1. Ncinzi Jesu ncaakaambila basikwiiya bakwe kujatikizya ciindi cini naakali kuyoosika mamanino, alimwi ino wakabacenjezya kuti nzi?

 KAKUSYEEDE buyo mazuba masyoonto kuti Jesu afwe, basikwiiya bakwe bone bakamubuzya kuti: “Ncinzi ciyooba citondezyo . . . camamanino aabweende bwazintu?” (Mt. 24:3) Kweelede kuti basikwiiya aaba bakali kulibuzya naa bakali kuyoozyiba buti kuti Jerusalemu atempele lyanguwo ziyanda kunyonyoonwa. Mubwiinguzi bwakwe, Jesu tanaakaamba buyo kunyonyoonwa kwamunzi wa Jerusalemu antempele lyanguwo, pele alimwi wakaamba kujatikizya “mamanino aabweende bwazintu,” nkokuti mazuba aano ngotupona. Kujatikizya ciindi cini mamanino naakali kuyoosika, Jesu wakaamba kuti: “Kujatikizya buzuba oobo naa ciindi, kunyina uuzyi pe, nobaba bangelo kujulu naba Mwana, pele buyo Taata.” Kumane wakacenjezya basikwiiya bakwe boonse kuti “amupakamane” alimwi ‘akulangila.’—Mk. 13:32-37.

2. Nkaambo nzi ncocakali kuyandika kapati ku Banakristo bamumwaanda wamyaka wakusaanguna, kuzumanana kupakamana?

² Mumwaanda wamyaka wakusaanguna, Banakristo ibakali kukkala mu Judaya bakeelede kuzumanana kupakamana; buumi bwabo bwakayeeme akucita boobo. Jesu wakaambila basikumutobela zintu nzyobakali kuyoobona izyakali kuyootondezya kuti Jerusalemu atempele lyanguwo zyakali kuyanda kunyonyoonwa. Wakabaambila kuti: “Mwaakubona Jerusalemu kazingulukidwe ampi, amukazyibe kuti kunyonyoonwa kwakwe kwaswena afwaafwi.” Aciindi eeco, bakeelede kutobela kucenjezya kwa Jesu ‘akutijila kumalundu.’ (Lk. 21:20, 21)  Aabo bakakubikkila maano kucenjezya ooku, bakafwutuka ciindi bana Roma nobakanyonyoona Jerusalemu.

3. Ncinzi ncotutiibandike mucibalo eeci?

³ Mazuba aano, tupona kumamanino aabweende bwazintu oobu bubyaabi. Aboobo andiswe tweelede kulibatamika akuzumanana kupakamana. Mucibalo eeci, tulabandika mbotukonzya kuzilanga kabotu zintu ciindi notubona zicitika munyika, mbotukonzya kulilingula tobeni, alimwi ambotukonzya kucibelesya kabotu ciindi cisyeede.

4. Nkaambo nzi ncotweelede kuyandisya kubona zintu zicitika mazuba aano mbozizuzikizya businsimi bwamu Bbaibbele?

⁴ Kuli twaambo tubotu, tutupa kuyandisisya kubona zintu zicitika munyika lino, mbozizuzikizya businsimi bwamu Bbaibbele. Mucikozyanyo, Jesu wakaamba zintu zigaminide izyakali kuyoocitika, kutondezya kuti bweende bwazintu bwa Saatani bulaafwaafwi kumana. (Mt. 24:3-14) Mwaapostolo Petro wakatukulwaizya kubikkila maano kukuzuzikizyigwa kwabusinsimi kutegwa lusyomo lwesu luzumanane kuyuma. (2Pet. 1:19-21) Bbuku lyamamanino mu Bbaibbele lilatalika amajwi aakuti: “Ciyubunuzyo cakapegwa a Jesu Kristo, eeco Leza ncaakamupa kuti atondezye bazike bakwe izintu zyeelede kucitika lino-lino.” (Ciy. 1:1) Aboobo, tulayandisisya kubona zintu zicitika munyika mazuba aano mbozizuzikizya businsimi bwamu Bbaibbele. Alimwi ambweni inga twayanda kutalika kubandika abamwi kujatikizya zintu eezyo.

