaamba kuti “Mwiiyi wanu Mupati.” (Is. 30:20, 21) Mwiiyi uukkazika moyo, uulaaluzyalo alimwi uumvwisya. Ulanga buyo bubotu muli basicikolo bakwe. (Int. 130:3) Alimwi kunyina nalangila kuti tucite zintu nzyotutakonzyi. Kamuyeeya kuti, ngowakalenga bongo bwanu, icipego citaliboteli. (Int. 139:14) Ncizyalwa buya kuyandisya kwiiya. Mulengi wesu uyanda kuti katwiiya lyoonse mane kukabe kutamani alimwi akukukkomanina. Aboobo inga twacita kabotu ‘kuyandisya’ kasimpe kamu Bbaibbele. (1Pet. 2:2) Amulibikkile mbaakani nzyomukonzya kuzuzikizya, akuba abubambe busitikide bwakubala akwiiya Bbaibbele. (Jos. 1:8) Kwiinda mukugwasyigwa a Jehova, muyootalika kukukkomanina kubala alimwi akwiiya kujatikizya nguwe.

12. Nkaambo nzi ncotweelede kubikkila maano kwiiya buumi bwa Jesu amulimo wakwe lyaciiyo cesu tobeni?

¹² Kamujana ciindi lyoonse cakuzinzibala kuyeeya buumi bwa Jesu amulimo wakwe. Cilayandika kapati kutobela mikondo ya Jesu cakulomya kutegwa tucikonzye kumubelekela Jehova, kwaambisya muziindi zino zikatazya. (1Pet. 2:21) Cakutainda mumbali, Jesu wakaamba buyumuyumu mbobakali kuyoojana basikumutobela. (Lk. 14:27, 28) Nokuba boobo, wakalaalusyomo lwakuti basikumutobela beni-beni, bakali kuyoocikonzya kuzwidilila mbubwenya mbuli nguwe. (Joh. 16:33) Aboobo, amwiiye zinji kujatikizya buumi bwa Jesu, akulibikkila mbaakani zyakumwiiya mubuumi bwanu bwabuzuba abuzuba.

13. Ncinzi ncomweelede kuzumanana kumulomba Jehova, alimwi nkaambo nzi?

¹³ Kuba buyo aluzyibo takuzulide pe. Pele luzyibo oolo lweelede kumugwasya kwiiya zinji kujatikizya Jehova akuba abube mbuli luyando alimwi alusyomo mulinguwe. (1Kor. 8:1-3) Mbomuyaabwiiya, amuzumanane kumulomba Jehova kuti amugwasye kuba alusyomo luyumu. (Lk. 17:5) Ulayiingula mipailo iili boobu. Kuba alusyomo lwini-lwini iluyeeme aluzyibo lwini-lwini lwa Leza, kuyoomugwasya kuyaambele.—Jak. 2:26.

14. Ino mwaapostolo Petro wakatondezya buti mbociyandika kapati kubelesya nzyotwiiya? (Amubone acifwanikiso.)

¹⁴ Mwaapostolo Petro wakatondezya mbociyandika kapati kuli basikutobela Kristo kuzumanana kuzibelesya zintu nzyobayiya. Wakaamba cibalo cimwi camu Bbaibbele cijatikizya Nowa. Jehova wakaambila Nowa kuti wakali kuyoobanyonyoona basizibi bakuciindi eeco kwiinda mukubelesya zambangulwe. Kuzyiba  buyo kuti kwakali kuyooboola zambangulwe tiikwakali kukonzya kupa kuti Nowa amukwasyi wakwe bafwutuke. Amubone kuti Petro wakali kwaamba ciindi kalitanacitika Zambangulwe “ibwato nobwakali kupangwa.” (1Pet. 3:20) Masimpe, Nowa amukwasyi wakwe bakazibelesya nzyobakayiya kuzwa kuli Leza kwiinda mukuyaka bwato. (Heb. 11:7) Kumane Petro wakakozyanisya ncaakacita Nowa kulubbapatizyo, wakalemba kuti: “Lubbapatizyo, ilukozyenye aceeci, alwalo lulamufwutula lino.” (1Pet. 3:21) Munzila imwi, tulakonzya kukozyanisya mulimo ngomucita lino ikulibambila kubbapatizyigwa, kumulimo wakuyaka bwato ngwaakacita Nowa amukwasyi wakwe kwamyaka minji. Ino mulimo nzi ngomweelede kucita kutegwa mulibambile kubbapatizyigwa?

