1, 2. (a) Ncinzi ncaakalomba Jesu mumupailo wakwe wamamanino naakali abaapostolo bakwe? (b) Kweelede kuti nkaambo nzi Jesu ncaakabikkilide maano kapati kumakani aalukamantano?

JESU wakalibikkilide maano kapati kumakani aalukamantano ciindi naakali kulya cilalilo camamanino abaapostolo bakwe. Ciindi naakapaila ambabo, wakaamba mbwaakayandide kapati kuti basikwiiya bakwe babe bamwi, mbubonya walo a Bausyi mbobakali bamwi. (Amubale Johane 17:20, 21.) Lukamantano lwabo lwakali kuyoopa bumboni busalede alimwi akupa citondezyo cisinizya kuti Jehova wakatuma Jesu anyika kuti acite kuyanda kwakwe. Luyando lwakali kuyooba citondezyo cabasikwiiya ba Jesu beni-beni oolo ilwakali kuyoopa kuti babe alukamantano.—Joh. 13:34, 35.

² Kukankaizya kwa Jesu kujatikizya lukamantano kulalimvwisya. Wakakubona kwaandaana naa kuteendelana ikwakali akati kabaapostolo, mbuli cakacitika ciindi naakali kulya cakulya camamanino ambabo. Mbubwenya mbocakacitikide musyule, bakatalika kuzwangana “kapati akati kabo kujatikizya wakali kubonwa kuti ngomupati kwiinda boonse.” (Lk. 22:24-27; Mk. 9:33, 34) Aciindi cimwi, Jakobo alimwi  a Johane bakalomba kuti Jesu abape masena alemenede kumbali lyakwe mu Bwami bwakwe.—Mk. 10:35-40.

3. Nzintu nzi zyeelede kuti nzyizyakapa kuti kutabi lukamantano akati kabasikwiiya ba Kristo, alimwi ino mibuzyo nzi njotutiilange-lange?

³ Nokuba boobo, kuyanda kuba ampuwo takuli kolikke ikwakapa kuti kube kwaandaana akati kabasikwiiya ba Kristo. Bantu ibakali mucisi bakalaandaanizyidwe akusulaikana alimwi akusalulula. Basikwiiya ba Jesu bakali kuyandika kuuzunda muuya ooyu. Mucibalo eeci, tulalanga-langa mibuzyo iitobela: Mbuti Jesu mbwaakakulanganya kusalulula? Mbuti mbwaakabagwasya basikumutobela kwiiya kutabasalulula bantu alimwi akuba alukamantano lwini-lwini? Alimwi ino mbuti kuyiisya kwakwe mbokukonzya kutugwasya kuzumanana kukamantana?

4. Amupe zikozyanyo zyakusalulula ikwakatondezyegwa kuli Jesu.

⁴ Kusalulula kwakamucitikila awalo Jesu kumugama. Ciindi Filipo naakaambila Natanayeli kuti wamujana Mesiya, Natanayeli wakaingula kuti: “Sena kuli cibotu cinga cazwa mu Nazareta?” (Joh. 1:46) Kweelede kuti Natanayeli wakalibuzyi businsimi bujanika ku Mika 5:2 alimwi wakabona munzi wa Nazareta kuba musyoonto kapati cakuti tamukonzyi kuzwa Mesiya. Mbubwenya buyo, bana Judaya ibakali ampuwo bakamusampaula Jesu akaambo kakuti wakali muna Galilaya. (Joh. 7:52) Bantu banji ibakali kukkala mu Judaya bakali kubona bantu ibakali kuzwa ku Galilaya kuba bantu batasumpukide. Ba Juda bambi bakamusampaula Jesu kwiinda mukumwiita kuti muna Samariya. (Joh. 8:48) Bana Samariya bakali kuzwa kumusyobo alimwi abukombi bwiindene kapati abwaba Juda. Alimwi bana Judaya abana Galilaya tiibakali kubalemeka bana Samariya alimwi tiibakali kuyanzana ambabo.—Joh. 4:9.

