1, 2. (a) Ino makani nzi mapati aabajatikizya bantu boonse? (b) Ino nkaambo nzi kubikkila maano kumakani aaya ncokuyandika kapati?

MAZUBA aano, bantu banji babikkila kapati maano kukujana mali. Mizeezo yabo iyeeme aakujana lubono lunji akukakatila kuzintu nzyobajisi. Kubantu bamwi, makani aayandika kapati mukwasyi wabo, buumi bwabo naa zintu nzyobazwidilila kucita mubuumi.

² Nokuba boobo, makani aayandika kapati aatujatikizya toonse, nkusumpulwa kwabulelo bwa Jehova. Tweelede kulangisisya kutegwa tutaalubi makani aaya aayandika kapati. Ino eeco inga cacitika buti? Tulakonzya kujata bubi kucita zintu ziyandika buzuba abuzuba mpoonya akuluba mbwaayandika kapati makani aakusumpula bulelo bwa Jehova. Naa ambweni tulakonzya kwaaluba makani aayandika kapati akaambo kakuti tuliminidwe amapenzi eesu aatugeme. Kulubazu lumbi, ikuti twabikkila maano kumakani aayandika kapati aakusumpula bulelo bwa Jehova, nkokuti tunoojisi nguzu zyakuzunda buyumuyumu ibukonzya kutusikila abuzuba. Kubikkila maano kuli boobo kuyootupa kuyumya cilongwe ncotujisi a Jehova.

3. Ino ncinzi ncaakaamba Saatani kujatikizya bulelo bwa Leza?

³ Kuzanga kwa Saatani kwakapa kuti kube kudooneka naa Jehova uleelela ncobeni kweendelezya. Waamba kuti bulelo bwa Leza tabuli  kabotu alimwi akuti Jehova ulaziima zilenge zyakwe zintu zibotu. Kweelana ambwaakaamba Diabolosi, bantu inga kabakkomene ikuti naa kabalilela. (Matl. 3:1-5) Saatani alimwi waamba kuti taakwe muntu uukonzya kusyomeka kuli Leza cakumaninina. Waamba kuti, ikuti muntu wasunkwa kapati, ulakonzya kubukaka bulelo bwa Jehova. (Job. 2:4, 5) Akaambo kakuti Diabolosi wakakazya bweendelezi bwa Leza, Jehova wabapa ciindi bantu cakuti balibonene bubi ibuliko ikuti naa tiibeendelezyegwa abulelo bwakwe bululeme.

4. Nkaambo nzi makani aajatikizya bulelo bwa Leza ncaayandika kumanizyigwa?

⁴ Bwini mbwakuti, Jehova ulizyi kuti zyoonse nzyaakaamba Saatani nzyakubeja. Aboobo ino nkaambo nzi Leza ncaalekela kuti makani aaya azumanane kwaciindi cilamfwu boobu, ikupa Saatani ciindi cakuti aasinizye ncaakaamba? Bwiinguzi kumubuzyo ooyu bulazijatikizya zilenge zyoonse. (Amubale Intembauzyo 83:18.) Cuusisya ncakuti, bazyali bakusaanguna bakabukaka bulelo bwa Jehova, alimwi bantu banji bacita mbubwenya oobo kusikila asunu. Ambweni bamwi inga bayeeya kuti ncaakaamba Saatani ndiza cakaliluzi. Ikuti makani aaya tanaasalazyigwa mumizeezo yabantu naa bangelo, kutamvwana kunooliko lyoonse akati kazisi, kwiindana kwamubala, myaambo, mikwasyi alimwi abantu. Pele bwaakusalazyigwa bulelo bwa Jehova, bantu boonse bayoolibombya kubulelo bwakwe bululeme mane kukabe kutamani. Luumuno luyoozula munyika yoonse mbubwenya mbocakabede kumatalikilo.—Ef. 1:9, 10.

