1-2. (a) Nkaambo nzi ncotukonzya kuyeeya kuti Jesu inga watupa nzila nguba-uba yakwiibaluka lufwu lwakwe? (b) Ino mbube nzi bwa Jesu mbotutiilange-lange?

SENA mulakonzya kupandulula cicitika ku Ciibalusyo calufwu lwa Kristo icicitwa mwaka amwaka? Cakutadooneka bunji bwesu tulakonzya kuziyeeya zintu izicitika mubuzuba bwa Mulalilo wa Mwami. Nkaambo nzi? Akaambo kakuti cakulya inga cipangidwe munzila nguba-uba kapati. Nokuba boobo, muswaangano ooyu ulayandika kapati. Nkakaambo kaako inga twabuzya kuti, ‘Ino nkaambo nzi cakulya eeci ncocipangwa munzila nguba-uba?’

² Naakali kubeleka mulimo wakwe waanyika, Jesu wakalizyibidwe mukuyiisya makani aayandika munzila nguba-uba alimwi iitakatazyi kumvwisya. (Mt. 7:28, 29) Munzila njiyonya eeyi, wakatupa nzila nguba-uba pesi iyandika kapati yakwiibaluka * lufwu lwakwe. Atuyeeyesye cakubikkila maano kujatikizya Ciibalusyo eeci alimwi azintu zimwi Jesu nzyaakaamba akucita. Tulamvwisya kapati kujatikizya Jesu mbwatondezya kulicesya, mbwatondezya busicamba ambwatondezya luyando, alimwi tulaiya mbuli mbotukonzya kumwiiya kabotu.

3. Kweelana ambokulembedwe kulugwalo lwa Matayo 26:26-28, mbuti cakulya ca Ciibalusyo ncaakatalisya Jesu mbocakabambidwe munzila nguba-uba, alimwi ino zintu zyobilo nzyaakabelesya zyakali kwiiminina nzi?

³ Jesu wakatalisya Ciibalusyo calufwu lwakwe kali antoomwe abaapostolo bakwe basyomeka ibali 11. Wakabweza cakulya cakacaala lya Pobwe Lyakwiindilila akutalisya ciibalusyo eeci citakatazyi.  (Amubale Matayo 26:26-28.) Wakabelesya buyo cinkwa citajisi bumena alimwi awaini wakaliko kale. Jesu wakaambila baapostolo bakwe kuti zintu eezyi zyobilo zyakali kwiiminina bulowa alimwi amubili wakwe uulondokede, walo ngwaakali kuya kwaaba muciindi buyo cisyoonto akaambo kambabo. Kweelede kuti baapostolo tiibakagambwa kujatikizya mbowatakali kukatazya muswaangano ooyu mupya uuyandika kapati. Nkaambo nzi?

4. Ino lulayo Jesu ndwaakapa kumatalikilo kuli Marta inga lwatugwasya buti kumvwisya kaambo Jesu ncaakabona masimpe kuti cakulya ca Ciibalusyo cabambwa munzila nguba-uba?

⁴ Amuyeeye cakacitika kakucili myezi iili mbwiibede, mumwaka watatu wamulimo wa Jesu, ciindi naakaswaya kuŋanda yabalongwe bakwe mbaakali kuyandisya, nkokuti Lazaro, Marta alimwi a Mariya. Kabakkede cakuliiba, Jesu wakatalika kuyiisya. Marta wakaliko, pesi wakajisi bubi kubamba cakulya cinji kumweenzu wakwe uulemekwa. Naakabona boobo, Jesu calubomba wakamulaya Marta, kumugwasya kubona kuti talili lyoonse cakulya cinji nocakali kuyandika. (Lk. 10:40-42) Mpoonya, kakusyeede buyo mawoola masyoonto kutegwa afwe lufwu lwacipaizyo, Jesu wakalutobela lulayo lwakwe mwini. Wakabona masimpe kuti cakulya ca Ciibalusyo cabambwa munzila nguba-uba. Ino eeci citwaambila nzi kujatikizya Jesu?

5. Ino cakulya eeci citondezya nzi kujatikizya Jesu, alimwi ino eeci ceendelana buti alugwalo lwa Bafilipi 2:5-8?

⁵ Muzintu zyoonse Jesu nzyaakaamba akucita, wakatondezya kulicesya. Nkakaambo kaako tacigambyi kuti Jesu wakatondezya bube bwakulicesya kapati mubusiku bwamamanino bwabuumi bwakwe anyika. (Mt. 11:29) Wakalizyi kuti wakali afwaafwi kwaaba cipaizyo cipati citanacitikide kuzwa ciindi bantu nobakatalika kupona alimwi Jehova wakali kuyoomubusya kuti akabe aacuuno cabulemu kapati kujulu. Nokuba kuti wakalizyi oobo, Jesu kunyina naakayanda kulisumpula kwiinda mukubamba zintu zinji kutegwa lufwu lwakwe kaluyeeyegwa. Pele wakaambila basikwiiya bakwe kuti ciindi comwe amwaka bakeelede kumwiibaluka kwiinda mucakulya eeci cibambidwe munzila nguba-uba. (Joh. 13:15; 1Kor. 11:23-25) Cakulya eeci citakatazyi pesi iciyandika kapati citondezya kuti Jesu tanaakali muntu uulisumpula. Tulakkomana kuti kulicesya nkumwi kwabube bulibedelede mbwajisi Mwami wesu wakujulu.—Amubale Bafilipi 2:5-8.

