1. Ncinzi citupa kuba alukkomano kapati?

 JEHOVA uyanda kuti katukkomana. Tulizyi oobo nkaambo lukkomano ncibeela camucelo wamuuya wakwe uusalala. (Gal. 5:22) Mbwaanga kupa kulakkomanisya kapati kwiinda kupegwa, tulaba alukkomano lunji ciindi notutola lubazu cakumaninina mumulimo wa Bunakristo alimwi akugwasya bakwesu munzila ziindene-indene.—Mil. 20:35.

2-3. (a) Kweelana a Bagalatiya 6:4, ntwaambo nzi tobilo itukonzya kutugwasya kuzumanana kuba alukkomano mumulimo wa Jehova? (b) Ino ncinzi ncotutiilange-lange mucibalo eeci?

² Kweelana a Bagalatiya 6:4, mwaapostolo Paulo wakaamba twaambo tobilo itukonzya kutugwasya kuzumanana kuba alukkomano. (Amubale.) Kakusaanguna, makanze eesu ayelede kuba aakupa Jehova zintu nzyotukonzya. Ikuti naa tulamupa zintu nzyotukonzya, tweelede kukkomana. (Mt. 22:36-38) Kabili, tatweelede kulyeezyanisya abamwi. Tweelede kumulumba Jehova kufwumbwa zintu nzyotukonzya kucita kweelana aluzyibo, zipego nzyotujisi alimwi abuumi bwesu. Alimwi buya, zyoonse nzyotwakatambula zizwa kulinguwe. Kulubazu lumwi, kuti bamwi kabacita kabotu muzibeela zyamulimo zimwi kwiinda ndiswe, tweelede kukkomana kuti babelesya zipego zyabo kutembaula Jehova, ikutali kulisumpula lwabo naa akaambo kakuliyanda. Aboobo muciindi cakuzundana ambabo, tweelede kwiiya kulimbabo.

³ Mucibalo eeci, tulabona mbotukonzya kuzumanana kuliyumya ikuti twatyompwa akaambo kakuti tatukonzyi kucita zyoonse nzyotuyanda mumulimo wesu. Alimwi tulalanga-langa mbotukonzya kuzibelesya kabotu zipego zyoonse nzyotujisi  alimwi ancotukonzya kwiiya kuzikozyanyo zyabamwi.

4. Mbukkale nzi ibukonzya kututyompya? Amupe cikozyanyo.

⁴ Babelesi ba Jehova bamwi cilabayumina kuzumina ciindi bukkale bwabo nobwacinca akaambo kakucembaala naa kuciswa. Eeci ncecakabacitika ba Carol. Aciindi cimwi bakajisi coolwe cakubelekela kubusena kubulide. Kuciindi eeco, bakali kusololela ziiyo zya Bbaibbele izili 35, alimwi bakagwasya banji kusika antaamu yakulyaaba akubbapatizyigwa. Ba Carol bakazwidilila kapati mumulimo! Mpoonya bakazyikuciswa kapati calo cakapa kuti kabakkala buyo aŋanda kwaciindi cinji. Ba Carol bakati, “Ndilizyi kuti akaambo kakuciswa tandicicikonzyi kubeleka mbuli Banakristo bamwi, aboobo ndilimvwa kuti tandisyomeki mbuli mbabo. Tandikonzyi kucita zyoonse nzyondiyanda, aboobo eeci cilatyompya.” Ba Carol bayanda kumubelekela Jehova kusikila mpobagolela. Masimpe eeci cilakkomanisya kapati! Tulakonzya kuba masimpe kuti Leza silweetelelo ulakkomana akaambo kakusolekesya kwabo.

5. (a) Ncinzi ncotweelede kuyeeya ikuti naa tulatyompwa akaambo kakulezya kumwi? (b) Kweelana ambotwabona muzifwanikiso, mbuti mukwesu mbwaazumanana kubeleka kusikila mpagolela mumulimo wa Jehova?