5. Ncinzi ncotuteelede kucita, pele ncinzi ncotweelede kucita? (Amubone azifwanikiso)

⁵ Nokuba boobo, ciindi notubandika businsimi bwamu Bbaibbele, tatweelede kwaamba zintu nzyotuyeeyela buyo kuti ziyoocitika. Nkaambo nzi? Nkaambo kucita boobo kulakonzya kunyonganya lukamantano mumbungano. Mucikozyanyo, tulakonzya kumvwa beendelezi bamunyika kabaamba mbobakonzya kwaamana mazwanga aamwi akuleta luumuno akuliiba. Pele muciindi cakuyeeyela buyo kuti makani aayo azuzikizya businsimi buli ku 1 Batesalonika 5:3, tweelede kuzyiba makani aakamwaigwa caino-ino kujatikizya kaambo aako. Aboobo, kuti twaambo ntotwaamba katuzwa mumakani aakamwaigwa ambunga ya Jehova, tupa kuti mbungano izumanane kukamantana akuba “amuzeezo omwe.”—1Kor. 1:10; 4:6.

6. Ncinzi ncotwiiya kulugwalo lwa 2 Petro 3:11-13?

⁶ Amubale 2 Petro 3:11-13. Mwaapostolo Petro ulatugwasya kuyeeya kaambo keelede kutupa kulanga-langa businsimi bwamu Bbaibbele. Utukulwaizya “kuyeeyesya kusika kwabuzuba bwa Jehova.” Nkaambo nzi? Nkaambo kakuti tuyanda kucibelesya kabotu ciindi cisyeede “mubukkale busalala alimwi amumilimo yakubelekela Leza cakulyaaba,” ikutali kuti tuyanda kuzyiba buzuba alimwi aciindi Jehova nayooleta Amagedoni. (Mt. 24:36; Lk. 12:40) Munzila imwi, tuyanda kuzumanana kuba abukkale buli kabotu alimwi akuba masimpe kuti zintu zyoonse nzyotucita mumulimo wa Jehova, tulazicita akaambo kakuti tulamuyanda kapati. Kutegwa tucikonzye kucita boobo, tweelede kunoolilingula tobeni.

7. Mbuti mbotukonzya kutondezya kuti tulalilingula tobeni? (Luka 21:34)

⁷ Jesu wakaambila basikwiiya bakwe kulilingula beni ikutali buyo kubikkila maano kuzintu zicitika munyika. Kaambo aaka kalaambidwe kulugwalo lwa Luka 21:34. (Amubale.) Jesu wakaamba kuti: “Amulilingule nobeni.” Muntu uulilingula mwini, ulabikkila maano kuzintu zili zyoonse zikonzya kunyonganya  cilongwe cakwe a Jehova alimwi akusola kuzitantamuka. Kwiinda mukucita boobo, ulazumanana kukkala muluyando lwa Leza.—Tus. 22:3; Jud. 20, 21.

8. Ncinzi mwaapostolo Paulo ncaakaambila Banakristo?

⁸ Mwaapostolo Paulo wakaambila Banakristo kulilingula beni. Mucikozyanyo, wakaambila Banakristo baku Efeso kuti: “Amucenjele kapati, mutanikweendi mbuli bafwubafwuba pe, pele mbuli bantu basongo.” (Ef. 5:15, 16) Saatani uluujisi kuyanda kunyonganya cilongwe cesu a Jehova, nkakaambo kaako Bbaibbele litwaambila ‘kuzumanana kumvwisya ncayanda Jehova’ kutegwa tucikonzye kumuzunda.—Ef. 5:17.

