Ndakazyalwa mu 1937 afaamu kufwaafwi adolopo lya Tokmok, Kyrgyzstan. Mukwasyi wesu uzulilwa kubantu bategwa Kyrgyz, alimwi twaambaula mwaambo waci Kyrgyz. Bazyali bangu bakali kubeleka afaamu alimwi bakali kucita oobo kuzwa mafwumofwumo kusikila kumazuba. Babelesi baafaamu bakali kupegwa zyakulya lyoonse, pele mali akali kuvwolwa buyo ciindi comwe amwaka. Bamaama bakapenga kulanganya ndime alimwi amusyoonto wangu musimbi. Kucikolo ndakaiya buyo kwamyaka yosanwe, mpoonya ndakatalika kubeleka afaamu.

Mucilawo mondakali kukkala, bantu banji bakali bacete, alimwi kwakali kuyandika kubeleka canguzu ncobeni kutegwa ujane mali aakuula ziyandika. Nondakali mukubusi, tiindakali kubikkila maano kuzyiba kaambo ncotuponena naa buumi bwakumbele. Tiindakazyi kuti mulumbe mubotu kujatikizya Jehova Leza alimwi amakanze aakwe wakali kukonzya kucinca buumi bwangu. Cilakkomanisya kapati kuzyiba mulumbe ooyu mbowakasika mu Kyrgyzstan. Zintu zyakatalikila mucooko mondakali kukkala mu Kyrgyzstan nkoili kunyika.

Kasimpe kajatikizya Jehova Leza kakatalika mu Kyrgyzstan mumyaka yakuma 1950. Kutegwa cibe boobo, kasimpe kakeelede kuzunda njiisyo yaci Kkomyunizimu. Ino nkaambo nzi? Cisi lino cizyibidwe kuti Kyrgyzstan eeco ciindi cakali kweendelezyegwa abulelo bwa Union of Soviet Socialist Republics (USSR). Mubulelo bwa USSR boonse, Bakamboni ba Jehova bakazumanana kutatola lubazu mutwaambo twacisi. (Joh. 18:36) Aboobo, bakali kupenzyegwa akaambo  kakuba basinkondonyina babweendelezi bwaci Kkomyunizimu. Pele kunyina bweendelezi bukonzya kulesya Jwi lya Leza kusikila myoyo yabantu basyomeka. Masimpe, ciiyo cimwi ciyandika kapati ncondakaiya mubuumi bwangu boonse ncakuti kuli Jehova, “zintu zyoonse zilakonzyeka.”—Mk. 10:27.

Kupenzyegwa kwa Bakamboni ba Jehova kwakapa kuti bavwule mu Kyrgyzstan. Ino nkaambo nzi ncocili boobo? Bulelo bwa USSR bwakali kubikkilizya acooko ca Siberia, kwalo basinkondonyina a Cisi nkobakali kutolwa kabali baange. Ciindi baange aaba nobakali kwaangununwa, banji bakaboola ku Kyrgyzstan, alimwi bamwi akati kabo bakaleta kasimpe nkobakajisi. Umwi iwakali mwaange, bakali ba Emil Yantzen, balo ibakazyalilwa mu Kyrgyzstan mu 1919. Ba Emil bakatolwa kucilabba cakupenzyezya kwalo nkobakajana Bakamboni. Bakakatambula kasimpe akupiluka nkobazwa mu 1956. Ba Emil bakajana busena bwakukkala afwaafwi adolopo lya Sokuluk, cilawo nkondakali kukkala. Mbungano yakusaanguna mu Kyrgyzstan yakapangwa mu 1958 mudolopo lya Sokuluk.

Nokwakainda mwaka omwe, ba Victor Vinter bakalongela ku Sokuluk. Mukwesu ooyu uusyomeka wakapenga abuyumuyumu ibwakamucitikila cakwiinduluka-induluka. Ziindi zyobilo wakaangwa kwamyaka yotatwe akaambo kakutatola lubazu mutwaambo twacisi; mpoonya alimwi wakakkala myaka aimwi iili kkumi muntolongo kusanganya aimbi yosanwe kali mwaange. Nokuba boobo, kupenzyegwa tiikwakalesya bukombi bwakasimpe kuyaambele.

Kusika mu 1963 kwakali Bakamboni babalilwa ku 160 mu Kyrgyzstan, bunji bwabo bakali kuzwa ku Germany, Ukraine, aku Russia. Bakali kubikkilizya aba Eduard Varter, imwaange iwakabbapatizyilwa ku Germany mu 1924. Muma 1940, ba Nazi, bakabatola kucilabba cakupenzyezya, mpoonya nokwakainda myaka misyoonto, bakabunga ka Kkomyunizimu mu USSR bakatola ba Eduard ikwakali kukkala baange. Mu 1961 mukwesu ooyu uusyomeka wakalongela kudolopo lya Kant, lyalo ilili afwaafwi kapati adolopo nkondakali kukkala.

