1-2. (a) Ino Jehova ulimvwa buti kujatikizya baabo ibacita cibi cipati alimwi ibateempwi? (b) Ncinzi Jehova ncayanda kuli basizibi boonse?

 TABULI bukkale boonse mbwazumina Jehova, kayi ulicisulide cibi. (Int. 5:4-6) Uyanda kuti katuzilemeka zyeelelo zyakwe zyabululami zyalo zilembedwe mu Bbaibbele. Nokuba boobo, Jehova ulizyi kuti tatulondokede aboobo tatukonzyi kumumvwida cakulondoka. (Int. 130:3, 4) Pele alimwi, tabayandi ‘bantu bamusampaula ibasandula luzyalo lwakwe kuba cilitamizyo cakuba abukkale busesemya.’ (Jud. 4) Nkakaambo kaako, Bbaibbele lyaamba ‘zyalunyonyooko lwabantu basampaula Leza’ lyankondo ya Amagedoni.—2Pet. 3:7; Ciy. 16:16.

² Nokuba boobo, Jehova tayandi muntu uuli woonse kuti akanyonyoonwe. Kweelana ambotwaiya mumagazini eeyi, cakusalazya Bbaibbele lyaamba kuti “uyanda kuti boonse bakonzye kweempwa.” (2Pet. 3:9) Aboobo, baalu Banakristo balamwiiya Jehova ciindi nobasoleka kugwasya muntu iwakacita cibi cakukkazika moyo kutegwa acince nzila zyakwe akutalika kukkomaninwa alimwi a Jehova. Nokuba boobo, tabali bantu boonse ibakacita cibi ibayanda kweempwa. (Is. 6:9) Ibamwi balakonzya kuzumanana kucita cibi nokuba kuti cakwiinduluka-induluka baalu basoleka kubagwasya kutegwa beempwe. Pele ncinzi baalu ncobeelede kucita mubukkale buli boobu?

 “AMUMUGUSYE MUNTU OOYO MUBI”

3. (a) Ino Bbaibbele lyaamba kuti muntu iwakacita cibi uutayandi kweempwa weelede kucitwa buti? (b) Nkaambo nzi ncotukonzya kwaamba kuti muntu iwakacita cibi waliyandila buya kugusyigwa mumbungano?

³ Ciindi muntu iwakacita cibi cipati natayandi kweempwa, baalu beelede kutobela lulayo lujanika kulugwalo lwa 1 Bakorinto 5:13 lwakuti: “Amumugusye muntu ooyo mubi akati kanu.” Munzila imwi, muntu ooyo iwakacita cibi inga waliyandila buya kugusyigwa mumbungano, inga utebula buyo ncasyanga. (Gal. 6:7) Nkaambo nzi ncotwaambila boobo? Nkaambo kayi wakaka kucinca bukkale bwakwe nokuba kuti baalu cakwiinduluka-induluka bakasola kumugwasya kutegwa ayempwe. (2Bam. 17:12-15) Aboobo micito yakwe itondezya kuti tayandi kutobela zyeelelo zya Jehova.—Dt. 30:19, 20.

4. Nkaambo nzi ncokwaambilizyigwa ciindi muntu iwakacita cibi uutayandi kweempwa naagusyigwa mumbungano?

⁴ Ciindi muntu iwakacita cibi uuteempwi naagusyigwa mumbungano, kulaambilizyigwa kuzyibya mbungano kuti tacili umwi wa Bakamboni ba Jehova. Makanze aacakwaambilizya eeci taali aakupa muntu ooyo kuti afwe nsoni. Muciindi caboobo, kulaambilizyigwa kutegwa bakwesu abacizyi batobele mulawo wamu Magwalo ‘wakuleka kuyanzana’ amuntu ooyo ‘nokuba kuleka kulya anguwe.’ (1Kor. 5:9-11) Alimwi buya kuli twaambo tubotu Jehova ncaakapeda mulawo ooyu. Mwaapostolo Paulo wakaamba kuti: “Bumena busyoonto bupa kuti mulwi woonse wafulaulu uukandidwe ufwufwumuke.” (1Kor. 5:6) Aboobo, ikuti muntu uutayandi kweempwa tanaagusyigwa mumbungano, ibamwi balakonzya kuyeeya kuti abalo tabayandiki kutobela zyeelelo zya Jehova.—Tus. 13:20; 1Kor. 15:33.

