1, 2. Ino nkaambo nzi Paulo ncaakalembela lugwalo ku Banakristo Bahebrayo?

Mumwaka wa 61, mbungano zyoonse mu Israyeli zyakalijisi luumuno iluli mbolubede. Nokuba kuti mwaapostolo Paulo wakali muntolongo ku Roma, wakali kulangila kuti wakali kuyakwaangununwa cakufwambaana. Timoteyo ngobakali kweenda limwi wakazwa aakwaangununwa muntolongo, alimwi antoomwe bakali kuyeeya kuti inga baswaya bakwesu ku Judaya. (Bahebrayo 13:23) Nokuba boobo, mumyaka buyo yosanwe, Banakristo bamu Judaya, alimwi kwaambisya aabo ibakali kukkala mu Jerusalemu, bakeelede kubweza ntaamu cakufwambaana. Ino nkaambo nzi? Musyule, Jesu wakaambila basikumutobela kuti mbobatiikabonene buyo Jerusalemu kazingulukidwe abasikalumamba, beelede kuyootija.—Luka 21:20-24.

² Kwakaindide myaka iili 28 kuzwa ciindi Jesu naakaambila basikumutobela kucenjezya ooku. Aciindi eeco, Banakristo mu Israyeli bakazumanana kusyomeka nokuba kuti bakali kukazyigwa alimwi bakajisi mapenzi manji. (Bahebrayo 10:32-34) Pele Paulo wakali kuyanda kuti balibambile izyakali kuyoocitika  kumbele. Kwakaceede buyo ciindi cisyoonto kuti lusyomo lwabo lusunkwe kapati. (Matayo 24:20, 21; Bahebrayo 12:4) Bakali kuyandika kuliyumya alimwi akuba alusyomo luyumu kapati kwiinda ndobakajisi kutegwa batobele malailile aa Jesu aakutija, nkaambo buumi bwabo mpobwakayeeme. (Amubale Bahebrayo 10:36-39.) Aboobo Jehova wakasololela Paulo kuti alembele bakwesu abacizyi aabo. Lugwalo oolu, lino ilwiitwa kuti bbuku lya Bahebrayo, lwakalembelwa kubayumya kuzintu izyakali kuyoocitika.

3. Ino nkaambo nzi ncotweelede kulibikkila maano bbuku lya Bahebrayo?

³ Mbotuli bantu ba Leza mazuba aano, tweelede kulibikkila maano bbuku lya Bahebrayo. Ino nkaambo nzi? Nkaambo bukkale bwesu bulikozyene abukkale mbobakajisi Banakristo baku Judaya. Tupona ‘muziindi zikatazya ncobeni,’ alimwi Banakristo banji baliyumya cakusyomeka kumasunko aakatazya naa kukupenzyegwa. (2 Timoteyo 3:1, 12) Pele bunji bwesu tujisi bukkale bulaaluumuno alimwi tatukazyigwi cacigaminina. Aboobo, mbubwenya mbuli Banakristo muciindi ca Paulo mbobakapakamene, andiswe tweelede kupakamana. Ino nkaambo nzi? Lino-lino, lusyomo lwesu luyoosunkwa kapati!—Amubale Luka 21:34-36.

4. Ino lugwalo lwamwaka wa 2016 ndugwalo nzi, alimwi nkaambo nzi ncolweelela?

⁴ Ino ncinzi cikonzya kutugwasya kulibambila ciyoocitika kumbele? Mubbuku lya Bahebrayo, Paulo wakaamba zintu zinji zikonzya kutugwasya kuyumya lusyomo lwesu. Ciyeekezyo iciyandika kapati cijanika kulugwalo lwa Bahebrayo 13:1. Lugwalo oolu lutukulwaizya kuti: “Luyando lwanu lwabunyina aluzumanane.” Kapango aaka kasalwa kuba lugwalo lwamwaka wa 2016.

5. Ino luyando lwabunyina ninzi?

⁵ Ino luyando lwabunyina ninzi? Luyando lwabunyina nduyando luli akati kabanamukwasyi naa akati kabalongwe ibamvwana kapati. (Johane 11:36) Tatulicengezyi buya kuba babunyina. Tuli babunyina. (Matayo 23:8) Paulo wakaamba kuti: “Muluyando lwabunyina amuyandane kapati. Mumakani aakulemekana, amube ndinywe nomuli kumbele kulemeka bamwi.” (Baroma 12:10) Majwi aaya atondezya mbotubayanda kapati bakwesu. Luyando lwabunyina oolu, antoomwe aluyando lwa Bunakristo lugwasya bantu ba Leza kumvwana kapati alimwi akukamantana.