Ba Elizabeth Fot, mubelesi wa Jehova uusyomeka awalo wakali kukkala mu Kant. Wakali kujana mali aakuula ziyandika kwiinda mukusuma zisani. Akaambo kakuti wakalicibwene kusuma, bantu mbuli bamadokota abamayi bakali kuula zisani kuzwa kulinguwe. Umwi wabamakaintu iwakali kuula zisani, mukaintu wazina lyakuti Aksamai Sultanalieva, walo iwakakwetwe kumwaalumi iwakali kubelekela muofesi yaloya wamfwulumende. Aksamai wakaboola kuli ba Elizabeth kutegwa aule zisani pele wakabuzya mibuzyo minji kujatikizya ncotuponena alimwi aciimo cabafwide. Ba Elizabeth bakaingula mibuzyo yakwe kubelesya Bbaibbele. Aksamai wakaba mukambausi musungu wamakani mabotu.

Aciindi eeco, ba Nikolai Chimpoesh, ibakali kuzwa ku Moldova, bakasalwa kuba mulangizi wabbazu alimwi bakabeleka mubbazu kwamyaka iitandila ku 30. Ba Nikolai tiibakali kuswaya buyo mbungano pele alimwi bakali kulanganya mulimo wakukkopolola akumwaya mabbuku eesu. Mulimo wabo wakazyibwa abalupati-pati. Aboobo, ba Eduard Varter bakaambila ba Nikolai majwi aakulwaizya aakuti: “Baakumubuzya balupati-pati, mukabaambile cakutasisa kuti mabbuku eesu twaajana kumaofesi mapati ku Brooklyn. Mukabalange kumeso basikumubuzya bakabunga ka KGB. Kunyina ceelede kumupa kuyoowa.”—Mt. 10:19.

Mbowakamanina buyo mubandi ooyu, ba Nikolai bakabaita kumaofesi mapati aakabunga ka KGB mu Kant. Bakaamba kujatikizya cakacitika kuti: “Mubelesi wakabunga wakabuzya nkotwaajana mabbuku eesu. Ndakamwaambila kuti twaajana ku Brooklyn. Tanaakazyi cakwaamba kujatikizya bwiinguzi mbondakapa. Wakandaambila buyo kuti nduunke alimwi  kunyina naakandiita alimwi.” Bakamboni bali boobo batayoowi bakazumanana kumwaya makani mabotu cakucenjela mucooko mondakali kukkala ca Kyrgyzstan nkoili kunyika. Ciindi kasimpe kayandika kapati kajatikizya Jehova nokakabasikila bamukwasyi wangu muma 1980, bakaintu bangu ba Mairambubu, mbabakasaanguna kukamvwa.

Ba Mairambubu bazwa ku Cooko ca Naryn mu Kyrgyzstan. Bumwi buzuba mu August 1974, bakaswaya bacizyi bangu, aboobo cakaba ciindi cakusaanguna kubonana ambabo. Mpoonya-mpoonya ndakabakkomanina ba Mairambubu. Twakakwatana mbubwenya buzuba mbotwakabonana.

Mu January 1981 ciindi ba Mairambubu nobakali mubbaasi kuunka kumusika, nceciindi nobakamvwa mubandi wamajwi aambwa kumatalikilo. Bakaintu bangu bakali kuyanda kumvwa zinji, aboobo bakabuzya mukaintu ooyo zina lyakwe alimwi akkeyala. Wakabaambila zina lyakwe kuti ngu Apun, pele wakabelesya bupampu akaambo kakuti nomuba muma 1980, mulimo wa Bakamboni wakalilesyedwe. Muciindi cakupa bakaintu bangu kkeyala, ba Apun bakalomba kkeyala yesu. Bakaintu bangu bakasika kuŋanda kabakkomene.

Ba Mairambubu bakaamba kuti, “Ndamvwa zintu zikkomanisya. Mukaintu umwi wandaambila kuti ino-ino bantu tabanoofwi pe. Nobaba banyama bamusyokwe banoovwubwa.” Kulindime, cakali kumvwika buyo mbuli kuti nkaano. Ndakaingula kuti, “Atulindile kusikila akatuswaye kutegwa akatwaambile zinji.”