5. Ino tweelede kumubona buti muntu iwagusyigwa mumbungano? Nkaambo nzi?

⁵ Pele ino tweelede kumubona buti musyomima iwagusyigwa mumbungano? Tweelede kucileka kuyanzana anguwe, nokuba boobo tatweelede kumubona kuti takonzyi kucinca, muciindi caboobo, tweelede kumubona kuti nimbelele iisweekede. Kayi kuti mbelele yasweeka, ilakonzya kupiluka alimwi kubutanga. Kamuyeeya kuti muntu ooyu, wakaaba buumi bwakwe kuli Jehova, nkuti buyo aciindi aawa taponi kweelana acikonke cakwe cakulyaaba calo cikonzya kumupa kusweekelwa bulangizi bwakuyoopona kukabe kutamani. (Ezk. 18:31) Nokuba boobo, kufwumbwa buyo kuti Jehova kacitondezya luse tulijisi bulangizi bwakuti muntu ooyu ulakonzya kucinca. Aboobo mbuti baalu mbobakonzya kumugwasya muntu iwakacita cibi iwagusyigwa mumbungano?

BAALU MBOBAKONZYA KUBAGWASYA AABO IBAGUSYIDWE MUMBUNGANO

6. Ncinzi baalu ncobayoocita kugwasya muntu iwagusyigwa mumbungano?

⁶ Ciindi muntu umwi naagusyigwa mumbungano, sena baalu balaleka kumugwasya kutegwa apiluke kuli Jehova? Peepe. Ciindi baalu nobaambila muntu umwi kuti ulagusyigwa mumbungano, bayoomwaambila ancayelede kucita kutegwa apilusyigwe. Pele kuli azimbi nzyobayoocita. Kanji-kanji, bayoomwaambila kuti inga bayanda kuyoobonana anguwe alimwi kwainda myezi misyoonto kutegwa bakabone naa wakacinca. Mpoonya kwainda myezi misyoonto, ikuti muntu ooyo wazumina kuswaangana abaalu alimwi, bayoomukulwaizya kuti ayempwe. Pele nokuba kuti aciindi aawo tanaatondezya kweempwa, baalu bayoosoleka kuswaangana anguwe alimwi akumukulwaizya kutegwa ayempwe.

7. Mbuti baalu mbobatondezya lubomba lwa Jehova ciindi nobagwasya muntu iwakagusyigwa mumbungano? (Jeremiya 3:12)

 ⁷ Baalu balasolekesya kwiiya kubomba moyo kwa Jehova ciindi nobagwasya muntu iwakagusyigwa mumbungano. Mucikozyanyo, kaindi Jehova tanaakalindila bantu bakwe bana Israyeli kuti basaangune kweempwa nkokuya atalike kubagwasya. Muciindi caboobo, wakabweza ntaamu yakubagwasya noliba leelyo nobatakalinatondezya kuti beempwa. Kweelana ambotwakabona mucibalo cabili, Jehova wakatondezya lubomba lwakwe kwiinda mukwaambila musinsimi Hosea kuti amulekelele mukaintu wakwe akumupilusya nokuba kuti wakacili kucita cibi. (Hos. 3:1; Malk. 3:7) Kwiinda mukwiiya Jehova, baalu Banakristo bayanda kuti muntu iwakacita cibi apiluke kumbungano alimwi balajana nzila yakuti cimuubile-ubile kucita boobo.—Amubale Jeremiya 3:12.

8. Mbuti cikozyanyo ca Jesu camwana mutaka mbocitugwasya kumvwisya mbwalimvwa Jehova kujatikizya baabo ibakamusiya? (Luka 15:7)

⁸ Amuyeeye cikozyanyo ca Jesu camwana mutaka, icakabandikwa mucibalo cabili. Bausyi mbobakamubonena buyo mwanaabo, “bakamubalikila, baakumukumbata akumumyonta.” (Lk. 15:20) Amubone kuti bausyi tiibakalindila mwanaabo kuti asaangune kulomba kulekelelwa. Muciindi caboobo, balo bakamubalikila akaambo kakuti bakali kumuyanda. Oobo Jehova mbwalimvwa kujatikizya baabo ibakamusiya, aboobo baalu balasolekesya kumwiiya. Bayanda kuti aabo bakamusiya Jehova bapiluke kulinguwe. (Lk. 15:22-24, 32) Ciindi muntu iwakacita cibi naapiluka, Jehova, Jesu, bangelo alimwi ambungano yoonse balakkomana kapati.—Amubale Luka 15:7.

