1. Ncinzi cikonzya kucitika ciindi umwi naacita cibi cipati?

 MUCIBALO cainda, twakaiya Paulo ncaakaambila mbungano yaku Korinto kuti icite ciindi mwaalumi umwi naakacita cibi cipati. Sikubisya ooyu tanaakeempwa, aboobo wakeelede kugusyigwa mumbungano. Pele kweelana ambolutondezya lugwalo aayeeme cibalo eeci, Leza ulakonzya kusololela muntu kukweempwa. (Rom. 2:4) Mbuti mbwababelesya baalu kugwasya muntu kuti ayempwe?

2-3. Ncinzi ncotweelede kucita ikuti twazyiba kuti musyomima umwi wakacita cibi cipati? Nkaambo nzi?

² Ikuti baalu kabatazyi kuti muntu umwi wakacita cibi cipati, tabakonzyi kumugwasya. Aboobo ncinzi ncotweelede kucita ikuti twazyiba kuti musyomima umwi, wakacita cibi cipati calo cikonzya kupa kuti agusyigwe mumbungano? Cakusaanguna, tweelede kumukulwaizya kuti abaambile baalu kutegwa bamugwasye.—Is. 1:18; Mil. 20:28; 1Pet. 5:2.

³ Pele ino mbuti kuti mukwesu naa mucizyi ooyo wakaka kubaambila baalu? Nkokuti swebo tweelede kubaambila kutegwa muntu ooyo apegwe lugwasyo luyandika. Ikuti twacita oobo, tutondezya luyando kumukwesu naa mucizyi ooyo nkaambo tulizyi kuti baalu balakonzya kumugwasya. Ikuti sizibi ooyo wazumanana abukkale bwakwe bubyaabi, ulakonzya kunyonganya cilongwe cakwe a Jehova. Alimwi buya ulakonzya kwiinyonganya mpuwo yambungano. Aboobo nokuba kuti tacili cuuba-uba, tweelede kubaambila baalu akaambo kakuti tulamuyanda Jehova amukwesu naa mucizyi ooyo.—Int. 27:14.

 BAALU MBOBABAGWASYA AABO IBACITA CIBI CIPATI

4. Ino makanze nzi ngobajisi baalu ciindi nobaswaangana amuntu iwakacita cibi cipati?

⁴ Ikuti umwi mumbungano wacita cibi cipati, kabunga kabaalu kalasala bakwesu botatwe kuzwa akati kabo kutegwa babe mukkomiti. a Bakwesu aaba beelede kuba bantu balibombya alimwi balicesya. Nokuba kuti balakonzya kusoleka kugwasya muntu wacita cibi cipati kuti ayempwe, beelede kuzyiba kuti tabakonzyi kumusinikizya kucinca. (Dt. 30:19) Baalu balizyi kuti tabali basizibi boonse ibakonzya kweempwa mbuli mbwaakacita Mwami Davida. (2Sam. 12:13) Basizibi bamwi balakonzya kusala kulukaka lulayo lwa Jehova. (Matl. 4:6-8) Nokuba boobo, makanze aabaalu ngakugwasya sizibi kuti ayempwe kuti kacikonzyeka. Aboobo, ncinzi ncobeelede kuyeeya ciindi nobaswaangana amuntu iwakacita cibi cipati?

5. Ino mbube nzi baalu mbobeelede kutondezya ciindi nobaswaangana amuntu wakacita cibi cipati? (2 Timoteyo 2:24-26) (Amubone acifwanikiso.)

⁵ Baalu babona muntu iwakacita cibi cipati mbuli mbelele iyandisi iisweekede. (Lk. 15:4, 6) Aboobo, ciindi baalu nobaswaangana amuntu ooyo, kunyina nobamweendelezya calunya naa kwaambaula cabukali. Alimwi kunyina nobaile kubuzya buyo mibuzyo kutegwa bazyibe twaambo. Muciindi caboobo, balatondezya bube bwaambidwe kulugwalo lwa 2 Timoteyo 2:24-26. (Amubale.) Aboobo balazumanana kutondezya kubomba moyo, luzyalo akuba batete moyo nkaambo bayanda kugwasya muntu ooyo kuti acince.