9. Ino inga twacizyiba buti ncayanda Jehova?

⁹ Bbaibbele talitwaambili zintu zyoonse zikonzya kunyonganya cilongwe cesu a Jehova. Kanji-kanji tweelede kulisalila buya zintu zitaambidwe cacigaminina mu Magwalo. Aboobo kutegwa tusale cabusongo, tweelede kumvwisya naa kuzyiba “ncayanda Jehova.” Tulakonzya kucita oobo kwiinda mukuba abubambe busitikide bwakwiiya Jwi lya Leza akuzinzibala kuyeeya nzyotwiiya. Ikuti twakumvwisya kuyanda kwa Jehova alimwi akusola kuba “amizeezo ya Kristo,” tuyoocikonzya kweenda mbuli bantu basongo noliba leelyo nokutakwe milawo iigaminide iitwaambila ncotweelede kucita. (1Kor. 2:14-16) Zimwi ziindi ncuuba-uba kuzyiba zintu zyotweelede kutantamuka; pele zimwi ziindi tacili cuuba-uba pe.

10. Nzintu nzi zimwi nzyotweelede kutantamuka?

¹⁰ Zintu zimwi nzyotweelede kutantamuka zibikkilizya, kuciindizya kunywa bukoko, kucita mbuli kuti mulamuyanda muntu ngomwiindene zizo, bulyato, kwaamba zintu zinyemya bamwi, kweebelela zyakulikondelezya zitali kabotu, zintu ziletela muzeezo wakoonana alimwi azimwi buyo. (Int. 101:3) Sinkondoma Diabolosi, uluujisi kuyandaula nzila mbwakonzya kunyonganya cilongwe cesu a Jehova. (1Pet. 5:8) Ikuti naa tiitwacenjela, Saatani ulakonzya kupa kuti tube amunyono, kutasyomeka, busyaacivwulemwangu, lusulo, kulisumpula alimwi akubikkilila. (Gal. 5:19-21) Kumatalikilo, tulakonzya kuyeeya kuti zintu eezyi tazikonzyi kutunyonganya. Pele kuti naa tiitwabweza ntaamu cakufwambaana kuzigwisya mumyoyo yesu, zintu eezyi zilakonzya kukomena mbuli cisyango cijaya akutuletela mapenzi.—Jak. 1:14, 15.

11. Ino mbukkale nzi bukonzya kutubikka muntenda mbotweelede kweeleba, alimwi nkaambo nzi?

¹¹ Bukkale bumwi mbotweelede kweeleba ibukonzya kutubikka muntenda, nkuyanzana abalongwe babyaabi. Amweezeezye bukkale oobu, atwaambe kuti mubeleka amuntu uutali kamboni. Alimwi muyanda kuti muntu ooyo azyibe kuti Bakamboni ba Jehova mbantu bali kabotu, aboobo mulamutondezya luzyalo akumugwasya. Mane buya zimwi ziindi mulazumina kulida antoomwe amuntu ooyo syikati. Kalitanalampa, mwatalika kulida antoomwe lyoonse. Mpoonya zimwi ziindi, watalika kwaamba zintu zijatikizya kutalilemeka, kumatalikilo mwazibona kuti tazili kabotu. Pele mukuya kwaciindi, mwazizyibila zintu eezyo nzyaamba alimwi zyaleka kumucima. Kumane bumwi buzuba, wamutamba kuti mukanywe twakunywaanywa mwakotoka, mpoonya mwazumina. Mukuya kwaciindi, mwatalika kubona zintu mbuli mbwazibona mubelesinyoko. Tacidoonekwi buya kuti kalitanalampa, andinywe mulatalika kucita zintu nzyoonya nzyacita mubelesinyoko ooyo. Masimpe kuti tweelede kutondezya luzyalo akubalemeka bantu boonse, pele tatweelede kuluba kuti bantu mbotuyanzana limwi balakonzya kupa kuti tube mbuli mbabo. (1Kor. 15:33) Ikuti katulilingula  tobeni kweelana a Jesu mbwaakatukulwaizya, tuyookutantamuka kuyanzana abantu batatobeli zyeelelo zya Jehova. (2Kor. 6:15) Aboobo tuyoobubona bukkale bukonzya kutubikka muntenda akubweeleba.