15. Ino kweempwa kuzwa ansi aamoyo kubikkilizya nzi?

¹⁵ Cintu cakusaanguna ncotweelede kucita nkweempwa zibi zyesu kuzwa ansi aamoyo. (Mil. 2:37, 38) Ikuti naa tweempwa kuzwa ansi aamoyo, tuyoocinca ncobeni. Sena mwakaleka kucita zintu zili zyoonse zitamukkomanisyi Jehova, mbuli kupona buumi bwakutalilemeka, kubelesya tombwe naa majwi aatali kabotu? (1Kor. 6:9, 10; 2Kor. 7:1; Ef. 4:29) Ikuti naa tamunaleka, amusolekesye kucinca. Amubandike ayooyo uumuyiisya Bbaibbele, naa amulombe lugwasyo kubaalu bambungano. Ikuti kamucili bana alimwi mukkala abazyali banu, amuzumanane kubalomba kutegwa bamugwasye kuleka zilengwa zili zyoonse zibyaabi izikonzya kupa kuti muteeleli kubbapatizyigwa.

16. Ino kuba abubambe busitikide bwakucita zintu zyakumuuya kubikkilizya nzi?

¹⁶ Alimwi cilayandika kapati kuba abubambe busitikide bwakucita zintu zyakumuuya. Eeci cibikkilizya kujanika kumiswaangano ya Bunakristo alimwi akutola lubazu. (Heb. 10:24, 25) Mpoonya, ikuti naa mweelela kutalika kukambauka, amusolekesye kunoocita oobo lyoonse. Ikutola lubazu lyoonse mumulimo ooyu, kuyoopa kuti mutalike kuukkomanina kapati. (2Tim. 4:5) Ikuti naa muli bana alimwi mucikkala abazyali banu, amulibuzye kuti: ‘Sena bazyali bangu inga bandiyeezya buya kuunka kumiswaangano amumulimo wakukambauka naa ndilaliyeezya?’ Kwiinda mukucita zintu eezyi, mutondezya kuti mulaalusyomo, mulamuyanda Jehova Leza alimwi mulalumba akaambo kazintu zyoonse nzyamupa. Eeyi “milimo yakubelekela Leza cakulyaaba,” nkokuti zipego  nzyomupa Jehova. (2Pet. 3:11; Heb. 13:15) Kufwumbwa zipego nzyotumupa Jehova cakuliyandila kakunyina kusinikizyigwa buya, zilamukkomanisya kapati. (Amweezyanisye 2 Bakorinto 9:7.) Tulacita zintu eezyi nkaambo cilatukkomanisya kubelekela Jehova kusikila mpotugolela.

17-18. Mbube nzi buyandika kapati ibuyoomugwasya kuyaambele akweelela kubbapatizyigwa, alimwi nkaambo nzi? (Tusimpi 3:3-6)

¹⁷ Mbomuyaabuyaambele kutegwa mweelele kukubbapatizyigwa, muyoojana buyumuyumu. Bamwi balakonzya kumusampaula akaambo kalusyomo lwanu lupya; balakonzya kumukazya naa kumupenzya buya. (2Tim. 3:12) Ciindi nomusolekesya kuleka kucita cintu cimwi citali kabotu, zimwi ziindi munoojana kuti mwaciinduluka kucicita cintu eeco. Naa ambweni muyakwaalilwa kukkazika moyo akulimvwa kutyompwa akaambo kakuti mbaakani yanu yalibonya mbuli kuti yamuka kuzuzikizyigwa. Ncinzi ciyoomugwasya mubukkale buli boobu? Nduyando ndomujisi kuli Jehova.