⁵ Kuti naa zimwi ziindi mulatyompwa akaambo kakulezya kwanu, amulibuzye kuti, ‘Ncinzi Jehova ncayanda kulindime?’ Uyanda buyo kuti kamucita nzyomukonzya kweelana abukkale bwanu lino. Amuyeeye bukkale oobu: Mucizyi uujisi myaka yakuma 80 ulatyompwa akaambo kakuti tacicikonzyi kubeleka ciindi cinji mumulimo wamumuunda mbuli mbwaakali kubeleka kajisi myaka yakuma 40. Ulimvwa kuti nokuba kuti wabeleka kusikila mpagolela, tamukkomanisyi Jehova. Pele sena masimpe aayo? Amubone kaambo aaka. Ikuti mucizyi ooyu wakali kucita nzyakonzya naakajisi myaka yakuma 40 alimwi ucicita nzyakonzya mumyaka yakuma 80, nkokuti tanaleka kucita nzyakonzya. Kuti naa twatalika kulimvwa kuti mulimo wesu tuumukkomanisyi Jehova, tweelede kuyeeya kuti Jehova ngonguwe uubikka ceelelo cazintu zimukkomanisya. Ikuti naa twabeleka kusikila mpotugolela, Jehova uyootwambila kuti: “Wacita kabotu!”—Amweezyanisye Matayo 25:20-23.

6. Ncinzi ncotukonzya kwiiya kucikozyanyo camucizyi Maria?

⁶ Tulakonzya kuzumanana kuba alukkomano ikuti twabikkila buyo maano kuzintu nzyotukonzya kucita, ikutali kuzintu nzyotutakonzyi kucita. Amubone cikozyanyo camucizyi Maria uuciswa bulwazi bumupa kutacita zinji mumulimo. Kumatalikilo, wakali kutyompwa akulimvwa kubula mpindu. Mpoonya wakayeeya mucizyi umwi mumbungano iwatakali kubukila bulo, aboobo wakayeeya kumugwasya. Mucizyi Maria wakati, “Ndakapanga bubambe bwakukambauka amucizyi ooyu kubelesya fooni alimwi akulemba magwalo.” Lyoonse notwakali kubeleka limwi, ndakali kukkomana alimwi akukkutila akaambo kakuti ndakamugwasya.” Andiswe tulakonzya kuyungizya lukkomano ikuti naa twabikkila buyo maano kuzintu nzyotukonzya kucita, ikutali kuzintu nzyotutakonzyi kucita. Pele ino mbuti kuti tulakonzya kucita zinji naa tucita kabotu muzibeela zimwi zyamulimo wa Jehova?

7. Ino ndulayo nzi lugwasya mwaapostolo Petro ndwaakapa Banakristo?

⁷ Mulugwalo lwakwe lwakusaanguna, mwaapostolo Petro wakakulwaizya bakwesu kubelesya zipego zyoonse nzyobakajisi ikuyaka basyominyina. Petro wakalemba kuti: “Kweelana  acipego umwi aumwi ncaakatambula, amucibelesye mukubelekelana mbuli babanzi babotu baluzyalo lwa Leza ilutondezyegwa munzila ziindene-indene.” (1Pet. 4:10) Tatweelede kuwayawaya kubelesya zipego nzyotujisi akaambo kakuyoowa kuti bamwi balatufwida munyono naa kututyompya. Kuti twacita oobo, nkokuti tatupi Jehova zyoonse nzyotukonzya.

