Kutegwa tumukkomanisye Jehova, tweelede kuba alusyomo. Pele Bbaibbele lyaamba kuti “tabali bantu boonse ibajisi lusyomo.” (2Tes. 3:2) Ciindi mwaapostolo Paulo naakali kwaamba majwi aaya, wakali kwaamba “bantu basiluciso alimwi babi” ibakali kumupenzya. Pele ncaakaamba kujatikizya lusyomo cilabeleka akubantu bamwi. Bantu bamwi tabazumini kuti kuli Leza wakalenga zintu zyoonse. (Rom. 1:20) Bamwi inga baamba kuti basyoma muntu umwi naa cintu cimwi cilaanguzu kapati. Pele oolu taluli lusyomo lwini-lwini.

Tweelede kusinizya kuti Jehova nkwali ncobeni alimwi akuti ulabalumbula aabo bamusyoma cakumaninina. (Heb. 11:6) Kutegwa tube alusyomo luli boobu, tuyandika muuya wa Leza. Kupaila kuli Jehova kulakonzya kutugwasya kuba amuuya uusalala. (Lk. 11:​9, 10, 13) Nzila imwi iiyandika kapati mbotukonzya kutambula muuya uusalala nkwiinda mukubala Bbaibbele, lyalo ilyakalembwa kwiinda mukusololelwa amuuya wa Jehova. Mpoonya tweelede kuzinzibala kuyeeya nzyotubala alimwi akuzibelesya. Kuti twacita oobo, nkokuti tuzumizya muuya wa Jehova kutugwasya kupona munzila iitondezya kuti tulijisi lusyomo.