¹⁸ Luyando ndomujisi kuli Jehova mbube buyandika kapati, ibwiinda kubota. (Amubale Tusimpi 3:3-6.) Kuba aluyando luyumu kuli Leza kulakonzya kumugwasya kuzwidilila ciindi nomwajana mapenzi mubuumi. Kanji-kanji Bbaibbele lilaamba kujatikizya luyando lutamani ndwajisi Jehova kubabelesi bakwe. Luyando oolu lutamani lutondezya kuti kunyina nayoobalekelezya babelesi bakwe naa kuleka kubayanda. (Int. 100:5) Mwakalengwa mucinkozya ca Leza. (Matl. 1:26) Aboobo mbuti mbomukonzya kutondezya luyando luli boobu?

19. Mbuti mbomukonzya kutondezya kulumba kapati akaambo kazintu zyoonse nzyaamucitila Jehova? (Bagalatiya 2:20)

¹⁹ Cakusaanguna, amutondezye kulumba. (1Tes. 5:18) Buzuba abuzuba, amulibuzye kuti, ‘Mbuti Jehova mbwaanditondezya luyando sunu?’ Mpoonya amumulumbe kwiinda mumupailo, akuzyaamba cacigaminina zintu nzyaamucitila. Mbubwenya mbuli mwaapostolo Paulo, amubone zintu zibotu nzyamucitila nywebo kumugama zyalo izitondezya kuti ulamuyanda. (Amubale Bagalatiya 2:20.) Amulibuzye kuti, ‘Sena andime ndilayanda kumutondezya kuti ndilamuyanda?’ Luyando ndomujisi kuli Jehova luyoomugwasya kuzumanana kuzunda masunko alimwi akuliyumya kumapenzi. Luyoomukulwaizya kuzumanana kucita zintu zyakumuuya, ikutondezya kuti mulamuyanda Uso wanu buzuba abuzuba.

20. Ncinzi ncomweelede kucita kutegwa mulyaabe kuli Jehova, alimwi nkaambo nzi ncociyandika kucita boobo?

 ²⁰ Mukuya kwaciindi, luyando lwanu kuli Jehova luyoomukulwaizya kupa mupailo waalubazu. Muyoolyaaba kuli Leza. Kamuyeeya kuti, ciindi nomwalyaaba kuli Jehova, muba abulangizi oobu butaliboteli: Ikuzulilwa kulinguwe lyoonse mane kukabe kutamani. Mwaaba buumi bwanu kuli Jehova, nkokuti mumusyomezya kuti munoomubelekela lyoonse muziindi zili kabotu alimwi azyamapenzi. Kunyina nomuyooyandika kuciinduluka cisyomezyo eeci. Masimpe kuti, kulyaaba makani mapati aayandika kubikkilwa maano. Amuyeeye kujatikizya kaambo aaka: Mubuumi bwanu, muyoopanga zyakusala zinji, alimwi buya izimwi zinooli zibotu kapati, pele kunyina cinooli cibotu kwiinda kusala kwaaba buumi bwanu kuli Jehova. (Int. 50:14) Saatani uyoosola kunyonganya luyando ndomujisi kuli Uso, kayeeya kuti muyoocileka kusyomeka. Akaka mutakasoli kumulekela kuzunda! (Job. 27:5) Luyando ndomujisi kuli Jehova, luyoomugwasya kuzuzikizya cisyomezyo canu cakumubelekela lyoonse alimwi akuzumanana kuba acilongwe ciyumu a Uso wanu wakujulu.

21. Nkaambo nzi ncotwaamba kuti kubbapatizyigwa taali ngamamanino, pele matalikilo buyo?

²¹ Mwamana kulyaaba kuli Jehova, amubandike abaalu bamumbungano yanu kujatikizya ntaamu iitobela iiyandika kapati. Nokuba boobo, lyoonse kamuyeeya kuti kubbapatizyigwa taali ngamamanino, pele matalikilo aakupona buumi bwakubelekela Jehova mane kukabe kutamani. Aboobo lino, amuyumye luyando ndomujisi kuli Uso wanu. Amulibikkile mbaakani kutegwa luyando oolo luzumanane kuyuma. Kucita boobo, kuyoomukulwaizya kubweza ntaamu yakubbapatizyigwa. Alimwi oobo bunooli buzuba bukkomanisya kapati. Pele aaya matalikilo buyo. Aboobo aabe makanze aanu kuzumanana kuyumya luyando ndomujisi kuli Jehova a Mwanaakwe mane kukabe kutamani.