Ncinzi Cikonzya Kutugwasya Kuyooba Abuumi Bubotu Kumbele?

AMULIZYE

Kweelana ambotwabona muzibalo zyainda, bantu basola kuyandaula buumi buli kabotu kwiinda mukusyoma zintu izyakabambilwa limwi kuti ziyoocitika, lwiiyo, lubono alimwi akuba muntu uuli kabotu. Pele kusyoma zintu eezyi, cili mbuli kusola kuunka kubusena mbomutazyi kwiinda mukubelesya maapu iitaluzi. Sena eeci caamba kuti kunyina cikonzya kumugwasya kuyooba abuumi bubotu kumbele? Tacili boobo pe!

BUSOLOZI BWIINDA KUBOTA

Ciindi notusala zyakucita, kanji-kanji tulasola kubuzya muntu umwi mupati alimwi musongo kwiinda ndiswe. Mbubwenya buyo, tulakonzya kujana busolozi busyomeka bwakumbele kuzwa ku Muntu mupati kapati alimwi musongo kwiinda ndiswe. Tulakonzya kubala lulayo lwakwe kuzwa mubbuku ilyakatalika kulembwa myaka iibalilwa ku 3,500 yayinda. Bbuku eeli lyamalembe aasalala liitwa kuti Bbaibbele.

Nkaambo nzi ncomukonzya kulisyoma Bbaibbele? Nkaambo kakuti lizwa kumuntu Mupati kapati alimwi wiinda busongo mububumbo boonse. Muntu ooyu waambwa kuti ngu “Sinsiku” uuliko “kuzwa lili alili mane kukabe kutamani.” (Daniele 7:9; Intembauzyo 90:2) Ngo “Mulengi wamajulu, Leza mwini-mwini, Ooyo wakabumba nyika.” (Isaya 45:18) Utwaambila kuti zina lyakwe ngu Jehova.—Intembauzyo 83:18.

Mbwaanga Bbaibbele lyakazwa ku Mulengi wabantu boonse, kunyina nolyaamba kuti cilengwa naa musyobo umwi mubotu kwiinda uumbi. Lulayo lwandilyo, lyoonse lulabeleka alimwi lwabagwasya bantu bamumasi oonse. Lilajanika mumyaambo minji alimwi ndebbuku lyamwaigwa kapati kwiinda bbuku limbi lili lyoonse. * Aboobo eeci caamba kuti bantu balakonzya kulibala kufwumbwa kubusena nkobabede alimwi akusololelwa andilyo. Eeci cileendelana ancolyaamba Bbaibbele:

“Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—MILIMO 10:34, 35.

Mbubwenya mbuli muzyali siluyando mbwapa busolozi kubana bakwe, Jehova Leza ngu Taata siluyando uutupa lugwasyo kwiinda mu Jwi lyakwe Bbaibbele. (2 Timoteyo 3:16) Alimwi mulakonzya kulisyoma Jwi lyakwe nkaambo nguwakatulenga alimwi ulizyi cikonzya kutupa kukkomana.

TULAKONZYA KULISYOMA BBAIBBELE

Tulakonzya kusyoma ncolyaamba Bbaibbele kujatikizya zyakumbele, nkaambo mazuba aano tulazibona zintu kazicitika nzyolyakasinsima kuti ziyoocitika myaka iibalilwa ku 2,000 yayinda.

ZINTU NZYOLYAKASINSIMA BBAIBBELE KUTI ZIYOOCITIKA

“Cisi ciyoobukila cisinyina abwami buyoobukila bwaminyina. Kuyooba mizuzumo yanyika mipati, alimwi mumasena aaindene-indene kuyooba nzala azilwazi.”—LUKA 21:10, 11.