5. Ino nkusalulula kuli buti ikwakabacitikila basikutobela Jesu?

⁵ Basololi baba Juda abalo bakali kubasampaula kapati basikutobela Jesu. Ba Farisi bakali kubabona kuti “mbantu basinganizyidwe.” (Joh. 7:47-49) Bakali kubona baabo boonse ibatakaiya kuzikolo zyaba rabbi naa aabo ibatakali kutobela zilengwa zyabo kuti tabayandiki alimwi akuti mbantu-bantu buyo. (Mil. 4:13, bupanduluzi buyungizyidwe.) Kusalulula ikwakamucitikila Jesu alimwi abasikumutobela kwakaliko akaambo kakwiindaana bukombi, bukkale alimwi amusyobo. Basikwiiya abalo bakajatikizyigwa akusalulula. Kutegwa bakamantane, bakeelede kucinca mbobakali kuyeeya.

6. Amubelesye zikozyanyo ikutondezya kusalulula mbokukonzya kutujatikizya.

⁶ Mazuba aano, bunji bwesu tuzingulukidwe amuuya wakusalulula. Kusalulula kulakonzya kutucitikila, naa ambweni swebo tulakonzya katujisi muuya wakusalulula ooyu. Mucizyi umwi ooyo lino uuli mupainiya ku Australia wakaamba kuti: “Ikusulaika bamakuwa kwakakomena mulindime ciindi nondakabikkila maano kukutalulama ikwakacitwa kaindi alimwi amazuba aano kubantu baku Australia ibaitwa kuti ba Aborigin. Kupenzyegwa ikwakandicitikila andime akwalo kwakapa kuti ndibasulaike kapati.” Mukwesu umwi waku Canada awalo wakaamba mbwaakasalululwa kujatikizya mwaambo. Mboobu mbwaakaamba: “Ndakali kuyeeya kuti bantu baambaula ci French balisumpukide kapati. Aboobo ndakali kubasulaika kapati bantu baambaula Chingisi.”

7. Ino mbuti Jesu mbwaakakulanganya kusalulula?

⁷ Mazuba aano kusalulula kulakonzya kukomena kapati mumyoyo yesu, mbubwenya mbocakabede mumazuba aa Jesu. Ino mbuti Jesu mbwaakakulanganya? Cakusaanguna, wakakukaka kusalulula, kunyina naakatondezya muuya wakusalulula naaceya. Wakali kubakambaukila bavwubi abacete, ba Farisi abana Samariya, alimwi anobaba basimitelo abasizibi. Cabili, kwiinda mukuyiisya kwakwe alimwi acikozyanyo cakwe, Jesu wakatondezya basikwiiya bakwe kuti beelede kukuzunda kuyeeyela bamwi munzila iitali kabotu naa kubasalulula bamwi.

8. Ino ninjiisyo nzi iiyandika kapati aayeeme lukamantano lwa Bunakristo? Amupandulule.

⁸ Jesu wakayiisya basikumutobela njiisyo iiyandika kapati aayeeme lukamantano lwesu. Wakati: “Nywebo nyoonse muli babunyina.” (Amubale Matayo 23:8, 9.) Masimpe, nzila imwi mbotuli “babunyina” njakuti toonse twakazwa kuli Adamu. (Mil. 17:26) Pele kuli twaambo atumbi. Jesu wakapandulula kuti basikwiiya bakwe bakali babunyina akaambo kakuti bakalizyi kuti Jehova ngu Usyi wabo wakujulu. (Mt. 12:50) Kuyungizya waawo, bakaba cibeela camukwasyi mupati wakumuuya, uukamantene akaambo kaluyando alimwi alusyomo. Aboobo mumagwalo aabo, baapostolo kanji-kanji bakali kwiita basikwiiyanyina kuti ‘bakwesu abacizyi.’—Rom. 1:13; 1Pet. 2:17; 1Joh. 3:13. *

9, 10. (a) Ino nkaambo nzi ba Juda ncobatakeelede kulisumpula akaambo kamubala? (b) Mbuti Jesu mbwaakapa ciiyo mukuzunda kusalulula akaambo kamubala? (Amubone cifwanikiso icili kumatalikilo aacibalo.)