5. Ino tujisi lubazu nzi mumakani aakusumpula bweendelezi bwa Jehova?

⁵ Kweelela kwabulelo bwa Leza kuyoosumpulwa, pele bulelo bwa Saatani abwabantu buyakwaalilwa mpoonya akunyonyoonwa. Bweendelezi bwa Leza kwiinda mu Bwami bwabu Mesiya buyoozwidilila, alimwi bantu basyomeka bayootondezya kuti bantu balakonzya kuba kulubazu lwabulelo bwa Leza. (Is. 45:23, 24) Sena mulayanda kuba akati kabantu basyomeka ibasumpula bulelo bwa Jehova? Cakutadooneka mulayanda. Kutegwa tube bantu basyomeka, tweelede kubikkila maano kumakani aaya aayandika kapati alimwi akuzyiba mbwaayandika.

6. Ino kusumpulwa kwabulelo bwa Jehova kuyandika kapati buti?

⁶ Kweelana ambokwaambwa kale, kusumpulwa kwabulelo bwa Jehova nkakaambo kayandika kapati ikajatikizya bantu boonse. Kaambo aaka kalayandika kapati kwiinda lukkomano lwamuntu uuli woonse. Sena eeci caamba kuti lufwutuko lwesu tacili cintu ciyandika kapati naa kuti Jehova tatubikkili maano? Peepe. Nkaambo nzi ncotukonzya kwaambila boobo?

7, 8. Ino nkaambo nzi kusumpulwa kwabulelo bwa Leza ncokubikkilizya akuzuzikizyigwa kwazisyomezyo zyakwe?

⁷ Jehova ulabayanda kapati bantu alimwi ulababikkila maano. Nkakaambo kaako wakalyaaba kubelesya bulowa bwa Mwanaakwe kuti cikonzyeke kulindiswe kuyooba abuumi butamani. (Joh. 3:16; 1Joh. 4:9) Ikuti Jehova naali kwaalilwa kuzuzikizya zisyomezyo zyakwe, nkokuti Diabolosi wali kunooba akaambo kakwaambila kuti Leza mubeji walo uubaima zintu zibotu bantu bakwe akuti weendelezya calunya. Kuyungizya waawo, basikukazya nobalijisi twaambo twakufwubaazyila twakuti: “Ino nkuli ikubako kwakwe ooko kwakasyomezyegwa? Kayi, kuzwa buzuba bamatata nobakoona mulufwu, izintu zyoonse zyazumanana mbubonya mbozyakabede kuzwa kumatalikilo aazilenge.” (2Pet. 3:3, 4) Aboobo Jehova uyakubona masimpe kuti kusumpulwa kwabulelo bwakwe kwabikkilizya akufwutulwa kwabantu basyomeka. (Amubale Isaya 55:10, 11.) Kuyungizya waawo, bulelo bwa Jehova bweendelezyegwa aluyando lwakwe. Aboobo tulakonzya kuba masimpe kuti lyoonse unoobayanda alimwi akubabikkila maano kapati babelesi bakwe basyomeka.—Kul. 34:6.

⁸ Nokuba kuti tubandika mbociyandika kapati kusumpula bulelo bwa Jehova, eeci tacaambi kuti lufwutuko lwesu taluyandiki naa kuti swebo  tatukwe mpindu mumeso aakwe. Aawa twaamba buyo kuti bulelo bwa Leza alimwi alufwutuko lwesu tweelede kuzilanga munzila yeelede. Kuzilanga munzila iili boobu zintu kulayandika kapati ikuti naa tuyanda kubikkila maano kumakani aaya aayandika kapati alimwi akuba kulubazu lwabulelo bwa Jehova bululeme.