6. Ino nkuuli bani Banakristo bakasimpe nkobatondezya luyando lwabunyina alimwi nkaambo nzi?

⁶ Mabala aakuti luyando lwabunyina kanji-kanji alajanika mumabbuku aamba zya Banakristo. Kuli bama Juda kaindi, ibbala lyakuti “mukwesu” kanji-kanji lyakali kubelesyegwa kuli wacibbululu alimwi zimwi ziindi kumuntu buyo uutali wamumukwasyi. Pele tiilyakali kubikkilizya muntu iwatakali mu Juda. Nokuba boobo, mbotuli Banakristo bakasimpe, Munakristo wakasimpe uuli woonse “mukwesu”, tacikwe makani acisi nkwazwa. (Baroma 10:12) Jehova watuyiisya kumvwana abakwesu. (1 Batesalonika 4:9) Pele ino nkaambo nzi ncociyandika kapati kuzumanana kutondezya luyando lwabunyina?

7. (a) Ino nkaambo nzi kapati ncotweelede kutondezya luyando lwabunyina? (b) Amwaambe kaambo akambi kuyandana kapati ncokuyandika.

⁷ Ikaambo kapati ncotweelede kutondezya luyando lwabunyina nkakuti Jehova utwaambila  kucita oobo. Tatukonzyi kuyanda Jehova ikuti katutabayandi bakwesu. (1 Johane 4:7, 20, 21) Kaambo akambi nkakuti tuyandika bakwesu, ikwaambisya muziindi zikatazya. Ciindi Paulo naakalemba lugwalo lwakwe ku Banakristo Bahebrayo, wakalizyi kuti bamwi muciindi buyo cisyoonto bakali kuyoosiya maanda alimwi azintu zyabo. Jesu wakaamba mbocakali kuyookatazya ciindi eeco. (Marko 13:14-18; Luka 21:21-23) Aboobo kacitanasika ciindi eeco, Banakristo aabo bakeelede kuyandana kapati.—Baroma 12:9.

8. Ino ncinzi ncotweelede kucita lino mapenzi mapati naatanatalika?

⁸ Mapenzi mapati aatanacitikide alaafwaafwi kusika. (Marko 13:19; Ciyubunuzyo 7:1-3) Tuyakuyandika kutobela malailile aakuti: “Kamuya nobantu bangu, amunjile mumaanda aanu aamukati, mulijalile. Amuyube kwakaindi kaniini buyo kusikila mane bukali bwiinde.” (Isaya 26:20) ‘Maanda aamukati’ aayo alakonzya kwaamba mbungano zyesu. Ooko nkonkuko nkotukomba Jehova notuli antoomwe abakwesu abacizyi. Pele nzinji nzyotweelede kucita kunze buyo lyakuswaangana lyoonse. Paulo wakabayeezya Banakristo Bahebrayo kuti bakeelede kukulwaizyanya mukutondezya luyando alimwi akucitila umwi aumwi zintu zibotu. (Bahebrayo 10:24, 25) Tweelede kuyumya luyando lwesu lwabunyina lino nkaambo ciyootugwasya kuliyumya kumasunko aali woonse aakonzya kuyootusikila kumbele.

9. (a) Ino nzyoolwe nzi nzyotujisi zyakutondezya luyando lwabunyina mazuba aano? (b) Amupe zikozyanyo zitondezya bantu ba Jehova mbobatondezya luyando lwabunyina.

⁹ Tulijisi zyoolwe zinji izyakutondezya luyando lwabunyina naaba mazuba aano, naatanatalika mapenzi mapati. Bunji bwabakwesu balapenga akaambo kamizuzumo yanyika, kupaya kwamaanzi, alimwi antenda zimwi zilicitikila. Bakwesu bamwi balaliyumya kukupenzyegwa. (Matayo 24:6-9) Alimwi buzuba abuzuba kuli buyumuyumu bwakujana mali akaambo kakuti tupona munyika eeyi iinyongene. (Ciyubunuzyo 6:5, 6) Nokuba boobo, mapenzi mbwaayaabubavwulila bakwesu, citupa zyoolwe zinji zyakutondezya kuti tulabayanda kapati. Nokuba kuti bantu munyika eeyi tabajisi luyando, tweelede kuzumanana kutondezya luyando lwabunyina. (Matayo 24:12) ^[1]—Amubone bupanduluzi buyungizyidwe.