⁹ Naakamana kucisalazya kuti tweelede kubona umwi aumwi wesu mbuli mukwesu amucizyi, Jesu wakakankaizya kaambo ncokuyandika kulicesya. (Amubale Matayo 23:11, 12.) Mbuli mbotwabona kale, kulisumpula ikwakali akati kabaapostolo bakwe kwakapa kuti kube kwaandaana. Alimwi kulisumpula akaambo kamubala akwalo kweelede kuti lyakali penzi. Sena ba Juda bakeelede kulisumpula akaambo kakuti bakali bamukowa wa Abrahamu? Ba Juda banji mbobakali kulimvwa oobo. Pele Johane Mubbapatizi wakabaambila kuti: “Leza ulakonzya kumupa bana Abrahamu kuzwa kumabwe aaya.”—Lk. 3:8.

¹⁰ Kulisumpula akaambo kamubala Jesu wakakwaamba kuti nkubi. Wakaamba oobo ciindi mulembi naakabuzya kuti: “Ino mubwini simukoboma nguni?” Mukwiingula, Jesu wakaamba cikozyanyo camuna Samariya walo iwakamulanganya kabotu simweenda nzila, mu Juda iwakaumwa ababbi. Ba Juda bakamwiindilila mwaalumi ooyu, pele muna Samariya wakamufwida luzyalo. Jesu wakamanizya kwiinda mukwaambila mulembi kuti wakeelede kuba mbuli muna Samariya. (Lk. 10:25-37) Jesu wakatondezya kuti muna Samariya wakali kukonzya kubayiisya ba Juda ncocaamba kutondezya luyando lwini-lwini kuli basimukoboma.

11. Ino nkaambo nzi basikwiiya ba Kristo ncobakali kuyandika kutatondezya kusalulula kubantu ibatakali ba Juda, alimwi mbuti Jesu mbwaakabagwasya kukamvwisya kaambo aako?

¹¹ Kutegwa bauzuzikizye mulimo wabo, basikwiiya ba Jesu bakeelede kuuzunda muuya wakulisumpula alimwi akusalulula nkobakajisi. Katanaunka kujulu, Jesu wakabapa mulimo wakupa bumboni “mu Judaya moonse amu Samariya, mane kusikila kumasena aakulamfwu kapati aanyika.” (Mil. 1:8) Kakucili kooko, Jesu wakabagwasya kuti balibambile mulimo mupati ooyo kwiinda mukubatondezya bube bubotu mbobakajisi aabo ibatakali ba Juda. Wakalumbaizya silutwe wabasikalumamba iwatakali mu Juda akaambo kalusyomo lwakwe lulibedelede. (Mt. 8:5-10) Naakali mumunzi okwabo ku Nazareta, Jesu wakaamba kujatikizya Jehova mbwaakatondezya luzyalo kubantu ibatakali ba Juda, mucikozyanyo mukaintu muna Fonike kuzwa ku Zarefati alimwi a Naamani sicinsenda muna Siriya. (Luke 4:25-27) Kuyungizya waawo, Jesu tanaakakambaukila buyo mukaintu muna Samariya, pele alimwi wakakkala mazuba obilo mumunzi wabana Samariya akaambo kaluyandisisyo bantu ndobakajisi kumulumbe wakwe.—Joh. 4:21-24, 40.

12, 13. (a) Ino baapostolo bakacita buti ciindi Jesu naakayiisya mukaintu muna Samariya? (Amubone cifwanikiso icili kumatalikilo aacibalo.) (b) Ino ncinzi citondezya kuti Jakobo a Johane tiibakacimvwisya kabotu ciiyo?

¹² Nokuba boobo, tiicakali cuubauba kuli basikwiiya kuleka kusalulula nkobakajisi. Bakagambwa  kubona Jesu kuti wakaliyandide kumuyiisya mukaintu muna Samariya. (Joh. 4:9, 27) Ikuti naa basololi bacikombelo caba Juda tiibakali kwaambaula amukaintu uuli woonse mubuleya, mbuti kujatikizya mukaintu muna Samariya iwakali kupona bukkale bubyaabi? Baapostolo bakaambila Jesu kuti alye. Pele bwiinguzi bwakwe bwakatondezya kuti wakabikkilide kapati maano kumubandi wakumuuya cakuti tanaakali kukonzya kwiimvwa anzala. Kukambuka, nokuba kumukaintu muna Samariya, kwakali kuyanda kwa Bausyi, alimwi cakali mbuli cakulya kulinguwe.—Joh. 4:31-34.

