MABBUKU aayo akali aamibala iindene-indene mbuli fwulicoongo. Nondakatalika kwaalanga-langa, ndakajana zifwanikiso zibotu zyalo zyakandipa kutalika kweezyeezya. Aboobo, kuzwa kubwana, ndakaba aluyandisisyo lwakuba aluzyibo lwamu Bbaibbele, mbuli loolo ilwakali mumabbuku aaya aalibedelede.

Ciindi Nkondo Yanyika Yabili noyakali afwaafwi kusika mu India, buumi bwangu bwakatalika kuyaabubija. Bazyali bangu bakaandaana, mpoonya bakazyikulekana. Cakandikatazya kumvwisya ikaambo kakapa kuti bantu bobilo mbondakali kuyanda balekane. Ndakakatazyigwa mumizeezo alimwi akulimvwa kulekelezyegwa. Ndakazyedwe buyo endikke, alimwi tiindakali kujana luumbulizyo alugwasyo ndondakali kuyandika kapati.

Aciindi eeco mebo abamaama twakali kukkala mu Karachi, idolopo lipati mucooko eeco. Bumwi buzuba, ba Fred Hardaker, badokotela bacembeede alimwi Bakamboni ba Jehova, bakatuswaya kuŋanda. Bakajisi lusyomo lukozyenye alwamisyinali ooyo iwakatupede mabbuku aalya. Bakabalomba bamaama kuti kabaiya Bbaibbele ambabo. Pele bamaama bakakaka akwaamba kuti ambweni mebo inga ndayanda. Ndakatalika  kwiiya a Mukwesu Hardaker nsondo njoonya iyakatobela.

Nokwakainda nsondo zisyoonto, ndakatalika kujanika kumiswaangano ya Bunakristo kucibbaddela ca Mukwesu Hardaker. Bakamboni bacembeede basika ku 12 bakali kuswaangana ooko kutegwa bakombe. Bakanduumbulizya alimwi akundibikkila maano mbuli mwanaabo wakulizyalila. Ndilayeeya mbobakali kukkala andime, kulibikka muciimo cangu, alimwi katubandika mbuli balongwe beni-beni, cintu ncondakali kuyanda aciindi eeco.

Kakutanainda ciindi, Mukwesu Hardaker wakanditamba kuti tubeleke limwi mumulimo wamumuunda. Wakandiyiisya mbocibelesyegwa cilimba camalekkoodi kutegwa katulizya makani mafwaafwi aamu Bbaibbele akalekkoodwa. Makani aamwi akali kwaambwa munzila yacigaminina, aboobo bantu bamwi mbotwakali kujana mumaanda tiibakali kwaakkomanina. Pele ndakali kukukkomanina kukambaukila bamwi. Ndakali musungu kukasimpe kamu Bbaibbele alimwi ndakali kukkomana kukaambila bamwi.

Ciindi basikalumamba bana Japan nobakali kulibambila kulwana cisi ca India, beendelezi bamfwulumende yaku Britain bakaindizya kubapenzya Bakamboni ba Jehova. Mpoonya mu July 1943, kupenzyegwa ooko kwakandijatikizya andime kundigama. Mupati wacikolo, imusololi wacikombelo ca Anglican wakanditanda cikolo. Wakaambila bamaama kuti kuyanzana kwangu a Bakamboni ba Jehova tiikwakali cikozyanyo cibotu kuli basicikolo bamwi. Aboobo bakanditola kuli bataata ku Peshawar, idolopo lili kulamfwu amakkilomita aali 1,370 kutozya kunyika. Akaambo kakutalya cakulya cakumuuya alimwi akutayanzana abakwesu, cilongwe cangu a Jehova cakanyongana.

Mu 1947, ndakajokela alimwi ku Karachi kuyakuyandaula mulimo. Kandili kokuya, ndakaunka kucibbaddela ca Dr. Hardaker. Bakanditambula amaanza obilo.

Kabayeeya kuti ndaboola kusilikwa, bakandibuzya kuti, “Ino waciswa nzi?”

Ndakayingula kuti, “Badokotela, tandicisidwe pe, ndiyanda ciiyo ca Bbaibbele.”

Mpoonya bakandibuzya kuti, “Ino uyanda kuti tukatalike lili?”

Ndakaingula kuti, “Inga twatalika ndilyonya lino kuti kacikonzyeka.”

Cakali kukkomanisya kapati kwiiya Bbaibbele mangolezya aayo. Ndakalimvwa kwaanguluka akaambo kakuba akati kabantu ba Jehova alimwi. Bamaama bakasoleka canguzu kundikasya kuyanzana a Bakamboni, pele aciindi aawo ndakalikanzide kusala kubelekela Jehova. Mu August 31, 1947, ndakakutondezya kulyaaba kwangu kuli Jehova kwiinda mukubbapatizyigwa mumeenda. Kakutanainda ciindi, kandijisi myaka iili 17, ndakatalika kubeleka kandili mupainiya waciindi coonse.

