KULIBILIKA kulakonzya kupa moyo kutyompwa. (Tus. 12:25) Sena kuli nomwakatyompedwe kapati akaambo kakulibilika? Sena kuli nomwakalimvwide kuti inga tiimwacikonzya kuzumanana kuliyumya? Kuti kacili boobo, tamuli nyolikke. Bunji bwesu tulimvwa kukatala, kulibilika alimwi akutyompwa akaambo katwaambo tusiyene-siyene, ambweni akaambo kakulanganya munamukwasyi uuciswa, kufwidwa muyandwa naa kupenga akaambo kantenda zilicitikila. Pele ino ncinzi cikonzya kutugwasya kuliyumya ciindi notulibilikide? *

Kwiinda mukulanga-langa cikozyanyo ca Mwami Davida tulakonzya kwiiya zinji kujatikizya mbotukonzya kuliyumya kukulibilika. Wakajisi mapenzi manji mubuumi bwakwe nokuba kuyanda kujaigwa buya zimwi ziindi. (1Sam. 17:34, 35; 18:10, 11) Mbuti Davida mbwaakaliyumya kukulibilika? Mbuti mbotukonzya kwiiya cikozyanyo cakwe?

Davida wakajana mapenzi manji aciindi comwe. Mucikozyanyo, amubone cakacitika ciindi Davida naakali kutija Mwami mujayi Saulo. Ciindi Davida abaalumi bakwe nobakazwa kunkondo, bakagambwa nobakazyiba kuti basinkondonyina bakazibba zintu zyabo, bakaaumpa maanda aabo, alimwi akutola mikwasyi yabo mubuzike. Ino Davida wakacita buti? “Davida abaalumi mbaakali limwi bakatalika koongolola kulila, mane limwi nguzu zyabo zyakulila zyakamana.” Kuyungizya waawo, baalumi mbaakali kusyoma “bakali kuyanda kumupwaya mabwe.” (1Sam. 30:1-6) Lino Davida wakajisi mapenzi mapati otatwe aciindi comwe: Mukwasyi wakwe wakali muntenda, baalumi bakwe bakali kuyanda kumujaya, awalo Mwami Saulo wakacili kumuyandaula. Amweezyeezye buyo Davida mbwaakalibilikide!

Ino ncinzi Davida ncaakacita? Mpoonya-mpoonya “wakaliyumya munguzu zya Jehova Leza wakwe.” Ino Davida wakacita buti oobo? Wakajisi cilengwa cakupaila kuli Jehova kutegwa amugwasye alimwi akuyeeya mbwaakamugwasya musyule. (1Sam. 17:37; Int. 18:2, 6) Davida wakabona kuti wakali kuyandika busolozi bwa Jehova, aboobo wakamubuzya kujatikizya ncaakeelede kucita. Naakamana kutambula busolozi bwa Jehova, wakabutobela mpoonya-mpoonya. Aboobo walo abaalumi bakwe bakalongezyegwa a Jehova alimwi bakafwutula mikwasyi yabo akubweza zintu zyabo. (1Sam. 30:7-9, 18, 19) Sena mwazibona zintu zyotatwe nzyaakacita Davida? Wakapaila kuli Jehova kulomba lugwasyo, wakazinzibala kuyeeya Jehova mbwaakamugwasya musyule, alimwi akubweza ntaamu kutobela busolozi bwa Jehova. Mbuti mbotukonzya kumwiiya Davida? Atulange-lange twaambo totatwe.

1. Amupaile. Kufwumbwa ciindi nitwalibilika, tulakonzya kupaila kuli Jehova kulomba lugwasyo abusongo. Tulakonzya kulemununwa kuti twapaila alimwi akumwaambila zyoonse zili mumoyo. Naa tulakonzya kupaila mupailo mufwaafwi wakaumuumu kuti naa ncecintu cilikke ncotukonzya kucita aciindi eeco. Ciindi coonse notulomba lugwasyo kuli Jehova, tutondezya kuti tulamusyoma cakumaninina mbubwenya mbwaakacita Davida ciindi naakaamba kuti: “Jehova ngomwala wangu, mampangala aangu alimwi ngonguwe uundivwuna. Leza wangu nindomba yangu, oomo mondiyubila.” (Int. 18:2) Mwati mupailo ulabeleka  ncobeni? Mupainiya wazina lya Kahlia wakaamba kuti: “Ndamana kupaila, ndilaba aluumuno. Mupailo ulandigwasya kutalika kuyeeya mbwayeeya Jehova, alimwi ilusyomo lwangu mulinguwe lulayuma.” Masimpe, mupailo ncipego cibotu kapati cizwa kuli Jehova icitugwasya kuzumanana kuliyumya notulibilika.

2. Amuzinzibale kuyeeya. Kuti mweezyeezya izyakamucitikila musyule, sena mulaayeeya masunko ngomwakacikonzya kuliyumya kwiinda mukugwasyigwa a Jehova? Ciindi notuyeeya Jehova mbwaakatugwasya swebo alimwi ababelesi bakwe bakaindi, tulaba aluumuno alimwi tulamusyoma cakumaninina. (Int. 18:17-19) Mwaalu wazina lya Joshua wakaamba kuti, “Ndijisi mulongo wamipailo yakaingulwa. Eeci cilandigwasya kuyeeya ciindi nindakalomba Jehova cintu cigaminide, mpoonya wakandipa.” Inzya, ciindi notuzinzibala kuyeeya zintu nzyaakatucitila kale Jehova, tulaba anguzu zyakuzumanana kuliyumya kupenzi lyakulibilika.

3. Amubweze ntaamu. Katutanasala cakucita mubukkale bumwi, tweelede kuvwuntauzya mu Jwi lya Leza kutegwa tujane busolozi bugwasya. (Int. 19:7, 11) Banji bajana kuti nobavwuntauzya kujatikizya lugwalo lumwi, balalumvwisya alimwi akubona mbolubeleka mubuumi bwabo. Mwaalu wazina lya Jarrod wakaamba kuti: “Kuvwuntauzya kulandigwasya kubona cijatikizyidwe mukapango alimwi akumvwisya Jehova ncandaambila. Eeci cilandigwasya kuzimvwisya nzyondibala alimwi akubweza ntaamu.” Ciindi notuyandaula busolozi bwa Jehova kuzwa mu Magwalo, cilatugwasya kuliyumya notulibilikide.

Davida wakamvwisya kuti kutegwa azwidilile kuliyumya kukulibilika, wakali kuyandika lugwasyo lwa Jehova. Wakalumba kulugwasyo lwa Jehova cakuti wakaamba kuti: “Kwiinda munguzu zya Leza ndilakonzya kutanta bwaanda. Leza mwini-mwini ngonguwe uundipa nguzu.” (Int. 18:29, 32) Tulakonzya kulimvwa kuti masunko eesu ali mbuli bwaanda mbotutakonzyi kutanta. Kwiinda mukugwasyigwa a Jehova, tulakonzya kuzunda masunko aali woonse aali mbuli bwaanda mbotutakonzyi kutanta. Inzya, ciindi notupaila kuli Jehova kulomba lugwasyo, kuyeeya mbwaakatugwasya musyule alimwi akubweza ntaamu kutobela busolozi bwakwe, tulakonzya kuba alusyomo lwakuti uyootupa nguzu alimwi abusongo mbotuyandika kutegwa tuliyumye ciindi notulibilikide.