Ba Apun bakatuswaya nokwakainda myezi yotatwe. Mpoonya bacizyi bambi bakazumanana kuswaya cakuti twakaswaangana a Bakamboni bamwi bakusaanguna ibakali kuzulilwa kubantu bategwa Kyrgyz. Bacizyi aaba bakatutondezya makani aamasimpe aakkomanisya kujatikizya Jehova amakanze aakwe kujatikizya bantu. Bakatuyiisya Bbaibbele kubelesya bbuku lya From Paradise Lost to Paradise Regained. * Pele akaambo kakuti kwakali buyo bbuku lyomwe lili boobu mu Tokmok, twakalikkopolola amaanza tobeni.

Cimwi akati kazintu nzyotwakaiya kusaanguna bwakali businsimi buli kulugwalo lwa Matalikilo 3:15. Businsimi oobu buyoozuzikizyigwa kwiinda muli Jesu kali Mwami wa Leza wabu Mesiya. Eelo kaka ooyu mulumbe uuyandika kapati ngobeelede kumvwa bantu boonse! Toonse ootu twaambo tweelede kutupa kutola lubazu mumulimo wakwaambilizya makani mabotu aa Bwami. (Mt. 24:14) Tiilyakalampa, kasimpe kamu Bbaibbele kakatalika kucinca buumi bwesu.

Mukwesu Munakristo mu Tokmok wakatutamba kubwiinga. Mukaindi buyo kasyoonto mebo abakaintu bangu twakabona kuti Bakamboni baliindene mbobalilemeka. Kwakanyina bukoko kubwiinga, alimwi zintu zyakali kucitwa kabotu-kabotu. Ooku kwakali kwiindana kupati amapobwe aabwiinga amwi ngotwakajanika, kwalo basikutambwa kanji-kanji nkobakali kukolwa, kutalilemeka kabotu, alimwi akubelesya majwi mabi.

Alimwi twakajanika akumiswaangano ya Bunakristo yambungano mu Tokmok. Miswaangano eeyi yakali kucitilwa musyokwe, kuti kwaca kabotu. Bakwesu abacizyi bakalizyi kuti basilikani bakali kubayandaula, aboobo bakwesu bakasala bamwi kutegwa kabasondela naa baboola. Ciindi camupeyo, twakali kuswaanganina muŋanda. Ziindi zyobilo, basilikani bakasika kuŋanda akubuzya ncotwakali kucita. Mebo aba Mairambubu notwakabbapatizyigwa mu July 1982 mu Mulonga wa Chüy, twakeelede kucenjela. (Mt. 10:16) Bakwesu basyoonto bakasika akubungana musyokwe. Twakaimba nyimbo ya Bwami mpoonya twakaswiilila kumakani aalubbapatizyo.

Mu 1987 mukwesu umwi wakandilomba kuti ndikaswaye muntu umwi iwakajisi luyandisisyo mudolopo lya Balykchy. Kutegwa ndisike ooko kuzwa kuŋanda yesu cakali kutola mawoola one kweenda acitima. Nokwakainda nyendo zili mbozibede zyakukambaukila ku Balykchy, twakajana kuti bantu banji bakalijisi luyandisisyo ookuya. Cakutadooneka eeci cakali coolwe cakuyungizya mulimo wesu wakukambauka.

Mebo aba Mairambubu bunji bwaziindi twakali kuunka ku Balykchy. Twakali kukkala okuya kanji-kanji kumamanino amvwiki, twakali kuunka mumulimo wakukambauka, alimwi twakali kucita amiswaangano ya Bunakristo. Bantu bakatalika kwaayandisya kapati mabbuku eesu. Kuzwa mu Tokmok, mabbuku twakali kwaanyamuda mucisaka citegwa mishok icakali kubelesyegwa kunyamuda magwili. Zisaka zyobilo zizwide mabbuku nzyotwakali kunyamuna amwezi zyakali kumana bamwi kabatanapegwa. Nomuba mucitima notwakali kuunka alimwi akujoka kuzwa ku Balykchy, twakali kubakambaukila ibakali mucitima.

Mu 1995 mbungano yakapangwa mu Balykchy—nokwakainda myaka iili lusele kuzwa ciindi notwakaswaya dolopo eelyo ciindi cakusaanguna. Myaka eeyo njotwakali kweenda akati kadolopo lya Tokmok alya Balykchy kwakaunka mali manji. Tiitwakajisi mali manji. Aboobo ino twakacikonzya buti? Mukwesu Munakristo wakali kutupa mali lyoonse kutegwa tubbadelele zyoonse ziyandika. Jehova wakalubona luyandisisyo ndotwakajisi mukuyungizya mulimo wesu, alimwi wakatujalwida “milyango yakujulu.” (Malk. 3:10) Masimpe zintu zyoonse zilakonzyeka kuli Jehova!

