1, 2. Ino mbuti Jehova mbwabelesya zintu zyakwe cabwaabi?

JEHOVA ngu Leza mwaabi. Zintu zyoonse nzyotujisi zizwa kulinguwe. Jehova ngomukamwini ngolida alimwi ansiliva yoonse antoomwe azilengwaleza zimbi zyoonse izili anyika, alimwi ulazibelesya kuti zipe zintu ziyandika kutegwa buumi buzumanane. (Int. 104:13-15; Hag. 2:8) Bbaibbele lilijisi zibalo zinji izyaamba Jehova mbwaakabelesya zintu zyakwe camaleele kutegwa ape nzyobakali kuyandika bantu bakwe.

² Kwamyaka iili 40, Jehova wakapa cisi ca Israyeli mana alimwi amaanzi ciindi nobakali munkanda. (Kul. 16:35) Aboobo, “tiibakabula cintu pe.” (Neh. 9:20, 21) Kwiinda mumusinsimi Elisha, Jehova wakacita maleele kwiinda mukuyungizya mafwuta masyoonto ngaakajisi mukamufwu uusyomeka. Cipego ca Leza cakamugwasya kuti abbadele zikwelete zyakwe alimwi kuzwa waawo wakaba amali ngaakali kukonzya kubelesya walo abana bakwe. (2Bam. 4:1-7) Kwiinda mukugwasyigwa a Jehova, Jesu munzila yamaleele wakapanga cakulya mane amali ciindi nokwakali kuyandika.—Mt. 15:35-38; 17:27.

3. Ino ncinzi ncotutiilange-lange mucibalo eeci?

³ Jehova ulakonzya kubelesya zintu zili zyoonse kutegwa agwasyilizye  zilenge zyakwe zyamunyika. Nokuba boobo, utamba babelesi bakwe kuti babelesye zintu zyabo kugwasyilizya mulimo uucitwa mumbunga yakwe. (Kul. 36:3-7; amubale Tusimpi 3:9.) Ino nkaambo nzi Jehova ncalangila kuti katumupa zintu nzyotujisi? Ino mbuti bantu bakaindi basyomeka mbobakali kubelesya mali aabo kutegwa bagwasyilizye milimo yakali kucitwa abaiminizi ba Jehova? Ino mbunga yaabelesya buti mali aasangwa mazuba aano? Bwiinguzi kumibuzyo eeyi bulabandikwa mucibalo eeci.

4. Ino ncinzi ncotutondezya kuli Jehova ciindi notugwasyilizya mulimo wakwe?

⁴ Tulamupa Jehova akaambo kaluyando ndotujisi kulinguwe alimwi akumulumba. Ciindi notulanga-langa zintu zyoonse Jehova nzyatucitila, tulakulwaizyigwa kapati. Naakali kupandulula zintu izyakali kuyandika kumulimo wakuyaka tempele iwakali kulangilwa, Mwami Davida wakazumina kuti zintu zyoonse nzyotujisi zizwa kuli Jehova alimwi akuti kufwumbwa ncotumupa Jehova cizwa akati kazintu nzyaakatupa kale.—Amubale 1 Makani 29:11-14.

5. Ino mbuti Magwalo mbwaatondezya kuti kupa kuzwa ansi amoyo ncintu ciyandika kapati mubukombi bwakasimpe?

⁵ Kupa alimwi ncitondezyo cabukombi bwesu kuli Jehova. Mucilengaano, mwaapostolo Johane wakamvwa babelesi ba Jehova kujulu kabaamba kuti: “Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zintu zyoonse, alimwi akaambo kakuyanda kwako zyakabako alimwi zyakalengwa.” (Ciy. 4:11) Sena tamukonzyi kuzumina kuti Jehova uleelela kutambula bulemu boonse alulemeko nzyotukonzya kumupa kwiinda mukumupa zintu ziinda kubota nzyotujisi? Kwiinda muli Musa, Jehova wakalailila bana Israyeli kuti kabalibonya kubusyu bwa Jehova ziindi zyotatwe mumapobwe akali kucitwa mwaka amwaka. Kacili cibeela cabukombi bwabo kumapobwe aayo, bana Israyeli tiibakeelede “kuboola kubusyu bwa Jehova cinkwamaanza.” (Dt. 16:16) Mbubwenya buyo amazuba aano, kupa kuzwa ansi amoyo kutegwa tutondezye kulumba alimwi akugwasyilizya mulimo wacibeela caanyika cambunga ya Jehova ncintu ciyandika kapati mubukombi.