6. Mbuti baalu mbobakonzya kulibambila mumoyo kabatanaswaangana amuntu iwakacita cibi? (Baroma 2:4)

⁶ Baalu balalibambila mumoyo. Balasolekesya kumwiiya Jehova ciindi nobeendelezya muntu wakabisya, kabaayeeyede majwi aa Paulo aakuti: “Leza muluzyalo lwakwe uyanda kukusololela kukweempwa.” (Amubale Baroma 2:4.) Baalu beelede kuyeeya kuti mbeembezi ibali ansi aabweendelezi bwa Kristo. (Is. 11:3, 4; Mt. 18:18-20) Aboobo, ciindi nobatanaswaangana amuntu iwakacita cibi, beelede kupaila kutegwa bacikonzye kumugwasya muntu ooyo kweempwa. Balavwuntauzya muzyakumwaya zyesu amu Magwalo alimwi akupaila kuli Jehova kutegwa abagwasye kumumvwisya muntu ooyo alimwi abukkale bwakwe. Kunze lyaboobo, beelede kuzyiba kujatikizya mbwaakakomena muntu ooyo alimwi akulanga-langa twaambo twalo tulangilwa kuti ntotwakamupa kucita zintu munzila eeyo.—Tus. 20:5.

7-8. Ino baalu inga baciiya buti cikozyanyo ca Jehova cakukkazika moyo ciindi nobaswaangana amuntu iwakacita cibi?

⁷ Baalu balakwiiya kukkazika moyo kwa  Jehova. Balayeeya Jehova mbwaakali kubagwasya basizibi kaindi. Mucikozyanyo, Jehova wakamukkazikila moyo Kaini. Wakamwaambila icakali kuyoocitika ikuti naa tanaacinca alimwi akuti wakali kuyoomulongezya ikuti naa wamvwida. (Matl. 4:​6, 7) Jehova wakatuma musinsimi Natani kuyoomupa lulayo Davida. Natani wakabelesya cikozyanyo icakamugwasya Davida kuti ayempwe. (2Sam. 12:1-7) Alimwi Jehova ‘wakazumanana kutuma’ basinsimi bakwe “cakwiinduluka-induluka” kubana Israyeli ciindi nobakamuzangila. (Jer. 7:24, 25) Kunyina naakali kulindila kuti bantu bakwe beempwe naya abagwasye. Muciindi caboobo, wakali kubweza ntaamu yakubagwasya kutegwa beempwe.

⁸ Baalu baiya cikozyanyo ca Jehova ciindi nobasola kugwasya muntu iwakacita cibi cipati. Kweelana ambolwaamba lugwalo lwa 2 Timoteyo 4:2, balacita oobo “cakukkazika moyo kapati” ciindi nobeendelezya musyominyina iwakacita cibi. Aboobo lyoonse baalu beelede kuti kababateme alimwi akukkazika moyo kutegwa bacikonzye kumugwasya muntu iwakacita cibi kuyanda kucita ciluzi. Nkaambo ikuti naa baalu banyema naa kucimwa, muntu inga taaluswiilila lulayo naa buya inga wakaka kweempwa.

9-10. Mbuti baalu mbobakonzya kugwasya muntu iwakacita cibi kubona icakasololela kukucita cibi eeco alimwi ambocili cipati?

⁹ Baalu balasolekesya kuzyiba bukkale ibwakapa kuti muntu acite cibi. Mucikozyanyo, sena Munakristo ooyo wakayaansi kumuuya akaambo kakuti wakaleka kucita ciiyo cakwe mwini naa kuunka mumulimo wakukambauka? Sena wakaleka kupaila lyoonse kuli Jehova? Sena wakali kuzumizya kulombozya kubyaabi kumweendelezya? Ino mbantu bali buti mbaali kuyanzana limwi? Ino nzyakulikondelezya zili buti nzyakkomanina? Mbuti zyakusala eezyi mbozyazijatikizya nzyayeeya alimwi anzyalombozya? Sena ulamvwisya mbwalimvwa Jehova akaambo kacintu ncaakacita?

¹⁰ Kwiinda mukumubuzya mibuzyo yalo iikonzya kumugwasya kuyeeya zintu izyakapa kuti ayaansi kumuuya alimwi akucita cibi, baalu balakonzya kumusika amoyo muntu ooyo kakunyina kumubuzya makani aamaseseke alo ngobatayandiki kuzyiba. (Tus. 20:5) Kuyungizya waawo, balakonzya kubelesya zikozyanyo kugwasya muntu ooyo kutegwa abone mbocili cipati cibi ncaakacita, mbubwenya Natani mbwaakacita kuli Davida. Ambweni nobaswaangana ciindi cakusaanguna, muntu ooyo ulakonzya kutondezya kuusa akaambo kabukkale bwakwe. Mane buya akutondezya kweempwa.