¹³ Jakobo a Johane tiibakacimvwisya ciiyo eeci. Nobakali kweenda a Jesu mu Samariya, basikwiiya bakali kuyanda kuti bajane kwakoona mumunzi wa Samariya. Bana Samariya bakakaka kubatambula, aboobo Jakobo a Johane kabanyemede bakali kuyanda kuti mulilo uboole kuzwa kujulu kutegwa unyonyoone munzi woonse. Jesu wakabakalalila. (Lk. 9:51-56) Tulakonzya kulibuzya ikuti naa Jakobo a Johane nobakacita mbubwenya oobo ikuti munzi iwakakaka kubatambula nowakali mucilawo cabo ca Galilaya. Kulibonya kuti kusalulula kwakapa kuti babasulaike kapati. Ciindi naakakkomene akaambo kakuzwidilila mumulimo wakukambauka kubana Samariya, kweelede kuti mwaapostolo Johane wakamvwa nsoni naakayeeya mbobakalaacite kumatalikilo.—Mil. 8:14, 25.

14. Ino kakalanganizyigwa buti kaambo ikeelede kuti kakali kujatikizya mwaambo?

¹⁴ Kakutanainda ciindi cilamfwu kuzwa mu Pentekoste 33 C.E., kwakabuka kaambo kajatikizya kusalululana. Ciindi nobakali kwaabila bamukabafwu zyakulya, bamukabafwu baambaula Chigiriki tiibakali kupegwa. (Mil. 6:1) Kweelede kuti kaambo aawa kakali kujatikizya kusalululana akaambo kamwaambo. Cakufwambaana baapostolo bakakalanganya kaambo kwiinda mukusala baalumi beelela kutegwa kabalanganya makani aakwaabila cakulya. Boonse baalumi beelela aaba ibakasimide kumuuya bakajisi mazina aa Chigiriki. Eeci ceelede kuti cakabapa kukkalwa moyo bamukabafwu aabo ibakali kusalululwa.

15. Ino mbuti Petro mbwaakayaambele mukutondezya kutasalulula kubantu boonse? (Amubone cifwanikiso icili kumatalikilo aacibalo.)

¹⁵ Mu 36 C.E., mulimo wakugwasya bantu kuba basikwiiya wakatalika kusika kubantu bamumasi oonse. Mwaapostolo Petro wakajisi cilengwa cakuyanzana buyo aba Juda. Pele ciindi Leza naakacisalazya kuti Banakristo tabeelede kusalulula, Petro wakamukambaukila Korneliyo, sikalumamba muna Roma. (Amubale Milimo 10:28, 34, 35.) Mpoonya, Petro wakatalika kulya alimwi akuyanzana a Bamasi ibakali basyomi. Nokuba boobo, nokwakainda myaka, Petro wakacileka kulya a Banakristo ibatakali ba Juda mu Antiokeya. (Gal. 2:11-14) Aciindi aawa, Paulo wakapa Petro lulayo lweelela, lwalo cakutadooneka ndwaakatambula. Ciindi Petro naakalemba lugwalo lwakwe lwakusaanguna kuba Juda alimwi aku Bamasi ibakali Banakristo ku Asia Minor, calukkomano wakaamba kujatikizya ciinga coonse cabakwesu.—1Pet. 1:1; 2:17.

16. Ino bakaba ampuwo nzi Banakristo bakusaanguna?

¹⁶ Cilisalede kuti, baapostolo bakaiya kucikozyanyo ca Jesu cakuyanda “bantu bamisyobo yoonse.” (Joh. 12:32; 1Tim. 4:10) Nokuba kuti cakatola ciindi, bakabambulula mbobakali kuyeeya. Banakristo bakusaanguna bakaba ampuwo yakuyandana umwi amweenzinyina. Tertullian, imulembi wamumwaanda wamyaka wabili, wakazubulula bantu bamwi ibatakali Banakristo kabaamba kuti: “Amubone mbobayandana . . . Balilibambide nokuba kufwida beenzyinyina.” Kwiinda mukusama “buntu bupya,” Banakristo bakusaanguna bakatalika kubona bantu boonse kuti baleelene mumeso aa Leza.—Kol. 3:10, 11.