6. Ino nkaambo nzi kupa ncocili cintu cili kabotu kulindiswe? (Amubone cifwanikiso icili kumatalikilo aacibalo.)

⁶ Kupa, ncintu cili kabotu kulindiswe. Ncintu cigwasya kulindiswe kuti katupa cabwaabi kutali buyo kuba basikutambula. (Amubale Tusimpi 29:21.) Tulakonzya kuyeeya mwana uupa bazyali bakwe cipego kuzwa kumali masyoonto ngobamupa. Eelo kaka bazyali balalumba cipego eeco! Mwana uubeleka mulimo wabupainiya alimwi uukkala aŋanda ulakonzya kupa bazyali mali amwi kutegwa agwasyilizye kuula zintu ziyandika aŋanda. Nokuba kuti bazyali tabakonzyi kulangila cintu cili boobu kucitika, balakonzya kuzitambula zipego eezyi akaambo kakuti kumwana ninzila yakutondezya kulumba kuzintu zyoonse nzyobamucitila. Mbubwenya buyo, Jehova ulizyi kuti kupa zintu zyesu ncintu cili kabotu kulindiswe.

7, 8. Ino mbuti bantu ba Jehova bakaindi mbobakapa cikozyanyo mukusanga (a) kutegwa bagwasyilizye milimo imwi iigaminide? (b) kutegwa bagwasyilizye mulimo uuli woonse?

⁷ Kupa kuzwa kuzintu nzyotujisi kulatondezyegwa kabotu mu Magwalo. Ziindi zimwi, bantu ba Jehova bakali kusanga kutegwa bagwasyilizye milimo imwi iigaminide. Mucikozyanyo, Musa wakaamba kuti kusangwe kutegwa tente lyakukombela liyakwe, mbubwenya mbuli Davida mbwaakacita kutegwa tempele liyakwe. (Kul. 35:5; 1Mak. 29:5-9) Ciindi Mwami Jehoasi naakali kulela, bapaizi bakabelesya mali aakasangwa kubambulula ŋanda ya Jehova. (2Bam. 12:4, 5) Ciindi bakwesu mumbungano ya Bunakristo yamumwaanda wamyaka wakusaanguna nobakazyibisyigwa  zyalugwasyo lwakali kuyandika akaambo kanzala, “bakakanza umwi aumwi kweelana ancaakali kukonzya kupa, ikutumina lugwasyo kubakwesu bakkala mu Judaya.”—Mil. 11:27-30.

⁸ Munzila zimwi, bantu ba Jehova bakali kupa lugwasyo lwamali kuli baabo bakali kweendelezya mumulimo. Kuciindi ca Mulawo wa Musa, ba Levi tiibakali kutambula lukono mbuli misyobo iimwi mboyakali kutambula. Muciindi caboobo, bana Israyeli bakali kubapa cakkumi, calo cakali kupa kuti ba Levi babikkile buyo maano kumulimo wabo kutente lyakubunganina. (My. 18:21) Mbubwenya buyo, mukuya kwaciindi Jesu abaapostolo bakwe bakagwasyigwa kuzwa kubwaabi bwabamakaintu “ibakali kubakutaukila kwiinda mukubelesya lubono lwabo.”—Lk. 8:1-3.