9. Ncinzi Jehova ncayanda kuli baabo bakamusiya?

⁹ Kweelana anzyotwabandika kale, twabona kuti Jehova tabazumizyi aabo batayandi kweempwa kuzumanana kuba mumbungano. Nokuba boobo ulazumanana kubagwasya, uyanda kuti bapiluke kulinguwe. Ciindi bantu nobeempwa, amubone Jehova mbwalimvwa kujatikizya mbabo. Lugwalo lwa Hosea 14:4 lwaamba kuti: “Ndiyoobaponya kubulwazi bwabo bwakutasyomeka. Ndiyoobayanda cakuliyandila, nkaambo ndagusya bukali.” Eelo kaka kuzyiba Jehova mbwalimvwa, kweelede kukulwaizya baalu kubikkila maano kukucinca kuli koonse ikutondezya kuti muntu watalika kweempwa! Alimwi majwi aaya ayelede kukulwaizya baabo ibakamusiya Jehova, ikuzyiba kuti ulabayanda alimwi akuti uyanda kuti bapiluke kulinguwe kakunyina kusowa ciindi.

10-11. Mbuti baalu mbobakonzya kubagwasya aabo bakagusyigwa mumbungano kaindi?

¹⁰ Mbuti kujatikizya bantu ibakagusyigwa mumbungano kaindi ambweni kwamyaka minji? Bantu bali boobu ambweni inga kabataciciti zibi izyakabapa kuti bagusyigwe mumbungano. Zimwi ziindi, ambweni inga kabataciyeeyede twaambo twakapa kuti bagusyigwe mumbungano. Tacikwe makani naa kwainda myaka yongaye kuzwa ciindi bantu aaba nobakagusyigwa mumbungano, baalu bayoosoleka kubayandaula alimwi akubaswaya. Lyakuswaya kuli boobu, balakonzya kupaila ambabo akubalomba kuti bapiluke kumbungano. Masimpe kuti, ikuti muntu tanaali kuyanzana ambungano kwaciindi cili mbocibede, tacidoonekwi buya kuti inga kafwide kumuuya. Aboobo, ikuti naa muntu ooyo watondezya kuti ulayanda kupiluka kumbungano, baalu balakonzya kubikka bubambe bwakuti muntu ooyo kasololelwa ciiyo ca Bbaibbele nokuba kuti tanapilusyigwa mumbungano. Pele baalu lyoonse mbabajisi mukuli wakubikka bubambe bwakuti muntu ooyo atalike kwiiya Bbaibbele alimwi.

¹¹ Baalu balasolekesya kwiiya lubomba ndwajisi  Jehova kubantu. Aboobo, bayoosolekesya kubayandaula aabo bakamusiya Jehova akubakulwaizya kuti bapiluke kulinguwe. Ciindi muntu iwakacita cibi naatondezya kweempwa akubuleka bukkale bwakwe bubyaabi, ulakonzya kupilusyigwa kakunyina akusowa ciindi.—2Kor. 2:6-8.

12. (a) Mbukkale nzi baalu mbobeelede kucenjelela kapati? (b) Nkaambo nzi ncotuteelede kuyeeya kuti bantu bamwi ibakacita cibi tabakonzyi kufwidwa luse a Jehova? (Amubone abupanduluzi buyungizyidwe.)

¹² Pele zimwi ziindi, baalu beelede kucenjela kapati kabatanapilusya muntu mumbungano. Mucikozyanyo, ikuti muntu wakagusyigwa  mumbungano akaambo kakutundulula mwana, busiluleyo naa kuyanda kumana cikwati cabumpelenge, baalu beelede kuba masimpe kuti muntu ooyo wakeempwa ncobeni. (Malk. 2:14; 2Tim. 3:6) Baalu beelede kubukwabilila butanga. Nokuba boobo, tweelede kuzyiba kuti Jehova ulakonzya kumutambula muntu uli woonse iweempwa ncobeni akuleka bukkale bwakwe bubyaabi. Aboobo nokuba kuti baalu beelede kucenjela kapati nobalanganya ibakacitila bamwi cabumpelenge, tabeelede kuyeeya kuti bantu aabo tabakonzyi kufwidwa luse a Jehova. a—1Pet. 2:10.