Ku Quetta nkondakasaanguna kubeleka kandili mupainiya, ooko nkobakali kukkala basikalumamba bana Britain. Mu 1947, cisi ca India cakaandaanizyigwa muzibeela zyobilo kupanga cisi ca India alimwi aca Pakistan. * Eeci cakatalisya nkondo mpati yazikombelo, calo cakapa kuti bantu banji kapati balonge, kulonga ooku kwakali kupati kwiinda. Bazangalisi bali 14 miliyoni bakalozyegwa. Ba Mozilemu ibakali mu India bakaunka ku Pakistan, mpoonya ba Hindu aba Sikhs ibakali ku Pakistan bakaunka ku India. Kakuli manyongwe aayo, ndakatanta citima imwakali bantu banji kapati mudolopo lya Karachi, aboobo tiindakanjila mukati pele ndakajatilide buyo atubulo twaamulyango lweendo loonse kuya ku Quetta.

Ku Quetta, ndakajana mukwesu George Singh, mupainiya waalubazu wakajisi myaka yakuzyalwa iili 25. Mukwesu ooyu wakandipa ncinga yakaindi kutegwa kandibelesya mucilawo icakajisi tulundu-lundu. Ziindi zinji, ndakali kukambauka ndelikke. Mumyezi iili cisambomwe, ndakaba aziiyo zya Bbaibbele zili 17, alimwi ziiyo zimwi zyakaboola mukasimpe. Umwi wabo wakali silutwe wabasikalumamba wazina lya Sadiq Masih, iwakagwasya mukwesu George andime kusandulula mabbuku aamwi aamba zyamu Bbaibbele kutola muci Urdu, imwaambo uubelesyegwa kapati mucisi ca Pakistan. Mukuya kwaciindi, ba Sadiq bakaba basikumwaya bamakani mabotu basungu.

Nokwakainda ciindi, ndakajokela ku Karachi akubeleka amukwesu Henry Finch alimwi a Harry Forrest, bamisyinali bapya ibakazwa ku Cikolo ca Gileadi. Eelo kaka bakandipa lwiiyo lweendelezyegwa a Leza lutaliboteli! Ciindi cimwi ndakamusangana Mukwesu Finch mulweendo lwakwe lwakuyookambaukila ku Pakistan nkoili kunyika. Kunselelo aamulundu, twakajana babombe myoyo ibaambaula mwaambo waci Urdu ibakali aanyota yakasimpe kamu Bbaibbele. Nokwakainda  myaka yobilo, ndakaunka ku Cikolo ca Gileadi; mpoonya ndakajoka ku Pakistan kwalo zimwi ziindi nkondakali kubeleka mbuli mulangizi wabbazu. Ndakali kukkala abamisyinali botatwe aŋanda yabamisyinali ku Lahore.

Cuusisya ncakuti, mu 1954, bamisyinali ku Lahore bakazwangana, calo cakapa kuti bakuofesi yamutabi babaandaanye. Akaambo kakuti ndakaanjila makani aayo, ndakapegwa lulayo ilulaanguzu kapati. Ndakatyompwa kapati, akulimvwa kuti ndaalilwa kuuzuzikizya mulimo wangu. Ndakajokela alimwi ku Karachi, kumane ndakaunka ku England mudolopo lya London, kandijisi makanze aakuyooyitalika buya alimwi milimo yakumuuya kubusena bumbi.

Ku London, mumbungano mondakabede mwakali bakwesu abacizyi banji ibamukwasyi wa Beteli yaku London. Mukwesu Pryce Hughes, iwakali mubelesi uulanganya mutabi, caluyando wakatalika kundiyiisya. Bumwi buzuba, wakandaambila kujatikizya ciindi naakapegwa lulayo lulaanguzu kuzwa kumukwesu Joseph F. Rutherford, iwakali kulanganya mulimo wakukambauka nyika yoonse. Ciindi Mukwesu Hughes naakasola kulitamizya, Mukwesu Rutherford wakamusinsa. Aboobo ndakagambwa kubona Mukwesu Hughes kamweta-mweta ciindi naakali kwaambaula. Wakaamba kuti kumatalikilo wakanyema kuli ceeco icakacitika. Pele kumamanino wakazyiba kuti wakali kuyandika lulayo alimwi akuti cakali citondezyo caluyando lwa Jehova. (Heb. 12:6) Makani ngaakaamba akandinjila mumoyo alimwi akandigwasya kuubeleka alimwi mulimo ooyu calukkomano.

Aciindi eeco, bamaama bakalongela ku London alimwi bakazumina kutalika kwiiya Bbaibbele amukwesu John E. Barr, ooyo kumbele iwakabeleka mu Kabunga Keendelezya. Bakayaambele cakufwambaana kumuuya alimwi bakabbapatizyigwa mu 1957. Mukuya kwaciindi, ndakamvwa kuti bataata abalo kabatanafwa, bakaiya a Bakamboni ba Jehova.