9. Ino zyakali kuzwa kuli nzyobakali kusanga bakaindi?

⁹ Masimpe, zyakusanga eezyi zyakaliindene nkozyakali kuzwa. Ciindi nobakali kusanga kutegwa tente lyakukombela liyakwe munkanda, kulibonya kuti nzyobakali kupa bana Israyeli zyakali kubikkilizya anzyobakaletelezya kuzwa ku Egepita. (Kul. 3:21, 22; 35:22-24) Mumwaanda wamyaka wakusaanguna, Banakristo bamwi bakasambala zintu zyabo, mbuli myuunda amaanda, mpoonya akuleta mali aakajanwa kubaapostolo. Baapostolo bakali kwaabanya mali aayo kuli baabo ibakabulide. (Mil. 4:34, 35) Bamwi bakali kubikka mali ambali alimwi akupa zyakusanga lyoonse kutegwa bagwasyilizye mulimo. (1Kor. 16:2) Aboobo, bantu bamisyobo yoonse—kuzwa kuli baabo bakajisi lubono kapati kusikila kubacete kapati—bakatola lubazu.—Lk. 21:1-4.

10, 11. (a) Ino mbuti mbotukonzya kubaiya babelesi ba Jehova baabi bakaindi? (b) Ino mulimvwa buti kujatikizya coolwe ncomujisi cakugwasyilizya mulimo wa Bwami?

¹⁰ Mazuba aano, andiswe tulakonzya kulombwa kuti tusange kutegwa tugwasyilizye milimo imwi iigaminide. Mucikozyanyo, sena kuli bubambe bwakuyaka Ŋanda ya Bwami mpya njoinoobelesya mbungano yanu? Naa sena Ŋanda ya Bwami njomubelesya lino ili mukubambululwa? Tulakonzya kuzibisyigwa kujatikizya mali aayandika mukubambulula kuofesi yamutabi iili mucisi cesu, kubusena nkotuswaanganina miswaangano mipati, naa kugwasyilizya bakwesu ciindi nokwacitika ntenda zilicitikila. Alimwi tulasanga kugwasyilizya baabo balanganya mulimo ibali kumaofesi eesu mapati alimwi abali mumaofesi aamitabi nyika yoonse. Zyakusanga zyesu zilabagwasyilizya bamisyinali, bapainiya baalubazu, alimwi abaabo ibali mumulimo wamubbazu. Cakutadooneka ayalo mbungano yanu yakasala mali ngoinakupa kugwasyilizya mulimo uucitwa nyika yoonse wakuyaka Maanda Aakucitila Miswaangano Mipati alimwi a Maanda aa Bwami, izigwasya bakwesu nyika yoonse.

¹¹ Toonse tulakonzya kutola lubazu mukugwasyilizya mulimo ngwali mukucita Jehova mumazuba aaya aamamanino. Bunji bwazyakusanga tazyizyibwi pe. Cakutalibonesya tulasanga mali mutubbokesi twakusangila ku Ŋanda ya Bwami, naa ambweni tulakonzya kusanga kubelesya jw.org. Ambweni tulakonzya kulimvwa kuti zyakusanga zyesu zisyoonto taakwe ncozyaamba. Pele, mazuba aano bunji bwamali aasangwa azwa kuzipego zisyoonto-syoonto ikutali kuzipati. Bakwesu, nobaba baabo batajisi mali manji, mbuli bakucisi ca Macedonia ibakali “mubucete bwabo butaambiki” nobakapegwa coolwe cakuti bagwasyilizye bakacita oobo cabwaabi.—2Kor. 8:1-4.