6. Mbuti mbotukonzya kwiiya kulicesya kwa Jesu ciindi notwasunkwa?

⁶ Ino mbuti mbotukonzya kwiiya kulicesya kwa Jesu? Kwiinda mukubikka zintu nzyobayandika bamwi mubusena bwakusaanguna. (Flp. 2:3, 4) Amuyeeye alimwi mubuzuba bwamamanino  bwabuumi bwa Jesu anyika. Jesu wakalizyi kuti ino-ino wakali kuyoofwa lufwu lucisa kapati; nokuba boobo wakabikkilide maano kapati kubaapostolo bakwe basyomeka, aabo muciindi buyo cisyoonto ibakali kuyooba mubuumba akaambo kanguwe. Nkakaambo kaako wakabelesya busiku bwamamanino kubayiisya, kubakulwaizya alimwi akubaumbulizya baapostolo bakwe. (Joh. 14:25-31) Cakulicesya, Jesu wakabikkila kapati maano kuli bamwi muciindi cakulibikkila maano lwakwe mwini. Eelo kaka ncikozyanyo cibotu kapati ncaakatusiila!

7. Mbuti Jesu mbwaakatondezya busicamba kapati naakamana buyo kutalisya Mulalilo wa Mwami?

⁷ Naakamana buyo kutalisya Mulalilo wa Mwami, Jesu wakatondezya busicamba kapati. Munzila nzi? Jesu wakazumina kuti kuyanda kwa Bausyi kucitwe kulinguwe, nokuba kuti wakalizyi kuti kucita boobo kwakali kuyakwaamba kuti uyoojaigwa akaambo kakutamikizyigwa mulandu uusisya kapati wakusampaula Leza. (Mt. 26:65, 66; Luka 22:41, 42) Jesu wakazumanana kusyomeka cakumaninina kutegwa alemeke zina lya Jehova, kusumpula bulelo bwa Leza alimwi akujalula nzila yabuumi butamani kubantu beempwa. Aciindi ncimunya eeco, Jesu wakabagwasya baapostolo bakwe kulibambila zintu zyakali kuyootobela.

8. (a) Ino ncinzi Jesu ncaakaambila baapostolo bakwe basyomeka? (b) Mumyaka yakatobela kuzwa naakafwa, mbuti basikwiiya ba Jesu mbobakatobela cikozyanyo cakwe cabusicamba?

⁸ Jesu wakatondezya busicamba ciindi naakakubikka ambali kulibilika kuli koonse nkwaakajisi akubikkila buyo maano kuzintu nzyobakali kuyandika baapostolo bakwe basyomeka. Mulalilo wa Mwami ngwaakatalisya Jesu ciindi naakamana kutanda Judasi, wakali kuyooyeezya baabo ibakali kuyooba basikumutobela ibananike kujatikizya bulowa bwa Jesu ibwakatika mbobugwasya alimwi akuba mucizuminano cipya anguwe. (1Kor. 10:16, 17) Kutegwa abagwasye kusinizya  kuti baleelela kubwiite bwakujulu, Jesu wakabaambila basikumutobela walo alimwi a Bausyi ncobakali kulangila kulimbabo. (Joh. 15:12-15) Alimwi Jesu wakabaambila baapostolo bakwe kujatikizya masunko ngobakali kuyoojana kumbele. Mpoonya ikutegwa abakulwaizye kutobela cikozyanyo cakwe, wakabaambila ‘kuba basicamba!’ (Joh. 16:1-4a, 33) Nokwakainda myaka minji, basikwiiya ba Jesu bakacili kutobela cikozyanyo cakwe cakulyaaba alimwi akutondezya busicamba. Nokuba kuti cakali kupa kuti kabapenzyegwa, bakali kugwasyanya mumasunko aayindene-indene ngobakali kujana.—Heb. 10:33, 34.

