Bbaibbele lyaamba kuti, kutegwa makanze aa Leza azuzikizyigwe, zimwi ziindi bangelo balabakwabilila bakombi bakasimpe. (Intembauzyo 34:7) Mucikozyanyo:

• Ciindi Jehova naakanyonyoona minzi mibyaabi ya Sodoma a Gomora, bangelo bakamugwasya Loti amukwasyi wakwe kuzwa.—Matalikilo 19:1, 15-26.

• Kaindi ku Babuloni yansiku ciindi bakubusi bana Hebrayo botatwe nobakabetekwa kuti basowelwe mubbibi lyamulilo, Leza ‘wakatuma mungelo wakwe akuvwuna babelesi bakwe.’—Daniele 3:19-28.

• Ciindi mwaalumi uusyomeka Daniele naakakkala busiku boonse mumulindi wabasyuumbwa bakali, wakaamba kuti wakafwutuka akaambo kakuti ‘Leza wakatuma mungelo wakwe ooyo iwakajala milomo yabasyuumbwa.’—Daniele 6:16, 22.

Kaindi zimwi ziindi, bangelo ba Leza bakali kugwasyilizya mumilimo njobakali kucita Banakristo bakusaanguna kufwumbwa nokwali kuyandika kucita boobo kutegwa makanze aa Jehova azuzikizyigwe. Mucikozyanyo:

• Mungelo wakajalula milyango yantolongo akusololela baapostolo ibakaangidwe kuti bazumanane kukambauka mutempele.—Milimo 5:17-21.

• Mungelo wakalailila mukambausi Filipo kuti aunke kumugwagwa wakunkanda uuzwa ku Jerusalemu kuya ku Gaza kutegwa akakambaukile muna Etiopiya iwakaunkide ku Jerusalemu kuyookomba.—Milimo 8:26-33.

• Nocakasika ciindi cakuti Leza azumizye bamasi kuti babe Banakristo, mungelo wakalibonya kuli sikalumamba muna Roma wazina lya Korneliyo mucilengaano akumulailila kuti aite mwaapostolo Petro kuŋanda yakwe.—Milimo 10:3-5.

• Ciindi mwaapostolo Petro naakali muntolongo, mungelo wakalibonya kulinguwe mpoonya akumusololela kuzwa muntolongo.—Milimo 12:1-11.

Kunyina bumboni butondezya kuti Leza mazuba aano ucibelesya bangelo kugwasya bantu munzila yamaleele mbuli mbwaakali kucita muzibalo izyaambidwe mu Bbaibbele. Nokuba boobo, Jesu wakaamba boobu kujatikizya mazuba ngotupona: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.” (Matayo 24:14) Sena mulizyi kuti basikwiiya ba Kristo balaucita mulimo ooyu kwiinda mukusololelwa abangelo?

Bbuku lya Ciyubunuzyo litondezya kuti bangelo banoogwasya bantu cabusungu kuti baiye kujatikizya Jehova Leza alimwi amakanze ngajisi kujatikizya bantu. Mwaapostolo Johane wakalemba kuti: “Ndakabona mungelo uumbi kauluka mumulengalenga, alimwi wakajisi makani mabotu aatamani aakwaambilizya kuli baabo bakkala anyika, kumasi oonse, kumisyobo yoonse, kumilaka yoonse alimwi akubantu bamisyobo yoonse. Kaamba ajwi pati kuti: ‘Amuyoowe Leza akumupa bulemu, nkaambo woola lyakubetekwa anguwe lyasika, aboobo amukombe yooyo wakapanga julu, nyika, lwizi alimwi atusensa twamaanzi.’” (Ciyubunuzyo 14:6, 7) Izyakuluula zicitika mazuba aano zitondezya kuti bangelo baluujisi ncobeni kusololela mumulimo wakukambauka Bwami uucitwa nyika yoonse. Masimpe, ciindi sizibi omwe nayempwa akupiluka kuli Jehova, “kulaba kukondwa akati kabangelo ba Leza.”—Luka 15:10.

Ino ncinzi ciyoocitika waakumana kucitwa mulimo wakukambauka? Nkamu yabangelo ‘yakujulu’ iyoogwasya Jesu Kristo, mwami wabami, mukulwana “nkondo yabuzuba bupati bwa Leza Singuzuzyoonse” lya Amagedoni. (Ciyubunuzyo 16:14-16; 19:14-16) Bangelo basinguzu bayooba basikunyonyoona baabo ibayoobetekwa a Leza ciindi Mwami Jesu “aakusubula baabo . . . bataswiilili makani mabotu aa Mwami wesu Jesu.”—2 Batesalonika 1:7, 8.

Aboobo amusyome kuti, bangelo balamubikkila maano nywebo lwanu kumugama. Balabubikkila maano kapati buumi bwabaabo ibayanda kubelekela Leza, alimwi Jehova ubelesya bangelo cakwiinduluka-induluka kutegwa kababayumya-yumya alimwi akubakwabilila babelesi bakwe basyomeka ibali anyika.—Bahebrayo 1:14.

Umwi aumwi wesu, ujisi cakusala cipati. Sena tuyooswiilila alimwi akwaatobela makani mabotu aakambaukwa nyika yoonse? Bakamboni ba Jehova mucilawo canu bayookkomana kumugwasya kutegwa muluzyibe luyando ndobatondezya bangelo ba Leza basinguzu.