12. Ino mbuti mbunga mboisolekesya kwaabelesya kabotu mali aasangwa?

¹² Kwiinda mukupaila, ba Kabunga Keendelezya balasolekesya kusyomeka alimwi akuba abupampu kujatikizya mbwaabelesyegwa mali ambunga. (Mt. 24:45) Mali aatambulwa alaapaulwa  akubelesyegwa bweelede. (Lk. 14:28) Kaindi, baalumi basyomeka ibakali kulanganya zyakali kusangwa bakali kubona masimpe kuti zyabelesyegwa buyo kuzintu zijatikizya bukombi bwa Jehova. Mucikozyanyo, Ezara wakajokela ku Jerusalemu azintu zyakasangwa kuzwa kumwami wa Persia—nkokuti ngolida, nsiliva, alimwi azintu zimwi zyamuulo wamali wiinda ku $100 miliyoni mazuba aano. Ezara wakabona mali aaya kuti zyakusanga zyakuliyandila kuli Jehova alimwi wakapa malailile aagaminide kutegwa mbono eezyi zikwabililwe mulweendo lwakali kwiindwa mumasena aayoosya kapati. (Ezr. 8:24-34) Mwaapostolo Paulo wakali kubwezelela mali kutegwa agwasye bakwesu mu Judaya. Wakabweza ntaamu kutegwa abone masimpe kuti aabo bakali kutola mali ‘baalanganya cakusyomeka ikutali buyo kumbele lya Jehova, pele alimwi akumbele lyabantu.’ (Amubale 2 Bakorinto 8:18-21.) Kwiinda mukwiiya cikozyanyo ca Ezara a Paulo, mbunga yesu mazuba aano ilabikkila maano kapati caboola kumakani ambwaabelesyegwa mali aasangwa.

13. Ino mbuti mbotweelede kukubona kubambululwa kwazintu ikwali kucitwa caino-ino mumbunga?

¹³ Banamukwasyi balakonzya kubambulula zintu ciindi nobasola kweendelanya mali ngobajana azintu nzyobeelede kuula naa ciindi nobalanga-langa mbobakonzya kuubya-ubya buumi bwabo akucesya zintu zyakuula kutegwa babe aciindi cinji cakubeleka mulimo wa Jehova. Oobu mbombubo mbocibede akumbunga ya Jehova. Mumyaka misyoonto yainda, kuli zintu zinji zipya zikkomanisya izyali kucitika. Ziindi zimwi, kwaciindi cili mbocibede eeci cali kupa kuti kubelesyegwe mali manji kwiinda yaayo aanjila. Aboobo, mbunga iyandaula nzila mboikonzya kucesya mali aabelesyegwa alimwi akuubya-ubya mulimo kutegwa cikonzyeke kucita zintu zinji kapati kwiinda mukusanga kwanu cabwaabi.

14-16. (a) Ino nzintu nzi zimwi izicitwa akaambo kakusanga kwanu? (b) Ino muunzila nzi momwagwasyigwa kuzintu eezyi?

¹⁴ Babelesi ba Jehova banji bakaindi baamba kuti kunyina nobakabwene kale ciindi icili mbuli ncotubede icijisi zyoolwe zyakumuuya zinji kapati. Amuciyeeyele buyo! Mumyaka yainda caino-ino, twabona kutalika kwa jw.org alimwi a JW Broadcasting. Bbaibbele lya Busanduluzi Bwanyika Mpya lilamwaigwa mumyaambo iimbi minji. Mu 2014 a 2015, mabbuwa amwi mapati kapati aakusobanina mumadolopo aali 14 munyika yoonse akabelesyegwa lya Muswaangano Wamasi wamazuba otatwe wakuti “Amusaangune Kuyandaula  Bwami Bwa Leza!” Aabo ibakajanika bakakkomana kapati.

¹⁵ Banji balatondezya kulumba akaambo kazilongezyo zitaliboteli nzyobatambula mumbunga ya Jehova. Mucikozyanyo, kujatikizya pulogilamu ya JW Broadcasting, banabukwetene bamwi ibabelekela mucisi cimwi mu Asia bakalemba kuti: “Mulimo wesu uli mudolopo nsyoonto. Aboobo, zimwi ziindi tulimvwa kulendelelwa, alimwi mukaindi kasyoonto tulaluba mbouli mupati mulimo wa Jehova. Pele kufwumbwa buyo tweebelela mapulogilamu aa JW Broadcasting aindene-indene, tulayeeya kuti tuli cibeela cabunyina bwanyika yoonse. Bakwesu abacizyi bamucilawo balakkomana kapati kujatikizya pulogilamu ya JW Broadcasting. Kanji-kanji bamana kweebelela pulogilamu yamwezi amwezi, tulabamvwa kabaamba kuti, balimvwa kuyandwa kapati kuli bamu Kabunga Keendelezya. Lino balimvwa kusumpuka kapati kwiinda kaindi kuba cibeela cambunga ya Leza.”