Mu 1992, ndakasalwa kuba mwaalu, ndakaba mwaalu wakusaanguna waci Kyrgyz mucisi. Mumbungano yesu yamu Tokmok, zyoolwe zimbi zyamulimo zyakajaluka. Twakalijisi ziiyo zya Bbaibbele zinji abakubusi baci Kyrgyz ibakali muzikolo. Umwi wabakubusi aaba ngotwakali kwiiya limwi lino uli mu Kkomiti ya Mutabi, mpoonya bambi bobilo mbapainiya baalubazu. Alimwi twakali kubagwasya bamwi kumiswaangano yesu. Kumatalikilo amyaka yakuma 1990, mabbuku eesu alimwi amiswaangano zyakali mumwaambo waci Russian. Pele bunji bwabantu mumbungano bakali kwaambaula mwaambo waci Kyrgyz walo iwakali mwaambo wabo. Aboobo ndakali kusandulula, calo cakabagwasya kukamvwisya bweelede kasimpe.

 Kulubazu lumwi, mebo aba Mairambubu twakajisi bubi kulanganya mukwasyi wesu iwakali kuyaabukomena. Twakali kuunka abana besu mumulimo wakukambauka akumiswaangano yambungano. Mwaneesu musimbi wazina lya Gulsayra—aciindi eeco iwakajisi buyo myaka yakuzyalwa iili 12—wakali kukukkomanina kwaambaula abasimweendanzila alimwi akubaambila zyamu Bbaibbele. Alimwi bana besu bakali kukuyanda kupeta Magwalo. Munzila eeyi bana besu, alimwi anokwakainda ciindi bazyukulu besu, bakali kutola lubazu kapati mumilimo yambungano. Akati kabana bali 9 alimwi abazyukulu bali 11 ibacipona, bali 16 balamubelekela Jehova naa balajanika kumiswaangano antoomwe abazyali babo.

Bakwesu abacizyi bayandwa ibakatalika mulimo wa Jehova mucilawo cesu mumyaka yakuma 1950 balakonzya kugambwa kapati kubona kucinca kupati ikwacitika. Masimpe ngakuti, kuzwa kuma 1990, twakkomana kapati alwaanguluko lwakukambauka makani mabotu alimwi akuswaangana antoomwe mubunji.

Mu 1991 mebo abakaintu bangu twakajanika kumuswaangano mupati ciindi cakusaanguna mudolopo lya Alma-Ata, lino lizyibidwe kuti Almaty, mu Kazakhstan. Mpoonya mu 1993 kwaciindi cakusaanguna bakwesu mu Kyrgyzstan bakaba amuswaangano wacooko mubbuwa lyazisobano litegwa Spartak Stadium mu Bishkek. Basikumwaya bakatola nsondo yomwe ikusalazya bbuwa lyazisobano kautanacitika muswaangano. Mweendelezi wakakkomana kapati cakuti wakatuzumizya kwiibelesya kakunyina kubbadela.

Mu 1994 kwakaba kucinca kupati kumwi ciindi mabbuku eesu naakasimbwa ciindi cakusaanguna mumwaambo waci Kyrgyz. Mabbuku lino alasandululwa lyoonse muci Kyrgyz abasanduluzi ibali kuofesi yamutabi mu Bishkek. Masimpe, mu 1998 mulimo wa Bakamboni wakazumizyigwa mumulawo mu Kyrgyzstan. Mbunga yakomena, lino tobasikumwaya tulainda ku 5,000. Mazuba aano, tulijisi mbungano zili 83 atubunga tuli 25 twaci Chinese, Chingisi, ci Kyrgyz, ci Russian, Mwaambo Wakutambaika waci Russian, ci Turkish, ci Uighur, alimwi awaci Uzbek. Boonse bakwesu abacizyi aaba ibazwa mubukkale bwiindene-indene balamubelekela Jehova calukamantano. Jehova wakapa kuti kucinca kupati koonse ooku kukonzyeke.

Jehova alimwi wakabucinca buumi bwangu. Ndakakomenena mumukwasyi wabalimi waansi alimwi cikolo ndakaiya buyo kwamyaka yosanwe. Nokuba boobo, Jehova wakandibelesya kuba mwaalu alimwi akuyiisya kasimpe kamu Bbaibbele kubantu ibakayiide kwiinda ndime. Masimpe, Jehova ulapa kuti zintu zitayeeyelwi zicitike. Cakandicitikila cilandikulwaizya kuzumanana kwaambilizya cakusyomeka kujatikizya Jehova, walo kulinguwe “zintu zyoonse zilakonzyeka.”—Mt. 19:26.