9. Ino Saatani wakaamba nzi kujatikizya Jobu? (Amubone cifwanikiso icili kumatalikilo aacibalo.)

⁹ Ikaambo ncotweelede kuzilanga munzila yeelede zintu kulaambidwe cakusalazya mubbuku lya Jobu, lyalo lili akati kamabbuku aakasaanguna kulembwa mu Bbaibbele. Mubbuku eeli, twiiya kujatikizya ncaakaamba Saatani kuti, ikuti naa Jobu wasunkwa kapati, wakali kukonzya kumukaka Leza. Saatani wakapa muzeezo wakuti Leza asunke Jobu. Jehova tanaakacita oobo, pele wakazumizya Saatani kuti amusunke Jobu, kwiinda mukwaamba kuti: “Zyoonse nzyajisi zili mumaanza aako.” (Amubale Jobu 1:7-12.) Muciindi cisyoonto buyo, Jobu wakasweekelwa babelesi bakwe, lubono lwakwe alimwi abana bakwe bali kkumi. Saatani wakacita zintu eezyi munzila yakali kulibonya mbuli kuti Leza lwakwe kumugama nguwakapa kuti Jobu abe mumapenzi. (Job. 1:13-19) Cakatobela ncakuti Saatani wakapa kuti Jobu aciswe cilwazi cisesemya alimwi icicisa kapati. (Job. 2:7) Mapenzi aakwe akayungizyigwa amajwi aacisizya moyo ngaakaamba mukaintu wakwe alimwi abaalumi botatwe ibakali kulicengeezya kuba balongwe bakwe.—Job. 2:9; 3:11; 16:2.

10. (a) Ino Jobu wakacita nzi kutondezya kuti wakali kusyomeka kuli Leza? (b) Ino muunzila nzi mwaakalezya?

¹⁰ Ino ncinzi cakacitika? Kutamikizya kwa Saatani kwakalibonya kuti kwakali kwakubeja. Jobu wakakaka kuzangila Leza. (Job. 27:5) Nokuba boobo, kwakaindi kasyoonto buyo Jobu wakaalilwa kuzilanga munzila yeelede zintu. Wakazoobikkila kapati maano kukulitondezya kuti wakaliluleme, mane buya akuyanda kujana kaambo ncaakali kupengela. (Job. 7:20; 13:24) Andiswe ambweni tulakonzya kwaamvwisya matongoosi aakwe mbwaanga wakapenga citaambiki. Nokuba boobo, Leza wakabona kuti Jobu wakali kuyandika kululamika. Ino Jehova wakamwaambila nzi?

11, 12. Ino ncinzi Jehova ncaakagwasya Jobu kumvwisya, alimwi mbuti mbwaakalimvwa?

¹¹ Majwi aa Leza kuli Jobu ajanika muzyaandaano zyone mubbuku lya Jobu, nkokuti mucaandaano 38 kusikila mucaandaano 41. Nokuba boobo, kunyina mpotubala kuti Leza wakamwaambila Jobu cacigaminina kujatikizya kaambo ncaakali kupengela. Kaambo kapati Jehova ncaakabandikila a Jobu tiikwakali kumupandulwida kaambo ncaakali kupengela, mbuli kuti Leza wakeelede kulisalazya kuti wakanyina kaambo mumakani aaya. Muciindi caboobo, Jehova wakali kuyanda kugwasya Jobu kuti azyibe Leza mbwaakali mupati kapati ikuti twamweelanya anguwe.  Alimwi wakumugwasya Jobu kubona kuti kwakali twaambo tupati ntwaakeelede kubikkila maano. (Amubale Jobu 38:18-21.) Eeci cakamugwasya Jobu kutalika alimwi kuzilanga munzila yeelede zintu.

¹² Sena Jehova wakamucitila lunya Jobu kwiinda mukumupa lulayo lugaminide boobo kakuli wakazwide aakupenga citaambiki? Peepe alimwi Jobu awalo tanaakali kuyeeya boobo pe. Nokuba kuti wakapenga kapati, Jobu wakatalika alimwi kumulumba Leza. Mane buya wakaamba kuti: “Ndaajola majwi ngendaambide, ndeempwa mulusuko alimwi amumulota.” Jobu wakalimvwa boobo akaambo kalulayo lwa Jehova lugaminide pele ilukatalusya. (Job. 42:1-6) Leza katanabandika anguwe, Jobu alimwi wakapegwa lulayo lwakumululamika kuzwa kuli Elihu iwakali mwana-mwana. (Job. 32:5-10) Jobu naakakutambula kululamikwa kwa Leza alimwi akucinca mbwaakali kuzibona zintu, Jehova wakabatondezya bamwi mbwaakakukkomanina kusyomeka kwa Jobu mumasunko.—Job. 42:7, 8.