¹⁶ Nyika yoonse, Maanda aa Bwami aatandila ku 2,500 alimukuyakwa naa kubambululwa. Nobakatalika kubelesya Ŋanda ya Bwami mpya, basimbungano bamwi ku Honduras bakalemba kuti: “Tulikkomene kapati kuba cibeela camukwasyi wabubumbo boonse wa Jehova alimwi akukkomana abunyina bwanyika yoonse, zibeela zyoonse zyobilo izyakagwasya kutegwa tucikonzye kuba a Ŋanda ya Bwami mucilawo cesu njotwakali kuyeeyela kuba anjiyo.” Banji balaamba majwi aakulumba ngamunya aayo nobatambula Bbaibbele alimwi amabbuku aasandululwa mumyaambo yabo, nobagwasyigwa ciindi nokucitika ntenda, naa nobabona bubotu bwabukambausi bucitwa mumadolopo imujanika bantu banji alimwi abukambausi bwakubuleya muzilawo zyabo.

17. Kweelana amboibeleka mbunga, ino mbuti mboipa bumboni bwakuti Jehova ulaigwasyilizya mazuba aano?

¹⁷ Bantu ibalangilila tabakonzyi kumvwisya mbocikonzyeka kulindiswe kucita mulimo woonse ooyu kubelesya zyakusanga zyakuliyandila zilikke. Naakamana kulanga maofesi eesu aasimbilwa, mweendelezi umwi wakkampani mpati wakagambwa kuti mulimo woonse wakali kucitwa abasikulisungula, kwiinda muzyakusanga cakuliyandila, alimwi kakunyina kucita milimo iileta mali. Wakaamba kuti kweelede kuti nciyumu kucita mulimo ngotucita. Masimpe aayo! Tulizyi kuti cilakonzyeka akaambo buyo kakuti Jehova ulaugwasyilizya mulimo.—Job. 42:2.

18. (a) Ino nzilongezyo nzi nzyotujana ciindi notupa kutegwa tugwasyilizye Bwami? (b) Ino mbuti mbotukonzya kuyiisya bana besu alimwi abapya ikutola lubazu?

¹⁸ Jehova ulatulemeka kwiinda mukutupa coolwe cakugwasyilizya mulimo mupati uuli mukucitwa mazuba aano. Utusyomezya kuti tuyootambula zilongezyo ciindi notubugwasyilizya Bwami. (Malk. 3:10) Jehova usyomezya kuti mwaabi uyoozwidilila. (Amubale Tusimpi 11:24, 25.) Kupa alimwi kulatupa kukkomana, nkaambo “kupa kulakkomanisya kapati kwiinda kupegwa.” (Mil. 20:35) Kwiinda mumajwi alimwi amucikozyanyo, tulijisi coolwe cakuyiisya bana besu alimwi abapya mbobakonzya kutondezya kulumba kwiinda mukutola lubazu alimwi azilongezyo zinji nzyobakonzya kujana akaambo kakucita boobo.

19. Ino cibalo eeci camukulwaizya buti?

¹⁹ Zintu zyoonse nzyotujisi zizwa kuli Jehova. Kumupa zintu eezyi kutondezya kuti tulamuyanda alimwi akuti tulamulumba akaambo kazintu zyoonse nzyatucitila. (1Mak. 29:17) Ciindi nobakali kusanga kujatikizya kuyakwa kwatempele, “bantu bakasekelela akaambo kakusanga kwabo cakuliyandila, nkaambo bakapa zyakusanga camoyo woonse kuli Jehova.” (1Mak. 29:9) Mbubwenya buyo, andiswe atuzumanane kujana lukkomano akukkutila ciindi notumupa Jehova izintu izyakazwa kulinguwe.