8. Kweelana a 1 Bakorinto 4:6, 7, nkaambo nzi ncotweelede kukutantamuka kulisumpula akaambo kazipego nzyotujisi?

⁸ Tweelede kuzibelesya cakumaninina zipego nzyotujisi, pele tweelede kucenjela kutegwa katutalisumpuli kujatikizya nzizyo. (Amubale 1 Bakorinto 4:6, 7.) Mucikozyanyo, inga katucibwene kutalisya ziiyo zya Bbaibbele zyaaŋanda. Tatweelede kuwayawaya kucibelesya cipego eeco. Nokuba kuti kubelesya cipego eeco kuli kabotu, tatweelede kulisumpula kujatikizya ncico. Atwaambe kuti mujisi cakuluula camumulimo wamumuunda cikkomanisya icakapa kuti mutalisye ciiyo. Muliyandide kubaambila bamukabunga kanu kujatikizya cakuluula eeco. Pele nomwaswaangana mukabunga, mucizyi uumwi waamba cakuluula kujatikizya mbwaakabila magazini. Walo wakaabila magazini; pele nywebo mwakatalisya ciiyo. Ino ncinzi ncomukonzya kucita? Mulizyi kuti bamukabunga balakonzya kukulwaizyigwa acakuluula canu, pele inga mwasala kutacaamba aciindi eeco kutegwa mutamutyompyi mucizyi ooyo iwakaabila buyo magazini. Eelo kaka oolo nduzyalo! Pele mutaleki naaceya kutalisya ziiyo zya Bbaibbele. Mulijisi cipego, amucibelesye.

9. Mbuti mbotweelede kuzibelesya zipego nzyotujisi?

⁹ Tweelede kuyeeya kuti kufwumbwa busongo bwakuzyalwa aambubo mbotujisi ncipego kuzwa kuli Leza. Aboobo tweelede kubelesya cipego cili coonse kuyaka mbungano, ikutali kulitondezya kuti tulabainda bamwi. (Flp. 2:3) Ciindi notubelesya nguzu zyesu alimwi aluzyibo kucita kuyanda kwa Leza, tulakkomana ikutali akaambo kakuti tulabainda bamwi, pele akaambo kakubelesya zipego eezyo kutembaula Jehova.

10. Nkaambo nzi ncocitaluzi kulyeezyanisya abamwi?

¹⁰ Kuti tiitwacenjela, umwi ulakonzya kucegwa mukakole kakweezyanisya mbazu mwacita kabotu kukulezya kwaumwi. Mucikozyanyo, mukwesu inga kacibwene kupa makani aabuleya. Eeyi nembazu mwacita kabotu. Pele mumoyo inga watalika kunyansya mukwesu uujana buyumuyumu bwakupa makani. Pele mukwesu ooyo inga kacita kabotu mukutondezya muuya wakusamausya, kuyiisya bana  bakwe naa kali musungu mumulimo wakukambauka. Eelo kaka tulikkomene kuba abakwesu abacizyi banji ibabelesya zipego nzyobajisi kubelekela Jehova alimwi akugwasya bamwi!

11. Nkaambo nzi ncotweelede kusolekesya kutobela cikozyanyo ca Jesu?

¹¹ Nokuba kuti tweelede kweeleba muuya wakulyeezyanisya abamwi, tulakonzya kugwasyigwa kwiinda mukwiiya kucikozyanyo cababelesi ba Jehova basyomeka. Atulange-lange cikozyanyo ca Jesu. Nokuba kuti wakalilondokede, tulakonzya kwiiya bube bwakwe bubotu alimwi ambwaakali kucita zintu. (1Pet. 2:21) Ciindi notusolekesya kusikila mpotugolela kutobela cikozyanyo cakwe, tulakonzya kumukkomanisya Jehova alimwi akuba basungu mumulimo wamumuunda.

12-13. Ncinzi ncotukonzya kwiiya kucikozyanyo ca Mwami Davida?

¹² Mu Jwi lya Leza, tulijisi zikozyanyo zinji zyabamaalumi abamakaintu basyomeka. Nokuba kuti tiibakalondokede, tulakonzya kubaiya. (Heb. 6:12) Amuyeeye kujatikizya Mwami Davida, ooyo Jehova ngwaakaita kuti “imwaalumi weendelana amoyo wangu.” (Mil. 13:22) Pele Davida tanaakalondokede. Alimwi buya, wakacita zibi zipati. Nokuba boobo, ncikozyanyo cibotu kulindiswe. Nkaambo nzi? Nkaambo kakuti ciindi naakalulamikwa, kunyina naakapa twaambo twakulitamizya. Muciindi caboobo, wakalutambula lulayo lwanguzu ndwaakapegwa alimwi akweempwa ncobeni kukulubizya nkwaakacita. Aboobo Jehova wakamulekelela.—Int. 51:3, 4, 10-12.