11. Ino Jesu wakali kubeendelezya buti basizibi?

¹¹ Baalu balasolekesya kumwiiya Jesu. Ciindi naakali kugwasya Saulo waku Tarso, Jesu iwakabusyigwa wakamubuzya kuti: “Saulo, Saulo, ino undipenzyela nzi?” Kwiinda mukumubuzya mubuzyo ooyu, Jesu wakali kumugwasya kuzyiba kuti ncaakali kucita cakalilubide. (Mil. 9:3-6) Alimwi kujatikizya ‘mukaintu uulya Jezebeli,’ b Jesu wakaamba kuti: “Ndakamupa ciindi cakweempwa.”—Ciy. 2:20, 21.

12-13. Mbuti baalu mbobakonzya kumupa ciindi muntu iwakacita cibi kutegwa ayempwe? (Amubone acifwanikiso.)

¹² Baalu balamwiiya Jesu kwiinda mukutafwambaana kuyeeya kuti muntu ooyo iwakacita cibi talangilwi kweempwa. Nokuba kuti bamwi balakonzya kweempwa ciindi cakusaanguna kkomiti noyaswaangana ambabo, bamwi inga bayandika kubapa ciindi. Aboobo baalu inga bayandika kubikka bubambe  kutegwa baswaangane amuntu ooyo iwakabisya kwaziindi zili mbozibede. Ambweni nobamana kuswaangana ciindi cakusaanguna, Munakristo iwakabisya ulakonzya kutalika kwaayeeyesya makani ngaakaambilwa. Ulakonzya kutondezya kulicesya akulomba Jehova kuti amulekelele cibi cakwe. (Int. 32:5; 38:18) Aboobo ciindi nobaswaangana ciindi cabili ulakonzya kutondezya bube bwiindene ambwaakatondezya nobakaswaangana ciindi cakusaanguna.

¹³ Kutegwa bamugwasye kweempwa, baalu beelede kutondezya lweetelelo alimwi aluzyalo. Balapaila kuli Jehova kutegwa akulongezye kusoleka kwabo, akuzumanana kulangila kuti Munakristonyina iwakacita cibi ulakonzya kuliyeeya akweempwa.—2Tim. 2:​25, 26.

14. Nguni weelede kupegwa bulemu ciindi sizibi naayempwa? Nkaambo nzi?

¹⁴ Ikuti sizibi weempwa, cilakkomanisya kapati! (Lk. 15:​7, 10) Pele ino nguni weelede kupegwa bulemu? Sena mbaalu? Amuyeeye Paulo ncaakaamba kujatikizya basizibi naakati: “Ambweni Leza inga wabapa kweempwa.” (2Tim. 2:25) Study note yakapango aaka mu Bbaibbele lya Cikuwa yaamba kuti: “Bulemu boonse buboola akaambo kakucinca ooku tabuunki kumuntu uuli woonse pe, pele buunka kuli Jehova iwagwasyilizya Munakristo ooyo iwaleyede kuti acince. Kunze lyaboobo, Paulo ulazumanana kwaamba bubotu bukonzya kujanwa akaambo kakweempwa kuli boobu, ikuti kulakonzya kusololela muntu iwakabisya kuluzyibo lwini-lwini lwakasimpe, ikumugwasya kuti aliyeeye alimwi akuzwa mutukole twa Saatani.—2Tim. 2:26.”

15. Mbuti baalu mbobakonzya kuzumanana kumugwasya sizibi iweempwa?

¹⁵ Ciindi muntu naayempwa, baalu bayoozumanana kumuswaya kutegwa bamugwasye kuyumya lusyomo lwakwe akuzumanana kulwana masunko aa Saatani alimwi akucita ciluzi. (Heb. 12:​12, 13) Masimpe kuti baalu tabeelede kwaambila bamwi kujatikizya cibi ncaakacita muntu ooyo. Pele ncinzi ncobeelede kuzyibya mbungano?