10. Ino tulalanga-langa nzi lino?

¹⁰ Nokuba kuti tulijisi mapenzi, ino inga twacita buti kutegwa tuzumanane kutondezya luyando lwabunyina? Ino inga twazyiba buti kuti tulijisi luyando luli boobu kubakwesu? Naakamana kwaamba kuti, ‘luyando lwanu lwabunyina luzumanane,’  mwaapostolo Paulo wakaamba nzila zinji mobakonzya kucita oobo Banakristo. Lino atulange-lange nzila zimwi zili cisambomwe.

11, 12. Ino caamba nzi kusamausya beenzu? (Amubone cifwanikiso icili kumatalikilo aacibalo)

¹¹ “Mutalubi kusamausya beenzu.” (Amubale Bahebrayo 13:2.) Ino bbala lyakuti “kusamausya beenzu” lyaamba nzi? Ibbala ndyaakabelesya Paulo lyaamba “kutondezya luzyalo kubantu mbotutazyi.” Ambweni majwi aaya atuyeezya Abrahamu a Loti. Baalumi aaba bobilo bakatondezya luzyalo kubantu mbobatakazyi. Mukuya kwaciindi, Abrahamu a Loti bakazoozyiba kuti beenzu baya mbobatakazyi bakali bangelo. (Matalikilo 18:2-5; 19:1-3) Zikozyanyo eezyi zyakakulwaizya Banakristo Bahebrayo kutondezya luyando lwabunyina kwiinda mukusamausya.

¹² Ino inga twabasamausya buti bantu? Tulakonzya kubatamba bakwesu abacizyi kuŋanda yesu kuti tulye antoomwe naa kuti tubakulwaizye. Nokuba kuti tatumuzyi kabotu mulangizi wabbazu wesu abakaintu bakwe, tulakonzya kubatamba ciindi nobaswaya mbungano yesu. (3 Johane 5-8) Takuyandiki kubamba cakulya cinji naa kubelesya mali manji. Mbaakani yesu njakukulwaizya bakwesu, kutali kubakkomanisya azintu nzyotujisi. Alimwi tatweelede kwiita buyo baabo mbotuyeeya kuti inga batujolela munzila imwi. (Luka 10:42; 14:12-14) Ciyandika kapati nkujana ciindi cakusamausya kutali kujata bubi lyoonse cakuti twaluba akusamausya!

13, 14. Ino inga ‘twabayeeya buti aabo bali muntolongo’?

¹³ “Kamubayeeya aabo bali muntolongo.” (Amubale Bahebrayo 13:3.) Ciindi Paulo naakalemba majwi aaya, wakali kwaamba bakwesu ibakali muntolongo akaambo kalusyomo lwabo. Paulo wakailumbaizya mbungano akaambo kakuti ‘bakabeetelela aabo ibakali muntolongo.’ (Bahebrayo 10:34) Bakwesu bamwi bakamugwasya Paulo ciindi naakali muntolongo kwamyaka yone, pele bamwi bakali kukkala kule. Ino nobakamugwasya buti Paulo? Bakali kukonzya kuzumanana kumupailila kapati.—Bafilipi 1:12-14; Bahebrayo 13:18, 19.

¹⁴ Mazuba aano, Bakamboni banji bali muntolongo akaambo kalusyomo lwabo. Bakwesu abacizyi ibakkala munsi-munsi balakonzya kubagwasya azintu nzyobayandika. Pele bunji bwesu tukkala kule abaabo bali muntolongo. Ino inga twacita nzi kutegwa tubagwasye akutabaluba? Luyando lwabunyina luyootukulwaizya kubapailila kapati. Mucikozyanyo, tulakonzya kubapailila bakwesu, bacizyi, alimwi abana ibali muntolongo ku Eritrea, kubikkilizya abakwesu ba Paulos Eyassu, Isaac Mogos, alimwi Negede Teklemariam, ibacili muntolongo nokuba kuti kwainda myaka iili 20.