13. Mbuti lulayo lwa Jehova mbolwakamugwasya Jobu noliba leelyo nokwakainda ciindi cilamfwu kuzwa naakapenga?

¹³ Lulayo lwa Jehova lwakali kuyoozumanana kumugwasya Jobu noliba leelyo mapenzi aakwe naakamana. Munzila nzi? Nokuba kuti “Jehova wakaleleka mamanino aabuumi bwa Jobu kwiinda matalikilo aakwe,” kutegwa zintu zibe kabotu alimwi cakatola ciindi cili mbocibede. Kumbele “wakaba abana bambi basankwa bali ciloba abana basimbi botatwe.” (Job. 42:12-14) Cakutadooneka Jobu wakali kubayeeya bana bakwe ibakafwa kumatalikilo akaambo kamilimo ya Saatani. Kweelede kuti kwaciindi cili mbocibede Jobu wakali kwaayeeya mapenzi aakamucitikila. Nokuba kuti mukuya kwaciindi wakazookazyiba kaambo ncaakali kupengela, ambweni zimwi ziindi wakali kuyeeya ikaambo ncaakeelede kupenga kusika antaamu eeyo. Kufwumbwa naa wakali kuyeeya nzi, bwini mbwakuti wakali kuluyeeya lulayo ndwaakamupa Leza. Kucita boobo kwakali kuyoomugwasya kuzumanana kuzilanga munzila yeelede zintu, mpoonya eeco cakali kuyoomuumbulizya.—Int. 94:19.

14. Ino ncinzi ncotukonzya kwiiya kuzintu zyakamucitikila Jobu?

¹⁴ Andiswe tulakonzya kwiiya kuzilanga munzila yeelede zintu alimwi akujana luumbulizyo kuzwa kuzintu zyakamucitikila Jobu. Jehova wakaciyobola cibalo eeci kuti ‘cituyiisye, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.’ (Rom. 15:4) Ino nciiyo nzi ncotwiiya? Ciiyo ncakuti: Tatweelede kubikkila kapati maano kuzintu zitucitikila mubuumi bwesu cakuti mane buya twaakwaaluba makani aaya aayandika kapati, nkokuti kusumpulwa kwabulelo bwa Jehova. Alimwi tutalubi kuti lubazu lwesu mumakani aaya aayandika kapati ndwakuzumanana kusyomeka noliba leelyo notuli mubukkale bukatazya kapati, mbubwenya mbuli mbwaakacita Jobu.

15. Ino kusyomeka kwesu notuli mumasunko kuzuzikizya nzi?

 ¹⁵ Nkaambo nzi ncotunga twaambila kuti cilagwasya kuyeeya mbokuyandika kusyomeka kwesu? Nkaambo kakuti citondezya kuti kuli kaambo masunko ncaatucitikila. Masunko taatondezyi kuti Jehova takkomene andiswe pe, pele atupa coolwe cakutondezya kuti tuli kulubazu lwabulelo bwa Leza. (Tus. 27:11) Kuliyumya kwesu kupa kuti tube “abukkale mbwakkomanina Leza” alimwi kuyumya bulangizi mbotujisi. (Amubale Baroma 5:3-5.) Makani aa Jobu akankaizya kaambo kakuti, “Jehova ulaalubomba kapati aluse.” (Jak. 5:11) Aboobo tulakonzya kuba masimpe kuti uyootupa bulumbu swebo alimwi abaabo boonse ibasumpula bulelo bwakwe. Ikuzyiba makani aaya kutugwasya ‘kuliyumya cakumaninina kumwi katukkazikide moyo alimwi akukondwa.’—Kol. 1:11.