¹³ Tulakonzya kumwiiya Davida kwiinda mukulibuzya kuti: ‘Ino ndicita buti ciindi nondapegwa lulayo? Sena ndilafwambaana kukuzumina kulubizya kwangu naa inga ndisola kupa twaambo twakulitamizya? Sena ndilafwambaana kutamizya bamwi? Sena ndilabeleka canguzu kutakwiinduluka kulubizya kwangu?’ Mulakonzya kulibuzya mibuzyo iikozyenye ayeeyi, ciindi nomubala kujatikizya bamaalumi abamakaintu basyomeka ibaambidwe mu Bbaibbele. Sena bakajisi mapenzi mbuli ngomujisi? Mbube nzi bubotu mbobakatondezya? Mubukkale bumwi abumwi, amulibuzye kuti: ‘Mbuti mbondikonzya kuba mbuli mubelesi wa Jehova ooyu uusyomeka?’

14. Mbuti mbotukonzya kugwasyigwa kwiinda mukwiiya zikozyanyo zyabasyomima?

¹⁴ Alimwi tulakonzya kugwasyigwa kwiinda mukwiiya zikozyanyo zyabasyomima, bana alimwi abapati. Mucikozyanyo, sena mulakonzya kuyeeya umwi mumbungano  yanu uuliyumya kusunko limwi, ambweni nkuyungwa abeenzinyina, kukazyigwa abanamukwasyi naa kuciswa-ciswa? Sena kuli bube bubotu mbomubona mumuntu ooyo mbomukonzya kwiiya? Kwiinda mukulanga-langa cikozyanyo cakwe cibotu, mulakonzya kwiiya mbomukonzya kuliyumya mumasunko aanu. Eelo kaka tulalumba kuba azikozyanyo zyalusyomo nzyotukonzya kwiiya, masimpe eeci ceelede kutupa kukkomana!—Heb. 13:7; Jak. 1:2, 3.

15. Ndulayo nzi ndwaakapa mwaapostolo Paulo ilukonzya kutugwasya kuzumanana kuba alukkomano mumulimo wa Jehova?

¹⁵ Kutegwa kube luumuno alukamantano mumbungano, umwi aumwi wesu weelede kubeleka kusikila mpagolela. Amubone cikozyanyo ca Banakristo bamumwaanda wamyaka wakusaanguna. Bakajisi zipego amikuli yiindene-indene. (1Kor. 12:4, 7-11) Pele eeci tiicakabapa kuba amuuya wakuzundana alimwi akwaandaana. Muciindi caboobo, Paulo wakakulwaizya umwi aumwi kucita cakali kuyandika ‘kutegwa bayake mubili wa Kristo.’ Paulo wakalembela bana Efeso kuti: “Cizo cimwi acimwi nocibeleka kabotu, eeci cipa kuti mubili ukomene mbwaanga ulaliyaka wini muluyando.” (Ef. 4:1-3, 11, 12, 16) Aabo bakatobela ncaakaamba Paulo bakapa kuti kube luumuno alukamantano, ibube mbotubona mumbungano mazuba aano.

16. Ino tweelede kuba amakanze aali buti? (Bahebrayo 6:10)

¹⁶ Amube amakanze akutalyeezyanisya abamwi. Muciindi caboobo, amumwiiye Jesu alimwi akusolekesya kwiiya bube bwakwe. Amugwasyigwe azikozyanyo zyalusyomo zyamu Bbaibbele alimwi azyamazuba aano. Mbomuyaabuzumanana kubeleka kusikila mpomugolela, amusyome kuti Jehova “tali Leza uutaluleme pe uunga waluba milimo yanu.” (Amubale Bahebrayo 6:10.) Amuzumanane kukkomana kubelekela Jehova kamuzyi kuti ulalumba kumilimo njomubeleka kuzwa ansi amoyo kutegwa mumukkomanisye.