BBAIBBELE NCOLYAKAAMBA KUJATIKIZYA BANTU MBOBANOOBEDE

“Kumazuba aamamanino kuyooba ziindi zikatazya ncobeni. Nkaambo bantu bayooba basikuliyanda, bayandisya mali, basikulidunda, basikulisumpula, basikusampaula, batamvwidi bazyali, batalumbi, batasyomeki, batajisi luyando lwakuzyalwa andulo, batanyoneki, basikubejelezya, batalilesyi, bakali, batayandi bubotu, basikwaaba bamwi, batalaiki, basikulitukumuna, bayandisya zyakulikondelezya kwiinda kuyandisya Leza.”—2 TIMOTEYO 3:1-4.

Ino Bbaibbele lyakacikonzya buti kwaambila limwi kujatikizya zintu eezyi izicitika mazuba aano? Tacidoonekwi kuti mulakonzya kuzumina ncaakaamba Leung iwaku Hong Kong, walo iwakaamba kuti: “Businsimi bwamu Bbaibbele bwakalembwa kaindi kapati. Kunyina muntunsi uukonzya kwaambila limwi zintu zili boobu akucitika ncobeni. Aboobo kweelede kuti Bbaibbele lyakazwa kumuntu musongo kapati kwiinda ndiswe.”

Bbaibbele lijisi businsimi bunji kapati bwalo ibwakazuzikizyigwa kale. * Eeci citondezya kuti Bbaibbele ndi Jwi lya Leza ncobeni. Lyaamba kuti: “Ndime Leza, taakwe uumbi uuli mbuli ndime. Kuzwa kumatalikilo ndaambila limwi ciyoocitika kumbele.” (Isaya 46:9, 10) Aboobo, mulijisi twaambo tubotu ncomukonzya kusyoma ncolyaamba Bbaibbele kujatikizya zyakumbele.

BUSOLOZI IBUKONZYA KUMUGWASYA LINO ALIMWI MANE KUKABE KUTAMANI

Ikuti mwatobela busolozi bujanika mu Magwalo Aasalala, muyoogwasyigwa kapati. Amubone zikozyanyo zimwi.

KWAALANGA MUNZILA YEELEDE MALI AMULIMO

“Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.”—MUKAMBAUSI 4:6.

BUUMI BWAMUMUKWASYI

“Umwi aumwi wanu weelede kuyanda mukaintu wakwe mbubonya mbwaliyanda mwini; kunze lyaboobo, mukaintu awalo weelede kumulemeka kapati mulumaakwe.”—BAEFESO 5:33.

MBOMUKONZYA KUMVWANA ABAMWI

“Koleka kunyema abukali; utacimwi akutalika kucita cibi.”—INTEMBAUZYO 37:8.

Kutobela ncolyaamba Bbaibbele kulakonzya kumugwasya kuba abuumi bukkomanisya lino alimwi akumbele. Mu Bbaibbele, tujana cisyomezyo ca Leza cazintu zibotu kumbele izibikkilizya

LUUMUNO AKULIIBA

“Bayoobotelwa kapati muluumuno lunji.”—INTEMBAUZYO 37:11.

MAANDA AAKUKKALA ALIMWI ACAKULYA CABANTU BOONSE

“Bayooyaka maanda akukkala mulingawo, bayoosyanga myuunda yamisaansa akulya micelo yanjiyo.”—ISAYA 65:21.

KUCISWA ALIMWI ALUFWU ZIYOOMANA

“Lufwu talukabi limbi, akwalo koomoka, kulila nokuba kucisa takukabi limbi pe.”—CIYUBUNUZYO 21:4.

Ino ncinzi ncomweelede kucita kutegwa mukazibone zintu eezyi zyakumbele? Amubone cibalo citobela.

^ munc. 6 Kutegwa muzyibe zinji kujatikizya kusandululwa alimwi akumwaigwa kwa Bbaibbele, amuunke a www.jw.org akulanga alembedwe kuti NJIISYO ZYAMU BBAIBBELE > MAKANI AAKAINDI A BBAIBBELE.

^ munc. 16 Kutegwa muzyibe zinji, amubone cibalo 9 cabbuku lyakuti The Bible—God’s Word or Man’s? ilyakamwaigwa a Bakamboni ba Jehova. Nkolili awebbusaiti ya www.jw.org. Amubone aalembedwe kuti LIBRARY > BOOKS & BROCHURES.