17. Ino mbuti mbotukonzya kugusya kusalulula mumyoyo yesu? Amupe zikozyanyo.

¹⁷ Mazuba aano, andiswe inga twayandika ciindi cakugusya kusalulula kuli mumoyo wesu. Mucizyi waku France wakaamba kujatikizya mbwaakakulwana kuti: “Jehova wandiyiisya ncolwaamba luyando, ncocaamba kupa, ncocaamba kuyanda bantu bamisyobo yoonse. Pele ndiciiya mbondikonzya kuzunda kusalulula bamwi, alimwi talili lyoonse nocili cuubauba. Nkikaambo  kaako ndilazumanana kucipailila.” Mucizyi waku Spain awalo njenjiyo nkondo njalwana alimwi wakaamba kuti: “Zimwi ziindi ndilakatazyigwa kulwana muuya wakusulaika ngondijisi kujatikizya musyobo umwi, alimwi ziindi zinji ndilazwidilila. Pele ndilizyi kuti ndiyandika kuzumanana kulwana. Ndilamulumba Jehova, ndilikkomene akaambo kakuba akati kamukwasyi uukamantene.” Umwi aumwi wesu ulakonzya kulilingula cakusitikila. Sena andiswe kutugama inga twayandika kuulwana muuya wakusalulula, mbuli mbobacita bacizyi aaba bobilo?

18, 19. (a) Ino ntwaambo nzi ntotujisi itutupa kubatambula bantu boonse? (b) Mbuti mbotukonzya kucita boobo munzila zigwasya?

¹⁸ Cilayandika kapati kuyeeya kuti aciindi cimwi toonse twakali “beenzu,” naa bamuzwakule, ibatakajisi cilongwe a Leza. (Ef. 2:12) Pele Jehova wakatukwela kulinguwe “azyaanzyo zyaluyando.” (Hos. 11:4; Joh. 6:44) Kunze lyaboobo, Kristo wakatutambula. Wakatujalwida mulyango kutegwa tube cibeela camukwasyi wa Leza. (Amubale Baroma 15:7.) Mbwaanga Jesu wakatutambula, nokuba kuti tatulondokede, inga tiicaba camaano kukaka muntu uuli woonse!

¹⁹ Kwaandaana, kusalululana alimwi akusulaikana cakutadooneka zinooyaabwiindila munyika eeyi mbotuzumanana kuswena afwaafwi amamanino aabweende bubyaabi oobu. (Gal. 5:19-21; 2Tim. 3:13) Nokuba boobo, mbotuli babelesi ba Jehova, tulomba busongo kuzwa kujulu, ibutasalululi alimwi ibusumpula luumuno. (Jak. 3:17, 18) Tulakkomana kupanga zilongwe abantu bazwa kumasi aambi, kwiiya bukkale bwiindene-indene alimwi nokuba kwiiya myaambo yabamwi. Ciindi nocita boobo, luumuno lulakunka mbuli mulonga alimwi abululami mbuli mayuwe aamulwizi.—Is. 48:17, 18.

20. Ino ncinzi cicitika ciindi luyando nolubumba mizeezo alimwi amyoyo yesu?

²⁰ Mucizyi waku Australia iwaambwa kumatalikilo wakaamba kuti: “Milyango yaluzyibo lwini-lwini yakajalulwa kulindime.” Kujatikizya kwiiya Bbaibbele mbokwakamugwasya wakaamba kuti: “Ndakabumbwa akuba amoyo mupya akucinca mbondakali kuyeeya. Aboobo kusalulula alimwi akusulaika ikwakasimpide miyanda mumoyo wangu kwakamana kandilangilila.” Awalo mukwesu waku Canada waamba kuti lino wazyiba kuti “kutazyiba zintu kanji-kanji nkokupa kuti kakuba kusalululana mubala alimwi akuti bube bwabantu tabuyeeme kubusena nkobakazyalilwa.” Wakakwata mucizyi iwakali kwaambaula mwaambo wa Chingisi. Kucinca kuli boobo ikujatikizya mbotuzibona zintu mbumboni butondezya kuti masimpe luyando lwa Bunakristo lulakonzya kuzunda kusalulula. Lutupa kuba alukamantano lutazungaani.—Kol. 3:14.