9. Mbuti mbotukonzya kwiiya Jesu mukutondezya busicamba?

⁹ Mbubwenya buyo amazuba aano, tutobela cikozyanyo ca Jesu cabusicamba. Mucikozyanyo, kuyandika busicamba kutegwa tubagwasyilizye bakwesu ibapenzyegwa akaambo kalusyomo lwabo. Zimwi ziindi, bakwesu balakonzya kwaangwa kakutakwe kaambo. Ikuti eeco cacitika, tweelede kubacitila zyoonse nzyotukonzya, nokuba kubaiminina. (Flp. 1:14; Heb. 13:19) Aimbi nzila mbotutondezya busicamba nkwiinda mukuzumanana kukambauka “cabusicamba.” (Mil. 14:3) Mbubwenya mbuli Jesu, tulikanzide kuzumanana kukambauka mulumbe wa Bwami, nokuba kuti bantu balakonzya kutukazya alimwi akutupenzya. Nokuba boobo, zimwi ziindi tulakonzya kujana kuti tatujisi busicamba. Ino ncinzi ncotukonzya kucita?

10. Kwaakusyaala nsondo zisyoonto kutegwa Ciibalusyo cicitwe, ncinzi ncotweelede kunoocita alimwi nkaambo nzi?

¹⁰ Tulakonzya kubuyumya busicamba bwesu kwiinda mukuyeeya kujatikizya bulangizi mbotujisi akaambo kacinunuzyo ca Kristo. (Joh. 3:16; Ef. 1:7) Kakusyeede nsondo zisyoonto kutegwa Ciibalusyo cicitwe, tunoojisi coolwe cilibedelede cakutondezya kulumba kwesu akaambo kacinunuzyo. Muciindi eeco, amuzumanane kutobela mulongo wakubala Bbaibbele lya Ciibalusyo alimwi akuzinzibala kuyeeya zintu izyakacitika  kali afwaafwi kufwa Jesu. Mpoonya twaakuswaangana lya Mulalilo wa Mwami, tuyoomvwisya kapati ncozyaamba zitondezyo zya Ciibalusyo alimwi acipaizyo ciyandika ncoziiminina. Ciindi notumvwisya ncaakatucitila Jesu a Jehova akumvwisya mbocitugwasyilizya swebo antoomwe abayandwa besu, bulangizi bwesu bulayuma, alimwi tulakulwaizyigwa kuzumanana kuliyumya cabusicamba mane kusikila kumamanino.—Heb. 12:3.

11-12. Ino ncinzi ncotwaiya kusikila waawa?

¹¹ Kusikila waawa, twaiya kuti Mulalilo wa Mwami utuyeezya cinunuzyo ciyandika kapati alimwi abube bwa Jesu bulibedelede bwakulicesya abusicamba. Eelo kaka tulalumba kapati kuti Jesu wazumanana kutondezya bube oobu mbwali Mupaizi wesu Mupati kujulu, ooyo uutukombelezyela kutegwa tukafwutuke. (Heb. 7:24, 25) Kutondezya kulumba kwesu kupati, cakusyomeka tweelede kuzumanana kwiibaluka lufwu lwa Jesu mbubwenya mbuli mbwaakalailila. (Lk. 22:19, 20) Tulacita eeci mubuzuba bweendelana a Nisani 14, ibuzuba buyandika kapati mumwaka.

¹² Kwiinda kububambe bwacakulya cuuba-uba ca Mulalilo wa Mwami, tulakonzya kwiiya bube abumbi ibwakapa kuti Jesu atufwide. Ciindi naakali kupona aanyika kali muntu, wakalizyibidwe kapati akaambo kabube oobu. Ino mbube nzi oobo?

13. Ino luyando ndwaakatondezya Jehova alimwi a Jesu lupandulwidwe buti mulugwalo lwa Johane 15:9 alimwi alwa 1 Johane 4:8-10, alimwi ino mbaani ibagwasyigwa aluyando oolo?

¹³ Munzila iilondokede, Jesu wakalutondezya luyando lupati Jehova ndwajisi kulindiswe muli zyoonse nzyaakacita. (Amubale Johane 15:9; 1 Johane 4:8-10.) Kwiinda zyoonse, Jesu wakakulwaizyigwa amoyo wakwe woonse kwaaba buumi bwakwe akaambo kandiswe. Kufwumbwa naa tuli bananike naa ‘bambelele zimbi,’ tulagwasyigwa kuluyando oolo Jehova a Mwanaakwe ndobakatutondezya kwiinda mucipaizyo eeco. (Joh. 10:16; 1Joh. 2:2) Alimwi amuyeeye kujatikizya zintu nzyobakabelesya kubamba cakulya ca Ciibalusyo; ziyubununa luyando ndwajisi Jesu alimwi ambwababikkila maano basikwiiya bakwe. Mubuti?