16. Nkaambo nzi ncotweelede kuliyeezya kujatikizya mbociyandika kusumpula bulelo bwa Jehova?

¹⁶ Ikwaamba masimpe, kubikkila maano kukusumpula bulelo bwa Jehova cilakonzya kukatazya. Zimwi ziindi mapenzi eesu alakonzya kutuvwulila. Naaba yaayo aboneka mbuli kuti masyoonto alakonzya kutuzyinga mumizeezo ikuti katwaayeeya ciindi coonse. Aboobo tweelede kuliyeezya lyoonse mbociyandika kusumpula bulelo bwa Leza ciindi notuba mubukkale bukatazya.

17. Ino mbuti kutola lubazu mumulimo wa Jehova mbokukonzya kutugwasya kuzumanana kubikkila maano kumakani aayandika kapati?

¹⁷ Ikuzumanana kutola lubazu mumulimo wa Jehova lyoonse kulakonzya kutugwasya kuzumanana kubikkila maano kumakani aaya aayandika kapati. Mucikozyanyo, Kamboni umwi wazina lya Renee wakaciswa bulwazi bwakulebuka mubili alimwi abulwazi bwakkansa. Ciindi naakali kusilikwa kucibbadela, wakali kubakambaukila babelesi bakucibbadela, balwazinyina alimwi abantu ibakali kuboola kubona balwazi. Kucibbadela cimwi, wakabeleka mawoola aali 80 kukambaukila bantu munsondo buyo zyobilo acisela. Noliba leelyo naakali afwaafwi kufwa, Renee taakwe naakacileka kubikkila maano kubulelo bwa Jehova. Kucita boobo kwakapa kuti mapenzi aakwe amwi ayozye-yozye.

18. Mbuti cakuluula camucizyi umwi mbocitondezya mpindu iijanika kwiinda mukusumpula bulelo bwa Jehova?

¹⁸ Masimpe, alimwi tulayanda kuti katubikkila maano kubulelo bwa Jehova ciindi notujana buyumuyumu bwabuzuba abuzuba alimwi aciindi notukatazyigwa azintu zimwi zyatali kuyeeyelwa. Ba Jennifer bakakkala mazuba otatwe abbuwa lyandeke kabalindila ndeke kuti baunke kwabo. Ndeke zyoonse bakali kuzisumpya. Mbwaanga bakalilendeledwe akukatala kapati, nobakatyompwa akutalika kulyeetezya. Pele muciindi caboobo, bakapaila kutegwa babone mbobakali kukonzya kupa lugwasyo lwakumuuya kuli baabo ibakatyompedwe mbubwenya mbuli mbabo. Ino ncinzi cakacitika akaambo kakubweza ntaamu eeyo? Ba Jennifer bakakambaukila bantu banji alimwi akumwaya mabbuku manji. Mboobu mbobakaamba, “Ndakalimvwa kuti Jehova wakandilongezya nokuba kuti ndakali mubukkale bukatazya alimwi wakandipa nguzu zyakwaambilizya zina lyakwe munzila yeelede.” Masimpe, bakazumanana kubikkila maano kumakanze aa Jehova.

19. Ino bantu ba Jehova bali kulubazu lwani kujatikizya makani aabweendelezi?

¹⁹ Kuyandisya bulelo bwa Jehova kupa kuti bakombi bakasimpe baindane abakombi bakubeja. Kuzwa kaindi, bantu ba Leza bali kubusumpula bulelo bwakwe. Mbwaanga tusumpula bukombi bwakasimpe, umwi aumwi wesu weelede kusolekesya kuzumanana kucita oobo kweelana a Magwalo mbwaamba.

20. Ino Jehova ulimvwa buti kujatikizya kusoleka kwanu ikusumpula bulelo bwakwe?

²⁰ Amusyome kuti Jehova ulalumba akaambo kakusolekesya kwanu ikusumpula bulelo bwakwe kwiinda mukumubelekela cakusyomeka alimwi akuliyumya ciindi nomusunkwa. (Int. 18:25) Cibalo citobela ciyakulanga-langa twaambo atumbi bulelo bwa Jehova ncobweelela kusumpulwa alimwi ambomukonzya kubusumpula.