15. Ino inga twacilemeka buti cikwati cesu?

¹⁵ “Cikwati acilemekwe abantu boonse.” (Amubale Bahebrayo 13:4.) Alimwi tulakonzya kutondezya luyando lwabunyina kwiinda mukusalala mukulilemeka.  (1 Timoteyo 5:1, 2) Mucikozyanyo, ikuti twacita bwaamu amukwesu naa amucizyi, tulakonzya kunyonganya muntu ooyo naa mukwasyi wamuntu ooyo. Kusyomwa nkobatusyoma bakwesu inga kwamana. (1 Batesalonika 4:3-8) Alimwi amuyeeye buyo mukaintu mbwakonzya kulimvwa ikuti wazyiba kuti mulumaakwe weebelela zintu ziletela muzeezo wakoonana. Sena inga walimvwa kuti mulumaakwe ulamuyanda alimwi akuti ulabulemeka bubambe bwacikwati?—Matayo 5:28.

16. Ino kukkutila kutugwasya buti kutondezya luyando lwabunyina?

¹⁶ “Amukkutile azintu nzyomujisi lino.” (Amubale Bahebrayo 13:5.) Kusyoma Jehova kuyootugwasya kukkutila azintu nzyotujisi. Ino eeci citugwasya buti kutondezya luyando lwabunyina? Ikuti katukkutila, tuyakuyeeya kuti bakwesu abacizyi Banakristo balayandika kapati kwiinda mali naa zintu. (1 Timoteyo 6:6-8) Tatukabatongooki bakwesu naa kutongooka bukkale bwesu mubuumi. Alimwi tatukabafwidi munyono bamwi naa kuba basyaacivwulemwangu. Muciindi caboobo, ikuti naa twaba bantu bakkutila, tunooli baabi.—1 Timoteyo 6:17-19.

17. Ino ‘kuba basicamba’ kutugwasya buti kutondezya luyando lwabunyina?

¹⁷ ‘Atube basicamba.’ (Amubale Bahebrayo 13:6.) Kusyoma Jehova kutupa busicamba bwakuliyumya mumapenzi aakatazya. Busicamba oobu butugwasya kulanga zintu munzila yeelede. Alimwi ciindi notuzilanga munzila yeelede zintu, tulakonzya kutondezya luyando lwabunyina kwiinda mukubakulwaizya akubaumbulizya bakwesu  abacizyi. (1 Batesalonika 5:14, 15) Nokuba kuciindi camapenzi mapati, tulakonzya kuba basicamba katuzyi kuti lufwutuko lwesu luli afwaafwi.—Luka 21:25-28.

18. Ino inga twaluyumya buti luyando lwesu lwabunyina kubaalu besu?

¹⁸ “Kamubayeeya aabo basololela.” (Amubale Bahebrayo 13:7, 17.) Ibaalu mumbungano zyesu babelesya ciindi cabo kutubelekela canguzu. Ikuti twaziyeeya zyoonse nzyobacita, luyando lwesu kuli mbabo luyookomena alimwi tunoobalumba kapati. Inga tiitwayanda kuti babule lukkomano naa kuti bacimwe akaambo kazintu nzyotucita. Muciindi caboobo, tuyanda kuti katubamvwida cakuliyandila. Munzila eeyi ‘tulabalemeka kapati muluyando akaambo kamulimo ngobacita.’—1 Batesalonika 5:13.

19, 20. Ino inga twazumanana buti kutondezya luyando lwabunyina kwiinda mbotucita?

¹⁹ Bantu ba Jehova balizyibidwe akaambo kaluyando lwabunyina ndobatondezya. Oobu mbocakabede amuciindi ca Paulo. Pele Paulo wakakulwaizya bakwesu kutondezya luyando munzila mpati kwiinda. Wakaamba kuti: ‘Amuzumanane kucita boobo kwiinda waawo.’ (1 Batesalonika 4:9, 10) Mubwini, kuli mbazu zinji motukonzya kucita kabotu mumakani aaya!

²⁰ Aboobo notululanga lugwalo lwamwaka mu Ŋanda yesu ya Bwami mwaka uuno, atuzinzibale kuyeeya mibuzyo eeyi: Sena inga ndayaambele mukusamausya? Ino inga ndabagwasya buti bakwesu bali muntolongo? Sena ndilabulemeka bubambe bwa Leza bwacikwati? Ino ncinzi ciyoondigwasya kukkutila ncobeni? Ino inga ndamusyoma kapati buti Jehova? Mbuti mbondikonzya kunoobamvwida kapati aabo ibasololela? Ikuti twabelekela mumbazu eezyi zili cisambomwe, lugwalo lwamwaka talukabi buyo cikwankwani abwaanda; lunootuyeezya kutobela majwi aa Paulo aakuti: ‘Luyando lwanu lwabunyina luzumanane.’—Bahebrayo 13:1.