14. Muunzila nzi Jesu mwaakatondezya luyando kuli basikwiiya bakwe?

¹⁴ Jesu wakatondezya luyando kuli basikumutobela bakwe ibananikidwe amuuya kwiinda mukutalisya bubambe butakatazyi ibujatikizya cakulya cibambidwe munzila nguba-uba kutegwa kababutobela. Mukuya kwaciindi, basikwiiya bananike basyomeka aabo bakeelede kucita Ciibalusyo mwaka amwaka, kucita oobo mubukkale bwiindene-indene, kubikkilizya amuntolongo. (Ciy. 2:10) Sena bakali kukonzya kumuswiilila Jesu? Inzya bakali kukonzya!

15-16. Mbuti bamwi mbobakacikonzya kucita Mulalilo wa Mwami mubukkale bukatazya?

¹⁵ Kusikila mazuba aano, Banakristo bakasimpe balasolekesya kwiibaluka lufwu lwa Jesu. Balatobela bubambe bwa Mulalilo wa Mwami kusikila mpobagolela, zimwi ziindi nomuba mubukkale bukatazya. Amubone zikozyanyo zitobela. Ciindi Mukwesu Harold King naakali alikke muntolongo ku China, wakajana nzila yakuti acite Ciibalusyo. Cakusisikizya wakabamba zitondezyo zya Ciibalusyo ikubelesya zintu nzyaakajisi. Alimwi wakasolekesya kubalila mazuba kutegwa azyibe deeti Ciibalusyo nocakeelede kucitwa. Nocakasika ciindi ca Ciibalusyo, kali alikke muntolongo wakaimba, wakapaila akupa makani aamu Bbaibbele.

¹⁶ Nceeci cikozyanyo acimbi. Kabunga kabacizyi ibakaangidwe mucilabba cakupenzezya ciindi ca Nkondo Yanyika Yoonse Yabili bakabikka buumi bwabo muntenda kutegwa baibaluke Mulalilo wa Mwami. Nokuba boobo, akaambo kakuti zintu zyakabelesyegwa tiizyakali kukatazya, bakacikonzya kucita Ciibalusyo cakusisikizya. Bakaamba kuti: “Twakaimikila antoomwe katuzingulukide  katebulu kasyoonto ikakavwumbidwe cisani cituba kakuli waini alimwi acinkwa atala. Twakayasya nkendulu muŋanda mbwaanga magesi naakapa kuti cizyibwe ncotwakali kucita. . . . Twakainduluka zikonke zyesu kuli Taateesu kuti tuyoobelesya nguzu zyesu zyoonse kutegwa Zina lyakwe ilisalala lisumpulwe.” Eelo kaka lulilibedelede lusyomo ndobakatondezya! Alimwi talulikomeneni luyando Jesu ndwaakatondezya ciindi naakapa kuti cikonzyeke kulindiswe kucita Ciibalusyo nomuba mubukkale bukatazya!

17. Ino mibuzyo nzi njotukonzya kulibuzya?

¹⁷ Mbociyaabuswena Ciibalusyo, inga twacita kabotu kulibuzya mibuzyo iitobela: ‘Ino mbuti mbondikonzya kumwiiya Jesu cakulomya mukutondezya luyando? Sena ndilabikkila maano kapati kuzintu nzyobayandika bakombima kwiinda nzyondiyandika mebo? Sena ndilangila zinji kuzwa kubakwesu abacizyi kwiinda nzyobakonzya kucita naa ndilikuzyi kulezya kwabo? Atumwiiye Jesu lyoonse alimwi ‘akweetelelana.’—1Pet. 3:8.

18-19. (a) Ncinzi ncotukonzya kuba masimpe? (b) Ino mukanzide kucita nzi?

¹⁸ Bubambe bwakucita Ciibalusyo calufwu lwa Kristo tabukazumanani kwaciindi cilamfwu. Jesu ‘aakuboola’ ciindi camapenzi mapati, uyoobunganya “basale” bakwe basyeede kuya kujulu, mpoonya Ciibalusyo ciyooleka kucitwa.—1Kor. 11:26; Mt. 24:31.

¹⁹ Nociba ciindi twaakuleka kucita Ciibalusyo, tulakonzya kuba masimpe kuti bantu ba Jehova bacinoociyeeya kapati cakulya eeci citakatazyi kacili citondezyo cakulicesya kupati, busicamba alimwi aluyando lutanatondezyedwe amuntu uuli woonse. Aciindi eeco, aabo ibakali kujanika kumulalilo cakutadooneka banooluula bubotu oobo kutegwa bakagwasye baabo ibanoopona kuciindi eeco. Pele kutegwa lino tugwasyigwe kucakulya eeci, tweelede kuba amakanze aakwiiya kulicesya, busicamba aluyando lwa Jesu. Ikuti twacita oobo, tulakonzya kuba masimpe kuti tuyootambula bulumbu bwesu kuzwa kuli Jehova.—2Pet. 1:10, 11.