12. Ncinzi ncobakeelede kucita basikwiiya ba Jesu ciindi nobakali kulindila mamanino aabweende bwazintu?

¹² Jesu wakali kuyanda kuti basikwiiya bakwe kabatakkali buyo ciindi nobakali kulindila kunyonyoonwa kwa Jerusalemu atempele lyanguwo. Aboobo wakabapa mulimo wakucita. Wakabaambila kukambauka makani mabotu “mu Jerusalemu, mu Judaya moonse amu Samariya, mane kusikila kumasena aakulamfwu kapati aanyika.” (Mil. 1:6-8) Eelo kaka ooyu wakali mulimo mupati ngobakapegwa! Kwiinda mukulitakata kucita mulimo ooyu, bakatondezya kuti bakali kucibelesya kabotu ciindi ncobakajisi.

13. Nkaambo nzi ncotweelede kucibelesya kabotu ciindi cesu? (Bakolose 4:5)

¹³ Amubale Bakolose 4:5. Kutegwa tulilingule tobeni, tweelede kuyeeyesya mbotucibelesya ciindi cesu. Toonse buyo tulakonzya ‘kucitikilwa zintu zitalangilwi.’ (Muk. 9:11) Tulakonzya kufwa cakutayeeyela.

14-15. Mbuti mbotukonzya kucibelesya kabotu ciindi cesu? (Bahebrayo 6:11, 12) (Amubone acifwanikiso)

¹⁴ Tulakonzya kucibelesya kabotu ciindi cesu  kwiinda mukucita kuyanda kwa Jehova alimwi akuyumya cilongwe cesu anguwe. (Joh. 14:21) Aboobo, ‘atukakatile tutazungaani pe, lyoonse atube azintu zinji zyakucita mumulimo wa Mwami.’ (1Kor. 15:58) Mpoonya mamanino aakusika, kufwumbwa naa mamanino aabuumi bwesu naa aabweende bwazintu oobu bubyaabi, tunoosinizyide kuti twakacibelesya kabotu ciindi cesu.—Mt. 24:13; Rom. 14:8.

¹⁵ Mazuba aano, Jesu wazumanana kusololela basikwiiya bakwe ciindi nobakambauka kujatikizya Bwami bwa Leza munyika yoonse. Wacizuzikizya cisyomezyo cakwe. Kwiinda mumbunga ya Jehova, Jesu ulatuyiisya mbotweelede kukambauka alimwi ulatupa zibelesyo nzyotuyandika kutegwa tucikonzye kukambauka makani mabotu. (Mt. 28:18-20) Andiswe tweelede kucita lubazu lwesu, kwiinda mukubeleka canguzu kukambauka akuyiisya bamwi alimwi akuzumanana kupakamana ciindi notulindila Jehova kuti anyonyoone bweende bwazintu oobu. Kwiinda mukutobela lulayo luli ku Bahebrayo 6:11, 12, tuyoozumanana kukakatila kubulangizi bwesu “kusikila kumamanino.”—Amubale.

16. Ino makanze nzi ngotweelede kuba angawo?

¹⁶ Jehova wakasala kale buzuba aciindi nayoonyonyoona bweende bwazintu bwa Saatani. Bwaakusika buzuba oobo, Jehova uyoobuzuzikizya businsimi boonse ibuli mu Jwi lyakwe. Pele zimwi ziindi, tulakonzya kuyeeya kuti mamanino aabweende bwazintu oobu amuka. Nokuba boobo, buzuba bwa Jehova ‘tabukamuki pe.’ (Hab. 2:3) Aboobo aabe makanze eesu aakuzumanana ‘kunoolangila Jehova akukkazika moyo notulindila Leza walufwutuko lwesu.”—Mik. 7:7.