NCOIKONZYA KUCITA MBUNGANO

13. Ino nkwiindana nzi kuliko akati kambotumweendelezya muntu iwasinswa abaalu alimwi awagusyigwa mumbungano?

¹³ Mbubwenya mbokwakabandikwa mucibalo cainda, zimwi ziindi kulaambilizyigwa kuti muntu umwi wasinswa. Mubukkale buli boobu, tulakonzya kuzumanana kuyanzana anguwe akaambo kakuti tulizyi kuti wakeempwa alimwi wakabuleka bukkale bwakwe bubyaabi. (1Tim. 5:20) Kunze lyaboobo, ucili cibeela cambungano aboobo uyandika kukulwaizyigwa abakwesu abacizyi kwiinda mukuyanzana ambabo. (Heb. 10:24, 25) Nokuba boobo, ibukkale bulaindana amuntu iwagusyigwa mumbungano. “Tulaleka kuyanzana” amuntu ooyo, “nokuba kulya anguwe.”—1Kor. 5:11.

14. Mbuti Banakristo mbobakonzya kubelesya manjezyeezya aabo ayiisyidwe Bbaibbele kujatikizya baabo ibakagusyigwa mumbungano? (Amubone acifwanikiso.)

¹⁴ Sena malailile aali kulugwalo lwa 1 Bakorinto 5:11, apandulula kuti tatukonzyi kumutamba kumuswaangano muntu wakagusyigwa mumbungano naa kumwaanzya kuti wasika? Peepe. Masimpe kuti, tatweelede kuyanzana anguwe. Pele Banakristo beelede kubelesya manjezyeezya aabo aayiisyidwe Bbaibbele ciindi nobayanda kusala kumutamba kumuswaangano wambungano muntu iwakagusyigwa mumbungano, ambweni inga kali wacibbululu naa mulongwe ngobakali kumvwana kapati katanagusyigwa. Mpoonya ikuti naa wajanika, ino tweelede kumweendelezya buti? Kaindi, tiitwakali kumwaanzya muntu uli boobo. Pele lino, aalo aawa Munakristo umwi aumwi  weelede kubelesya manjezyeezya aakwe aayiisyidwe Bbaibbele. Bamwi balakonzya kulimvwa kuti cili buyo kabotu kumwaanzya naa kumutambula naasika kumuswaangano. Nokuba boobo, tatweelede kuba amubandi mulamfwu amuntu ooyo naa kuyanzana anguwe.

15. Mbantu nzi bacita zibi baambidwe kulugwalo lwa 2 Johane 9-11? (Amubone akabbokesi kakuti “ Sena Johane a Paulo Bakali Kwaamba Cibi Cikozyenye?”)

¹⁵ Bamwi balakonzya kubuzya kuti: ‘Tee Bbaibbele lyaamba kuti Munakristo waanzya muntu uli boobu ngusikutola lubazu mumicito yakwe mibi?’ (Amubale 2 Johane 9-11.) Pele makani aayengelede lugwalo oolu atondezya kuti busolozi oobu bwaamba basiluleyo alimwi abaabo ibakulwaizya bamwi kucita zintu zibi. (Ciy. 2:20) Aboobo ikuti naa muntu wazumanana kukulwaizya njiisyo zyakubeja naa zintu zibi, baalu tabeelede kupanga bubambe bwakumuswaya. Nokuba boobo, kuli bulangizi bwakuti muntu uuli boobo inga weempwa. Pele tatweelede kumwaanzya naa kumutamba kumiswaangano kusikila wacita oobo.

AMWIIYE LUBOMBA ALUSE LWA JEHOVA

16-17. (a) Ncinzi Jehova ncayanda kuti bantu ibacita zibi bacite? (Ezekieli 18:32) (b) Mbuti baalu mbobakonzya kutondezya kuti babelekela antoomwe a Jehova?

¹⁶ Ncinzi ncotwaiya mumagazini eeyi? Twaiya kuti Jehova tayandi kuti muntu uli woonse akanyonyoonwe. (Amubale Ezekieli 18:32.) Uyanda kuti bantu basizibi bayanzanisyigwe kuli nguwe. (2Kor. 5:20) Nkakaambo kaako kuzwa kaindi, Jehova cakwiinduluka-induluka wali kukulwaizya babelesi bakwe ibakaleyede kuti beempwe akupiluka kuli nguwe. Aboobo, mumbungano baalu babelekela antoomwe a Jehova kugwasya baabo ibakacita zibi zipati kuti beempwe.—Rom. 2:4; 1Kor. 3:9.

¹⁷ Amweezeezye buyo kukondwa kuba kujulu ciindi basizibi nobeempwa! Taateesu wakujulu Jehova lwakwe kumugama ulakondwa ciindi mbelele yakasweekede noyapiluka kumbungano. Aboobo, luyando ndotujisi kuli Jehova lulazumanana kukomena ciindi notuzinzibala kuyeeya lubomba, luse aluzyalo ndwajisi.—Lk. 1:78.