 “KOBASINSA KUMESO AABANTU BOONSE”

16. Kweelana alugwalo lwa 1 Timoteyo 5:20, ino mbaani Paulo mbaakali kwaamba kuti “bantu boonse”?

¹⁶ Amubale 1 Timoteyo 5:20. Paulo wakaambila Timoteyo mwaalunyina kuti kabasinsa kumeso aabantu boonse aabo “ibazumanana kucita cibi.” Pele sena Paulo wakali kupandulula kuti muntu iwacita cibi wakeelede kusinswa kumbele lyambungano yoonse? Peepe. Muciindi caboobo, wakali kwaamba buyo bantu basyoonto balo ibakazyi kale kujatikizya cibi eeco icakacitwa. Bantu aaba bakali kukonzya kuba bakamboni ibakalibonena ameso naa aabo mbaakaambila sikucita cibi. Aboobo, baalu balakonzya kwaambila buyo baaba kuti muntu ooyo iwakacita cibi wakagwasyigwa.

17. Ikuti banji mumbungano kabazyi kale kuti muntu umwi wakacita cibi cipati naa kuti balangilwa kuzyiba, ino ncakwaambilizya nzi iceelede kupegwa? Nkaambo nzi?

¹⁷ Zimwi ziindi, banji mumbungano inga kabazyi kale kuti muntu umwi wakacita cibi cipati naa balangilwa kuzyiba. Mubukkale buli boobu, “bantu boonse” balakonzya kubikkilizya mbungano yoonse. Aboobo mwaalu ulakonzya kwaambilizya kumbungano kuti mukwesu naa mucizyi wasinswa. Nkaambo nzi? Paulo wakaamba kuti: “Kutegwa bamwi boonse bacenjezyegwe” akutacita cibi.

18. Ikuti mwana uubbapatizyidwe uujisi myaka iitasiki ku 18 wacita cibi cipati, ino baalu beelede kucita buti? (Amubone acifwanikiso.)

¹⁸ Mbuti kujatikizya bana babbapatizyidwe ibajisi myaka yakuzyalwa iitasiki ku 18 ibacita cibi cipati? Kabunga kabaalu kayoobikka bubambe bwakuti baalu bobilo baswaangane amwana ooyo abazyali bakwe Banakristo. c Baalu bayooyanda kuzyiba ntaamu njobabwezede  kale bazyali kutegwa bamugwasye mwanaabo kweempwa. Ikuti mwana ooyo walutobela lulayo lwabazyali akutalika kucinca mbwayeeya alimwi ambwalilemeka, baalu aabo balakonzya kusala kuti bazyali bazumanane kumugwasya. Kayi mukuli wabazyali ngobapedwe a Leza ikulaya bana babo. (Dt. 6:​6, 7; Tus. 6:20; 22:6; Ef. 6:​2-4) Mpoonya ciindi aciindi, baalu beelede kunoobalingula bazyali bamwana ooyo ikubona naa ulazumanana kupegwa lugwasyo ndwayandika. Pele ino mbuti kuti mwana ooyo uubbapatizyidwe wazumanana kucita cibi? Mubukkale buli boobu, kkomiti yabaalu iyooswaangana amwana ooyo antoomwe abazyali bakwe.

“JEHOVA ULAALUBOMBA KAPATI ALUSE”

19. Mbuti baalu mbobasolekesya kumwiiya Jehova ciindi nobagwasya muntu iwakacita cibi?

¹⁹ Baalu ibabeleka mukkomiti bajisi mukuli ngobapedwe a Leza wakugwasya mbungano kuti izumanane kusalala. (1Kor. 5:7) Pele alimwi balasolekesya kugwasya muntu iwakacita cibi kutegwa ayempwe. Aboobo ciindi nobamugwasya, balazumanana kuba abulangizi bwakuti ulacinca. Nkaambo nzi? Nkaambo kakuti bayanda kwiiya Jehova “ulaalubomba kapati aluse.” (Jak. 5:11) Amubone mwaapostolo Johane mbwaakabutondezya bube oobu. Wakalemba kuti: “Nobana bangu bayandwa, ndimulembela zintu eezyi kutegwa mutabisyi. Pele, ikuti umwi wabisya, tulijisi mugwasyi kuli Taata, Jesu Kristo, imululami.”—1Joh. 2:1.

20. Ncinzi ncotuyoobandika mucibalo camamanino cazibalo eezyi?

²⁰ Cuusisya ncakuti, zimwi ziindi Munakristo ulakonzya kukaka kweempwa. Ikuti caba boobo, nkokuti weelede kugusyigwa mumbungano. Ncinzi baalu ncobeelede kucita ikuti eeci cacitika? Mubuzyo ooyu uyoobandikwa mucibalo camamanino cazibalo eezyi.