Mu 1958, twakakwatana aba Lene, imucizyi waku Denmark pele iwakali kukkala mu London. Mwaka wakatobela, twakalongezyegwa kwiinda mukuba amwana musimbi, Jane, imutaanzi akati kabana bosanwe mbotwakazyala. Kuyungizya waawo, ndakaba acoolwe cakubikkwa kuba mwaalu mu Mbungano ya Fulham. Nokuba boobo, mukuya kwaciindi, akaambo kakuciswa-ciswa kwaba Lene, twakasala kulongela kubusena bukasaala. Aboobo mu 1967, twakalongela ku Australia, mudolopo lya Adelaide.

Mumbungano yesu ku Adelaide mwakali a Banakristo bananike bali 12. Bakali basungu kapati mumulimo wakukambauka. Tiilyakalampa, andiswe twakaba basungu mukubelekela Jehova.

Mu 1979, mebo aba Lene twakaba amwana wasanu, Daniel. Wakazyalwa abulwazi bwa Down syndrome * alimwi  tanaakali kunoopona kwaciindi cilamfwu. Noliba lino ndilakatazyigwa kupandulula mbondakalimvwide. Twakacita zyoonse nzyotwakali kukonzya kutegwa tumulanganye, kumwi katulanganya abana besu bambi bone. Zimwi ziindi lukanda lwa Daniel lwakali kucinca kuba mbuli mubala wacikambwe akaambo kakuceya kwamuya wakuyoya ikwakali kucitika akaambo katupulo tobilo twakali kumoyo wakwe, aboobo twakali kumutola cakufwambaana kucibbadela. Pele nokuba kuti wakali kuciswa-ciswa, wakali musongo alimwi siluyando. Alimwi wakali kumuyanda kapati Jehova. Ciindi notwakali kupaila mbuli mukwasyi katutanalya, wakali kulijata mumaanza, kuzuminizya amutwe, alimwi akwaamba kuzwa aansi amoyo kuti “Ameni!” Amana kucita oobo ndendilyo naakali kutalika kulya.

Ciindi Daniel naakakkwanya myaka yone, wakatalika kuciswa bulwazi bwa acute leukemia (kkansa yamumafwuwa.) Mebo aba Lene twakali kukatala kapati alimwi akukatazyigwa mumizeezo. Ndakali kulimvwa mbuli kuti ndiyanda kusondoka. Mpoonya bumwi buzuba ciindi notwakatyompedwe kapati, mulangizi wesu wabbazu, wazina lya Neville Bromwich, wakatuswaya aŋanda. Busiku oobo, kumwi kalila, wakatukumbata. Mpoonya toonse twakalila. Majwi aakwe aaluyando alimwi aaluzyalo akatuumbulizya kapati. Wakanyamuka cakuma 13 hrs buzuba bwakatobela. Tiilyakalampa, Daniel wakafwa. Lufwu lwakwe ncecintu cakatucisa kapati mubuumi bwesu. Nokuba boobo, twakaliyumya kubuumba bwesu, katujisi lusyomo lwakuti, noluba lufwu, talukonzyi kumwaandaanya Daniel kuluyando lwa Jehova. (Rom. 8:38, 39) Aboobo tulangila ciindi notuyooba anguwe aakubusyigwa munyika mpya ya Leza!—Joh. 5:28, 29.

Mazuba aano, nokuba kuti ndakalebuka mubili ziindi zyobilo, ndicili mwaalu mumbungano. Zintu zyakandicitikila mubuumi zindipa kuba alweetelelo alimwi alubomba kuli bamwi, ikapati aabo ibali mumapenzi. Ndilasoleka kutababeteka. Muciindi caboobo, ndilalibuzya kuti: ‘Ino mbuti zintu zyakabacitikila mubuumi bwabo mbozijatikizya mbobalimvwa alimwi ambobayeeya? Mbuti mbondikonzya kutondezya kuti ndilababikkila maano? Mbuti mbondikonzya kubakulwaizya kutobela nzila zya Jehova?’ Eelo kaka ndilakukkomanina kucita mulimo wabweembezi mumbungano! Masimpe, ciindi nondibaumbulizya alimwi akubakatalusya bamwi kumuuuya, ndilimvwa kuti andime lwangu ndilalyuumbulizya akulikatalusya.

Ndilimvwa mbuli sintembauzyo iwakaamba kuti: “Mizeezo minji iilibilisya neyakandikatazya, [Jehova] wakanduumbulizya akunditontozya.” (Int. 94:19) Wali kundigwasya kutegwa ndiliyumye mubuyumu-yumu bwamukwasyi, mukukazyigwa kujatikizya bukombi alimwi anondali kutyompwa. Masimpe, Jehova wali Taata mwini-mwini kulindime!